Efɛɛzɩ a ‑nʋa 6

Sɛ'ɛ Pɔɔlʋ 'zʋä 'yuë ‑nyɛ ‑lowluwa 'sɔ 'dɩ 'mö

Abhʋa yuëa,

sɛ a glɩnɩɛ ‑Alowli Zezwii Kliisɩ a ‑nʋä a za,

a nɩ 'zʋ a ‑lowluwa 'klʋkpamö,

‑sɩbhä ma‑a nɛnɩɛ Lagɔ dlɩ yɔwʋ.

2 ‑Mä Lagɔ 'a Gböö 'wuë gla'mö a tɛkägbaa 'nyupälɩ ‑glɛɛ gwëë,

ma‑a.

Sɛ'ɛ a nʋä nɩɩ:

'Zʋ ‑na dɩba ‑nyɛ ‑na ‑da 'sɔ 'klʋkpamö.

3 ‑Lɛ a dɔ'wʋ,

‑n yi ‑jɔlʋ ghlɩ,

‑n yi 'pɩwʋ gwälɛ.^a

4 'Yuëlowluwanyɩ,

a nɩ tɩ 'a yuëa 'klɛ 'mlɩ zʋ.

‑Maa a ‑kʋä ‑suu,

sɛɛ Lagɔ slʋnanyɩɛ,

a nɩ zlɔmanuë ‑sɩbhä 'mö a 'kʋä ‑sɩbhä 'dɩ 'mö zʋ.

Sɛ'ɛ Pɔɔlʋ 'zʋä göwa ‑nyɛ 'bhidɩbawa 'sɔ 'dɩ 'mö

5 Abhʋa göwaa,

'a mä'ä dʋdʋ 'wʋ a 'bhidɩbawaa,

a nɩ 'zuë 'klʋkpamö.

A nɩ 'zuë ‑lɛ,

a nɩ kä wa nganɔ ku 'mö.

A nɩ ‑wʋnuë 'a dilaa 'wuë 'mö 'yli.

A ‑kä ‑sɩbhä 'zʋ dɔ'wʋ ‑wʋʋ,

ɛ nɩ ‑bhɩɛ Zezwii Kliisɩ a'bhë 'mö a ‑wʋ 'yli.

6 A ‑kä 'wa libhoo nʋ dɔ'wʋ ‑wʋʋ,

wa ‑kä ‑lɛ ‑wʋ a 'yize 'n a nɩ tuë 'klʋkpamö zʋ wa 'kanyɩa 'zʋ a za.

‑Maa wa 'nɩ ‑lɛ ‑wʋ ‑kë,

a nɩ 'libhï anyɩ Kliisɩ a libhonʋwa 'mö 'wʋ,

'saa Lagɔ yɩbhää,

a 'kʋ 'mänasɛ nʋ.

7 Sɛ'ɛ n gbää nɩɩ,

'a libhoo,

a nɩ nʋnuu dlɩ a dlɩ 'mö.

A ‑kʋʋ nʋ dɔ'wʋ ‑wʋʋ,

ɛ nɩ ‑bhɩɛ ‑Alowli a ‑lu a nʋ,

‑maa ɛ nɩ tɩ ‑bhɩɛɛ nɩkpa a 'yize a ‑lu.

8 A nɩ yɩbhlɩnɩ sɛ nɩɩ,

‑ɔ yi gïyi glɩnɩ oo,

‑ɔ 'nɩ gïyi glɩnɩ oo,

‑a 'wuë,

‑a'a ‑li a ‑lii ‑a nʋä mä'ä dʋdʋ 'wʋʋ,

‑sɩbhä ‑Alowli Lagɔ ‑kanyɩɛ 'ylɩ ‑bhlʋ 'mö yɩ 'pɛna 'nyɛ.

9 Abhʋa 'bhidɩbawaa,

a ‑nyɛ 'a göwaa 'sɔ a ‑kä ‑lɛ glɩɩ,

a nɩ ‑kämö wa dɔ'wʋ Lagɔ a nganɔ ku 'mö.

A nɩ tuë ‑gbäglɛsɛ ‑su.

A nɩ yɩbhlɩnɩ sɛ nɩɩ,

a ‑nyʋä 'sɔ ‑Lowli ‑bhlʋ a kää,

mɔɔ ‑wʋä ‑mä ghäyɩ 'wʋ.

Ɔ dɔ'wʋ,

nɩkpaa 'wuë ‑bhʋlʋ wa glɩnɩɛ,

ɔ 'nuëë 'mö gbäzɩ.

Lagɔyu a tʋgwɩnɩli

10 ‑Atʋayuënyɩ,

yɩ 'wuë 'mö a dɔ'wʋ,

a 'wuë,

a nɩ ‑glɛ sasɛ ‑Alowli 'wʋ 'tɩɩ,

ɔ 'kanyɩ 'ɔ 'mötɛɛnɔ 'kɔdʋʋ ‑gömö 'zʋ,

a 'kä 'mö 'tɛɛ 'yize.

11 Sɛɛ tʋgwɩnyɔ ‑su'ɛ ɔ tʋgwɩnɩlii,

a nɩ nglu 'wʋ Lagɔ a'bhë 'kanyɩ ‑sɩbhä 'wlu gïganɩ 'tɩɩ,

‑lɛ a dɔ'wʋ Sataa ‑kä gbli 'wuë 'mö ghlɛnɩ,

ɔ ‑kaanyɩ tʋ kwää,

a 'kɔa 'wlu 'plɩ.

12 Nɩkpa ‑a ‑nyɛ 'nɩɛa gwɩ,

‑maa zuzukuzoku a kii 'wuë ‑yɩ ‑wʋä ‑lɛ zlɩ ‑nyɛ dʋdʋ 'sɔ a jijo'wʋ,

‑yɩ 'tɛɛ 'mö,

‑yɩ 'kämanɩɛ mä'ä 'pɩwʋ a ‑lizokuu 'wuë ‑gömöö,

mö ‑a ‑nyɛ gwɩaa.

13 Nza n gbää nɩɩ,

a nɩ 'libhï Lagɔ 'a tʋgwɩnɩlii 'wuë 'wʋ,

‑lɛ a dɔ'wʋ,

Sataa ‑kaanyɩ tʋ ‑lɛ 'yizee,

a yi 'mö 'tɛɛ,

a yo 'wlu 'plɩ.

A ‑kɔɔ 'wlu 'plɩ 'wëë,

a yi 'yli yɔwʋ 'tɛɛ ‑këë,

a yi ‑mä 'gbë 'wʋ ghlɛ.

14 Zaa,

a nɩ ‑gïganɩ 'wlu a 'kä ‑lɛ glɩ.

Sɛɛ tʋgwɩnyɔ ‑bhlɩnɩɛ 'bɛtʋ 'mlɩɩ,

'a ‑lii 'wuë nɩ kä ‑sɩbhä gbëaa a 'yize 'mö.

Sɛ ɔ ‑suä 'ɔ leyibäna 'möö,

abhʋa abhlɩ,

Lagɔ a 'yila 'klʋ a dɔ'wʋ,

a nɩ zlɔnɩ ‑sɩbhä 'mö.

15 Sɛɛ tʋgwɩnyɔ ‑suä 'siikpli 'möö,

Lagɔ 'a 'Mänatɩtɩɩ ‑yɩ nyɛɛ nɩkpa 'tɩɩglɩglɛɛ,

yɩ biabiatʋ nɩ 'lɩbhanyɩ ‑sɩbhä tenyii.

16 Zezwii Kliisɩ a dlɩtɛɛnɩtɛnɛ,

mɛɛ nɩ glɩnɩ a tʋgwɩgbäta,

a 'kanyɩ 'wʋ ‑kʋ.

‑Lɛ a dɔ'wʋ,

kii 'wuë Sataa 'kää 'mö ghlɛnɩɩ,

yɩ 'naa 'kanyɩ 'wʋ plɛ.

17 'Pʋpʋɛɛ Lagɔ 'nyanyɩɛ,

mɛɛ nɩ glɩnɩ a leyiwugbële.

Lagɔ 'a wɛlɩɩ,

mɩɩ nɩ glɩnɩ gwɩnɩgbälɛ Lagɔ 'a 'Wugɔmʋʋ 'nyanyɩɛ.

18 A ‑kä ‑lɛ glɩɩ,

a nɩ bhibhe 'kwädlɩ Lagɔ 'yize,

‑mä 'a bhibhebhibhiu 'wuë 'mö,

'ɔ 'Wugɔmʋʋ mɔɔ nɩ ‑soanyɩ.

A nɩ ‑ligba a 'kä ‑lɛ glɩ.

A 'kä Lagɔ a ‑nʋa 'wuë a 'wlumö bhibhe a dɔ'wʋ,

swɩ nɩ tanyɩ yɔwʋ 'kunɩ.

19 Na'bhë a nɩ bhibhemö'ɛ na 'wlumö,

nzɩɩ Lagɔ ‑kaa 'ɔ wɛlɩɩ ngli 'pä,

'ɔ 'Mänatɩtɩɩ a sɛ yɩ sɛɛ ‑tiamö zɛmöö,

n ‑kɩɩ ‑sɩbhä bia dɔ'wʋ ‑wʋʋ,

n tɩa ngänɩ.

20 N ‑kä sɛ'ɛ ‑jie 'mö ‑wʋ ‑kë,

Lagɔ 'a 'Mänatɩtɩɩ a biabianyɔ n glɩnɩɛ 'yize.

Nza n gbää nɩɩ,

a nɩ bhibhe na 'wlumö,

nzɩɩ sɛɛ Lagɔ gbää n nɩ bhïla 'ɔ wɛlɩɩ,

n 'kɩ ‑sɩbhä bhïla 'yize n tɩa ngänɩ.

Bhälɩwɛlɩɩ Pɔɔlʋ 'bhlenɩɛ 'gbëë

21 ‑Aa ‑daayu Tisikö,

ɔ 'kanyɩ 'na 'tɩtɩɩ 'wuë 'nyɛ,

nzɩɩ a 'kä na ‑gömö a wɛlɩ ‑yi,

nza n tieanyɔɔ dɛ'ɛ 'wʋ.

Tisikö dlɩsɛ ɔ ‑kaaa tenyii,

ɛ'ɛ ‑bhö nyɩasɛ,

‑maa sasɛ ɔ nʋä ‑Alowli Zezwii 'a libhoo.

22 'Mö n tieanyɩɛ dɛ'ɛ 'wʋ,

ɔ 'kanyɩ mä'ä a tɩtɩɩ 'wuë 'nyɛ,

ɔ 'kanyɩ swɩ nyɛmʋ 'mö 'pä.

23 ‑Aa dɩba Lagɔ ‑nyɛ ‑Alowli Zezwii Kliisɩ 'sɔ,

abhʋa wa ‑nʋa,

'wa 'tɩɩglɩglɛɛ nɩ ghlanyɩ 'wʋ.

Wa nɩ 'zʋanyɩ ‑wawʋ dlɩ zɛmö,

wa nɩ gbä a 'kʋä dlɩ 'tɛɛnɩ 'yize.

24 Nɩkpaa 'wuë,

‑wa ‑waa ‑Alowli Zezwii Kliisɩ,

swɩ 'nɩ 'kunɩɛ yɔwʋ ɔ ‑wawa dɔ'wʋʋ,

Lagɔ nɩ 'pʋä 'nyu.