Ebleewaa 7

Mɛlɩkisedɛkö a wɛlɩɩ

Mɛlɩkisedɛkö 'la,

Salɛɛmö a 'bhlɩlowli ɔ glɩnɩ a‑a,

Lagɔtapɛ a bʋbɔbʋbɔnyɔ ɔ glɩnɩ a‑a.

Mɔɔ möä 'ylɩ ‑bhlʋ 'mö Ablaamö gbanɩɛ.

Ablaamö 'bhöö tʋ 'wʋ,

ɔ 'bhöö 'bhlɩlowluwa a ‑bɛ 'wlu 'plɩɛ,

'n Mɛlɩkisedɛkö yoo 'nyu 'pä.

2 Ablaamö ‑nyɔɔ gbanɩɛ 'wʋʋ,

‑lii ɔ ‑sɛ a‑a 'bhlɩlowluwaa ɔ ‑nyɛɛ gwɩɛ kä'möö,

yɩ 'wuë a kʋgbänɩɩ 'n ɔ yonyɩɛ 'nyɛ.^a

Mɛlɩkisedɛkö 'a nglɩɩ a'bhë,

yɩ kä zɛmö.

Yɩ zɛmöä nɩɩ,

'bhlɩlowli ‑ɔ zlɔnɩ 'mö.

'N wa lɔ'ɛɛ Salɛɛmö a 'bhlɩlowli,

mɩɩ sɛɛ zɛmö nɩɩ,

'bhlɩlowli ɔ 'yɩbhä ‑wanɩwanɛ.

3 Ɔ'ɔɔ dɩba ‑kä,

ɔ'ɔɔ ‑da ‑kä,

ɔ'ɔɔ ngëyi ‑kä.

'Ɔ 'pɩwʋ 'nɩɛ tɛɛnɩdɛ ‑nyɛ 'bhlenɩdɛ 'sɔ ‑kä.

Lagɔ 'a Yuu a dɩdlɛna ɔ glɩnɩ a‑a.

'N ɔ yiɛ 'kwädlɩ a Lagɔbʋbɔnyɔ 'zʋ.

4 Mɛlɩkisedɛkö,

sɛ ɔ 'ghïliɛ,

a nɩ 'yɩɛ ‑ka ‑sɩbhä 'ylɩmö.

‑Aa dɩba 'kɔdɔ Ablaamö a'bhë,

ɔ 'bhööä tʋ 'wʋʋ,

‑lii 'wuë ɔ ‑nyɛɛ 'bhöönɩɛ ‑mä,

yɩ kʋgbänɩɩ,

'mö ɔ 'nyɩɛ.

5 Moyizɩ 'a Gböö lɛ naa,

Levii 'a ‑gligbëa 'wʋ a ‑nʋa ‑wa nʋä Lagɔbʋbɔlibhoo,

Yizlaɛlɩ 'a ngëyii 'mö a ‑nʋa 'wuë a 'saa wa kää,

wa nɩ ‑sɛ ‑lɛ yɩ da kʋgbänɩɩ 'yize.

Levii a ‑nʋa,

wa ‑daayuë wa glɩnɩɛ.

Ɛ'ɛ ‑bhö nyɩasɛ,

‑maa Ablaamö a 'yuë a 'yuë wa glɩnɩmöä.

6 Mɛlɩkisedɛkö ɔbhlɩ,

ɔ'ɔ ‑bhö Levii a ‑gligbë 'wʋ a nɩkpɛ,

‑maa ‑sɩbhä yɩ ‑wʋ 'mö 'n Ablaamö yoo ‑lii ɔ ‑suä a kʋgbänɩɩ 'nyɛ.

'N ɔ yi'ɛɛ Ablaamö 'nyu 'pä.

Ablaamö Lagɔ a'bhë 'nyɛɛ 'ɔ wɛlɩɩ 'mö ɔ 'pää 'nyu.

7 ‑A ‑yi sɛ nɩɩ,

'kwädlɩ a dɔ'wʋ,

‑ɔ pää 'nyu,

mɔɔ 'ghïliɛ mɔɔ ziɛ ‑mɔ ɔ pää 'nyu 'wʋ.

8 Levii 'a ‑gligbëa 'wʋ a ‑nʋa wa nyɛɛ ‑lii 'wuë a kʋgbänɩɩ,

'kukuwa wa glɩnɩɛ.

‑Maa Mɛlɩkisedɛkö ɔbhlɩ,

ɔ ‑bhölɩ 'kwädlɩ 'yize.

9 Zaa,

‑a bhɛnɩ ‑a 'kä nɩɩ,

Ablaamö 'nyɛɛ da'a Mɛlɩkisedɛkö 'ɔ ‑lii 'wuë a kʋgbänɩɩ,

Levii,

wa nyɛ a‑a 'kwädlɩ ‑li 'wuë a kʋgbänɩɩ,

ɔ'bhë,

mɔɔ 'nyɛmɔnyɩɛ da'a.

10 Nyɩasɛ n'n‑ä ‑sɩbhä gbä,

‑maa 'tɛnyɩ 'mö Ablaamö ‑nyɛ Mɛlɩkisedɛkö gbanɩɛ 'wʋʋ,

Levii 'nɩɛ abhlɩ ‑bhlɛ gwëlio,

‑maa ɔ ‑wʋ a ‑mä ɔ dɩba 'kɔdɔ Ablaamö a 'mlɩ.

Mɛlɩkisedɛkö a sɛ a Lagɔbʋbɔnyɔ 'kɔdɔ

11 Moyizɩ 'a Gböö mɩɩ gbää nɩɩ,

Levii a 'yu a 'yu Aghlɔɔ 'a ‑gligbëa 'wʋ a ‑nʋa,

mʋa nɩ kä Lagɔbʋbɔlibhoo,

‑maa 'wa libho 'la 'nɩɛ nɩkpa ‑nyɛ Lagɔ 'sɔ a wamanɩwamanɛ sasɛ bhɛmanɩ.

Nza Mɛlɩkisedɛkö a sɛ a Lagɔbʋbɔnyɔ ‑ɔɔɔ Aghlɔɔ a saa ‑wʋ,

ɔ 'wlʋä.

12 Ɛ'ɛ ‑bhö nyɩasɛ,

‑maa sɛɛ Lagɔbʋbɔsaa 'sɔɔ ‑gba'wʋʋ,

‑sɩbhä Gböö 'sɔɔmöä ‑gba'wʋ.

13 ‑Ɔnyɩɩ dɛ wɛlɩ nɩ bhïlaa,

käbögligbë 'wʋ a nɩkpɛɛ.

‑Gligbë 'la 'wʋ a nɩkpɛ 'nɩɛ ‑bhlɛ tɛkäsɛ Lagɔbʋbɔlibho nʋ.

14 ‑Sɩbhä yɩ ‑wʋ 'mö ‑maa,

‑a ‑yi sɛ nɩɩ ‑Alowli,

Zwidaa a ‑gligbëa 'wʋ ‑mä ɔ 'bhöönɩɛ.

Moyizɩ 'kää Lagɔbʋbɔlibhoo a gbʋʋ bhïlaa,

ɔ'ɔɔ ‑gligbë 'la a dɛ bhïla.

15 Kïbhëa ‑a kää 'nglɩ 'n wɛlɩɩ 'wuë yiɛ gbëaa bhli ma‑a nɩɩ,

Lagɔbʋbɔnyɔ ‑mɔ'la ‑ɔ 'wlʋä,

Mɛlɩkisedɛkö a sɛ a ‑nɔ ɔ glɩnɩɛ.

16 Levii a ‑nʋa a saa ‑sɩbhä ɔ'ɔɔ ‑wʋ.

Wabhlɩ,

sɛ wa glɩnɩɛ Levii a 'yuë a 'yuë a za,

Moyizɩ 'a Gböö mɩɩ 'nyʋää ‑lɛ a libho 'la.

‑Maa ‑mɔ'la ɔbhlɩ,

zɩkpa a ‑maa 'naa 'kää 'kwädlɩ 'yli bhɩɛ,

'a 'mötɛɛnɔɔ mʋʋ kää 'nglɩ 'n ɔ yiɛ Lagɔbʋbɔnyɔ 'zʋ.

17 Wɛlɩ 'la,

sɛ'ɛ Lagɔwɛlɩɩ 'zwiɛ kɛ ‑gömö nɩɩ:

Mɛlɩkisedɛkö a sɛ a

Lagɔbʋbɔnyɔɔ ‑n 'kää 'kwädlɩkwädlɩnɩ glɩnɩ.^b

18 Gbösɩɛkö 'nɩɛ 'mö 'tɛɛ,

zaa yɩ'ɩɛ dɛsɛ ‑kä.

Nza wa ‑sɩɩɛ sɛ.

19 Ɛ'ɛ ‑bhö nyɩasɛ,

‑maa yɩ'ɩɛ nɩkpa ‑nyɛ Lagɔ 'sɔ a wamanɩwamanɛ sasɛ bhɛmanɩ.

Sɩbhä a za Lagɔ nyɩanyɩɛ dlɩ'wʋtɛɛnɔ a ‑dlɩwʋtɛɛnɔ.

Wʋ za,

‑a bhɛnɩa'aa ‑a 'kä Lagɔ yɔwʋ 'dio.

20 ‑Maa yɩ 'kä ‑sɩbhä 'wʋ 'plɩ a dɔ'wʋ,

Lagɔ,

zligo ɔ zligoo.

‑Muë'la 'kä Lagɔbʋbɔwa 'zʋ a dɔ'wʋ,

ɔ'ɔɔ zligo.

21 ‑Maa Zezwii ɔbhlɩ,

Lagɔ 'kɔɔ Lagɔbʋbɔnyɔ 'wʋ 'zʋa yii,

zligozligu yɩ kää 'mö,

‑zlɩ Lagɔ 'nyɔɔ 'dɩ nɩɩ:

'Kwädlɩ a Lagɔbʋbɔnyɔ ‑n glɩnɩɛ.

‑Alowli,

zligo ɔ zligoo,

wɛlɩ 'la,

ɔ 'naa 'kɩ käbödɛ pälanɩ.^c

22 ‑Sɩbhä a za,

mɛnɩnɔɔ ‑a ‑nyɛ Lagɔ ‑mɛnɩnɩɛ Zezwii a 'nglɩ 'möö,

‑tiamö a ‑luä,

wʋ zi bhla'mö a ‑nʋʋ 'wʋ.

23 Bhla'mö a dɔ'wʋ,

‑wa kä a‑a Lagɔbʋbɔlibhoo,

kä'mö wa sɛsɛnu a‑a.

‑Mɔ ‑kä 'ku 'wëë,

‑mɔmɔɔ plɩɛ ‑lɛ,

sa'a ‑këë 'n wa yiɛ zumanɩ.

24 ‑Maa Zezwii ɔbhlɩ,

'kwädlɩkwädlɩnɩ ɔ ‑bhölɩɛ,

zaa 'ɔ Lagɔbʋbɔlibhoo,

wʋ'ʋä wʋ 'kä 'bhlenɩdɛ ghlɩ.

25 ‑Sɩbhä a za,

‑wa 'dionɩɛ Zezwii a 'nglɩ 'mö Lagɔ yɔwʋʋ,

Lagɔ bhɛnɩ ɔ 'kʋä ‑tiamö puë.

Ɛ'ɛ ‑bhö nyɩasɛ,

‑maa Zezwii ‑bhölɩ 'kwädlɩ 'n ɔ bhibhee wa 'wlumö.

26 Sɛ'ɛ n gbää nɩɩ,

Zezwii mɔɔ glɩnɩɛ Lagɔbʋbɔnyɔ 'kɔdɔɔ ‑ɔ ‑ngwanyɩɛ 'wʋ.

Ɛ'ɛ ‑bhö nyɩasɛ,

‑maa mɔɔ ‑wʋä 'wlɩlɩ,

mɔɔ 'nɩɛ gbʋ ‑gömö ‑kä,

mɔɔ 'nɩɛ 'nyinyloli 'mö ‑kä,

ɔ'ɔɔ ‑mä 'nyinylolinʋwa gla'mö ‑wʋ.

‑Mä Lagɔ a'bhë dlɩ 'mö ‑mä ɔ ‑wʋä.

27 Ɔ ‑nyɛ bhla'mö a Lagɔbʋbɔwa 'kädɩɩ 'nɩɛ 'wlʋnɩ.

Bhla'mö a ‑nʋa,

sɛ wa glɩnɩmö a‑a 'nyinylolinʋwa a za,

wa ‑kä nɩkpa a 'wlumö Lagɔ ‑li bʋbɔnɩɛ möö,

wa ‑sumö wanyɩ a ‑nɩ wa 'kɩ tɛɛ wanyɩ a za Lagɔ bʋbɔnɩ 'wë,

wa 'kɔ bhäla nɩkpabhë a 'nyinyloli a za ‑mi'la bʋbɔnɩ.

Sɛɛ zila zɩɛ 'yize,

sa'a wa zʋ a‑a.

‑Maa Zezwii ɔbhlɩ,

‑sɩbhä ɔ'ɔɔ 'zʋ.

Ɔnyɩ ɔ 'wlʋä 'mö,

'wʋ ‑bhlʋ ‑kpöö 'n ɔ yiɛ nɩkpa 'wuë a 'wlumö bʋbɔnɩlu 'zʋ.

28 Sɛ'ɛ n gbää nɩɩ,

Moyizɩ 'a Gböö,

nɩkpa a ‑muë glɩnɩmöä 'nyinylolinʋwa,

'mö yɩ 'zʋa a‑a Lagɔbʋbɔwa 'kädɩ 'wʋ.

‑Maa Lagɔ 'a zligozligowɛlɩɩ ‑yɩ nʋä nɩɩ,

'kwädlɩ a Lagɔbʋbɔnyɔ ‑n glɩnɩɛ,

‑yɩ 'plɩɛ Gböö a 'bhle 'möö,

mɩɩ 'zʋa Lagɔ 'a Yuu ‑ɔ zlɔnɩɛ 'mö,

'kwädlɩ a Lagɔbʋbɔnyɔ 'kɔdɔ 'wʋ.