Ebleewaa 1

'Bɔgʋʋ Zezwii a tietienyɔ ‑bhlʋ 'cɛlɩɛ

Ebleewaa

'wʋʋ

‑Mä Lagɔ ghlɛnɩɛ 'ɔ Yuu 'mö 'n ɔ ‑yinyɩɛ 'ɔ wɛlɩɩ 'nyɛ

Bhla'mö a dɔ'wʋ,

Lagɔ ‑kä a ‑aa dɩbawa a dɩbawa wɛlɩ 'nyɛɛ yii,

'ɔ 'möbhïlanɩwaa 'mö ɔ ghlɛnɩ a‑a 'mö.

'Wʋ 'kɔkɔmlɛ 'n 'ki a ‑bɛ 'mö ɔ 'nyɛnuë a‑a 'dɩ.

2 Sa'a ‑këë,

‑a'a 'tɛnyɩ ‑a ‑wʋä dɛ'ɛ 'mö,

‑ɛ glɩnɩɛ 'pɩwʋ a 'gbëbhlenɩtɛnyɩɩ,

'n ɛ yiɛ ghlɛ.

Ɛ 'mö a dɔ'wʋ,

ɔ ‑kanyɩɛ 'dɩ 'nyɛɛ yii,

'ɔ 'Yuu 'mö ɔ ghlɛnɩɛ 'mö,

'mö ɔ 'zʋaa ‑lii 'wuë a ‑lowli 'wʋ,

'mö ɔ ghlɛnɩ'ɛɛ 'mö 'n ɔ yiɛ 'pɩwʋ a ‑lii 'wuë ‑bhɛ.

3 Lagɔ 'a 'ghïlinɔɔ ‑wʋʋä ‑sɩbhä a sɛ ‑wʋʋ,

‑mä 'ɔ Yuu 'mö,

‑mä wʋ 'yoonɩɛ 'ylɩmö.

Sɛɛ ɔ dɩba Lagɔ ‑wʋä 'tɩɩ,

‑sɩbhä ɔ ‑wʋmöä.

'Ɔ ngli a wɛlɩɩ a 'mötɛɛnɔɔ 'mö ɔ ‑sunɩɛ 'pɩwʋ a ‑lii 'wuë 'mö.

Mɔɔ ‑sɛɛ nɩkpaa 'wa 'nyinylolii a gbʋʋ ‑gömö.

Ɔ 'zʋä ‑sɩbhä 'wëë,

'n ɔ yiɛ ‑mä Lagɔ ‑ɔ 'kämanɩɛ ‑lii 'wuë ‑gömö a luukɛ 'wʋ sɛ glɩɛ mö,

4 mɩɩ kää 'nglɩ 'n Lagɔ yoo 'nglɩ 'kädɩ 'nyɛ ‑yɩ ziɛ Lagɔzuzukuu a ‑nɩɩ 'wʋʋ,

‑sɩbhä a za,

mɔɔ kää dɛsɛ mɔɔ ziɛ Lagɔzuzukuu 'wuë 'wʋ.

Yuu mɔɔ 'ghïliɛ mɔɔ ziɛ Lagɔzuzukuu 'wuë 'wʋ

5 'Lɩlɩlɩ a dɔ'wʋ,

Lagɔ 'nɩɛ ‑bhlɛ tɛkäsɛ Lagɔzuzukwë 'dɩ 'nyɛ nɩɩ:

‑Nmöö glɩnɩɛ 'na Yuu,

tɛɛnɩ zɩ'ɛ dɛ'ɛ,

‑amöö glɩnɩɛ ‑na dɩba.^a

'N ɔ yi'ɛɛ nɩɩ:

‑Amöö 'kää ɔ dɩba glɩnɩ,

'na Yuu 'mö ɔ 'kää glɩnɩ.^b

6 'Ɔ Yuu ‑ɔ glɩnɩɛ 'yukugaa,

ɔ lɛ 'kɔɔ mä'ä dʋdʋ 'wʋ tiee yii,

sɛ'ɛ ɔ nʋ'ɛɛ nɩɩ:

Lagɔzuzukuu 'wuë,

yɩ nɩ 'pä ‑lɛ ɔ dlɩ 'mö ‑kokomïladigbï glu yɩ 'kɔ bʋbɔ.^c

7 Lagɔzuzukuu yɩbhlɩ,

sɛ'ɛ yɩ cɛlɩɛ yɩ dɛ nɩɩ:

Mɔɔ 'zʋaa Lagɔzuzukuu nyɛmʋ 'wʋ.

'Yliwʋwa 'la,

mɔɔ 'zuëë ‑kosubïli 'wʋ.^d

8 ‑Maa Lagɔ 'a Yuu,

sɛ'ɛ yɩ cɛlɩɛ ɔ dɛ nɩɩ:

Lagɔ,

‑na'a 'kämanɔɔ,

wʋ 'naa 'kä 'kwädlɩnɩ 'yli bhɩɛ.

'Mözlɔnɩsɛ ‑n 'kämanɩɛ.

9 'Saa zlɔnɩɛ 'mö,

mö ‑n ‑waa.

‑Nn‑ä 'nyinyloli ‑wa 'lɩlɩlɩ.

‑Sɩbhä a za,

Lagɔ,

‑na'a Lagɔ ‑samöä ‑lɛ ‑mä ‑na 'bhɩa 'wuë gla'mö,

'n ɔ ‑yimöä 'mänalikpö 'wlu zʋ,

n‑n yiɛ 'blɩlowli 'zʋ.^e

10 Sɛ'ɛ yɩ cɛlɩ'ɛɛ ɔ dɛ nɩɩ:

‑Nmö ‑Alowli,

'pɩwʋ a ‑lii 'wuë 'kää tɛɛɛ yii,

‑nmöö 'wälaa dʋdʋkpätaa.

‑Mä ‑na kä'mö ‑mä zlɩɩ 'bhöönɩɛ.

11 Yɩ 'wuë,

'yli yɩ 'kää bhɩɛ,

‑maa ‑nmö ‑naa,

'kwädlɩ ‑n 'kää ‑bhölɩ.

Sɛɛ ‑bäna bhɩɛ'ɛ 'wʋʋ,

yɩ 'wuë,

‑sɩbhä yɩ 'kää 'wʋ bhɩɛ.

12 Sɛ wa panɩɛ lekwi 'wʋʋ,

‑sɩbhä ‑n 'kɩɛ 'wʋ panɩ.

Sɛ wa cɩanɩ'ɛ ‑banɩɩ,

‑sɩbhä ‑n 'kɩɛ cɩanɩ,

‑n 'kä 'lilili yɩ 'bhle 'mö zʋ.

‑Maa ‑nmö ‑naa,

‑nn‑ä ‑n 'kä 'kwädlɩ 'wʋ bhɩɛ,

‑bhölɩ ‑n 'kää ‑bhölɩ 'yize.^f

13 Lagɔ 'nɩɛ'ɛ ‑bhlɛ tɛkäsɛ Lagɔzuzukwë 'dɩ 'nyɛ nɩɩ:

Glɩ dɛ'ɛ na luukɛ 'wʋ sɛ,

n 'kä ‑na'a ‑gblɩwaa ‑mä ‑na kplɩzɛmö 'zʋ.^g

14 Lagɔzuzukuu yɩbhlɩ,

Lagɔ a 'yliwʋwa a 'yize yɩ glɩnɩɛ.

Nɩkpaa ‑wa 'kää 'ɔ 'pʋpʋɛɛ ghlɩɩ,

yɩ 'kʋä 'wʋ yi.