Ghlɔɔmö a ‑nʋa 11

Lagɔ 'nɩɛ Yizlaɛlɩ 'a ngëyii kɛ'mö ‑sɛ

Sɛ'ɛ n gbää nɩɩ,

Yizlaɛlɩ a ngëyii Lagɔ ‑sɛɛ ‑lɛ,

ɛ 'mö a ‑nʋa,

kɛ'mö ɔ ‑sʋʋä bhä ‑a?

N'nn,

ɔ 'nuëë kɛ'mö ‑sɛ.

Na'bhë,

Zwiiföyi n glɩnɩmöä.

Ablaamö a 'yu a 'yu n glɩnɩɛ.

Bɛzamɛɛ a ‑gligbë 'wʋ a nɩkpɛ n glɩnɩɛ.

2 Nza n gbää nɩɩ,

Yizlaɛlɩ a ngëyii Lagɔ ‑sɛ a‑a ‑lɛ 'kɩɩ,

ɔ 'nɛɛ kɛ'mö ‑sɛ.

A'bhï a ‑yi sɛ nɩɩ,

Lagɔbɔgʋʋ 'mö a 'kïbhë ‑bhlʋ lɛ naa,

Elii,

mɔɔ yiɛ ‑lɛ Lagɔ a 'yila 'klʋ 'n ɔ yiɛ Yizlaɛlɩ a ‑nʋa 'klɛ.

Sɛ'ɛ ɔ nʋä nɩɩ:

3 ‑Alowli Lagɔ,

‑na'a 'möbhïlanɩwaa,

wa kʋä 'lɩbhä 'wë 'lɩlɩlɩ.

Sɛ ‑a bʋbɔnɩmö a‑a nɩmaa,

wa yɛ ‑sɩbhä nyima 'wë 'lɩlɩlɩ.

Na 'yize ‑kpöö,

‑amöö tʋʋa'aa ‑lɛ,

‑maa wa yɩbhä'ɛ wa ‑kaa 'lɩbhämö.^a

4 ‑Maa sɛ'ɛ Lagɔ 'nyɔ a‑a 'dɩ nɩɩ:

Nɩkpa a 'dwi kʋgbä ngbi'sɔ,

nɩkpa a gwlɩ kʋgbä (7.000),

'mö n cɩanɩɛ 'wa dɛ.

Nɩkpa 'la,

'fʋ a ‑lagɔ Baalɩ,

mʋa 'nɩɛ ‑lɛ wʋ dlɩ 'mö ‑kokomïladigbï glu 'pä wa 'kʋ 'wlu 'nyɛ.^b

5 Sɛ ‑bhʋlʋ ‑kpɔ 'la ‑sɩbhä ‑a'a 'tɛnyɩ ‑mɛ nɩ 'mö a dɔ'wʋ,

ɔ ‑sɛmö'ɛ ‑mä ɔ ‑nʋa jijo'wʋ 'ɔ ngäzɩdlɩ a 'yize a za nɩkpayɛya.

6 N ‑kä nɩɩ 'ɔ ngäzɩdlɩɩ a za‑a nʋʋ,

miɛ nɩɩ,

ɛ'ɛ ‑bhö 'wa nʋnʋlii a za.

'N ɛ ‑kä a ‑sɩbhää,

Lagɔ 'a ngäzɩdlɩɩ 'naa 'kä a ‑tiamö a ngäzɩdlɩ glɩnɩ.

7 Yɩ 'wuë a 'wlusɛnɩdaa,

‑lɛ ma‑a nɩɩ,

Yizlaɛlɩ 'a ngëyii 'mö a ‑nʋa,

'saa wa tɛlɩ a‑a sɛ,

wa 'wuë mʋa 'nuä ‑sɩbhä 'gämö ghlɩnɩ.

‑Maa ‑muë ɔ ‑sɛ a‑a ‑lɛ,

wa 'yize ‑kpöö mʋa ghïluä.

‑Muë'la wabhlɩ,

'wa dilaa 'mö Lagɔ 'tumanɩ 'mö.

8 Sɛ yɩ cɛlɩ a‑a 'kɩ wa dɛ ma‑a nɩɩ:

Nɩkpa nɩ,

Lagɔ yɛ 'wa 'nɛɛnɔɔ 'klʋ ‑gba.

‑Sɩbhä a za wa kä 'yila 'klʋ,

‑maa wa'aa sɛ yɩlɩ,

'wa kä 'yukwïla 'wlu,

‑maa wa'aa ‑ngö.

Sa'a yɩ ‑wʋä 'kwädlɩ wa dɛ ‑këë zɩ'ɛ.^c

9 'Bhlɩlowli Daviidɩ ɔbhlɩ,

sɛ'ɛ ɔ gbä'ɛɛ wa dɛ nɩɩ:

‑Atʋ Lagɔ,

nɩkpa nɩ,

'wa pɩpɩɩ a lilea nɩ 'zʋ wa'bhï a ‑gbokwë,

wa 'sokwli,

wa 'kɩ köbhä.

Yɩ nɩ 'zʋ wa 'nyinyloli a 'pɛna.

10 ‑Na'a wɛlɩɩ a dɔ'wʋ,

'wa yilaa nɩ 'ngïmo 'wʋ,

wa tɩa'a sɛ yɩlɩ,

yɔlɔylʋ nɩ 'kwïlanuë 'kwädlɩ 'wlu.^d

11 Zaa,

Zwiiföwaa,

wa sɛɛ Lagɔ 'klʋkpamö 'n wa yiɛ ‑sɩbhä a za tʋʋ,

sɛ'ɛ yɩ sɛ bhä zɛmö nɩɩ,

Lagɔ kʋä 'lɩlɩlɩ kɛ'mö ‑sɛ ‑a?

N'nn,

ɔ 'nuëë kɛ'mö ‑sɛ.

‑Maa Zwiiföwaa,

'wa sɛ wa fälanɩɛ sa'a Lagɔ 'a 'pʋpʋɛ 'ylimöö,

mɩɩ kää 'nglɩ,

‑waaa Zwiiföwa glɩnɩ,

'n Lagɔ yuëë 'ɔ 'pʋpʋɛ 'wʋ ghäla,

nzɩɩ Zwiiföwaa a'bhï yɩ 'kʋä nglʋnyinye 'lɩbha wa 'kä'ɛ wabhlɩ 'ɔ 'pʋpʋɛ 'la sɛ tɛlɩmö.

12 Sɛ'ɛ n gbää nɩɩ,

'n Zwiiföwaa 'a zɛmöbhlibhlee ‑kä ‑waaa Zwiiföwaa glɩnɩ ‑li a ‑li 'wlu nʋʋ,

Zwiiföwaa 'wuë ‑käa'a Lagɔ 'yi göö,

sɛ yɩ 'naa 'kä bhä ‑li a ‑li 'kädɩ ‑yɩ ziɛ ‑lii 'wuë 'wʋ glɩnɩ 'nɩ?

‑Waaa Zwiiföwa glɩnɩ 'a 'pʋpʋɛ a wɛlɩɩ

13 Abhʋa 'nɩɛ Zwiiföwa glɩnɩɩ,

abhʋa n nyɛɛ dɛ'ɛ 'dɩ nɩɩ,

Zezwii a tietienyɔ n glɩnɩɛ,

‑mä a jijo'wʋ,

‑mä n 'kää libho nʋ.

Libho 'la ɔ nyɩaaa,

'mäna 'wʋ wʋ ‑bhööä.

14 Ɛ'ɛ ‑bhö nyɩasɛ,

‑maa n ‑kä ‑sɩbhä 'zʋʋ,

na 'bhɩa Zwiiföwaa ‑kä ‑sɩbhä 'ylɩmöö,

yɩ yuë nglʋnyinye 'lɩbha,

wa gla'mö a 'yɛya yi 'pʋ.

15 Sɛ'ɛ n gbää nɩɩ,

Zwiiföwaa,

sɛɛ Lagɔ ‑sʋää nimïï,

‑sɩbhä ma‑a kää 'nglɩ,

'n bhlɩɩ 'wuë ‑gömö a nɩkpa bhɛnɩa'aa wa ‑nyɛ Lagɔ 'kä wamanɩ.

Miɛ abhlɩ da'a,

‑maa Zwiiföwaa a'bhï,

‑zlɩ Lagɔ ‑kʋä 'wʋ 'sɔ 'wʋ 'libhïnɩɩ,

sɛɛ 'kuduwa 'wlʋ'ɛ gluu,

‑sɩbhä ma‑a.

16 Wa ‑kä lile a tɛkäna Lagɔ bʋbɔnɩɩ,

lile ‑mä'la 'wuë ‑a tʋʋä ‑lɛ,

Lagɔ mɔɔ ‑kälaa.

Su a kpïla ‑kä Lagɔ a ‑li glɩnɩɩ,

wʋ kïlaa 'wuë,

Lagɔ a ‑liɛ.

17 Glʋglʋsuu wa laa olivie ‑wʋnyɩɩ kïla ‑mimii wa ‑dɩ'ɛ 'wʋʋ,

'mö n pälɩɛ Zwiiföwaa 'wʋ.

Abhʋa Zezwii a ‑nʋa,

abhʋaa 'nɩɛ abhlɩ Zwiiföwa glɩnɩɩ,

'kwlɛsu a kïla a glɩnɩɛ.

Abhʋa Lagɔ 'libhïä 'wʋ 'n ɔ yeanyɩɛ ‑lɛ glʋglʋsu 'la 'yli glɛ,

'n a yiɛ ngëyii Lagɔ ‑sɛɛ ‑lɛ 'mö a ‑nʋä 'zʋ.

Zaa,

glʋglʋsu 'la,

nyuu 'wʋ kpïlaa sɛɛ ‑mä gluu,

'mö a 'pʋnɩmöä 'mö.

18 Zaa,

sukïlaa wa ‑dɩɛ 'wʋ a za,

a nɩ tɩ tɛkpɔ.

'N a ‑kä tɛkpɔɔ,

a nɩ yɩbhlɩnɩ sɛ nɩɩ,

Abhʋaa 'nɩɛ suu a kpïlaa ‑su,

‑maa mɩɩ ‑soanyɩɛ.

19 Sɛ'ɛ a 'kää ‑kamä nɩɩ:

Lagɔ ‑kanyɩ ‑lɛ 'yɩ ‑gbaa 'mö glɛ a za,

nza ɔ ‑diiɛ 'wʋ.

20 ‑Sɩbhä ma‑a abhlɩ,

‑maa wa'aa 'wʋ nglu wa 'kä Zezwii Kliisɩ dlɩ 'tɛɛnɩ,

nza Lagɔ ‑sʋää ‑lɛ 'wa ‑gbaa 'mö,

abhʋa abhlɩ,

sɛ a 'tɛɛnɩɛ Zezwii Kliisɩ dlɩ a za,

nza Lagɔ glanyɩɛ ‑lɛ 'wa ‑gbaa 'mö.

Zaa,

a nɩ tɩ tɛkpɔ,

‑maa a nɩ kä Lagɔ a nganɔ ku 'mö.

21 Nyɩasɛ n'n‑ä ‑sɩbhä gbä,

‑maa ‑muë'la ‑wa glɩnɩ a‑a 'kɩ glʋglʋsuu a kïlaa,

'n Lagɔ ‑kʋä sa'a ‑lɛ 'wa ‑gbaa 'mö ‑sɛɛ,

a nɩ 'nɛmanɩa anyɩ 'wʋ ‑maa ɔ 'naa 'kanyɩ 'wʋ tɩ.

22 A yɩɛ,

Lagɔ,

ɔ nɛnɩ dlɩ zɛmö,

'n ɔ kälɩɛ yɔwʋ.

‑Wa panɔɔɔ ‑gömö,

wa dɔ'wʋ,

yɔwʋ ɔ kälɩɛ,

‑maa abhʋa abhlɩ,

a dɔ'wʋ,

dlɩ zɛmö ɔ nɛnɩɛ,

zaa a nɩ 'nɛmanɩ anyɩ 'wʋ,

a tɩa 'ɔ dlɩzɛmönanɔɔ 'ylimö fälanɩ,

'n yɩ 'nɩa ‑sɩbhä 'mö ‑wʋʋ,

Zwiiföwaa a saa,

‑sɩbhä ɔ 'kanyɩa ‑lɛ 'a ‑gbaa 'mö ‑sɛmö.

23 ‑Maa Zwiiföwa 'la,

wa ‑kä 'wa dilaa a 'mötunɔɔ kɛ'mö ‑sɛɛ,

Lagɔ yuë 'wʋ 'sɔ ‑lɛ 'wa ‑gbaa 'mö glɛ.

Ɛ'ɛ ‑bhö nyɩasɛ,

‑maa ‑Lu ‑wʋ 'kää Lagɔ kɛ'mö 'tɛɛnɩɩ,

wʋ'ʋä ‑bhölɩ.

24 Sɛ'ɛ n gbää nɩɩ,

abhʋaa 'nɩɛ da'a Zwiiföwa glɩnɩɩ,

'kwlɛsuu 'a kïlaa wʋ ‑nyɛɛ 'wlʋä 'mö a glɩnɩɛ,

‑lɛ wʋ 'yli,

‑lɛ Lagɔ ‑saanyɩɛ,

glʋglʋsuu ‑wʋnyɩɩ kïlaa a'aa glɩnɩɩ,

'n ɔ yeanyuä 'yli glɛ.

Zwiiföwaa wabhlɩ,

glʋglʋsu 'la Lagɔ glanyɩɛ 'ylii,

'wʋ kïlaa wʋ ‑nyɛɛ 'wlʋä,

'mö wa glɩnɩɛ.

Zaa,

mʋa ‑kä 'wʋ 'sɔ ‑lɛ ‑da 'yli gɔlɔnɩɛ yi a dɔ'wʋ,

yɩ'ɩɛ 'mö 'tɛɛ 'lɩlɩlɩ.

Zwiiföwaa yi Zezwii wa Puënyɔ 'mö yɩbhlɩnɩ

25 ‑Atʋayuënyɩ,

wɛlɩ a ‑mii glɩnɩɛ gbëaa,

‑yɩ zizaa a‑a,

'mö n 'kanyɩɛ dɛ'ɛ kɛ 'klʋ kälɩnɩ nzɩɩ,

anyɩgäsɛ a tɩa anyɩ 'nɛɛnɩwa 'mö 'wʋ 'libhï.

Gbëaa 'la ma‑a nɩɩ,

Yizlaɛlɩ a ‑nʋa ‑mumuë,

Lagɔ yɛ 'wa dilaa 'klʋ ‑gba,

wa tɩa Zezwii puënyɔ 'mö yɩbhlɩnɩ.

Sa'a ‑sɩbhä yɩ yiɛ ‑wʋä ‑këë,

'tɛnyɩɩ Lagɔ ‑dɩɛ nɩɩ,

nɩkpa ‑waaa Zwiiföwa glɩnɩ ɔ ‑sɛɛ 'kɔ yɩbhlɩnɩɩ,

'n ɛ 'kää ghlɛ.

26 ‑Lɛ a dɔ'wʋ Yizlaɛlɩ a ngëyii 'mö a ‑nʋa 'wuë,

wa yi 'Pʋ.

Sa'a ‑sɩbhä yɩ cɛlɩ a‑a 'kɩ nɩɩ:

Zakɔɔbö a yowluwa,

'wa Puënyɔɔ ‑ɔ 'kʋää galɛ 'mö ‑sɛɛ,

‑mä Siɔɔ^ea ‑nʋa jijo'wʋ,

‑mä ɔ 'kää 'bhöönɩ,

mɔɔ 'kää 'wa 'klʋkpamösɛsʋʋ sɛ ‑sɛ.

27 Sa'a ‑sɩbhä n 'kʋää 'wa 'nyinylolii a gbʋʋ ‑gömö ‑sɛ,

n ‑nyʋä 'sɔ ‑a 'kä'ɛ mɛnɩnɩ.^f

28 Zaa,

Zwiiföwaa,

'wa sɛ wa ‑sɛɛ Lagɔ 'a 'Mänatɩtɩɩ nimï a za,

wa ‑nyɔɔ 'sɔ,

wa'aa'a ‑wanɩ,

mɩɩ 'zʋä a ‑li a ‑lii.

‑Maa ngëyii Lagɔ ‑sɛɛ ‑lɛ,

sɛ wa glɩnɩɛ ɛ 'mö a ‑nʋää,

‑n ‑kä ‑sɩbhä 'wʋ yɩlɩɩ,

‑n ‑yi sɛ nɩɩ,

wa dɩbawa a dɩbawa a za,

wa ‑glɛ Lagɔ dlɩ 'wʋ 'yize.

29 Ɛ'ɛ ‑bhö nyɩasɛ,

‑maa Lagɔ,

'ɔ ngäzɩdlɩɩ a za,

ɔ ‑kä nɩkpɛ ‑lu 'nyɛ 'wëë,

ɔ'ɔ ‑sɔɔnyɩ kä'mö.

Ɔ ‑kä'ɛ nɩkpɛ ‑lɛ ‑sɛ 'wëë,

ɔ'ɔ ‑sɔɔ kɛ'mö.

30 A'bhï abhʋaa 'nɩɛ Zwiiföwa glɩnɩɩ,

bhla'mö a dɔ'wʋ,

Lagɔ a 'klʋkpamösɛwa a glɩnɩ a‑a.

‑Maa ‑sɩkaa a dɔ'wʋ,

dɛɛ Zwiiföwaa ‑sɛɛ Lagɔ 'klʋkpamöö,

‑lɛ Lagɔ 'pänɩɛ a ngäzɩdlɩ.

31 Wa ‑sɛɛ sa'a Lagɔ 'klʋkpamöö,

Lagɔ 'kä a ngäzɩdlɩ 'pä a za‑a,

sɛ ‑bhlʋ ‑kpɔ 'la,

ɔ yi'ɛ ‑sɩbhä wa ngäzɩdlɩ 'pämö.

32 Sɛ'ɛ n gbää nɩɩ,

nɩkpaa 'wuë 'klʋkpamösɛwa 'mö Lagɔ 'libhuëë 'wʋ,

nzɩɩ ɔ 'kä wa 'wuë a ngäzɩdlɩ 'pä.

Lagɔ 'ghïli ɔ 'ghïliɛ

33 ‑Tiamö!

Lagɔ 'a wʋlʋnɔɔ mu,

'ɔ 'nɛɛnɔɔ ‑nyɛ 'ɔ ‑lii a ‑yiyee 'sɔ,

yɩ'ɩɛ ‑sɩbhä a sɛ ‑wʋ.

'Ɔ ‑zijlitutwee ‑nyɛ 'ɔ sɛ ɔ zʋä 'n 'saa ɔ 'yɩbhää 'wlʋnɩɛ 'yli 'sɔ,

yɩ'ɩɛ 'mönʋsɛ ‑wʋ.

34 Sɛ'ɛ yɩ cɛlɩɛ ‑mä Lagɔbɔgʋʋ 'mö nɩɩ:

‑Alowli Lagɔ 'a dlɩpäsaa,

‑ɔ bhɛnɩ bhä ɔ 'kä ‑sɩbhä 'mö 'nʋ 'nɩ?

‑Ɔ bhɛnɩ bhä,

ɔ 'kɔ 'dɩ 'mö zʋ 'nɩ?^g

35 ‑Ɔ 'nyɔ bhä tɛɛ ‑lu 'wë zaa,

‑ɔnyɩɩ 'gë ɔ kä bhä ‑gömö 'nɩ?^h

36 Lagɔ,

'pɩwʋ a ‑lii 'wuë,

‑mä ɔ kä'mö ‑mä yɩ 'bhöönɩɛ,

mɔɔ nwiiɛ,

yɩ 'wuë,

ɔ liɛ.

‑Alowli Lagɔ,

'ɔ nglɩɩ nɩ 'ghlimanɩ 'kwädlɩkwädlɩnɩ 'yize.

‑Amɛɛ!