1 Piɛlɩ 5

Piɛlɩ yɛ 'yukugänɩwaa 'dɩ 'mö 'zʋ

Abhʋaa Zezwii a ‑nʋa a 'yukugänɩwaa,

a saa,

'yukugänɩnyɔ n glɩnɩmöä.

Sɛɛ Kliisɩ 'yɩɛ 'klɩɩ,

na'bhë n 'yɩ ‑sɩbhä 'ylɩmö.

'Ɔ 'pɩwʋlelea ‑aaa ‑sɩbhä a sɛ ‑wʋ,

‑a 'kää zɩla'a 'yli 'wlʋnɩɩ,

a 'wʋ a ‑nɔ n glɩnɩmöä.

Zaa,

abhʋa n zʋä dɛ'ɛ 'dɩ 'mö nɩɩ,

2 a nɩ 'zʋnɩ Lagɔ a ‑nʋa 'yli.

Libhoo Lagɔ 'nyanyɩɛ da'aa,

a nɩ nu sasɛ,

a nɩ nʋnuu dlɩ a dlɩ 'mö,

‑sɩbhä Lagɔ yɩbhää.

‑Maa a ‑kʋʋ nʋ dɔ'wʋ ‑wʋʋ,

ɛ nɩ tɩ ‑bhɩɛ 'wlumö wa köbhänanyɩ.

Sɛɛ Lagɔ 'a wɛlɩɩ a 'yize a gbʋʋ plɛnanyɩɛ a za,

nza a nɩ nu,

‑maa a nɩ tu moni 'mö sɛ tɛlɩnɩ.

3 Nɩkpaa ‑wanyɩɩ 'yuku Lagɔ 'zʋanyɩɛ,

a nɩ tuë 'wlumökänɩsɛ ‑su.

‑Maa a'bhï a nɩ 'zʋ sasɛ Lagɔ 'a wɛlɩɩ 'klʋkpamö,

wa ‑kaanyɩ 'ylɩmöö,

wa 'kä ‑sɩbhä 'zʋmö.

4 ‑Lɛ a dɔ'wʋ,

‑ɔ glɩnɩɛ ‑a 'wuë a 'ylizʋnɩnyɔ 'kɔdɔɔ,

‑zlɩ ɔ ‑kä yii,

ɔ yeanyɩ 'nglɩ 'kädɩ 'kädɩ ‑yɩ 'naa 'kää 'wʋ bhɩɛ 'nyɛ.

5 Abhʋa ‑dɩgbö abhlɩ,

‑wa glɩnɩɛ a 'wʋ a 'kädɩɩ,

a nɩ 'zuë 'klʋkpamö.

A 'wuë,

‑dɩgböö muë,

'kädɩɩ muë,

a nɩ tɩ anyɩ 'kädɩ 'mö 'wʋ 'libhï ‑maa a nɩ 'zʋzʋnɩ ‑lɛ.

Sɛ'ɛ Lagɔwɛlɩɩ nʋä nɩɩ:

Lagɔ,

bhabhawaa ‑kplikpli 'yli ɔ klɛnuëë,

‑maa ‑wa ‑lɛmöä wanyɩ dʋdʋ 'wʋʋ,

'mo ɔ yiɛ 'wʋ.^a

6 ‑Atʋayuënyɩ,

Lagɔ mɔɔ 'kämanɩɛ ‑lii 'wuë ‑gömö,

zaa,

ɔ 'yila 'klʋ a dɔ'wʋ,

a nɩ ‑lɛmö anyɩ dʋdʋ 'wʋ,

nzɩɩ 'ɔ 'tɛnyɩ ɔ ‑dɩɛ ‑kä ghlɛɛ,

ɔ 'kanyɩ 'wlu 'libhï.

7 Lagɔ a'bhë mɔɔ 'zʋnanyɩɛ 'kwädlɩ 'yli,

zaa ‑lii 'wuë ‑yɩ 'tɛɛnanyɩɛ kɛ'möö,

a nɩ 'nyɔnyɩ yowʋ.

8 A nɩ 'nɛmanɩ anyɩ 'wʋ,

‑maa sɛɛ gbi klu'ɛ 'n ɛ binɩ'ɛ glɔɔ,

Sataa ‑ɔ glɩnɩɛ 'a ‑gblɩnyɔ 'kɔdɔɔ,

‑sɩbhä ɔ ‑wʋanyɩɛ 'wʋ binɩ dɔ'wʋ.

‑Mɔ ɔ 'kää ‑mä 'pä ɔ 'kɔ Lagɔ 'a 'yioo 'wʋ ‑sɛ,

'mö ɔ tɛlɩɛ sɛ zaa,

a nɩ ‑ligba a 'kä ‑lɛ glɩ.

9 A nɩ 'tɛɛnɩ 'kwädlɩ Lagɔ dlɩ,

nzɩɩ 'a ‑gblɩnyɔ 'la ‑kaanyɩ sa'a ‑mä 'pää,

a 'käa nimï ‑sɛ 'yize.

A nɩ ‑yi sɛ nɩɩ,

sɛ a ‑wʋä da'a 'klɩ 'yɩ dɔ'wʋʋ,

a 'bhɩa Lagɔgänɩwaa ‑wa ‑wʋä ‑mä dʋdʋ a këtiea 'wuë 'wʋʋ,

‑sɩbhä wa 'yɩmöä 'klɩ.

10 ‑Maa Lagɔ ‑ɔ glɩnɩɛ ɔ 'wuë ngäzɩdlɩɩ,

mɔɔ ‑saanyɩɛ ‑lɛ,

nzɩɩ ‑mä ɔ yɔwʋ mää 'nɩɛ ‑sɩbhä a sɛ ‑wʋʋ,

a 'kä ‑mä mö,

a 'kä 'kwädlɩ Zezwii Kliisɩ a bɔɔmö a za ‑mä ‑wʋ.

A ‑wʋ abhlɩ 'tɛnyɩke ‑mɛ nɩ 'mö 'klɩ 'yɩ dɔ'wʋ,

‑maa ɔ'bhë,

ɔ yeanyɩ swɩ nyɛmʋ 'mö 'pä,

ɔ yi 'nglɩ ‑kä a yi 'yli yɔwʋ 'tɛmanɩ tenyii,

ɔ yi gbä,

dɛ a kää sɛ a yi ‑lɛ kɛ nyɔnʋ ‑këë,

a yi ‑mä 'gbë 'wʋ ghlɛ.

11 Ɔ 'yize,

mɔɔ 'kämanɩɛ 'kwädlɩkwädlɩnɩ.

Nn,

mɔɔ 'kämanɩɛ.

Sɛ'ɛ Piɛlɩ gbää 'gbëbhlenɩ dɔ'wʋ

12 ‑Atʋayuënyɩ,

wɛlɩyiea n kä a‑a 'mlɩɩ,

muëë da'a.

‑Aa ‑daayu Silasɩ,

‑ɔ glɩnɩɛ nɩkpɛ a ‑mɔ wa kää wa 'kä dlɩ 'wʋ ‑kä,

'mö n 'nyɛɛ 'dɩ 'n ɔ yiɛ 'bɔgʋ nɩ 'cɛlɩ,

n 'kanyɩ swɩ nyɛmʋ 'mö 'pä nɩɩ,

sɛɛ Lagɔ 'pää a ngäzɩdlɩ 'n ɔ yeanyɩɛ ‑lɛ ‑sɛɛ a wɛlɩɩ a 'tɛɛnɩ dlɩɩ,

‑tiawɛlɩɛ.

13 A 'bhɩa Lagɔgänɩwaa ‑wa ‑wʋä mä'ä,

mä wa la'ɛɛ Babilɔɔnɩ,

wa lɛ wa bhälanyɩ.

Na yowli Maakö,

ɔ lɛ ɔ bhälɩmanyɩ.

14 A ‑kä 'wlu 'yɩbhää,

a nɩ bhälɩbhälɩnɩ ‑wanɩwanɩsɛ.

A 'wuë abhʋaa ‑glɛɛ Kliisɩ 'wʋʋ,

Lagɔ a 'pʋpʋɛ nɩ ghlanyɩ 'wʋ.