Kolɔɔsɩ a ‑nʋa 2

Libhoo n ‑wʋä dɛ'ɛ nʋ dɔ'wʋʋ,

wʋ 'mö a yɔlɔylʋʋ,

'mö wʋ 'tɛɛ ‑tiamö.

‑Maa a nɩ yɩbhlɩnɩ sɛ nɩɩ,

a za n ylɔɔ ‑sɩbhä.

Abhʋa ‑mä Kolɔɔsɩ a ‑nʋa muë,

‑mä Laodisee a ‑nʋa muë,

'n ‑mumuë a ‑bɛ ‑wa ‑nɩɩɛ ‑bhlɛ 'ylɩmö,

a 'wuë a za n ylɔɔ ‑sɩbhä.

2 N yɩbhä nɩɩ,

swɩ nɩ pälanyɩ yɔwʋ a 'kä ‑wawanɩ,

a 'kä ‑bhlʋ zʋ,

'nyu tanyɩa jijo'wʋ ghlɛnɩ,

a 'kä Lagɔ 'a 'nɛɛnɔɔ 'wuë ghlɩ,

'ɔ wɛlɩɩ a dɔ'wʋ,

gʋgɔgʋgʋ tanyɩa dlɩ zɛmö ‑wʋ.

'Ɔ wɛlɩɩ ‑yɩ ziza‑a a‑a,

ɔ kälɩnɩnyɩa'aa kɛ 'klʋʋ,

n yɩbhä nɩɩ,

a nɩ 'nwi sasɛ 'mö,

miɛ nɩɩ,

Kliisɩ,

sɛ ɔ ‑wʋä 'tɩɩ,

a nɩ yɩbhlɩnɔɔ ‑sɩbhä.

3 Ɛ'ɛ ‑bhö nyɩasɛ,

‑maa 'saa 'wuë nɩkpɛ bhɛnɩɛ ɔ 'kä Lagɔ a dɛ yɩbhlɩnɩɩ,

'nɛɛnɔɔ ‑nyɛ ‑lii 'wuë a ‑yiyee 'sɔ,

‑mä Kliisɩ 'mö ‑mä yɩ 'wlʋnɩɛ 'yli.

4 Nɩkpɛ tanyɩa zaklɔwɛlɩ 'mö ylʋ nʋnɩ,

ɔ tanyɩa 'wlumö nyima,

nza n nyanyɩɛ ‑sɩbhä 'dɩ.

5 ‑Mä yɩ 'wuë 'mö,

n 'nanyɩ ‑sɩkaa dɛ'ɛ jijo'wʋ ‑wʋ ‑kë,

'na dlɩ ‑gälanyɩ 'wʋ 'yize.

N ‑yi sɛ nɩɩ,

a ‑käkänɩ sɛ,

'n a 'tɛɛnɩɛ 'gämö Zezwii Kliisɩ dlɩ.

‑Sɩbhä a za,

'mänaa lɩbhaaa.

‑Alowli Zezwii Kliisɩ mɔɔ 'kämanɩɛ ‑lii 'wuë ‑gömö

6 A yɛ Zezwii Kliisɩ a ‑lowli 'mö yɩbhlɩnɩ zaa,

a nɩ ‑gälɔɔa'a 'kwädlɩ 'wʋ 'tɩɩ.

7 'A ‑bhölɩbhölɛ 'wuë 'mö,

a nɩ ‑nyɔnʋ ‑mä 'ɔ wɛlɩɩ 'mö a dɔ'wʋ glu,

a nɩ ‑gälɔɔ 'wʋ.

Sɛ wa 'cɩanyɔɔ,

a nɩ 'tɛɛnɔɔ 'kwädlɩ ‑sɩbhä dlɩ.

‑Lii 'wuë 'mö a dɔ'wʋ,

a nɩ bhälɩ 'kwädlɩ Lagɔ.

8 Mä'ä 'pɩwʋ a 'nɛɛnɩwa 'kädɩɩ,

'wa wɛlɩɩ wa ‑sɛɛ 'wlumö ‑yɩɩɛ dɛsɛ ‑kää,

a nɩ 'nɛmanɩ anyɩ 'wʋ,

wa tanyia 'mö dulanɩ.

‑Maa 'wa wɛlɩ 'la,

yiowɛlɩɩ a 'yize nɩkpa ‑gänɩɛ,

'mö yɩ glɩnɩɛ.

‑Lɛ zlɩ ‑nyɛ dʋdʋ 'sɔ a jijo'wʋ a 'kämanɔ a dɛ yɩ bhïlaa.

Yɩ ‑nyɛ Kliisɩ 'a wɛlɩɩ 'nɩ mönɩ yɔwʋ.

9 Ɛ'ɛ ‑bhö nyɩasɛ,

‑maa 'saa Lagɔ glɩnɩɛ 'tɩɩ ‑mä ɔ 'mö ‑mä wʋ 'wlʋnɩɛ ‑tiamö 'yli.

10 A ‑kɔɔ 'wʋ ‑glɛɛ,

‑lu 'nɩa'a a dɔ'wʋ ‑mä tʋʋ,

a ‑nyɛ Lagɔ ‑wʋnɩ 'wʋ 'tɩɩ.

Zuzukuu 'wuë ‑yɩ 'tɛɛ 'mö ‑yɩ 'kämanɩɛ,

Kliisɩ mɔɔ 'kämaniɛ ‑gömö.

11 Sɛɛ Zwiiföwa dɩɛ nɩkpa 'wʋ nzɩɩ wa 'kä Lagɔ a ‑nʋä 'zʋ a za‑a,

‑sɩbhä a'aa ‑wʋ.

‑Maa abhʋa abhlɩ a 'kää ɔ ‑nʋä 'zʋä yii,

nɩkpɛkätɩkpaa 'nanyɩɛ 'wʋ ‑dɩ,

‑maa ‑mä 'a bhla'mö a ‑wʋwʋsɛzokwëa 'mö,

‑mä Kliisɩ a'bhë ‑saanyɩɛ.

12 Sɛ wa wɔlʋanyɩɛ 'wluu,

sɛ'ɛ ‑sɩbhä sɛɛ zɛmö nɩɩ,

‑zlɩ wa zizaa Zezwii,

'a bhla'mö a ‑wʋwʋsɛzokwëa ‑sɩbhä ma‑a bhɩɛ da'a 'yli 'lɩlɩlɩ.

‑Maa Lagɔ 'a 'mötɛɛnɔ 'kɔdʋʋ ɔ 'libhïä 'wʋ 'n ɔ yiɛ Zezwii glu ‑sɛɛ,

a 'tɛɛnu dlɩ zaa,

a ‑nyɔɔ 'sɔ a yɛ 'gämö zɩkpalele ghlɩnɩ.

13 Bhla'mö a dɔ'wʋ,

Lagɔ 'mö a sɛ a‑a 'klʋkpamö,

a'aa'ɛ 'wʋ dɩ‑ɩ zaa ‑gäzɩ a sɛ a ‑wʋ a‑a.

‑Maa ‑sɩkaa a dɔ'wʋ,

sɛ a ‑glɛɛ Kliisɩ 'wʋ a za,

Lagɔ kanyɩ zɩkpalele 'nyɛ.

‑A ‑nyɛ abhʋa 'sɔ,

ɔ yɛ ‑a'a 'nyinylolii 'wuë a gbʋʋ 'yi 'tatinɩ.

14 'Bɔgʋʋ ‑wʋ nʋä nɩɩ,

‑a yɛ Lagɔ 'klʋkpamö ‑sɛ,

zaa ‑wʋ köbhanyɩ a‑a gbʋʋ,

Lagɔ kʋ sɛ ‑sɛ.

Suu wa kʋnɩɛ Zezwii 'klʋʋ,

‑lɛ ɔ kʋnuuä.

15 ‑Zlɩ Zezwii 'kunɩɛ ‑lɛ su 'klʋʋ,

zuzukuzokuu 'wuë ‑yɩ 'tɛɛ 'mö ‑yɩ 'kämanɩɛ,

'n Lagɔ yiɛ 'yɩ 'mötɛɛnɔɔ kä'mö ‑sɛ,

‑lɛ nɩkpabhë a 'yila 'klʋ,

'n 'ɔ yiɛ ‑lɛ zʋ 'lɩbhanɩ,

‑sɩbhä ma‑a kää 'nglɩ 'n Zezwii Kliisɩ 'a nglɩɩ yiɛ tenyii 'ghlimanɩ.

16 ‑Sɩbhä a za,

‑bɛ nɩ tanyɩ gbö a 'ki 'wuë 'pä.

Ɛ yi lile ‑nyɛ nʋ 'sɔ a dɔ'wʋ oo,

ɛ yi 'cʋlulu a dɔ'wʋ oo,

ɛ yi Zwiiföwa a ‑gwlɛnɩzlɩ a dɔ'wʋ oo,

ɛ yi'ɛ ‑gwlɛnɩzila ‑mimii a dɔ'wʋ oo,

17 gbö 'la 'wuë,

'plɩplɩli yɩ glɩnɩ a‑a,

‑tiamö a ‑li ‑yɩ ‑gä a‑a nimï ‑yɩnyɩɩ dɛ yɩ bhïla a‑a,

mɩɩ 'wlʋnɩa'aa ‑sɩkaa ‑mä Kliisɩ 'mö 'yli.

18 Nɩkpa 'la,

‑wa nʋä 'klʋkpamözʋwa a ‑li,

‑wa nʋä nɩɩ:

‑N ‑kä ‑n 'kä Lagɔ bʋbɔɔ,

Lagɔzuzukuu mö ‑n kää ‑n 'kä 'wʋ 'tʋʋ,

wa ‑kä wa 'kanyɩ 'wa 'cɩacɩasaa 'mö ‑gömö 'kämanɩ nʋʋ,

a nɩ tuë 'yukwli ‑pʋnɩ.

Wa lɛ 'wa yilaa mɩɩ do,

‑li a ‑mii ziza‑a a‑a,

'n Lagɔ yuënyɩ 'ylimö tulanɩ.

‑Maa 'wa dlɩpäsaa 'nɩɛ Lagɔsɛ ‑wʋ zaa,

wanyɩ wa libhïä 'fʋ 'kädɩ 'mö 'wʋ.

19 Nɩkpa 'la,

Kliisɩ ‑ɔ glɩnɩɛ ɔ ‑nʋa a 'wukpëlea,

wa'aa 'yɩbhä wa 'kɔ 'wʋ ‑glɛ.

'Lɩlɩlɩ a dɔ'wʋ,

sɛɛ nɩkpɛ a kpökpa kä'ɛ gönasɛ,

'n 'ɔ nɩmaa ‑glɛglɛnɩ'ɛ 'wʋ 'ɔ twilaa a za‑a,

‑sɩbhä Kliisɩ ‑nyɛ ɔ ‑nʋa 'sɔ ‑wʋmöä.

Sɛ wa ‑gälɔɔɔ 'wʋ a za,

wa 'wuë,

‑bhlʋ wa glɩnɩɛ,

sɛɛ Lagɔ yɩbhää,

'n wa 'tɛmanɩɛ ‑sɩbhä 'yli yɔwʋ,

'n wa mönɩɛ 'gämö 'yukusɛ.

‑A ‑nyɛ Kliisɩ 'sɔ a yɛ 'gämö 'kunɩ

20‑21 ‑Atʋayuënyɩ,

a ‑nyɛ Kliisɩ 'sɔ a yɛ 'gämö 'kunɩ.

Zaa,

zuzukuu ‑yɩ 'kämanɩɛ mä'ä 'pɩwʋ ‑gömöö,

a ‑nyɩɩ yɛ yɩ 'ylimö ‑sɛnɩ nɩɩ,

sɛ yɩ ‑wʋ yɩa'a 'mö aa,

'n a nglu bhä 'wʋ 'n nɩkpa panyɩ bhä ‑bhlɛ gbö nɩɩ:

Tɩ ‑lu ‑mu nɩ 'wʋ 'libhï,

tɩ ‑lu ‑mu nɩ li,

tɩ ‑lu ‑mu nɩ kɛ zɩ.

Ɛ 'kä ‑bhɩɛ ‑bhlɛ mä'ä 'pɩwʋ a zuzukuu mɩɩ 'kämananyɩ ‑gömö 'yize.

22 Nɩkpa 'la,

‑lii Lagɔ 'wälaa ‑aa za,

‑yɩ 'kää 'yli bhɩɛɛ,

'mö wa pää gbö 'wʋ.

Gbö 'la 'wuë Lagɔ mɔɔ 'nanyiɛ 'pä,

‑maa nɩkpa a 'päpägböä.

23 Nɩkpa 'la,

wanyɩ wa 'mänanɩɛ ‑li a ‑bɛ 'wlu wa 'kä Lagɔ bʋbɔ a za,

nɩkpa a ‑muë zʋä tenyii Lagɔ 'klʋkpamö a ‑li wa nʋä,

wanyɩ wa 'pänɩɛ 'kpʋkpʋ 'wʋ 'n 'wa kpökpa yɩɛ 'klɩ.

‑Li 'la 'wuë ‑n ‑kɩɩ 'wʋ yɩlɩɩ,

‑n yi nɩɩ 'wa bʋbɔbʋbɔsaa dɛsɛ a kää nʋ.

‑Maa ‑tiamö a dɔ'wʋ,

‑sɩbhä 'nɩɛ dɛsɛ ‑kä 'lɩlɩlɩ.

‑N yi ‑lɛ a gbö 'la 'wuë 'klʋkpamö zʋ ‑kë,

yɩ 'naa ‑kamö ‑na'a dlɩpäsɛzokwëa dlɩ zɛmö ‑sɛ.