2 Tesaloniikö a ‑nʋa 2

‑Lii ‑yɩ 'kää 'yuku ‑gä 'wë Zezwii Kliisɩ 'a yiyizlɩɩ 'kä ghlɛɛ

‑Atʋayuënyɩ,

‑Alowli Zezwii Kliisɩ yi yi,

‑a 'wuë ‑a yi ‑lɛ ɔ yɔwʋ 'wlu 'titanɩ.

Wɛlɩ 'la a dɔ'wʋ,

sɛ'ɛ ‑a nyanyɩɛ 'dɩ nɩɩ:

2 N nɩkpɛ ‑kaanyɩ 'dɩ 'nyɛ nɩɩ,

‑lɛ a zlɩ 'la,

ɛ yɛ ghlɛɛ,

yɩ nɩ tanyɩ nyɩasɛ 'wlumö nyima,

'a dilaa nɩ tɩ 'mö ghɔlɔnɩ.

'N ‑mɔmɔɔ ‑kä nɩɩ,

Lagɔ 'a 'Wugɔmʋʋ 'mö wɛlɩ 'la 'bhöönɩɛ 'mö nʋʋ,

‑mɔ ‑kä nɩɩ,

‑a'bhï ‑abhʋa gbää ‑sɩbhää,

‑mɔmɔɔ ‑kä'ɛ nɩɩ,

‑abhʋaa 'pää 'bɔgʋ,

a‑a yiɛ ‑sɩbhä gbää,

wa 'wuë,

a nɩ tuë dlɩ 'wʋ ‑kä.

3 ‑Bɛ nɩ tanyɩ sa'a a wɛlɩɩ a 'ke ‑bhlʋ a'bhë 'mö ylʋ nʋnɩ.

‑Maa nɩkpa 'kɔkɔmlɛ,

wa 'maa 'kä Lagɔ ‑gömö panɩ 'wë,

'Kpʋkpʋnyɔɔ ‑ɔ sa‑a ‑lɛ ɔ 'kä 'yli bhɩɛ a za‑a,

ɔ 'maa 'kä 'yli 'wlʋ 'wë,

'n Zezwii Kliisɩ 'a yiyizlɩɩ 'kää ghlɛ.

4 Lagɔ a ‑Gblɩnyɔ 'la,

ɔ ‑kä 'yli 'wlʋʋ,

'saa 'wuë nɩkpaa zʋä 'klʋkpamö,

wa bʋbɔɔ,

ɔ yi sɛ ‑sɛ.

Lagɔbudu 'Kɔdʋʋ a'bhë 'mö,

ɔ yi ‑mä plɛ,

ɔ yi ɔnyɩ Lagɔ a 'bhle 'mö zʋ,

ɔ yi nɩɩ 'mö wa nɩ bʋbɔ nʋ.

5 ‑Li 'la 'wuë,

dɛ n ‑wʋ a‑a ‑bhlɛ ‑mä a jijo'wʋʋ,

n kanyɩ a yɩ 'dɩ 'nyɛ 'wë,

'a dilaa 'nɩ bhlinɩ bhä ‑lɛ ‑a?

6 ‑Maa 'saa kää 'nglɩ 'n 'Kpʋkpʋnyɔ 'la 'nɩɛ ‑bhlɛ 'yli 'wlʋʋ,

a'bhï a ‑yuu.

Miɛ nɩɩ 'tɛnyɩ Lagɔ a'bhë ‑dɩɛ,

ɛ ‑kä ghlɛ 'wëë,

'n ɔ 'kää 'yli 'wlʋ.

7 'Kpʋkpʋnyɔ 'la 'a 'mötɛɛnɔɔ 'nɩɛ abhlɩ ‑bhlɛ sasɛ gbëdanguu bhli,

‑maa wʋ yɛ 'wʋ libhoo tɛɛ.

‑Maa ‑ɔ kää 'nglɩ 'n wʋ 'nɩɛ ‑bhlɛ sasɛ gbëdanguu bhlii,

ɔ 'maa 'kʋ 'tɛnyɩ 'nyɛ 'wë,

'n wʋ 'kää gbëdanguu bhli.

8 'N 'Kpʋkpʋnyɔ 'la 'kää 'yli 'wlʋ,

'n ‑Alowli Zezwii 'kɔa'aa 'ɔ ngli a nyɛmʋ 'mö 'lɩbhänɩ.

‑Alowli 'a 'ghïlinɔ 'kɔdʋʋ ‑kä sa'a 'yli 'wlʋnɩɩ,

wʋ 'yize mʋʋ 'kää 'nglɩ ‑kä 'nyinylolinʋnyɔ 'kɔdɔ 'la 'kä 'yli bhɩɛ.

9 'Kpʋkpʋnyɔ 'la,

ɔ ‑kä yii,

Sataa 'a 'mötɛɛnɔɔ mʋʋ 'kɔɔ ‑gömö ‑wʋ,

ɔ 'kä zɩzɛ a kii 'wuë 'pä,

ɔ 'kä nɩkpa 'ɔ 'mötɛɛnɔɔ 'ylimö tulanɩ,

ɔ 'kʋä dula.

10 ‑Lizoku a kii 'wuë 'mö ɔ 'kää 'mö ghlɛnɩ ɔ 'kä nɩkpa dula,

wa 'kä 'yli bhɩɛ.

Nyɩasɛ wa'aa wa 'kä sa'a 'yli bhɩɛ,

‑maa Lagɔ 'a ‑tiawɛlɩɩ ‑yɩ 'kʋä a‑a puëë,

wa 'niɛ 'yɩbhä zaa,

wa 'niɛ 'wʋ nglu,

nza wa 'kää ‑sɩbhä 'yli bhɩɛ.

11 ‑Sɩbhä a za Lagɔ 'tatinuëë 'yi,

wɛlɩ a kii 'wuë ‑yɩɩɛ gbëaa 'mö ‑kä 'lɩlɩlɩɩ,

'n yɩ nyimuëë 'wlumö 'n wa kɩɛ dlɩ 'wʋ.

12 Sɛ'ɛ n gbää nɩɩ,

nɩkpaa 'wuë,

Lagɔ 'a ‑tiawɛlɩɩ,

‑wa 'niɛ dlɩ 'wʋ ‑kä,

‑lizoku a nʋnwɛ ‑bhöä 'mäna 'wʋʋ,

Lagɔ yuë yɩ za gbʋ köbha.

Lagɔ 'kanyɩ 'ɔ 'pʋpʋɛ 'nyɛ nza ɔ ‑saanyɩɛ ‑lɛ

13 ‑Abhʋa abhlɩ,

‑a kä ‑a 'kä 'kwädlɩ a za Lagɔ bhälɩ.

‑Atʋayuënyɩ,

abhʋa Lagɔ ‑wa tenyii.

Dɛɛ ɔ'ɔ a‑a ‑bhlɛ ‑lii 'wuë ‑bhɛ 'n ɔ yeanyɩ a‑a ‑lɛ ‑sɛ a 'kä 'ɔ 'pʋpʋɛ ghlɩ.

'Ɔ 'Wugɔmʋʋ mɔɔ ‑wʋanyɩɛ ‑gömö 'n a ‑bhölɩɛ Lagɔsɛ 'n a kää 'ɔ ‑tiawɛlɩɩ dlɩ 'wʋ.

14 'Mänatɩtɩɩ ‑a 'nyanyɩɛ,

'mö Lagɔ ghlɛnɩɛ 'mö 'n ɔ yeanyɩɛ ‑lɛ ‑sɛ.

Nzɩɩ a 'kä 'ɔ 'pʋpʋɛ 'la ghlɩ.

‑Alowli Zezwii Kliisɩ 'a 'nglɩmömɛɛ,

a 'kɛ'ɛ ghlɩmö.

15 ‑Sɩbhä a za,

‑atʋayuënyɩ,

Lagɔwɛlɩɩ ‑a 'cɩanyɩ a‑a,

‑a ‑wʋ a‑a ‑mä a jijo'wʋ ‑a ‑nɩɩ ‑nyɛ ‑mi ‑a 'cɛlanyɩ a‑a 'wʋ 'sɔ,

yɩ dɔ'wʋ a nɩ ‑nyɔnʋ glu,

a nɩ ti 'wʋ dlʋ.

16 ‑Aa dɩba Lagɔ ‑ɔ ‑wanyɩɛ,

‑a pɔ ‑bɛlɩ ɔ nɩ 'pä a ngäzɩdlɩ ɔ 'kanyɩ 'kwädlɩ 'yli yɔwʋ 'tɛmanɩ.

Ɔ nɩ 'nyanyɩ ‑tiamö a dlɩtɛɛnɩdɛ.

17 Ɔ ‑nyɛ ‑Alowli Zezwii Kliisɩ 'sɔ,

wa nɩ 'nyanyɩ 'mötɛɛnɔ a 'kä 'yli yɔwʋ 'tɛmanɩ,

‑mä 'a nʋnʋlii 'wuë ‑nyɛ 'a bhïlawɛlɩɩ 'wuë 'sɔ 'mö,

'saa nɛnuëë dlɩ yɔwʋʋ,

a 'kɩ nʋ.