Ghlɔɔmö a ‑nʋa 10

‑Atʋayuënyɩ,

na 'bhɩa Zwiiföwaa a dɔ'wʋ,

sɛɛ 'na dlɩ yɩbhää,

'n sɛ n bhibhee wa 'wlumö Lagɔ,

‑sɩbhä ma‑a nɩɩ,

Wa nɩ ghlɩ 'pʋpʋɛ.

2 ‑Tiamö,

n yi nɩɩ,

Lagɔ a dɔ'wʋ ku 'mö wa ‑suä nʋ.

‑Maa,

sɛ wa 'kɔɔ 'mö bʋbɔbʋbɔmöö,

wa'aa ‑sɩbhä ‑yi.

3 Miɛ nɩɩ,

'saa Lagɔ a'bhë nʋä nzɩɩ nɩkpɛ 'kä ɔ 'yila 'klʋ a dɔ'wʋ 'mö zlɔmanɩɩ,

wa 'niɛ yɩbhlɩnɩ,

‑maa 'wa sɛ wa ylɔɔ,

wa ‑tɔnɩ ‑sɩbhä ma‑a 'kä 'nglɩ ‑kä wa 'kä 'mö zlɔmanɩ Lagɔ a 'yila 'klʋ a dɔ'wʋ,

‑maa wa'aa yɩbhä Lagɔ a'bhë 'kʋä 'mözlɔnɩwa 'wʋ 'zʋa.

4 Sɛɛ n gbää nɩɩ,

Zezwii Kliisɩ,

'mö Gböö 'bhlenɩɛ.

Zaa,

‑ɔ 'tɛɛnɔa'aa dlɩ cuu,

mɔɔ zlɔnɩɛ 'mö Lagɔ a 'yila 'klʋ a dɔ'wʋ.

Lagɔ 'a 'pʋpʋɛ nɩkpa 'wuë ‑wa 'tɛɛnɩɛ Zezwii dlɩɩ wa ‑leyiɛ

5 Nɩkpɛ 'kä ɔnyɩgäsɛ a nʋnʋli a za 'mö zlɔmanɩ Lagɔ a 'yila 'klʋ a dɔ'wʋ,

sɛ'ɛ Moyizɩ 'cɛlɩ a‑a nɩɩ:

Lagɔ 'a Gböö,

sɛ yɩ gbää,

‑ɔ ‑kä ‑sɩbhä nɛmöö 'tɩɩ,

mɔɔ 'kää 'pʋ. ^a

6 'Mözlɔmanɔɔ wa ghlɩnɩɛ ‑mä dlɩ'wʋkänɔ 'möö,

wʋ wɛlɩɩ,

sɛ'ɛ yɩ nʋä nɩɩ,

tɩ ‑mä ‑na dlɩ zɛmö nʋ nɩɩ,

‑mɔ 'kä bhä ‑mä ghäyɩ 'wʋ ‑gbälɛ 'nɩ?

Mɩɩ sɛɛ zɛmö nɩɩ,

ɔ 'kä Kliisɩ'kwïla.

7 Tɩ'ɛ nɩɩ,

‑mɔ 'kä bhä ‑mä 'kudu 'wʋ sɛ 'sibhë 'nɩ?

Mɩɩ sɛɛ zɛmö nɩɩ,

ɔ 'kä Zezwii Kliisɩ gäla ɔ 'kɔ glu ‑sɛ.

8 Sɛ'ɛ yɩ cɛlɩɛ ‑mä Lagɔbɔgʋʋ 'mö nɩɩ:

Lagɔ 'a wɛlɩɩ,

yɩ ‑wʋ ‑lɛ ‑na yɔwʋ,

yɩ ‑wʋ ‑mä ‑na ngli,

yɩ ‑wʋ ‑mä ‑na dlɩ zɛmö.^b

Wɛlɩkïbhë 'la,

'Mänatɩtɩɩ ‑a nyɛɛ nɩkpa nɩɩ,

'tɛɛnɩ Zezwii dlɩ cuu,

yɩ dɛ a bhïlaa.

9 Zaa,

‑n ‑kɩɩ nɩkpabhë a 'yila 'klʋ ngli ‑sɛ nɩɩ,

‑Alowli,

mɔɔ glɩnɩɛ Zezwii,

‑n ‑kɩɩ'ɛ ‑tiamö dlɩ 'wʋ ‑kä nɩɩ,

Lagɔ gäla Zezwii 'n ɔ yoo glu ‑sɛɛ,

‑n yi Lagɔ 'a 'pʋpʋɛ ghlɩ.

10 Ɛ'ɛ ‑bhö nyɩasɛ,

‑maa nɩkpɛ a ‑mɔɔ 'tɛɛnɩɛ Zezwii dlɩ cuu,

‑mä 'ɔ dlɩɩ 'wuë zɛmöö,

mɔɔ zlɔnɩɛ 'mö Lagɔ a 'yila 'klʋ a dɔ'wʋ.

‑Mɔ sɩ'ɛɛ nɩkpabhë a 'yila 'klʋ ngli nɩɩ,

Zezwii mɔɔ glɩnɩɛ ‑Alowlii,

mɔɔ 'kää 'pʋ.

11 Nza yɩ cɛlɩ'ɛɛ ‑mä Lagɔbɔgʋʋ 'mö nɩɩ:

«‑Ɔ ‑kɔɔ dlɩ 'tɛɛnɩɩ,

ɔ 'naa 'kä 'yila 'tikïyie ghlɩ.» ^c

12 Wɛlɩ 'la,

nɩkpa 'wuë,

‑wa yi Zwiiföwa glɩnɩ oo,

‑wa 'nɩ Zwiiföwa glɩnɩ oo,

wa ‑liɛ.

Wa 'wuë,

Lagɔ mɔɔ glɩnɩɛ wa ‑lowli.

Zaa,

‑ɔ ‑kɔɔ 'mö 'winɩɩ,

ɔ ngäzɩdlɩ ɔ pää.

13 Sɛ'ɛ yɩ cɛlɩɛ nɩɩ:

‑Alowli Lagɔ,

‑ɔ ‑kɔɔ 'mö 'winɩɩ,

mɔɔ 'kää 'pʋ.^d

‑Ɔ ‑pʋnɩɛ 'Mänatɩtɩɩ 'yukwlii mɔɔ ghlɩɛ dlɩ'wʋkänɔ

14 Sɛ'ɛ ‑n 'kää ‑kamä nɩɩ:

Sɛ wa 'kɔ bhä 'mö 'winɩ 'n wa 'nɔ dlɩ 'wʋ ‑kä?

'Ɔ 'Mänatɩtɩɩ,

wa 'ni 'nʋʋ,

sɛ wa 'kɩ bhä dlɩ 'wʋ ‑kä 'nɩ?

Nɩkpɛ 'nuënyɩ'ɛ 'nyɛɛ,

sɛ wa 'kɩ bhä 'nʋ 'nɩ?

15 Tɩtɩ 'la a'bhë,

nɩkpaa ‑wa 'kɩɛ bia 'n wa 'nuë tiee,

sɛ wa 'kɩ bhä bia 'nɩ?

Nza yɩ cɛlɩɛ ‑mä Lagɔbɔgʋʋ 'mö,

nɩɩ:

Nɩkpaa wa tiee,

‑wa ‑lɛmöä 'Mänatɩtɩɩ,

a yɩɛ 'wa kplɩɩ,

sɛ yɩ nɛnɩɛ 'ylimöö^e.^f

16 ‑Sɩbhä yɩ ‑wʋ 'mö,

‑maa 'Mänatɩtɩ 'la,

wa 'wuë mʋa 'niɛ ‑sɩbhä 'wʋ nglu.

Sɛɛ Ezayii gbä a‑a 'tɩɩ wa dɛ nɩɩ:

‑Alowli Lagɔ,

‑na'a wɛlɩɩ ‑a 'nyɛɛ nɩkpaa,

‑ɔ kɩ bhä dlɩ 'wʋ 'nɩ?^g

‑Sɩbhä ma‑a 'wlʋnɩɛ 'yli.

17 'Lɩlɩlɩ a dɔ'wʋ,

‑ɔ nʋä 'Mänatɩtɩɩ,

mɔɔ ghlɩɛ dlɩ'wʋkänɔ,

'Mänatɩtɩ 'la,

Kliisɩ 'a wɛlɩɩ miɛ.

18 Zaa,

Zwiiföwaa wabhlɩ,

wɛlɩ 'la,

wa 'ni bhä 'nʋ ‑a?

Sɛ'ɛ n gbää nɩɩ,

wa 'nwi.

Ɛ'ɛ ‑bhö nyɩasɛ,

‑maa sɛ'ɛ yɩ cɛlɩɛ ‑mä Lagɔbɔgʋʋ 'mö nɩɩ:

Tietiewaa 'a wɛlɩɩ,

yɩ mlɩmanɩ ‑mä bhlɩɩ 'wuë ‑gömö.

‑Mä dʋdʋʋ a këtiea 'wuë ‑gömö a nɩkpaa,

wa 'nwi.^h

19 Yizlaɛlɩ a ‑nʋa,

wɛlɩ 'la,

wa 'ni a bhä 'mö 'nʋ ‑a?

Sɛ'ɛ Moyizɩ gbä a‑a nɩɩ,

Lagɔ lɛ naa:

Nɩkpaa ‑waa a‑a 'kɩ na ‑nʋä glɩnɩ,

wa laa ‑ɔɔ'nɛɛnɩwaa,

n yi gbä wa ‑yii yɩbhlɩnɩ

n yeanyɩ wa nglʋnyinye dlɩ zɛmö 'zʋ

ɛ yeanyɩ wa 'klɛ 'mlɩ zʋ.ⁱ

20 ‑Maa Ezayii mɔɔ bhïliia'aa sɛ'ɛ gbëaa a'bhë nɩɩ,

Lagɔ lɛ naa:

Nɩkpaa ‑waa tɛlɩɩ a‑a sɛɛ,

mʋa ghölɩɩɛ,

‑muë na gbʋ 'nɩ a‑a plɛnɩ 'lɩlɩlɩ a'bhëë,

'mö n tulanɩɛ nanyɩ 'ylimö.^j

21 ‑Maa Yizlaɛlɩ 'a ngëyii 'mö a ‑nʋa a'bhï,

sɛ'ɛ ɔ gbää wa dɛ nɩɩ:

Lagɔ lɛ naa:

Sɛɛ zila zɩɛ

ngëyii ‑ɛ 'tɛɛ a‑a 'yukwli 'mö,

‑ɛ ‑sɛɛ 'na wɛlɩɩ nimïï,

‑sɩbhä n tulanɛɛ kɛ 'ylimö.^k