1 Timotee 6

Göwa ‑nyɛ wa 'bhidɩbawa 'sɔ

Zezwii a ‑nʋa 'wuë ‑wa glɩnɩɛ göwaa,

wa nɩ tɩ wa 'bhidɩbawa 'ylimö fälanɩ,

‑maa wa nɩ 'zuë 'klʋkpamö 'tɩɩ.

‑Lɛ a dɔ'wʋ,

nɩkpɛ 'naa 'kä wa za Lagɔ a 'nglɩ nyima,

'ɔ wɛlɩɩ ‑a 'cɩaa,

'n ‑bɛ 'naa 'kɩɛ 'kïbhëzokwë ‑gömö 'zʋ.

2 Göwa a ‑muë ‑wanyɩɩ 'bhidɩbawaa glɩnɩmöä Zezwii a ‑nʋää,

wa nɩ tɩ nɩɩ,

‑a 'bhidɩbawa,

‑aa ‑daayuë wa glɩnɩɛ zaa,

wa 'klʋkpamözʋgbʋ ‑nɩnyɩɛ tenyii plɛnɩ,

wa nɩ tɩ ‑sɩbhä nʋ.

‑Maa wa 'bhidɩbawa 'la,

'wa sɛ wa glɩnɩmöä Zezwii a ‑nʋä Lagɔ ‑waa,

‑sɩbhä ma‑a nɩ kä tenyii a'bhë 'nglɩ wa 'kʋä sasɛ 'yli ‑wʋ.

Timotee,

wɛlɩ nɩ,

‑sɛsɛnii nɩkpa dlɩ ‑gömö,

'zuë 'dɩ 'mö wa 'kɩa 'klʋkpamö zʋ.

Moni a tʋʋ ‑nyɛ Lagɔ 'a libhoo 'sɔ

3 ‑Alowli Zezwii Kliisɩ 'a wɛlɩɩ,

‑abhʋa ɔ ‑nʋa 'wuë ‑a kää dlɩ 'wʋ,

‑yɩ ‑wʋä Lagɔsɛɛ,

nɩkpa ‑waaa 'yɩbhä wa 'kɩ ‑gänɩ,

‑wa sɛɛ wa'bhï wa ‑nɩ 'wlumö 'n wa biiɛ,

4 bhabhawa wa glɩnɩɛ,

wa'aa Lagɔ 'a wɛlɩ a'bhë ‑yi 'lɩlɩlɩ.

Wa 'kä 'fʋ a wɛlɩkïbhïyiea 'mö 'nɛka wa 'kɩ 'mö kpɛnɩ a gbʋʋ,

mʋʋ plɛnuëë tenyii,

‑n ‑kä ‑sɩbhä 'wʋ yɩlɩɩ,

‑n yi nɩɩ,

wa 'wlumö yɛ nyimo nʋ.

'Wa sɛ wa zʋä da'a,

‑sɩbhä ma‑a lɛmöä 'ylikälɩkälɛ,

'lʋlwɛɛ,

‑diziaziu,

‑sɩbhä ma‑a kää 'nglɩ 'n nɩkpa pää wa 'bhɩa a dɛ 'zokwësɛ dlɩ.

5 Kpɛnɩkpɛnɩwa 'la,

wa'aa 'nɛɛnɔ 'wlumö ‑kä,

wa yɛ Lagɔ 'a ‑tiamö a wɛlɩɩ kɛ'mö ‑sɛ.

‑Sɩbhä a za 'wa kpɛnɩkpɛnɛɛ 'nɩɛ 'bhlenɩdɛ ‑kä.

Wa ‑tɔnɩ nɩɩ,

Lagɔgänɩgänɛ,

moni a sɛtɛlɩlibhoo.

6 Lagɔ a dlɩtɛɛnɩtɛnɛ,

ɛ kä ‑tiamö ‑li a ‑li 'mö,

‑maa nɩkpa a ‑muë 'saa Lagɔ nyʋää ‑wa nʋä wʋ ‑zunuë kɛɛ,

wa 'yize a dɔ'wʋ ɛ kää ‑li a ‑li 'mö.

7 Nyɩasɛ n'n‑ä ‑sɩbhä gbä,

‑maa nɩkpɛ ‑kä 'pɩwʋ yii,

ɔ ‑nyɛ ‑lu 'nɩɛ yi,

ɔ ‑kä'ɛ 'pɩwʋ 'bhööä yii,

ɔ ‑nyɛ ‑lu 'nɩɛ mö.

8 Zaa,

nɩkpɛ ‑kä lile ‑kä,

ɔ ‑kä 'wuali ‑kä,

yɩ nɩ ‑zunɔɔ kɛ.

9 ‑Maa nɩkpɛ a ‑mɔɔ yɩbhää ɔ 'kä klɩpaa wʋlʋnɩnyɔ 'zʋʋ,

'ɔ dlɩɩ yo dula,

nyɩasɛlii a kii 'wuë ‑yɩɩɛ ɔ ‑lu a ‑lu 'mö ‑kää,

yɩ yi 'ɔ zɩkpaa nyima,

ɔ yi 'yli bhɩɛ 'lɩlɩlɩ.

10 Ɛ'ɛ ‑bhö nyɩasɛ,

‑maa moni a tʋ,

mʋʋ glɩnɩɛ ‑lizoku a kii 'wuë a 'bhöönɩda.

Nɩkpa ‑mumuë,

moni a tʋ mʋʋ zumanuëë tenyii dlɩ zɛmö,

'n wa yiɛ Lagɔ 'a dlɩ'wʋkänɔɔ kɛ'mö ‑sɛ,

'n wa yiɛ wanyɩ gbɩ a ‑zebï pälɩ,

'n yɩ ziuëa'aa 'zwɩ.

Sɛ'ɛ Pɔɔlʋ 'a 'gbëbhlenɩwɛlɩɩ gbää

11 ‑Maa ‑nmö ‑naa Timotee,

Lagɔnɩkpɛ ‑n glɩnɩɛ,

zaa ‑lizoku 'la,

'dianii ‑nanyɩ gwë.

'Saa zlɔnɩɛ 'mö,

mö ‑n nɩ tɛlɩ sɛ,

nɛmö Lagɔsɛ,

'tɛɛnɩ Lagɔ dlɩ,

‑wawʋ nɩ ‑wʋmö dlɩ zɛmö,

‑kpaanɩ dlɩ 'mö,

yɔnɩ dlɩ 'wʋ.

12 Gwɩ sasɛ Lagɔ a dlɩtɛɛnɩtɛnɛ a tʋ,

miɛ nɩɩ,

'tɛmanɩ 'yli yɔwʋ ‑n 'kä Lagɔ dlɩ 'tɛɛnɩ,

gbulo Lagɔ 'a 'pɩwʋlelea 'wʋ.

‑N ‑yi sɛ nɩɩ,

Lagɔ mɔɔ ‑samöä ‑lɛ ‑n 'ka ghlɩ.

‑Na'bhë ‑sɩbhä ‑n bhïliiɛ 'ylɩ ‑bhlʋ 'mö gbëaa nɩkpa a ‑bɛ a 'yila 'klʋ.

13 Timotee,

Lagɔ ‑bhölɩbhölɛ 'wuë 'bhöönɩɛ 'mö mɔ,

'nZezwii Kliisɩ,

‑ɔɔɔ ‑lɛ Pɔɔsɩ Pilaatɩ a 'yila 'klʋ Lagɔ 'a wɛlɩɩ kɛ'mö ‑sɛ 'lɩlɩlɩɩ,

wa 'nglɩ 'mö,

'dɩ n nyɩamöä dɛ'ɛ nɩɩ:

14 Wɛlɩɩ n nyɩamöä,

ti kɛ'mö ‑sɛ.

‑Na'a nɛmönɛmösaa nɩ zlɔnɩ 'mö,

‑sɩbhä nɩ tɩ ‑maa yɔwʋ ‑kä.

'Zʋ ‑sɩbhä ‑këë ‑Alowli Zezwii Kliisɩ 'kä yi.

15 'Ɔ yiyitɛnyɩ 'la,

Lagɔ a'bhë mɔɔ ‑deee.

Ɔ 'yize mɔɔ glɩnɩɛ ‑lii wuë a ‑lowli,

'mö 'nyupälɩ 'wuë 'bhöönɩɛ 'mö,

mɔɔ glɩnɩɛ 'bhlɩlowluwaa 'wuë jijo'wʋ a 'bhlɩlowli 'kɔdɔɔ,

'kämanɩwaa 'wuë mɔɔ 'kämanuëë ‑gömö.

16 Ɔ 'yize mɔɔ glɩnɩɛ ‑ɔɔ bhɩɛ 'wʋ.

Lɩlɛɛ ‑ɛ ‑binɔɔɔ,

‑bɛ 'nɩɛ bhɛnɩ ɔ 'kɛ yɔwʋ 'dio.

‑Bɛ 'nɔɔ ‑bhlɛ tɛkäsɛ 'ylɩmö,

mä'ä dʋdʋ 'wʋ a nɩkpɛ 'nɩɛ bhɛnɩ ɔ 'kɔ 'ylɩmö.

'Ɔ nglɩɩ ‑nyɛ 'ɔ 'kämanɔɔ 'sɔ,

yɩ nɩ 'ghlimanɩ 'kwädlɩkwädlɩnɩ.

‑Amɛɛ!

17 ‑Wa kää mä'ä 'pɩwʋ a lɩɩ,

'nyʋä 'dɩ,

wa nɩ tɩ bhabhawa glɩnɩ.

Lɩɩ ‑yɩ glɩnɩɛ 'plɩplɩli a 'yizee,

'mö wa nɩ tɩ dlɩ 'tɛɛnɩ,

‑maa Lagɔ ‑ɔ nyɩanyɩɛ ‑lii 'wuë ‑a 'kä 'mäna 'mö ‑wʋ,

‑ɔ ‑kanyɩ 'nyɛɛ yi ‑ɔɔ yɛkaa,

'mö wa nɩ 'tɛɛnɩ dlɩ.

18 'Nyʋä 'dɩ wa nɩ nʋ ‑li a ‑li.

Wa nɩ 'nyɛ nɩkpa,

wa nɩ nyɛnɩ dlɩwätɛ 'mö.

19 'Wa ‑li a ‑li wa nʋä da'aa,

sɛ wa 'yɩbha'ɛ lɩ a ki ‑mimii 'wluu,

‑sɩbhä ma‑a.

Miɛ nɩɩ,

‑mä Lagɔ yɔwʋ,

wa yi ‑mä ‑tiamö a ‑bhölɩbhölɛ ghlɩ.

20 ‑Nmö na 'yu Timotee,

sɛ'ɛ n gbää nɩɩ,

'saa 'wuë Lagɔ nyɩamöä,

'zʋnu sasɛ 'yli.

‑Maa nɩkpaa ‑wa laa 'fʋ wanyɩ Lagɔ 'a ‑lii 'wuë a ‑yiwa,

nyɩasɛwɛlɩɩ ‑yɩɩɛ gbëaa 'mö ‑kä,

‑yɩ ‑nyɛ Lagɔ 'a wɛlɩɩ 'nɩ mönɩɛ yɔwʋ,

‑wa biiɛ,

'dionuë gwë.

21 Nyɩasɛ n ‑nɩmöä ‑sɩbhä 'dɩ 'nyɛ,

‑maa Zezwii a ‑nʋä ‑mumuë,

‑lɛ a wɛlɩ 'la 'mö wa ‑gänɩɛ,

Lagɔ 'a wɛlɩɩ ‑a kää dlɩ 'wʋʋ,

'n wa yiɛ gwë 'dionɩ.

Timotee,

a 'wuë,

Lagɔ nɩ 'panyɩ 'kwädlɩ 'nyu 'yize.