Ghlɔɔmö a ‑nʋa 13

A nɩ 'zʋ 'kämanɩwaa 'klʋkpamö

‑Mɔ ‑n yi glɩnɩ ‑kë,

‑mɔ ‑n 'nɩ glɩnɩ ‑kë,

‑wa 'kämanɩɛ,

‑n kä ‑n 'kä 'wa 'kämanɔɔ 'klʋkpamö zʋ.

Ɛ'ɛ ‑bhö nyɩasɛ,

‑maa 'kämanɔɔ 'wuë,

‑mä Lagɔ kä'mö ‑mä wʋ 'bhöönɩɛ.

'Kämanɔ a ‑mu ‑wʋʋä Lagɔ kä'mö 'bhöönɩɩ,

wʋ'ʋä ‑bhölɩ.

2 ‑Sɩbhä a za,

‑wa 'kämanɩɛ,

‑ɔ ‑kʋä ‑gömö cɩcɔnɩɩ,

Lagɔ a'bhë,

'mö ɔ yɛɛ da'a ‑gömö cɩcɔnɩ.

‑Sɩbhä a nɩkpɛ 'la,

Lagɔ a gbʋ ɔ jlinɩɛ da'a ɔnyɩ 'wʋ.

3 Nɩkpɛ a ‑mɔɔ nʋä ‑li a ‑lii,

mɔɔ 'nɩɛ ‑kä ɔ 'kä ‑gɔmlɩwa ‑gu,

‑maa ‑ɔ nʋä ‑lizokuu mɔɔ kää ɔ 'kʋä ‑gu.

Zaa,

‑n ‑kä 'yɩbhä ‑n 'kä ‑pälɛpälɛ ‑wʋ ‑gɔmlɩwaa a 'yila 'klʋ a dɔ'wʋʋ,

‑li a ‑lii,

mö ‑n nɩ nʋ.

‑Lɛ a dɔ'wʋ,

‑gɔmlɩwaa yi ‑na 'dɩ a dɩ ‑sɛ.

4 Ɛ'ɛ ‑bhö nyɩasɛ,

‑maa ‑gɔmlɩwaa,

wa ‑kamö ‑su 'saa nɛnɩɛ ‑n 'kʋ nʋ,

nza Lagɔ 'zuëë ‑lɛ,

ɔ libho wa nʋä da'a.

Zaa,

‑n ‑kä ‑lizokunʋnyɔ glɩnɩɩ,

‑n kä ‑n 'kʋä ‑gu.

'Fʋ wa'aa bhɛnɩ wa 'kä nɩkpa 'wa ‑lizoku a 'pɛna 'nyɛ,

‑maa Lagɔ a'bhë mɔɔ 'zuëë ‑lɛ,

nzɩɩ wa 'kä ɔ 'nglɩ 'mö ‑lizokunʋwaa 'mö zlɔmanɩ.

5 ‑Sɩbhä a za n gbää nɩɩ,

‑wa 'kämanɩɛ,

'wa 'kämanɔɔ,

‑n ‑kʋʋ 'klʋkpamö zʋʋ,

yɩ nɛnɩ.

‑N ‑kä ‑sɩbhä 'zʋʋ,

ɛ'ɛ ‑bhö nɩɩ ‑n tɩa Lagɔ a gbʋ ‑nanyɩ 'wʋ jlinɩ a 'yize a za,

‑maa ‑na'bhë ‑mä ‑na dlɩ zɛmö,

‑n kä sɛ yɩbhlɩmanɩ nɩɩ,

‑li a ‑liɛ.

6 Sɛ ‑bhʋlʋ ‑kpɔ 'la,

‑wa kää lapoomoni a 'wʋbhlilibhoo,

wa ‑kä nɩɩ 'pɛnɩ lapoo klɩpaa nʋʋ,

yɩbhlɩnɩ sɛ nɩɩ Lagɔ mɔɔ 'nyʋää libho 'la zaa 'pɛnu.

7 ‑Wa 'kämanɩɛ,

sɛɛ Lagɔ 'yɩbhää ‑a nɩ 'zʋ wa dɔ'wʋʋ,

‑a nɩ 'zʋ ‑sɩbhä 'tɩɩ.

Lapoo a kii 'wuë wa gbää 'pɛnuëë,

'pɛni.

‑Mɔ ‑n kää ‑n 'kä 'klʋkpamö zʋʋ,

'zo 'klʋkpamö,

‑mɔ ‑n kää ‑n 'kä ‑lɛ zʋʋ,

'zo ‑lɛ.

A‑a nɩ ‑wawanɩ

8 Tɩ nɩkpɛ a gɔgbʋ ‑kä.

‑Maa ‑na 'lilɛ a ‑wawʋ a 'yize mʋʋ nɩ glɩnɩ ‑na gɔgbʋ.

Ɛ'ɛ ‑bhö nyɩasɛ,

‑maa ‑n ‑kä ‑tiamö ‑na 'lilɛ ‑waa,

Lagɔ 'a Gböö 'wuë,

‑n kɩ da'a 'klʋkpamö zʋ 'wë.

9 Sɛ'ɛ n gbää nɩɩ,

Lagɔ 'a Gböö ‑yɩ nʋä nɩɩ:

Tɩ ‑na 'li a 'nglɔ sɛ tɛlɩ,

tɩ ‑na 'li a 'luwli sɛ tɛlɩ,

tɩ 'ku 'lɩbhä,

tɩ ‑na 'li a ‑lu 'wi ghli,

‑na 'li a ‑li a 'tʋ nɩ ‑tɩmö 'zokwësɛ 'lɩbhä,^a

yɩ ‑nyɛ gbö ‑mi'la ‑yɩ tʋʋä ‑mä 'sɔ,

yɩ 'wuë,

gbaa ‑a nʋä nɩɩ:

Sɛ ‑n ‑waa ‑nanyɩ ‑wa ‑sɩbhä ‑na 'lilɛ,^b

‑mä a 'mö,

‑mä yɩ 'yɩbhanɩɛ yɩ 'wuë 'wlu.

10 Nɩkpɛ a ‑mɔɔ ‑waa ‑tiamö ɔ 'lilɛɛ,

ɔ'ɔ nɔ ‑lizoku 'wlu 'lɩlɩlɩ.

‑Sɩbhä a za n gbää nɩɩ,

‑n ‑kä ‑tiamö ‑na 'lilɛ ‑waa,

'saa Lagɔ 'a Gböö yɩbhää 'wuë,

‑n kʋ da'a nʋ 'wë.

A‑a nɩ ‑gïganɩ 'wlu ‑a 'kä Zezwii ‑kʋnɩ

11 Wɛlɩɩ 'wuë n 'bhööä da'a bhïlaaa,

a nɩ 'zwi sasɛ 'klʋkpamö.

Ɛ'ɛ ‑bhö nyɩasɛ,

‑maa 'tɛnyɩ ‑a ‑wʋä dɛ'ɛ 'möö,

a ‑yi dɛ ɛ ‑gänɩ.

Dɛ a 'kää 'yɛla 'mö 'wlʋnɩɩ,

‑lɛ ma‑a dɛ'ɛ.

Dɛ ‑a yɩbhlɩnɩ a‑a Zezwii a dɔ'wʋ,

Lagɔ 'a 'pɩwʋlelea a 'yliwlʋnɩdaa,

‑lɛ yɛ a 'dio,

‑maa ‑sɩkaa a dɔ'wʋ,

‑lɛ yɛa'a tenyii a'bhë 'dio.

12 'Tɛnyɩ ‑a ‑wʋä dɛ'ɛ 'möö,

zlɩzɩdɔ'wʋ,

'mö n pälɛɛ 'wʋ,

zlɩ yɛ zɩ 'wë.

Zaa,

‑lizokuu ‑a nʋnɩɛ ‑mä 'yuylukwë 'möö,

a‑a nɩ ‑sɩɩ kɛ'mö.

Tʋgwɩnyɔ a sɛ,

'päpälii ‑yɩ glɩnɩɛ zlɩgä a ‑nɩɩ,

'mö ‑a nɩ 'libhï 'wʋ.

13 ‑A'a nɛmönɛmösaa nɩ zlɔnɩ 'mö zlɩgänɛmönyɔ a sɛ.

'Fɛtilea wa ‑kä ‑sɛ 'n wa liɛ ‑këë 'n wa doo wlu 'kpulu,

'n wa nɩmää nʋ ‑këë 'n wʋ lɩbhʋää,

'n wa tɛlɩɛ ngwlɩɩ sɛ bidibidii,

‑sɩbhä a 'fɛtile 'la,

a‑a nɩ ti ‑sɛmö.

A‑a nɩ tɩ kpɛnɩkpɛnɩwa glɩnɩ,

a‑a nɩ tɩ nglʋnyinyekäwa glɩnɩ.

14 ‑Maa zɩkpalelea a ghlɩɛ ‑mä ‑Alowli Zezwii Kliisɩ 'möö,

sɛ wa päla'ɛ ‑bäna 'möö,

a nɩ pälaa ‑sɩbhä 'mö.

'A ‑wʋwʋsɛzokwëa,

sɛɛ ‑sɩbhä yɩbhää,

a nɩ tɩ 'wʋ nglu ‑sɩbhä nɩ tanyɩ ‑su.