Kolɔɔsɩ a ‑nʋa 4

Abhʋa 'bhidɩbawaa,

a nɩ yɩbhlɩnɩ sɛ nɩɩ,

a ‑kämö'ɛ abhlɩ 'bhidɩba,

ɔ ‑wʋ ‑mä ghäyɩ 'wʋ.

Zaa,

'saa zlɔnɩɛ 'möö,

'mö a nɩ nʋ 'a göwaa 'wlu,

'saa a kää a 'kʋä 'nyɛɛ,

a nɩ 'nyʋänyɩ.

A ‑kä ‑lɛ glɩɩ a nɩ bhibhe Lagɔ 'yize

2 A 'wuë,

a ‑kä ‑lɛ glɩɩ,

a nɩ bhibhe Lagɔ 'yize.

'A bhibhebhibhiu 'wuë 'mö,

ɔ bhälɩbhälɩ dɔ'wʋ swɩ nɩ tanyɩ yɔwʋ 'kunɩ.

3 A ‑kä 'kwädlɩ bhibhee,

a nɩ bhibhemö 'gämö ‑aa 'wlumö,

Lagɔ ‑kanyɩ 'tɛnyɩ a ‑tɛnyɩ 'nyɛ,

wɛlɩɩ ‑yɩ bhilaa Kliisɩ a dɛ ‑yɩ ziza‑a a‑a,

‑a 'kä nɩkpabhë yɩ zɛmösɛsaa kɛ 'klʋkälɩnɩ.

Wɛlɩ 'la,

yɩ za n ‑wʋä dɛ'ɛ ‑jie 'mö.

4 Miɛ abhlɩ da'a,

‑maa a nɩ bhibhe,

sɛ n kää n 'kɩ bhïlaa,

n 'kɩ ‑sɩbhä gbëaa bhïla 'yize.

5 Nɩkpa ‑waaa Zezwii a ‑nʋä glɩnɩ,

wa 'yila 'klʋ a dɔ'wʋ,

'a nɛmönɛmösaa,

a nɩ 'nɛmanɩ ‑sɩbhä 'wʋ.

'Tɛnyɩ Lagɔ nyanyɩɛ,

a nɩ tɛ 'yi 'tatinɩ ɛ nɩ tɩ nyɩasɛ 'plɩ.

6 'A ngli a wɛlɩ nɩ ‑wʋ 'kwädlɩ ‑pälɛpälɛ.

Yɩ 'wuë yɩ nɩ kä dɛsɛ,

‑sɩbhä a dɔ'wʋ,

nɩkpɛ ‑kaanyɩ wɛlɩkïbhë 'wʋ 'yɩbhänɩɩ,

a yi sasɛ a pʋlʋnɩsɛ yɩbhlɩnɩ.

Bhälɩwɛlɩɩ Pɔɔlʋ 'bhenɩɛ 'gbëë

7 ‑Amö na a,

‑aa ‑daayu Tisikö 'mö n kanyɩɛ 'wʋ tie ɔ 'kanyɩ 'na tɩtɩɩ 'wuë 'nyɛ.

Tisikö,

dlɩsɛ ɔ ‑kanyɩɛ tenyii,

‑a ‑nyɔɔ 'sɔ,

a‑a nʋä ‑Alowli 'a libhoo.

Sasɛ ɔ nuä,

n kɔ dlɩ 'wʋ.

8 N ‑kaanyɔ 'wʋ tiee,

ɛ'ɛ ‑bhö käbölu a za,

‑maa ɔ 'kanyɩ ‑a'a mä'ä a 'tɩtɩ 'nyɛ,

ɔ 'kanyɩ'ɛ swɩ nyɛmʋ 'mö 'pä.

9 A 'bhiyi Oneziimö,

mɔɔ 'kɔɔ 'yio 'wʋ kwä.

‑Aa ‑daayu a ‑mɔɔ ‑kanyɩɛ dlɩsɛ ‑a kää dlɩ 'wʋʋ,

'mö Oneziimö glɩnɩmöä.

Ɔ ‑nyɛ Tisikö 'sɔ,

'saa 'wuë 'plɩɛ mä'ä 'wʋ a 'tɩtɩ mʋa 'kanyiɛ 'nyɛ.

10 Alitaakö n ‑nyɛɛ 'sɔ ‑a ‑wʋä mä'ä ‑jie 'möö,

ɔ lɛ ɔ bhälanyɩ.

Banabasɩ a ‑daayu Maakö,

‑ɔnyɩ dɔ'wʋ n 'panyɩ a‑a 'dɩ 'wʋ nɩɩ ɔ ‑kä ‑mä 'a mä'a yi a nɩ pälɔɔ 'tɩɩ,

ɔ lɛ ɔ bhälanyɩ.

11 Zezwii wa laa Zwitusɩ,

ɔ lɛ ɔ bhälɩmanyɩ.

Wa nɩkpa nɩ ta ‑kpɔ,

‑mä Zwiiföwaa ‑wa 'zʋä Zezwii a ‑nʋä gla'mö,

wa 'yize mʋa ‑nya'mö 'sɔ ‑a nʋä Lagɔ 'a libhoo,

'pɩwʋ mää Lagɔ 'kämanɩɛ a wɛlɩɩ,

a‑a biiiɛ.

Wa za swɩ pälaaa yɔwʋ tenyii.

12 A 'bhiyi Epaflasɩ,

ɔ lɛ ɔ bhälɩmanyɩ.

Zezwii Kliisɩ a libhonʋnyɔ a ‑mɔɔ bhibhee 'kwädlɩ a za Lagɔ,

‑ɔɔ yɔlɔ bhibhebhibhe dɔ'wʋʋ,

'mö ɔ glɩnɩɛ.

Sɛ'ɛ ɔ bhibhee a za nɩɩ,

Lagɔ 'a wɛlɩɩ 'mö a dɔ'wʋ,

a nɩ ‑jɩbhɛ,

a tɩa gba'agbagba'a bhli,

'saa 'wuë Lagɔ yɩbhää a dɔ'wʋ 'a dilaa tɩa 'mö ‑ki,

nzɩɩ a 'kɩ yɩ 'wuë nʋ.

13 A ‑nyɛ Zezwii Kliisɩ a ‑nʋa ‑wa ‑wʋä ‑mä Laodisee 'sɔ,

Yielapoliisɩ a ‑nʋa kökä,

sɛɛ Epaflasɩ ylɔɔ a za‑a,

na'bhë n 'yɩ ‑sɩbhä 'ylɩmö.

14 ‑Dʋtaayi Lwiikö ‑ɔ ‑kanyɩɛ dlɩsɛɛ,

ɔ lɛ ɔ bhälɩmanyɩ,

Demaasɩ kökä.

15 ‑Aa ‑daayuë ‑wa ‑wʋä ‑mä Laodisee muë,

Nimöfaa mɔ,

'n Zezwii a ‑nʋä ‑muë'la ‑wa 'yɩbhänɩɛ ‑mä 'ɔ 'ligbë 'mö 'wlu muë,

wa 'wuë,

n bhäluë.

16 ‑Maa 'bɔgʋ nɩ n panyɩɛ dɛ'ɛ 'wʋʋ,

a ‑kʋʋ 'mö zɛlɩ 'wëë,

Zezwii a ‑nʋa ‑wa ‑wʋä ‑mä Laodisee,

a nɩ kwʋänyɩ ‑mä wa 'kʋ 'mö zɛlɩmö.

'Bɔgʋ n 'pʋä a 'yɛɛ wabhlɩ 'wʋʋ,

wa 'kanyɩɛ ‑lɛmöö,

a nɩ zɛlɩmuu'ɛ abhlɩ 'mö.

17 ‑Aa ‑daayu Alɩsiipö,

a nɩ 'zo 'dɩ 'mö,

ɔ nɩ 'tɛmanɩ 'yli yɔwʋ,

libho ‑Alowli 'nyɔɔ,

ɔ 'kʋ sasɛ nʋ.

18 Na'bhë ‑amöö cɛlɩa'aa dɛ'ɛ nɩɩ:

‑Amö Pɔɔlʋ n bhälanyɩ.

‑Jie 'mö n ‑wʋa'ɛ zaa,

na dɛ dlɩ nɩ tanyɩa 'wʋ 'mɔlɔ.

Lagɔ nɩ 'panyɩ 'nyu!