Ghlɔɔmö a ‑nʋa 12

Sɛɛ Zezwii a ‑nɔ kää ɔ 'kä nɛmöö

‑Atʋayuënyɩ,

sɛɛ Lagɔ 'pää a 'wuë a ngäzɩdlɩ a za,

yɔwʋ n bhibheanyɩɛ nɩɩ,

a nɩ 'nyɛ anyɩ Lagɔ yowʋ bʋbɔnɩlu a ‑mu ‑gä,

‑wʋ ‑wʋ 'wlɩlɩ,

‑wʋ nɛnɩ Lagɔ dlɩ yɔwʋ a sɛ.

‑Lɛ a dɔ'wʋ 'a Lagɔ a bʋbɔbʋbʋʋ yi ‑lu a ‑lu glɩnɩ.

2 Mä'ä 'pɩwʋ a nɩkpaa ‑waaa Lagɔ ‑yii,

a nɩ tɩ wa saa nɛmö.

‑Maa a nɩ 'tatinɩ Lagɔ 'yi,

ɔ 'kanyɩ dlɩpänɔlulu 'nyɛ,

a 'kä 'mö zigbonɩ 'tɩɩ.

‑Sɩbhä a dɔ'wʋ,

'saa Lagɔ yɩbhää a nɩ nʋ,

'saa nɛnɔɔ dlɩ yɔwʋ,

'saa ‑wʋä ‑kpöö,

a yi yɩbhlɩnɩ.

3 Sɛɛ Lagɔ paaa 'nyu a za,

a 'wuë 'dɩ n nyanyɩɛ dɛ'ɛ bhʋlʋbhlʋ nɩɩ:

A gla'mö a ‑nɔ ‑bhlʋ a'bhë,

ɔ nɩ tɩ ɔnyɩ 'kɔdʋ 'mö 'wʋ 'libhï.

‑Maa a 'wuë a nɩ ‑lɛ anyɩ dʋdʋ 'wʋ.

Sɛ a 'tɛɛnɩɛ Zezwii dlɩ a za,

Lagɔ kanyɩ bhʋlʋbhlʋ 'nyu 'pä a 'kä 'ɔ libhoo nʋ.

4 A nɩ 'pänɩɛ ‑ka nɩkpɛ a kpökpa a wɛlɩɩ dlɩ kɛ:

A ‑bhli ‑bhlʋ,

‑maa a yɔwʋ a nɩmaa 'nɩɛ muënɩ,

‑sɩbhä yɩ kää bhʋlʋbhlʋ libhi.

5 Sɛ ‑bhʋlʋ ‑kpɔ 'la,

sɩbhä ‑abhʋa Zezwii a ‑nʋa,

‑sɩbhä ‑a ‑wʋmöä.

‑Tiamö abhlɩ ‑aaa muënɩ,

‑maa ‑a 'wuë,

sɛ ‑a ‑glɛɛ Kliisɩ 'wʋ a za,

‑bhlʋ ‑a glɩnɩɛ,

kpökpaa yɔwʋ a nɩmaa a saa,

‑sɩbhä ‑a ‑glɛglɛnɩɛ 'wʋ.

6 ‑A 'wuë,

sɛ ‑a ‑diɛ 'wʋʋ,

Lagɔ,

'ɔ dlɩzɛmönanɔɔ a za,

‑sɩbhä ɔ ghälanyɩɛ bhʋlʋbhlʋ 'ɔ 'nyupälɩ a 'ki a ‑bɛ 'wʋ,

‑a 'kä 'ɔ libhoo nʋ.

‑Mɔ Lagɔ bhïlanɩɛ 'mö ɔ 'kä ɔ 'bhɩa 'dɩ 'nyɛɛ,

wɛlɩɩ Lagɔ nyɔɔ,

yɩ 'yize 'mö ɔ nɩ bhïlanɩ dlɩ'wʋkänɔ 'mö.

7 ‑Mɔ Lagɔ 'pää 'nyu ɔ 'kä ɔ 'bhɩa 'yli ‑wʋʋ,

ɔ nɩ ‑wuë 'yli,

‑mɔ Lagɔ 'pää 'nyu ɔ 'kä Lagɔ 'a wɛlɩɩ ‑gömö ‑sɛsɛnɩ,

ɔ nɩ ‑sɛsɛni ‑gömö.

8 ‑Mɔ Lagɔ 'pä'ɛ 'nyu ɔ 'kä ɔ 'bhɩa swɩ nyɛmʋ 'mö 'pää,

ɔ nɩ 'pʋä swɩ nyɛmʋ 'mö.

‑Ɔ pa‑a 'nyu ɔ 'kä 'nyɛɛ,

ɔ nɩ 'nyɛ yɛ'mönanɩsɛ.

‑Ɔ ‑gänɩɛ Zezwii a ‑nʋa 'yukuu,

ɔ nɩ ‑suë sasɛ.

‑Ɔ yiɛ ngäzɩwaa 'wʋʋ,

ɔ nɩ 'zʋ ‑sɩbhä 'mänasɛ.

9 'A ‑wawʋʋ,

wʋ nɩ tɩ 'kwlɩsɔkäkʋ 'mö ‑kä.

‑Lizoku a kii 'wuë,

a nɩ panii ‑gömö.

A nɩ nʋ 'kwädlɩ ‑li a ‑li.

10 ‑Daayuë a ‑muëë ‑wawanɩ'ɛ a sɛ,

a nɩ ‑käkänɩ ‑sɩbhä 'mäna 'mlɩ.

A 'kä ‑lɛ 'zʋzʋnɩ a gbʋ nɩ plɛnanyɩ tenyii.

11 A nɩ tɩ nɩkpa a ‑muë swɩ ‑kuunɩɛ yɔwʋ glɩnɩ,

‑maa a nɩ ‑su ku 'mö a 'kä ‑Alowli 'yli ‑wʋ.

12 'Saa Lagɔ 'kanyɩɛ 'nyɛ a za,

a dila nɩ 'tɛɛ 'wʋ,

a nɩ ‑wʋ 'mäna 'mö 'yize.

A ‑kä 'zwɩ zi dɔ'wʋ ‑wʋʋ,

a nɩ ‑kpaanɩ dlɩ 'mö.

Lagɔ a bhibhebhibhe dɔ'wʋ,

swɩ nɩ tanyɩ yɔwʋ 'kunɩ.

13 A 'bhɩa Zezwii a ‑nʋa ‑waaa ‑lu ‑kää,

a nɩ yuë 'wʋ.

Nɩkpaa ‑wa yeanyɩɛ 'wʋ plɛɛ,

a nɩ pölʋä sasɛ.

14 Nɩkpaa ‑wa 'yɩanyɩɛ 'klɩɩ,

a nɩ 'pʋä 'nyu.

A nɩ 'pä nɩkpa 'nyu,

‑maa a nɩ tɩ nɩkpa bhätlɩnɩ.

15 ‑Ɔ ‑wʋä 'mäna 'möö,

a ‑nyɔɔ 'sɔ a nɩ nʋ 'mäna,

‑ɔ wiɛ,

a nɩ 'winɔ.

16 A 'wuë a nɩ ‑wʋnɩ ‑tiamö 'wʋ.

'A dila nɩ tɩ 'nglɩmöli ‑gänɩ,

‑maa ‑yɩɩɛ dɛsɛ ‑kä a gbʋʋ mʋʋ nɩ plɛnanyɩ.

A nɩ tɩ anyɩ 'nɛɛnɩwa 'mö 'wʋ 'libhï.

17 Nɩkpɛ ‑kaanyɩ ‑lizoku 'wlu nʋʋ,

a nɩ tɩ yɩ kpa ‑sɛ.

'Saa glɩnɩɛ nɩkpa 'wuë 'yila 'klʋ a dɔ'wʋ ‑li a ‑li,

'mö a nɩ tɛlɩ sɛ a 'kɩ nʋ.

18 Nɩkpaa 'wuë,

a ‑nyʋä 'kä ‑wanɩ a dɔ'wʋ,

a'bhï 'a 'saa a bhɛnɩɛ a 'kä nʋ a ‑nyʋä 'kä ‑wanɩɩ,

a nɩ nwi.

19 ‑A'bhɩanyɩ,

a nɩ tɩ anyɩ a kpa ‑sɛ,

‑maa a nɩ yɩlɩ Lagɔ kä'mö.

Ɛ'ɛ ‑bhö nyɩasɛ,

‑maa sɛ'ɛ yɩ cɛlɩɛ ‑mä Lagɔbɔgʋʋ 'mö nɩɩ:

‑Alowli Lagɔ lɛ naa:

Na 'yize,

‑amöö kää n 'kä kpa ‑sɛ.

‑Lizokuu nɩkpaa nʋä,

‑amöö 'kʋää yɩ 'pɛna 'nyɛ.^a

20 Sɛ'ɛ yɩ cɛlɩ'ɛɛ ‑mä nɩɩ:

‑Na'a ‑gblɩnyɔɔ,

ngɔmʋ ‑kɔɔ 'lɩbhää,

'nyɔ ɔ 'kä li.

'Nyutʋ ‑kɔɔ 'lɩbhää,

'nyɔ ɔ 'kä 'nɩmä.

‑N ‑kä sa'a 'zʋʋ,

‑na'a ‑li a ‑li 'la yo zʋ 'lɩbha.^b

21 Tɩ 'wʋ nglu 'nyinylolii nɩ ‑tɩmö 'wlu 'plɩnɩ,

‑maa ‑li a ‑lii,

mö ‑n nɩ nʋ,

yɩ 'kä 'zokuu sɛ ‑sɛ.