Efɛɛzɩ a ‑nʋa 2

Lagɔ ‑kanyɩ zɩkpalele 'nyɛ

Bhla'mö a dɔ'wʋ,

'a sɛ a sɛ a‑a Lagɔ 'klʋkpamö 'n a nʋ a‑a 'nyinyloli a za,

ɔ 'yila 'klʋ a dɔ'wʋ ‑gäzɩ a sɛ a ‑wʋ a‑a.

2 ‑Lɛ a 'tɛnyɩ 'la 'mö a dɔ'wʋ,

mä'ä 'pɩwʋ a ‑nʋa ‑waaa Lagɔ ‑gänɩ a nɛmönɛmösaa,

‑sɩbhä a nɛmömö a‑a.

Sataa ‑ɔ 'kämanɩɛ ‑lɛ zlɩ ‑nyɛ dʋdʋ 'sɔ a jijo'wʋ,

‑ɔ 'kämanɩ'ɛɛ nɩkpa ‑waaa 'yɩbhä wa 'kä Lagɔ 'klʋkpamö zʋ ‑gömöö,

'mö a 'zʋmö a‑a 'klʋkpamö.

3 ‑Abhʋa Zezwii a ‑nʋa 'wuë,

nɩkpa 'la a saa ‑sɩbhä ‑a ‑wʋmö a‑a,

‑a'a nɩkpɛglɩnɩsaa ‑sɩbhä ma‑a ‑sumönyɩ a‑a,

miɛ nɩɩ ‑a'a kpökpaa ma,

‑a'a dlɩpäsɛzokwëa ma,

'nyinylolii yɩ kwaanyɩɛ 'möö,

mö ‑a nʋ a‑a.

‑A'a nɩkpɛglɩnɩsa 'la a za,

nɩkpaa 'wuë ‑waaa Lagɔ ‑gänɩ a saa,

nɩkpa a ‑muë Lagɔ 'kä gbʋ köbha,

mö ‑a glɩnɩmö a‑a.

4 ‑Maa Lagɔ,

ngäzɩdlɩ ɔ kää tenyii.

'Ɔ sɛ ɔ ‑wanyɩɛ a za,

5 ‑abhʋaa ‑wʋ a‑a sa'a ‑gäzɩ a sɛ,

‑a'a 'klʋkpamösɛsʋ a za‑a,

sɛ ɔ gäla Kliisɩ ɔ 'kä 'sɔ ‑bhölɩnɩɩ,

‑sɩbhä ɔ nyɩanyɩɛ zɩkpalele.

Zaa,

a nɩ yɩbhlɩnɩ sɛ nɩɩ,

Lagɔ,

'ɔ dlɩzɛmönanɔɔ a 'yize a za,

nza ɔ puëanyɩɛ.

6 Sɛ'ɛ n gbää nɩɩ,

sɛ ‑a ‑nyɛ Kliisɩ 'sɔ ‑a ‑glɛglɛnɩɛ 'wʋ a za,

‑a ‑nyɔɔ 'sɔ 'n Lagɔ ‑yinyɩɛ 'gämö glu ‑sɛnɩ.

Nzɩɩ ‑a ‑nyɔɔ 'sɔ ‑a 'kä 'kämanɩ.

7 Sa'a ‑sɩbhä Lagɔ tulanɩnyɩɛ ‑mä Zezwii Kliisɩ 'mö 'ɔ dlɩzɛmönanɔɔ 'ylimö.

Nzɩɩ 'tɛnyɩ 'wuë ‑ɛ ‑gää ‑mä nimï 'mö,

'ɔ ngäzɩdlɩɩ ‑ɛɛɛ ‑sɩbhä a sɛ ‑wʋʋ,

ɛ 'kä 'ylɩmö 'yoo.

8 Sɛ'ɛ n gbää nɩɩ,

Lagɔ,

'ɔ dlɩzɛmönanɔɔ a 'yize a za,

nza ɔ 'nyanyɩɛ 'ɔ 'pʋpʋɛ,

'a sɛ a 'tɛɛnɔɔ dlɩ a za.

‑Lɛ a 'pʋpʋɛ 'la,

anyɩgäsɛ abhʋa 'nɩɛ 'nglɩ ‑kä ɔ 'kanyɛ 'nyɛ,

‑maa 'fʋ a 'nyɛnyɛluä 'n ɔ yeanyuä 'nyɛ.

9 Ɛ'ɛ ‑bhö nɩkpɛ a nʋnʋlii a za.

Zaa,

‑bɛ 'nɩɛ bhɛnɩ ɔ 'kɛ 'mö tɛkpɔnɩ.

10 Lagɔ a ‑bhɛbhɛli ‑a glɩnɩɛ,

mɔɔ kää 'nglɩ ‑mä Zezwii Kliisɩ 'mö,

a‑a yiɛ nɩkpalili zʋ.

Nzɩɩ nʋnʋlii a kii 'wuë ‑yɩ nɛnɩɛ,

ɔ sɛ a‑a ‑lɛ 'kɩɩ,

‑a 'ki nʋ.

Zezwii Kliisɩ a ‑nʋa 'wuë ‑zɩkpa ‑bhlʋ wa glɩnɩɛ

11 Bhla'mö a dɔ'wʋ,

nɩkpa,

'wa sɛ wa'aa 'wʋ dɩ‑ɩ a za,

Zwiiföwaa laa ‑waa Lagɔ a ‑nʋä glɩnɩɩ,

wa gla'mö a ‑nʋä a glɩnɩmö a‑a.

Zwiiföwaa wabhlɩ,

'wʋdɩdɛ a ‑mɛ nɩkpa ‑dɩnɩɛ kä'mö 'wʋ a za,

wa lɛ mʋa glɩnɩ Lagɔ a ‑nʋä.

Miɛ abhlɩ da'a,

‑maa a'bhï,

'a 'saa a glɩnɩ a‑a bhla'möö,

a nɩ tu 'wʋ dlʋ.

12 ‑Lɛ a 'tɛnyɩ 'la 'mö,

Kliisɩ,

dɛ a 'nɔ a‑a ‑yi,

Yizlaɛlɩ 'a ngëyii Lagɔ ‑sɛɛ ‑lɛɛ,

ɛ 'mö,

a'aa a ‑mä 'bhle ‑kä.

Lagɔ ‑nyɛ ɔ ‑nʋa mɛnɩnɩɛ a 'saa ɔ gbä a‑a ɔ 'kʋä 'nyɛɛ,

‑lɛ a ‑li 'la 'wuë,

a ‑li yɩ'ɩɛ a glɩnɩmö.

A'aa a Lagɔ ‑yi zaa,

a'aa a dlɩtɛɛnɩdɛ ‑kä.

13 ‑Maa ‑sɩkaa a dɔ'wʋ,

Zezwii Kliisɩ a za,

abhʋaa 'nɩ a‑a Lagɔ ‑käpanɩɩ,

abhʋa Zezwii Kliisɩ 'a dluu 'dianɩɛ Lagɔ yɔwʋ.

14 Zwiiföwaa muë,

‑waaa Zwiiföwa glɩnɩɛ muë,

‑a 'wuë,

Zezwii Kliisɩ mɔɔ wamanɩnyɩɛ Lagɔ.

Mɔɔ kää 'nglɩ,

a‑a yiɛ ngëyi ‑bhlʋ zʋ.

‑Aa jijo'wʋ a gbʋkänɛ a ‑gbowluu ‑wʋ pö a‑a ‑lɛ,

Kliisɩ ‑ɔ 'wlʋä ɔnyɩ 'möö,

mɔɔ ‑sʋʋä ‑lɛ 'n ɔ ‑yinyɩɛ wamanɩ.

15 Zezwii a za,

Moyizɩ 'a Gböö ‑yɩ nʋä nɩɩ,

nɩkpɛ nɩ tɩ sɛ'ɛ zʋ,

nɩkpɛ nɩ 'zʋ'ɛ sɛ'ɛ klɩpaa,

yɩ yɛ sɛ 'bhöö.

Mɔɔ kää 'nglɩ,

Zwiiföwaa muë,

‑waaa Zwiiföwaa glɩnɩ muë,

wa 'wuë,

sɛ wa ‑gälɔɔ 'wʋ a za 'n wa yiɛ ngëyilele ‑bhlʋ 'zʋ,

'n wa yiɛ wamanɩ.

16 Sɛ'ɛ n gbää nɩɩ,

Zezwii,

sɛ ɔ 'kunɩɛ ‑lɛ su 'klʋ a za,

Zwiiföwaa muë,

‑waaa Zwiiföwaa glɩnɩ muë,

ɔ yɛ ‑lɛ wa jijo'wʋ a ‑gblɩgblɛɛ ‑sɛ.

Ɔ kʋä ngëyi ‑bhlʋ 'wʋ 'zʋa.

Ɔ kʋä Lagɔ wamanɩ.

17 Abhʋaa 'nɩ a‑a ‑mä ngëyi Lagɔ ‑sɛɛ ‑lɛ 'mö a ‑nʋä glɩnɩ muë,

ngëyii Lagɔ ‑sɛɛ ‑lɛ 'mö a ‑nʋa muë,

‑a 'wuë,

Kliisɩ mɔɔ ‑lɛmönyɩɛ ‑wanɩwanɛ a 'Mänatɩtɩɩ.

18 Zaa,

‑sɩkaa a dɔ'wʋ,

‑a yi Zwiiföwa glɩnɩ oo,

‑a 'nɩ Zwiiföwa glɩnɩ oo,

‑a 'wuë,

Zezwii Kliisɩ a za,

'Wugɔmʋʋ 'Wlɩlɩ ‑bhʋlʋ ‑kpɔ mö ‑a kää ‑gömö,

mɩɩ kää 'nglɩ,

‑a 'wuë,

a‑a bhɛnɩɛ ‑a 'kä ‑aa dɩba Lagɔ yɔwʋ 'dio.

19 ‑Sɩbhä a za,

abhʋaa 'nɩɛ da'a Zwiiföwa glɩnɩɩ,

a'a ‑bhöa'a ‑sɩkaa ‑mä ngëyii Lagɔ ‑sɛɛ ‑lɛ 'mö a dɔ'wʋ lɛgäwa.

‑Maa ‑wa glɩnɩ a‑a wanyɩ ‑bhʋlʋ ‑kpɔ Lagɔ a 'yize a ‑nʋä,

wa jijo'wʋ a ‑nʋä a glɩnɩmöa'aa ‑sɩkaa,

Lagɔ a 'yuë a glɩnɩmöä.

20 ‑Budu a sɛ a ‑wʋä.

Zezwii Kliisɩ 'a tietiewaa ‑nyɛ Lagɔ 'a 'möbhïlanɩwaa 'sɔ,

mʋa glɩnɩɛ ‑budu a gluu.

Zezwii Kliisɩ a'bhë,

mɔɔ glɩnɩɛ dɛsɛkäkpiyii ‑ɛ kää ‑buduu sɛ.

21 Mɔɔ kää 'nglɩ 'n wʋ 'tɛɛ 'mö,

'tɛɛnɩ ‑mä glu ‑këë ‑mä ghäyɩ,

wʋ 'kä ‑Alowli a 'yize a ‑lu glɩnɩ.

22 A'bhï,

'a sɛ a ‑glɛɛ Zezwii 'wʋ a za,

‑budu 'la a 'wʋsɩbhälii 'mö a glɩnɩmöä.

Abhʋa Lagɔ 'libhïmöä 'wʋ 'n ɔ yiɛ 'sɩbhä,

‑lɛ a dɔ'wʋ a ‑nyɛ Zezwii a ‑nʋä ‑muë'la 'wuë 'sɔ,

a 'kä 'ɔ ‑buduu 'zʋ,

'ɔ 'Wugɔmʋʋ 'kanyɩ 'mö ‑bhölɩnɩ.