A nɩ pö Zezwii 'a yiyizlɩɩ 'wʋ
5
‑Atʋayuënyɩ,
'tɛnyɩ Lagɔ ‑dɩɛ,
zlɩ a'bhë ‑lɛ a wɛlɩ 'la 'kää 'mö 'yli 'wlʋnɩɩ,
yɩ dɔ'wʋ,
yɩ'ɩɛ dɛsɛ ‑kä ‑a 'kanyɩ yɩ za 'wʋ 'cɛlɩ.
2 Ɛ'ɛ ‑bhö nyɩasɛ,
‑maa a'bhï a ‑yi ‑tiamö sɛ nɩɩ,
sɛɛ 'winyɔ yi'ɛ sabʋ zɛmövusɛɛ,
zlɩ ‑Alowli Zezwii 'kää 'mö yii,
‑sɩbhä ɛ ‑kanyɩɛ zɛmö ‑vu.
3 Dɛɛ nɩkpa 'kää nɩɩ,
‑a yɛa'a ‑sɩkaa 'tɩɩglɩglɛ ghlɩ,
‑a yia'a ‑pälɛpälɛ glɩ,
‑lɛ a 'tɛnyɩ 'la ‑bhʋlʋ ‑kpɔ 'mö,
‑lɛ Lagɔ 'a ‑zijlea 'kʋää zɛmö ‑vunɩ.
Sɛɛ ‑gbapögbapɛ bhli'ɛ gbadɩnglɔ 'wʋʋ,
‑sɩbhä ‑lɛ a zlɩ 'la 'kʋää 'wʋ bhli.
Wa gla'mö a ‑nɔ ‑bhlʋ a'bhë 'naa 'kɛ ngli 'pʋ.
4 ‑Maa ‑atʋayuënyɩ,
abhʋa abhlɩ,
nɩkpa a ‑muë ‑bhölɩnɩɛ guylukwë 'möö,
'mö a 'nɩɛ glɩnɩ zaa,
‑lɛ a zlɩ 'la 'naa 'kanyɩ 'winyɔ a sɛ zɛmö ‑vu.
5 Ɛ'ɛ ‑bhö nyɩasɛ,
‑maa abhʋa Zezwii ‑nʋa,
a 'wuë,
lɩlɛ ‑nyɛ ‑gägäzlɩ 'sɔ a 'yuë a glɩnɩɛ.
‑Aa ‑bhö guylukwë ‑nyɛ 'yuylukwë 'sɔ a yuë.
6 ‑Sɩbhä a za,
a‑a nɩ tɩ ngämö ‑muë'la ‑waaa Zezwii a ‑nʋä glɩnɩ a saa,
‑maa a‑a nɩ ‑ligba ‑a 'kä ‑lɛ glɩ,
a‑a nɩ 'nɛɛnɩ ‑anyɩ 'wʋ.
7 Ngämöngämöwaa,
sabʋ wa ngämöä.
Nʋnɩmäwaa,
sabʋ wa lʋa'ɛɛ wanyɩ nʋ 'wʋ.
8 ‑Maa ‑abhʋaa glɩnɩɛ ‑gägäzlɩɩ a ‑nʋaa,
a‑a nɩ ‑ligba ‑a 'kä ‑lɛ glɩ.
‑Sɩbhä a za,
sɛɛ tʋgwɩnyɔ ‑su'ɛ 'ɔ tʋgwɩnɩlii 'möö,
a‑a nɩ ‑gïganɩ ‑sɩbhä 'wlu ‑a 'kä ‑lɛ glɩ.
Miɛ nɩɩ,
Zezwii Kliisɩ,
a‑a nɩ 'tɛɛnɔɔ dlɩ,
'ɔ ‑wawʋ nɩ ‑wʋnyɩ dila zɛmö,
‑li 'la,
mɩɩ nɩ glɩnɩ ‑aa leyibäna.
Sɛ ‑a 'tɛɛnɩɛ dlɩ nɩɩ,
‑a yi Lagɔ 'a 'pʋpʋɛɛ 'wuë ghlɩɩ,
‑sɩbhä nɩ glɩnɩ ‑aa leyiwugbële.
9 Lagɔ ‑sanyɩɛ ‑lɛ,
ɔ'ɔɔ 'yɩbhä ‑a nɩ bhɩɛ 'ɔ ‑zijle 'kädaa a zlɩɩ 'mö 'yli,
‑maa,
‑Alowli Zezwii Kliisɩ a bɔɔmö a za,
‑a nɩ 'pʋ.
10 ‑Sɩbhä a za Zezwii Kliisɩ 'kuä ‑aa 'wlumö,
nzɩɩ ‑zlɩ ɔ ‑kä yii,
‑abhʋa ɔ ‑nʋa 'wuë,
‑ɔ yi ‑bhlɛ ‑bhölɩ oo,
‑ɔ yi a ku‑u 'wë oo,
‑a ‑nyɔɔ 'sɔ ‑a 'kä 'kwädlɩ ‑bhölɩ.
11 Zaa,
‑atʋayuënyɩ,
a nɩ 'päpänɩ swɩ nyɛmʋ 'mö,
'a dlɩ'wʋkänɔɔ 'käa nyɔnʋ.
‑A ‑yi sɛ nɩɩ,
a zʋ ‑sɩbhä zaa,
a nɩ 'zʋ ‑sɩbhä 'kwädlɩ 'yize.
'Bhlenɩdɛ ‑nyɛ bhälɩwɛlɩ 'sɔ
12 ‑Atʋayuënyɩ,
‑bɛlɩ ‑a panyɩɛ dɛ'ɛ nɩɩ:
A gla'mö a ‑nʋa 'wuë ‑wa ‑gänanyɩɛ 'yuku,
‑wa ylɔɔ wa 'kanyɩ Lagɔ 'a wɛlɩɩ slʋnɩ a za‑a,
‑wa zʋanyɩɛ 'dɩ 'möö,
a nɩ 'zuë 'klʋkpamö.
13 Libhoo wa nʋä a 'wlumö a za,
a nɩ 'zuë ‑lɛ tenyii,
a nɩ kä wa ‑wawʋʋ dlɩ zɛmö.
A 'wuë a nɩ ‑wanɩ.
14 ‑Atʋayuënyɩ,
sɛ'ɛ ‑a zʋanyɩ'ɛɛ 'dɩ 'mö nɩɩ:
‑Wa pönɩɛ swɩ 'wʋʋ,
a nɩ 'nyʋä 'dɩ,
wa nɩ nʋ libho.
‑Muë swɩ 'kunɩɛ yɔwʋʋ,
a nɩ 'pʋä swɩ nyɛmʋ 'mö.
‑Mä Lagɔ 'a wɛlɩɩ 'mö a dɔ'wʋ,
‑waaa ‑bhlɛ sasɛ 'yli yɔwʋ 'tɛmanɩɩ,
a nɩ kwänuë wa 'kä 'yli yɔwʋ 'tɛmanɩ.
Nɩkpaa 'wuë ‑gömö a dɔ'wʋ,
a nɩ ‑kpaanɩ dlɩ 'mö.
15 A 'nɛmanɩ anyɩ 'wʋ a tɩa anyɩ a kpa ‑sɛ,
‑maa ‑lii 'wuë 'mö a dɔ'wʋ,
a 'kä ‑li a ‑li a 'yize 'wlu nʋnʋnɩ a gbʋʋ mʋʋ nɩ plɛnanyɩ 'kwädlɩ.
A nɩ nʋ nɩkpa 'wuë ‑li a ‑li 'wlu.
16 A nɩ ‑wʋ 'kwädlɩ 'mäna 'mö.
17 A nɩ bhibhe 'kwädlɩ Lagɔ.
18 Sɛ yɩ 'nɩ 'mö ‑wʋ oo,
sɛ yɩ ‑kä 'mö ‑wʋ oo,
a nɩ bhälɩ 'kwädlɩ Lagɔ.
‑Wa ‑glɛɛ Zezwii Kliisɩ 'wʋʋ,
sɛɛ Lagɔ yɩbhää wa dɔ'wʋʋ,
‑sɩbhä ma‑a da'a.
19 Lagɔ 'a 'Wugɔmʋʋ 'a libhoo,
a nɩ tu 'gbë 'yli klɛnɩ.
20 Lagɔ 'a 'möbhilanɩwaa a wɛlɩɩ,
a nɩ ti kplɩ sɛ tlinɩ.
21 ‑Maa,
a nɩ yɩlɩ sasɛ yɩ 'wuë 'mö,
‑mii 'bhöönɩɛ ‑tiamö Lagɔ 'möö,
'mö a nɩ 'zʋ 'klʋkpamö.
22 ‑Lizoku a kii 'wuë,
a nɩ 'dionii gwë.
23 Lagɔ,
'tɩɩglɩglɛ 'bhöönɩɛ 'möö,
ɔ nɩ 'zʋanyɩ ‑tiamö ɔ 'yize a ‑nʋä 'wʋ.
'A 'wugaa ma,
'a dlɩpäsaa ma,
'n 'a kpökpaa,
ɔ nɩ ‑swii ‑këë ‑Alowli Zezwii Kliisɩ 'a yiyizlɩɩ 'kä ghlɛ,
ɔ ‑kä yi ɔ tanyɩa ‑maa yɔwʋ ghlɩ.
24 Lagɔ ‑ɔ ‑saanyɩɛ ‑lɛ a 'kä ɔ ‑nʋä glɩnɩɩ,
'ɔ sɛ ɔ yɛɛ gbä 'wëë,
‑sɩbhä ɔ zʋä klɩpaa zaa,
mɔɔ 'kɩɛ a dɔ'wʋ 'yli 'wälanɩ.
25 ‑Atʋayuënyɩ,
a nɩ bhibhe ‑aa 'wlumö.
26 Zezwii a ‑nʋa 'wuë,
a nɩ bhäluë na 'wlumö ‑wanɩwanɩsɛ.
27 ‑Alowli Zezwii a 'nglɩ 'mö n bhianyɩ,
'bɔgʋ nɩ,
a nɩ zɛlɩnuu Zezwii a ‑nʋa 'wuë a 'yila 'klʋ 'mö.
28 ‑Alowli Zezwii Kliisɩ nɩ 'panyɩ 'nyu!