2 Tesaloniikö a ‑nʋa 1

'Sɔnabɔgʋʋ Pɔɔlʋ 'cɛlɩɛ

Tesaloniikö a ‑nʋa

'wʋʋ

Bhälɩwɛlɩɩ

‑Amö Pɔɔlʋ,

n ‑nyɛ Silasɩ 'sɔ,

Timotee kökä,

‑abhʋaa panyɩɛ 'bɔgʋ nɩ 'wʋ.

Abhʋaa glɩnɩɛ ‑aa dɩba Lagɔ ‑nyɛ ‑Alowli Zezwii Kliisɩ 'sɔ a ‑nʋä,

abhʋaa ‑wʋä ‑mä Tesaloniikö glɔ 'möö,

‑a bhälanyɩ.

2 'Tɩɩglɩglɛɛ ‑nyɛ 'nyupälɩɩ 'sɔ ‑yɩ 'bhöönɩɛ ‑aa dɩba Lagɔ ‑nyɛ ‑Alowli Zezwii Kliisɩ 'sɔ 'möö,

yɩ nɩ ghlanyɩ 'wʋ.

Zezwii Kliisɩ ‑kä yii ɔ yi 'bhlɩbhëa 'wuë ‑zijle tu

3 ‑Atʋayuënyɩ,

‑a kä ‑a 'kä 'kwädlɩ a za Lagɔ bhälɩ 'yize.

Ɛ'ɛ ‑bhö nyɩasɛ,

‑maa 'a sɛ a 'tɛɛnɩɛ Lagɔ dlɩ 'n sɛ a ‑wawanɩɛ,

‑sɩbhä 'yukusɛ a möä 'yize.

4 'A dɛ a kää sɛ,

sɛ a nyɔnʋä ‑lɛ kɛ 'yize,

'n zwɩɩ 'wuë 'a ‑gblɩwaa zianyɩɛ 'mö,

sɛ a 'tɛɛnɩɛ Lagɔ dlɩ 'yize a za,

Lagɔ a ‑nʋa a ‑zɩkpöö 'wuë gla'mö,

‑a ‑kä ‑mä ghlɛɛ,

'mänasɛ ‑a nyʋä a 'tɩtɩ.

5 ‑Atʋayuënyɩ,

a ‑kä sa'a klɩɩ 'wuë 'yɩ ‑këë,

sɛɛ Lagɔ tuä 'mözlɔnɩsɛ 'ɔ ‑zijlii,

a yi 'ylɩ ‑bhlʋ 'mö ‑sɩbhä 'ylɩmö.

Ɛ'ɛ ‑bhö nyɩasɛ,

‑maa klɩ 'la 'wuë a ‑wʋä da'a 'pɩwʋ mää Lagɔ 'kämanɩɛ a za 'yɩ dɔ'wʋʋ,

ɛ yi 'nglɩ ‑kä ɔ yeanyɩ ‑mä 'bhle 'nyɛ.

6 Sɛ'ɛ n gbää nɩɩ,

Lagɔ 'mö ɔ zlɔnɩɛ zaa,

nɩkpaa ‑wa 'yɩanyɩɛ da'a 'klɩɩ,

ɔ yuë 'ylɩ ‑bhlʋ 'mö 'klɩ 'yɩamö.

7 ‑Maa abhʋa wa 'yɩaa da'a 'klɩɩ,

‑zlɩ ‑Alowli Zezwii ‑kä zɩla'a 'yli 'wlʋʋ,

a ‑nyɛ ‑abhʋa 'sɔ,

ɔ ‑yinyɩ 'zwɩzize ngli ‑sɛ.

‑Mä ghäyɩ 'wʋ ‑mä ɔ 'kää 'bhöönɩ ɔ ‑nyɛ 'ɔ zuzukuu ‑yɩ 'tɛɛ 'mö 'sɔ.

8 Ɔ ‑kä yi dɔ'wʋ ‑wʋʋ,

‑kosugbagbʋ jijo'wʋ ɔ 'kää ‑wʋ.

Nɩkpaa ‑waaa 'yɩbhä wa 'kä Lagɔ yɩbhlɩnɩ,

‑waa ngluä ‑Alowli Zezwii 'a 'Mänatɩtɩɩ 'wʋʋ,

ɔ 'kʋä 'wa ‑lizokuu a 'pɛna 'nyɛ.

9 'Wa 'pɛna Lagɔ 'kʋää 'nyɛ ma‑a nɩɩ:

'Yli wa 'kää bhɩɛ 'lɩlɩlɩ,

wa 'naa 'kä 'kwädlɩ ‑lɛ ɔ 'yila 'klʋ 'sibhë,

wa 'naa 'kä 'ɔ 'ghïlinɔɔ 'ylɩmö.

10 ‑Lɛ a zlɩ 'la ‑bhʋlʋ ‑kpɔ 'mö,

ɔ ‑nʋa 'wuë ‑wa 'tɛɛnɔɔ dlɩɩ,

wa yi 'mäna nʋ,

wa yi ɔ 'nglɩ 'ghlimanɩ.

A'bhï,

abhʋaa ngluä 'ɔ wɛlɩɩ ‑a 'nyanyɩɛ 'wʋʋ,

a yi ‑mä wa gla'mö ‑wʋmö,

a yi ɔ 'nglɩ 'ghlimanɩmö.

11 ‑Sɩbhä a za ‑a bhibhee 'kwädlɩ a 'wlumö Lagɔ.

Sɛ'ɛ ‑a bhibheoo nɩɩ,

ɔ nɩ gïgananyɩ sasɛ 'wlu,

'ɔ 'pɩwʋlelea ‑anyɩɩ za ɔ ‑saanyɩɛ ‑lɛ,

a 'kä ‑mä a 'wʋ 'bhle ghlɩ.

Sɛ'ɛ ‑a bhibheo'ɛɛ nɩɩ,

‑li a ‑li 'wuë a yɩbhää a 'kä nʋʋ,

ɔ nɩ 'zʋanyɩ 'ɔ 'mötɛɛnɔɔ ‑gömö,

a 'kɩ nʋ,

'a sɛ a 'tɛɛnɔɔ dlɩɩ,

‑sɩbhä 'kä ‑mä 'a nʋnʋlii 'wuë 'mö 'ylɩmö 'yoo.

12 ‑Sɩbhä a dɔ'wʋ,

a yi ‑Alowli Zezwii Kliisɩ a 'nglɩ 'ghlimanɩ,

ɔ'bhë,

ɔ yeanyɩ bhɩzɩ.

Ɔ ‑nyɛ ‑aa dɩba Lagɔ 'sɔ,

'wa ngäzɩdlɩɩ a za,

nza yɩ 'kää ‑sɩbhä 'yli 'wlʋnɩ.