Ebleewaa 6

Nza n gbää nɩɩ,

Lagɔwɛlɩɩ 'mö a tɛkäkïbhïï wa cɩɛɛ tɛɛ Kliisɩ a dɛɛ,

a‑a nɩ 'päni nimï nzɩɩ ‑a 'kä 'yukusɛ mö,

‑maa ‑aa nɩ tia'a 'wʋ nimï yi.

Miɛ glɩnɩɛ nɩkpɛ 'kä ‑lizoku kɛ'mö ‑sɛ ɔ 'kä Lagɔ dlɩ 'tɛɛnɩ a wɛlɩɩ mi,

2 'wluwɔlʋwlɛɛ a kii 'wuë a 'cɩɛcɩʋʋ a wɛlɩɩ mi,

wa 'kä Lagɔ a 'nglɩ 'mö nɩkpɛ kätɩkpö 'wlu zʋ a wɛlɩɩ mi,

gluwlʋwlɛɛ a wɛlɩɩ mi,

'n Lagɔ 'a ‑zijle 'kädaa a wɛlɩɩ,

yɩ 'wuë,

mö ‑a nɩ 'pänɩa'a nimï ‑a 'kä 'yukusɛ 'mö.

3 Lagɔ ‑kä nglu sa'a ‑sɩbhä ‑a 'kää zʋ.

4 Miɛ abhlɩ,

‑maa nɩkpɛ a ‑mɔɔ ngluä tɛkäsɛ Zezwii 'a wɛlɩɩ 'wʋ 'wë,

‑ɔ ‑sɩɩɛ kɛ'möö,

a‑a nɩ 'yɩɛ ‑ka 'ɔ wɛlɩɩ 'ylɩmö.

Lagɔ kɔ tɛkäsɛ 'ɔ wɛlɩɩ 'mö 'wʋ nglanɩ 'wë,

ɔ kɔ 'Wugɔmʋʋ 'Wlɩlɩ ‑gömö 'zʋ,

ɔ kɔ 'ɔ 'nyupälɩɩ 'wʋ ghäla,

5 sɛɛ Lagɔ 'a wɛlɩɩ nɛnɩɛ,

ɔ yɛ ‑sɩbhä 'ylɩmö,

'pɩwʋlelea ‑a 'kää yi a 'mötɛɛnɔɔ,

ɔ kʋ 'ylɩmö.

‑Li 'la 'wuë,

ɔ kɩ tɛkäsɛ 'ylɩmö 'wë,

6 'n ɔ yiɛ Lagɔ ‑gömö panɩ.

‑Sɩbhä a nɩkpɛ 'la,

wa 'kä gbä ɔ 'kä'ɛ ligba ɔ 'kä 'ɔ ‑lizokuu kɛ'mö ‑sɛ a dɔ'wʋ,

yɩ'ɩɛ 'yio ‑kä.

Ɛ'ɛ ‑bhö nyɩasɛ,

‑maa Lagɔ 'a Yuu 'mö ɔ kʋnɩɛ da'a 'wʋ 'sɔ su 'klʋ,

'mö ɔ zianɩɛ da'a nɩkpabhë a 'yila 'klʋ ‑di.

7 Dʋdʋ,

'nyizakwë lɩbhälɩbhänɩɛ 'wʋ ‑gömöö,

wʋ 'klʋ a lililii wa glʋä ‑kä 'pʋ yɩ ‑kä nɛnɩ ‑wa gwliɛ a dɔ'wʋʋ,

mɩɩ tulanɩɛ 'ylimö nɩɩ,

dʋdʋ 'la,

'nyu wʋ pa‑a Lagɔ a dɛ.

8 ‑Maa ‑dɛgla ‑nyɛ ‑putu 'sɔ a 'yize ‑kʋʋ 'wʋ 'wlʋʋ,

wʋ'ʋä ‑lu 'ylimö ‑kä,

‑bhätlɩnɩ wʋ ‑bhätlɩnɩɛ Lagɔ a dɛ,

zaa sia wa 'kʋä sia.

9 Na dlɩsɛkäwanyɩ,

miɛ abhlɩ da'a.

‑Maa a dɔ'wʋ,

n kɩ dlɩ 'wʋ nɩɩ,

'yio a ‑yio 'mö a nɛmöä 'wʋ zaa,

a yi Lagɔ 'a 'pʋpʋɛɛ ghlɩ.

10 'A sɛ a nʋä a 'bhɩa Lagɔgänɩwaa ‑li a ‑li 'wlu 'yize,

‑sɩbhä ma‑a tulanɩɛ 'ylimö nɩɩ,

a ‑wa ‑tiamö Lagɔ.

Lagɔ,

‑kpöö 'wʋ ɔ ‑wʋä zaa,

ɔ 'naa 'kä ‑sɩbhä 'wʋ dlʋ.

11 ‑Sɩbhä a za n zʋanyɩɛ 'dɩ 'mö nɩɩ,

sɛ a zʋä da'aa,

a nɩ 'tɛmanɩ 'yli yɔwʋ a 'kä ‑sɩbhä 'zʋ 'yize,

‑këë a 'kä ‑mä 'gbë 'wʋ ghlɛ,

nzɩɩ 'saa kää 'nglɩ 'n 'a dilaa 'tɛɛ 'wʋʋ,

yɩ 'kä 'ylɩ ‑bhlʋ 'mö 'yli 'wlʋnɩ.

12 Swɩ nɩ tanyɩ 'kwädlɩ yɔwʋ 'kunɩ,

‑maa bhla'mö a Lagɔnɩkpaa ‑wa 'tɛɛnɩ a‑a Lagɔ dlɩ,

'ɔ wɛlɩɩ a dɔ'wʋ dɛ wa kää sɛ ‑lɛ ‑wa nyɔnʋ a‑a kɛ,

‑këë 'n wa yiɛ ‑mä 'gbë 'wʋ ghlɛ,

'saa Lagɔ gbä a‑a ɔ 'kʋä 'nyɛɛ,

'mö wa ‑wʋä ghlɩ dɔ'wʋ.

Zaa,

nɩkpa 'la,

'wa gbäpöö 'mö a nɩ ‑gänɩ.

Sɛɛ Lagɔ gbää ‑sɩbhä ɔ zʋä 'kwädlɩ

13‑14 Ablaamö,

'mö Lagɔ 'nyɛɛ 'ylɩ ‑bhlʋ 'mö 'dɩ,

ɔ lɛ naa:

'Dɩ n nyɩamöä dɛ'ɛ nɩɩ,

n ‑yimö tenyii 'nyu 'pä,

‑na 'yuë a 'yuë yi zumanɩ.^a

Ɔ 'kää ‑sɩbhä Ablaamö 'dɩ 'nyɛɛ,

Lagɔ,

ɔnyɩ ɔ zligonɩɛ 'mö nɩɩ,

wɛlɩ 'la,

yɩ yi 'yli 'wlʋnɩ klɩpaa.

‑Ɔ 'kää 'ghïli,

‑ɔ 'kɔɔ 'wʋ zi,

ɔ 'kää 'mö zligonɩɩ,

ɔ'ɔɔ ‑bhölɩ,

nza ɔ zligonɩɛ ɔnyɩ 'mö.

15 Ablaamö,

dlɩ 'mö ɔ ‑kpaanɩ ‑këë,

'saa Lagɔ gbä a‑a ɔ 'kɔ 'nyɛɛ,

'n ɔ yuä ghlɩ.

16 Nɩkpɛ ‑kä zligoo,

‑ɔ 'ghïliɛ ‑ɔ zoo 'wʋʋ,

'mö ɔ zligonɩɛ 'mö.

Zligozligu 'la,

muu 'nigbaa kpɛnɩkpɛnɛɛ.

17 Nɩkpaa ɔ 'nyɛɛ 'ɔ wɛlɩɩ,

ɔ 'kʋä 'ylimö tulanɩ nɩɩ,

ɔ yi 'yli 'wälanɩ klɩpaa,

‑maa ɔ 'naa 'kɩ käbödɛ pälanɩ,

nza ɔ bhïliiɛ 'wë 'n ɔ yiɛ zligo.

18 'Kïbhï ‑yɩ 'naa 'kää ‑gba'wʋ sɔ‑ɔ,

‑yɩnyɩɩ 'mö Lagɔ 'nɩɛ bhɛnɩ ɔ 'kä 'yiodɩ ‑sɛɛ,

'sɔ yɩ ‑bhliɛ.

‑Abhʋaa nyɔnʋä dlɩ'wʋtɛɛnɩwɛlɩɩ wa nyɩanyɩɛ kɛɛ,

swɩ ‑kanyɩ yɩ za yɔwʋ plɛmanɩ tenyii,

nzɩɩ ‑a 'kä plɛdɛ ghlɩ.

19 Sɛ'ɛ n gbää nɩɩ,

wɛlɩɩ Lagɔ nyɩanyɩɛ,

ɔ gbää ɔ yi 'yli 'wälanɩɩ,

mɩɩ glɩnɩɛ ‑aa dlɩ'wʋtɛɛnɔ,

mɩɩ kää 'nglɩ,

a‑a 'nɩ bhlia'aa gba'agbagba'a,

‑mä zlɩ 'mö a Lagɔbudu 'Kɔdʋʋ a 'mlɩ 'mlɩ,

mää ghlidoo 'kɔdʋʋ ziza a‑a 'wʋʋ,

a‑a bhɛnɩa'aa ‑a 'kä ‑mä plɛ.

20 ‑Mä'la,

‑mä Zezwii 'plɩɛ 'yuku,

‑mä ɔ plɛɛ ‑aa za.

Ɛ'ɛ ‑bhö nyɩasɛ,

‑maa 'mö Lagɔ 'zʋaa Mɛlɩkisedɛkö a sɛ a 'kwädlɩ a Lagɔbʋbɔnyɔ 'kɔdɔɔ 'wʋ.