1 Timotee 5

Timotee,

nɩkpɛ ‑kä 'yli yɔwʋ 'kʋlʋʋ,

‑n ‑kɔɔ 'mö zlɔmanɩɛ yii,

to yɔwʋkanɩsɛ 'dɩ 'nyɛ.

‑Maa,

sɛ ‑n 'kää ‑na dɩba 'dɩ 'nyɛɛ,

‑sɩbhä ‑n nɩ 'nyɔ 'dɩ.

Nyɛgbayuëa,

'zuë ‑daayuësɛ 'dɩ 'mö.

2 'Ngwlɩ 'kädɩɩ,

'zuë ‑na ‑dawa a sɛ 'dɩ 'mö.

Nglʋdɩgbö,

'zuë ‑na nglʋdaayuë a sɛ 'dɩ 'mö,

tuë ‑nanyɩ 'mö 'bhɛta.

Zezwii a ‑nʋa a ‑zɩkpa 'mö a 'kuzlengwlɩɩ

3 Timotee,

'kuzlengwlɩɩ ‑waaa ‑tiamö 'wʋyinyɔ ‑kä,

yuë 'wʋ.

4 ‑Maa 'kuzlenglɔ ‑kä 'yuë ‑kä,

ɛ ‑kä'ɛ 'yuë a yuëë,

yuë 'la,

'nyʋä 'dɩ,

'saa zlɔnɩɛ 'mö wa ‑lowluwa a dɛɛ,

'mö wa nɩ nʋ tɛɛ,

miɛ nɩɩ,

wa ‑da mɔɔ ‑suëë a‑a,

zaa wa nɩ ‑sumɔ'ɛ wabhlɩ.

‑Sɩbhä ma‑a nɛnɩɛ Lagɔ dlɩ yɔwʋ.

5 'Kuzlenglɔ ‑ɔɔɔ 'wʋyinyɔ ‑kää,

Lagɔ a 'yize 'mö ɔ 'tɛɛnɩɛ dlɩ.

Sɛɛ zlɩ zɩɛ,

sɛɛ swe yluä,

'mö ɔ bhibhee ɔ 'kɔ 'wʋ yi.

6 ‑Maa 'kuzlenglɔ ‑kä nɛmönɛmölibho ‑kä,

ɔ yi ‑bhölɩ ‑kë,

‑gäzɛ a sɛ ɔ ‑wʋä.

7 Wɛlɩɩ ‑n 'kää 'kuzlengwlɩɩ 'wʋ ligbanɩ,

wa tuëa nuë 'wʋ kwää,

miɛ da'a.

8 Sɛ'ɛ n gbää nɩɩ,

nɩkpɛ 'nɩ 'ɔ waa 'yli 'zʋnɩ,

'n 'ɔ ‑kosu yɔwʋ a ‑nʋa a'bhë,

ɔ 'nuë 'yli 'zʋnɩɩ,

Lagɔ 'a wɛlɩɩ 'mö ɔ yɛɛ da'a kɛ'mö ‑sɛ.

Ɔ zi nɩkpɛ a ‑mɔ ‑ɔɔɔ Lagɔ ‑gänɩ a'bhë 'wʋ.

9 'Kuzlenglɔ a ‑mɔ Zezwii a ‑nʋa a ‑zɩkpaa kää wa 'kä 'yli 'zʋnɩɩ,

ɛ nɩ tɩ 'kuzlenglɔ a ‑mɔ ‑ɔɔɔ ‑bhlɛ 'ylʋbö a gwlɩ ta ghlɩ glɩnɩ.

'Kuzlenglɔ a ‑mɔɔ 'nɩɛ ‑bhlɛ tɛkäsɛ käböghlɩ möö,

'mö ɔ nɩ glɩnɩ.

10 'Nglɔ a ‑mɔ ‑ɔnyɩɩ 'dɩ a dɩ nɩkpa sɛɛ,

'mö ɔ nɩ glɩnɩ.

Miɛ nɩɩ,

'nglɔ a ‑mɔɔ ‑su a‑a sasɛ 'ɔ yuëa,

‑ɔ päla a‑a sasɛ lowluwa,

‑ɔ yɩbhä a‑a ɔ 'kä ɔ 'bhɩa Lagɔgänɩwaa 'yli ‑wʋ,

‑ɔ yi a‑a ngäzɩwa 'wʋ,

‑ɔ nʋ a‑a ‑li a ‑li a kii 'wuë,

'mö ɔ nɩ glɩnɩ.

11 ‑Maa 'kuzlenglɔ ‑kä ‑dɩgba glɩnɩɩ,

'mö n 'nɩɛ gaaa.

Ɛ'ɛ ‑bhö nyɩasɛ,

‑maa ‑sɩbhä a 'nglɔ,

nyɩbhɛlɩ a 'tʋ ‑kɔɔ tenyii 'lɩbhää,

ɔ yi Kliisɩ 'a wɛlɩɩ ‑gömö panɩ,

ɔ yi käböghlɩ mö.

12 ‑Sɩbhä a dɔ'wʋ,

'ɔ wɛlɩɩ ɔ bhïla a‑a nɩɩ,

ɔ 'kä Kliisɩ a 'yize 'yli ‑wʋʋ,

'mö ɔ ‑sɛɛ da'a nimï zaa,

'nyinyloli ɔ nʋä.

13 Nglʋdɩgbö,

libho wa plɛnɩɛ 'yibɔlɩ 'wʋ,

'n wa nɛmöä kpaakpa,

‑mä 'ligbï 'wuë 'mö ‑mä wa möä.

‑Yɩɩɛ tenyii nɛnɩ a'bhë,

miɛ nɩɩ ‑kɔlɔkɔlɔ wa nʋä,

wɛlɩ ‑yɩ 'nuëë 'wʋ yɩlɩɩ,

'mö wa pää wanyɩ 'mö.

14 Nza n gbää nɩɩ,

'kuzlenglɔ ‑kä ‑dɩgba glɩnɩ,

ɔ nɩ mö ghlɩ ‑mɛmɛɛ,

ɔ 'kä 'yuë gwälɩ,

ɔ 'kä sasɛ 'ɔ 'ligbëa 'yli 'zʋnɩ.

‑Lɛ a dɔ'wʋ wa 'naa 'kä Zezwii a ‑nʋa a ‑gblɩwaa nuë 'nyɛ wa 'naa 'kʋä zɛmö ‑dɩnɩ.

15 Nyɩasɛ n'n‑ä ‑sɩbhä gbä,

‑maa ‑sɩbhä a 'kuzlengwlɩ ‑mumuë,

wa yɛ Zezwii 'a 'yioo 'wʋ 'bhöö.

Sataa 'mö wa ‑gänɩɛ.

16 Sɛ'ɛ n gbää nɩɩ,

'nglɔ a ‑mɔɔ glɩnɩɛ Zezwii a ‑nɔ,

'kuzlengwlɩ ‑kä ‑mä 'ɔ waa gla'mö ‑wʋʋ,

ɔ'bhë,

mɔɔ nɩ 'zʋnuë 'yli,

‑maa ɔ nɩ tuë Zezwii a ‑nʋa a ‑zɩkpa tɩnɩ.

‑Lɛ a dɔ'wʋ Zezwii a ‑nʋa a ‑zɩkpa yi kä'mö ‑ghönɩ,

wa yi 'kuzlengwlɩɩ ‑waaa 'zʋsɛ ‑kä 'lɩlɩlɩ 'yli 'zʋnɩ.

Zezwii a ‑nʋa a ‑zɩkpa a 'yukugänɩwaa

17 Zezwii a ‑nʋa a 'yukugänɩwaa ‑wa nʋä sasɛ 'wa libhoo,

wa nɩ 'zuë ‑lɛ tenyii.

Wa gla'mö a ‑muëë ylɔɔ,

‑wa bhïlaa Lagɔ 'a wɛlɩɩ,

‑wa ‑sɛsɛniɛ nɩkpa dlɩ ‑gömöö,

'mö wa nɩ 'zʋ ‑lɛ tenyii a'bhë.

Libhoo wa nʋä da'a a 'wlumö,

wa nɩ 'pɛnuë sasɛ.

18 Sɛ'ɛ yɩ cɛlɩɛ ‑mä Lagɔbɔgʋʋ 'mö nɩɩ:

Bhilii ‑ɛ yʋä lilea,

tɛ nuë gwa.^a

Sɛ'ɛ yɩ cɛlɩ'ɛɛ ‑mä nɩɩ:

Nɩkpɛ a ‑mɔɔ nʋä libhoo,

wa kä wa 'kɔ wʋ 'wlumö 'pɛnɩ.

19 Timotee,

nɩkpɛ ‑kä yi,

ɔ ‑kä nɩɩ,

ɔ yɛ Zezwii a ‑nʋa a 'yukugänɩnyɔ ‑bhlʋ 'kïbhëzokwë ‑gömö ghlɩ nʋʋ,

'n nɩkpa 'sɔ nɩkpa ta 'nɩ ‑sɩbhä gbämöö,

to 'yukwli ‑pʋnɩ.

20 ‑Maa wa ‑kä ‑tiamö nɩkpɛ 'kïbhëzokwë ‑gömö ghlɩɩ,

'nyɛnɔ nɩkpabhë a 'yila 'klʋ gbëaa 'dɩ nɩɩ,

sɛ ɔ 'zʋä,

‑sɩbhä 'nɩɛ nɛnɩ,

‑lɛ a dɔ'wʋ Zezwii a ‑nʋa ‑muë'la 'wuë wa yi nganɔ ku 'mö ‑kämö.

21 Lagɔ mɔ,

Zezwii Kliisɩ mɔ,

Lagɔzuzukuu mi,

wa 'wuë a 'yila 'klʋ,

wɛlɩɩ n nyɩamöä dɛ'ɛ 'zwi 'klʋkpamö,

tɩ nɩkpɛ a 'klʋ ‑gu.

22 ‑N ‑kä ‑n 'kä nɩkpɛ kätɩkpö 'wlu zʋʋ,

tɩ yɛ'mö tɩta,

‑n tɩa ‑nanyɩ ‑mɔmɔɔ a 'nyinyloli a gbʋ 'wʋ jlinɩ.

‑Na'bhë,

'nɛmanɩ ‑nanyɩ 'wʋ,

‑n tɩa 'nyinyloli nʋmö.

23 Timotee,

‑nn‑ä 'mlɩ ‑kä zaa,

tɩ 'nyu a 'yize 'nɩmä,

‑maa 'nɩmämö'ɛ nʋ 'tikïyie,

ɛ'ɛ ‑bhö nyɩasɛ,

‑maa ‑nn‑ä 'ylʋ 'wʋ 'bhöö.

24 Timotee,

nɩkpa ‑mumuë,

'wa 'nyinylolii wa nʋä,

‑bɛ 'nɩ 'nɛkɩ 'mö a'bhë,

'n yɩ bhliɛ gbëdanguu.

‑Maa ‑mumuë wabhlɩ,

wa ‑nɩɩ ziza‑a yɩ ziza‑aa,

wa 'maa 'kɩ 'mö 'nɛka ‑këë,

'n yɩ bhlia'aa bhäla gbëdanguu.

25 Sɛ ‑bhʋlʋ ‑kpɔ 'la ‑sɩbhä nɩkpa ‑mumuë 'a ‑li a ‑li wa nʋä pöä gbëdanguu.

‑Maa ‑mumuë wabhlɩ,

'wa ‑li a ‑li wa nʋä,

ziza‑a yɩ ziza‑aa,

‑maa sɛ yɩ ‑kä 'mö ‑wʋ ‑kë,

'wa ‑li a ‑li 'la yɩ yi 'ylɩ ‑bhlʋ 'mö 'ylɩmö 'yoo.