3
‑Maa abhʋa abhlɩ,
a ‑yi sɛ nɩɩ,
Kliisɩ Lagɔ gälaa,
ɔ ‑sɛɛ gluu,
a ‑nyɔɔ 'sɔ 'gämö a ‑bhölɩnɩa'aa zaa,
‑mä ghäyɩ 'wʋ,
mää Kliisɩ glɩɛ Lagɔ a luukɛ 'wʋʋ,
‑mä a gbʋʋ mʋʋ nɩ plɛnanyɩ.
2 Sɛ'ɛ n gbää nɩɩ,
‑mä ghäyɩ 'wʋ a gbʋʋ mʋʋ nɩ plɛnanyɩ,
‑maa mä'ä 'pɩwʋ a 'yize a ‑lii,
yɩ gbʋ nɩ tanyɩ plɛnɩ.
3 Nyɩasɛ n'n‑ä ‑sɩbhä gbä,
‑maa 'a bhla'mö a ‑bhölɩbhölɩsaa yɛ 'ku.
A ‑nyɛ Kliisɩ 'sɔ,
zɩkpalelea Lagɔ 'nyanyɩɛ sɛ a ‑wʋä 'tɩɩ,
nɩkpa 'nɩɛ ‑bhlɛ ‑sɩbhä 'ylɩmö.
4 Kliisɩ,
'a zɩkpalelea 'bhöönɩɛ 'möö,
‑zlɩ 'ɔ 'ghïlinɔɔ ‑kä nɩkpabhë a 'yila 'klʋ gbëdanguu bhlii,
‑lɛ a zlɩ 'la 'mö,
a yi ‑lɛ ɔ yɔwʋ ‑wʋ,
‑mä 'ɔ 'ghlinɔɔ 'mö,
a yi ‑mä ‑wʋmö.
A yɛ nɩkpalili 'zʋ
5 ‑Sɩbhä a za,
'a nʋnʋlii 'wuë ‑yɩɩɛ Lagɔsɛ ‑wʋʋ,
nglʋwi oo,
nyɩbhɛlʋwi oo,
'väkajɛnɩjɛnɛ,
'yila'wʋmɛnɩnɔzokwëa,
‑lii a kii 'wuë a 'tʋzokwëa,
gugwaguguu,
‑lizoku 'la 'wuë a nɩ ‑sɩɩa'a kɛ'mö 'lɩlɩlɩ.
‑Maa gugwaguguu a dɔ'wʋ sɛ'ɛ n gbää nɩɩ,
'fʋ a ‑lagwɩ a bʋbɔbʋbʋ a ke ‑mämaa‑a.
6 Nɩkpaa ‑waaa 'yɩbhää wa 'kä Lagɔ 'klʋkpamö zʋʋ,
mʋa nʋä sa'a a ‑lizoku.
Yɩ za Lagɔ yuë gbʋ köbha.
7 A'bhï,
bhla'mö a dɔ'wʋ,
dɛ a ‑wʋ a‑a ‑bhlɛ ‑mä 'nyinyloli a galɛ 'möö,
sa'a a ‑lizoku 'la 'mö a nʋmö a‑a.
8 ‑Maa ‑sɩkaa a dɔ'wʋ,
a nɩ ‑sɛ ‑li 'la 'wuë kɛ'mö.
Ɛ yi klɛ oo,
ɛ yi dlɩgwlikäkʋ oo,
ɛ yi kpʋkpʋ oo,
a nɩ ‑sɩɩ kɛ'mö.
A nɩ tɩ a 'bhɩa ‑di zia.
Wɛlɩzoku a kii 'wuë,
yɩ nɩ tanyɩ ngli ghlɛnɩ.
9 A nɩ tɩ yio 'nyɛnyɛnɩ,
ɛ'ɛ ‑bhö nyɩasɛ,
‑maa 'a bhla'mö a ‑wʋwʋsɛzokwëa a galɛ 'mö,
a yɛ ‑mä 'wlʋ.
10 A yɛa'a ‑sɩkaa nɩkpalili 'zʋ.
Lagɔ ‑ɔ 'nyanyɩɛ zɩkpalele 'la,
mɔɔ nʋnanyɩɛ 'kwädlɩ dila zɛmö libho 'n a zigbonɩɛ 'mö,
sɛ ɔ ‑wʋä 'tɩɩ,
'a ‑wʋwʋsaa ‑nyɛ ‑sɩbhä 'kä 'wlʋmanɩ.
‑Sɩbhä a dɔ'wʋ,
a yo ‑tiamö yɩbhlɩnɩ.
11 ‑A 'wuë sɛ ‑a 'zʋä nɩkpalili a za,
‑n yia'a Zwiiföyi glɩnɩ oo,
‑n 'nɩ Zwiiföyi glɩnɩ oo,
‑n yi 'wʋ dɩ‑ɩ oo,
‑n 'nɩ 'wʋ dɩ‑ɩ oo,
‑n 'nɩ ‑lu ‑yi oo,
‑n 'nɩ 'mö ‑ngö oo,
‑n yi gïyi glɩnɩ oo,
‑n 'nɩ gïyi glɩnɩ oo,
yɩ 'wuë,
yɩ'ɩa'a dɛsɛ ‑kä,
Kliisɩ a 'yize mɔɔ kää dɛsɛ,
mɔɔ ‑bhölɩnɩnyɩɛ ‑a 'wuë 'mö.
12 ‑Atʋayuënyɩ,
sɛ a glɩnɩɛ nɩkpa a ‑muë Lagɔ ‑wa,
ɔ ‑sɛɛ ‑lɛ wa 'kä ɔ 'yize a ‑nʋä glɩnɩ a za‑a,
a nɩ nɛmöa'a ‑sɩkaa nɩkpalili a sɛ.
Miɛ nɩɩ,
a nɩ kä a 'bhɩa a ngäzɩdlɩ,
a nɩ nɛnɩ dlɩ zɛmö.
A nɩ tɩ anyɩ 'kädɩ 'mö 'wʋ 'libhï.
A nɩ yɔnɩ dlɩ 'wʋ.
A nɩ ‑kpaanɩ dlɩ 'mö.
13 Sɛɛ a 'bhɩa a ‑wʋwʋsaa yi 'mö ‑wʋ oo,
sɛɛ ‑sɩbhä 'nɩ 'mö ‑wʋ oo,
a nɩ 'kunɩ 'mlɩ,
a ‑nyʋä 'kä 'wʋ ‑wʋnɩ.
‑N ‑kä ‑na 'li a 'kïbhë 'mlɩ ‑kää,
'tatinaa 'yi.
Sɛɛ ‑Alowli 'tatinɩɛ 'a 'nyinyloli a gbʋʋ 'yii,
sɛ ‑bhʋlʋ ‑kpɔ 'la,
‑sɩbhä a nɩ 'tatitatinɩmö a 'bhɩa a ‑lizoku a gbɩɩ 'yi.
14 Yɩ 'wuë 'mö a dɔ'wʋ,
‑yɩ kää tenyii dɛsɛ,
miɛ nɩɩ,
‑wawʋʋ nɩ ‑wʋanyɩ 'kwädlɩ dlɩ zɛmö 'yize,
‑lɛ a dɔ'wʋ a yi ‑bhlʋ 'zʋ,
'nyuteyi 'naa 'kanyɩ jijo'wʋ ghlɛnɩ.
15 Kliisɩ 'a kpökpaa yɔwʋ a nɩma a glɩnɩɛ zaa,
'tɩɩglɩglɛɛ ‑ɛ 'bhöönɔɔ 'möö,
ɛ nɩ ‑wʋanyɩ dlɩ zɛmö.
A nɩ glɩnɩ nɩkpa a ‑muë yɩbhlɩnɩ ‑li a ‑li.
16 Kliisɩ 'a wɛlɩɩ,
a nɩ 'cɩɩ ‑bɛ 'wʋ,
a 'kɩ sasɛ 'mö 'nʋ.
'Nɛɛnɔɔ ‑wʋ 'bhöönɩɛ Lagɔ 'möö,
'mö a nɩ 'cɩacɩanii 'mö,
a 'kä 'dɩ 'mö 'zʋzʋnɩ.
A fä Lagɔ 'lwɩ a 'ki 'wuë yɔwʋ.
Ɛ yi ‑mii cɛlɩɛ ‑mä 'ɔ 'nglɩghlimanɩlwɩɩ a 'bɔgʋʋ 'mö mi oo,
ɛ yi ‑mi 'ɔ 'Wugɔmʋʋ panyɩɛ dlɩ 'wʋ mi oo,
a nɩ bhlɩnii 'a dila 'wuë 'mö Lagɔ,
a 'kä ‑sɩbhä ɔ 'nglɩ 'ghlimanɩ.
17 'Saa‑wɛlɩ a ‑kä bhïla ‑kë,
'saa a ‑kä nʋ ‑kë,
a nɩ nʋnii ‑Alowli Zezwii a 'nglɩ 'mö.
Sɛɛ Zezwii a ‑nʋa 'kää ‑mä 'wa 'ligbïï 'mö glɩmöglɩmöö
18 ‑Nmö nglɔɔ,
'zʋ ‑na 'luwli 'klʋkpamö.
‑Sɩbhä yɩ ‑ngwaa 'wʋ ‑Alowli Zezwii a ‑nʋä a dɔ'wʋ.
19 ‑Nmö ‑naa nyɩbhɛlʋʋ,
‑wa ‑na 'lɛnglɛ.
To 'wʋ 'kïla.
20 Abhʋa yuëa abhlɩ,
‑mä ‑lii 'wuë 'mö a dɔ'wʋ,
a nɩ 'zʋ a ‑lowluwa 'klʋkpamö,
‑sɩbhä ma‑a nɛnɩɛ ‑Alowli dlɩ yɔwʋ.
21 'Yuëlowluwanyɩ,
a nɩ tɩ tenyii 'a yuëa a dɔ'wʋ yɔwʋ kälɩ,
swɩ tuëa yɔwʋ 'kunɩ.
22 Abhʋa göwaa,
'a mä'ä dʋdʋ 'wʋ a 'bhidɩbawaa,
‑mä ‑lii 'wuë 'mö a dɔ'wʋ a nɩ 'zuë 'klʋkpamö.
A nɩ tuë 'yilasɛtɛlɩsɛ 'yli ‑wʋ.
Ɛ nɩ tɩ ‑bhɩɛ wa 'kanyɩ 'zʋ a za.
‑Maa a ‑kʋä 'yli ‑wʋ,
'a dila nɩ tɩ 'mö ‑dlinɩ sɛ a zʋä ‑Alowli Zezwii 'klʋkpamö a za.
23 Libho ‑mu a ‑kä nʋ ‑kë,
a nɩ nʋnuu dlɩ a dlɩ 'mö.
A nɩ tu nɩkpɛ a za a nʋ,
‑maa a nɩ nu ‑Alowli Zezwii a za.
24 A nɩ yɩbhlɩnɩ sɛ nɩɩ,
mɔɔ glɩnɩɛ a ‑tiamö a 'bhidɩbaa.
'Saa ɔ gbää ɔ 'kä ɔ ‑nʋa 'wuë 'nyɛɛ,
mʋʋ 'kää 'a libhoo a 'ylimö a ‑lu glɩnɩɛ.
25 ‑Maa 'saa 'nɩɛ 'mö zlɔnɩ,
‑ɔ nwiɛ,
‑mɔ ɛ yi glɩnɩ oo,
‑mɔ ɛ 'nɩ glɩnɩ oo,
Lagɔ yo 'ɔ ‑lizokuu a 'pɛna 'nyɛ,
ɔ 'naa 'kä 'mö gbäzɩ.