Efɛɛzɩ a ‑nʋa 1

'Bɔgʋʋ Pɔɔlʋ 'cɛlɩɛ ‑mä

Efɛɛzɩ a ‑nʋa

'wʋʋ

Bhälɩwɛlɩɩ

‑Amö Pɔɔlʋ,

‑amö Lagɔ 'yɩbhää nɩɩ n nɩ 'zʋ Zezwii Kliisɩ a tietienyɔɔ,

‑amöö 'cɛlɩɛ dɛ'ɛ 'bɔgʋ nɩ.

Abhʋa Lagɔ a ‑nʋa,

abhʋaa ‑wʋä ‑mä Efɛɛzɩ glɔ 'mö,

abhʋaa 'tɛɛnɩɛ Zezwii Kliisɩ dlɩɩ,

abhʋa n pʋä 'wʋ.

2 ‑Aa dɩba Lagɔ,

ɔ ‑nyɛ ‑Alowli Zezwii Kliisɩ 'sɔ,

'tɩɩglɩglɛɛ ‑nyɛ 'nyupälɩɩ 'sɔ ‑yɩ 'bhöönuëë 'möö,

yɩ nɩ ghlanyɩ 'wʋ.

'Nyupälɩɩ Lagɔ ghälanyɩɛ 'wʋ Zezwii Kliisɩ a za‑a

3 ‑Alowli Zezwii Kliisɩ a dɩba Lagɔ,

ɔ 'nglɩ nɩ 'ghlimanɩ.

‑A 'wuë ‑abhʋaa ‑glɛɛ Zezwii Kliisɩ 'wʋʋ,

'nyupälɩ a kii 'wuë ‑yɩ 'bhöönɔɔ 'möö,

mɔɔ ghälanyiɛ 'wʋ.

4 Ɔ'ɔɔ a ‑bhlɛ zɩkpaa 'wäla,

'n ɔ ‑yinyɩ a‑a Zezwii Kliisɩ a za ‑lɛ ‑sɛ,

‑a 'kä ɔ 'yize a ‑nʋä glɩnɩ,

‑a tɩa ɔ 'yila 'klʋ a dɔ'wʋ ‑maa yɔwʋ ‑kä 'lɩlɩlɩ.

'Ɔ ‑wawʋ a za,

5 mɔɔ tɩnii a‑a ‑lɛ 'kɩ ɔ ‑kanyɩ Zezwii Kliisɩ a 'nglɩ 'mö ɔ 'yuë 'wʋ 'zʋa.

'Ɔ dlɩzɛmönanɔɔ a za,

ɔnyɩgäsɛ mɔɔ 'yɩbhɩɛ ‑sɩbhä.

6 'Ɔ dlɩzɛmönanɔ 'kɔdʋʋ ‑wʋʋä ‑sɩbhä a sɛ ‑wʋʋ,

‑mä 'ɔ ‑wawayu ‑bhʋlʋ ‑kpɔ Zezwii Kliisɩ 'mö,

‑mä ɔ tulanɩnyuä 'ylimö.

Zaa,

a‑a nɩ 'ghlimanɩ ɔ 'nglɩ.

7 'Ɔ Yuu ‑bhʋlʋ ‑kpɔ 'la,

'ɔ dluu ‑wʋ kwliɛ a za,

‑a yɛ 'nyinylolii a galɛ 'mö 'wlʋ.

Ɔ za,

Lagɔ yɛ ‑a'a 'nyinylolii a gbʋʋ 'yi 'tatinɩ.

'Ɔ ngäzɩdlɩpäpʋ 'kɔdʋʋ 'kɔdʋʋ,

sa'a ‑sɩbhä ɔ tulanɩnyuä 'ylimö.

8 'Ɔ ngäzɩdlɩpäpʋ 'la,

‑wʋʋä 'bhlenɩdɛ ‑kää,

‑mä 'wʋ 'mö,

‑mä ɔ 'nyɛnɩnyɩɛ 'nɛɛnɔ 'wuë ‑a 'kä 'ɔ wɛlɩɩ 'wuë 'mö 'nʋ.

9 'Saa Lagɔ 'yɩbhä a‑a 'bhlɩbhëa 'wuë a dɔ'wʋ,

‑yɩ ziza‑a a‑a 'kwädlɩɩ,

'ɔ dlɩzɛmönanɔɔ a za,

'mö ɔ kälɩnɩnyɩɛ kɛ 'klʋ Kliisɩ a bɔɔmö a za.

10 'Tɛnyɩ ɔ ‑dɩ a‑a,

ɛ ‑kä ghlɛɛ,

mä ghäyɩ 'wʋ a ‑lii 'wuë ‑nyɛ mä'ä dʋdʋ 'wʋ a ‑nɩɩ 'wuë 'sɔ,

ɔ yi ‑bhlʋ 'wʋ 'zʋa nzɩɩ,

Kliisɩ 'kä yɩ 'wuë a 'wukpële glɩnɩ.

11 ‑Abhʋa Lagɔ ‑sɛ a‑a 'kɩ ‑lɛ,

'pʋpʋɛ ɔ gbä a‑a ɔ ‑kanyɩ 'nyɛɛ,

Kliisɩ mɔɔ ‑lanyɛɛ.

Lagɔ,

'ɔ sɛ ɔ 'yɩbhää ‑lii 'wuë a dɔ'wʋ,

‑ɔ 'wälanɩɛ ‑sɩbhä 'ylii,

mɔɔ kää 'nglɩ 'n yɩ yiɛ ‑sɩbhä 'yli 'wlʋnɩ,

12 nzɩɩ ‑abhʋaa Zwiiföwaa,

‑aa dilaa 'tɛmanɩɛ tɛɛ 'wʋ Kliisɩ a za‑a,

‑a 'kä ɔ 'nglɩ 'ghlimanɩ.

13 Abhʋaa 'nɩɛ Zwiiföwa glɩnɩɩ,

Lagɔ 'a ‑tiawɛlɩɩ ‑yɩ glɩnɩɛ 'Mänatɩtɩɩ ‑yɩ ‑lɛmöä 'pʋpʋɛɛ,

abhʋaa 'tɛɛniɛ dlɩɩ,

Lagɔ,

'Wugɔmʋʋ 'Wlɩlɩ ɔ gbä a‑a ɔ 'kä ɔ ‑nʋa ‑gömö 'zʋʋ,

'mö ɔ 'zʋanyɩɛ ‑gömö 'n ɔ yeanyɩɛ ‑sɩbhä yɩbhlɩnɩdɛ 'zʋ.

14 ‑Abhʋa Lagɔ a ‑nʋa 'wuë,

'ɔ 'Wugɔmʋʋ ɔ zʋʋnyɩɛ ‑gömöö,

‑li a ‑lii 'wuë ɔ ‑kanyɩɛ zɩla'a 'nyɛɛ,

'mö ɔ tɛɛ ‑bhlɛ da'a.

Miɛ nɩɩ,

ɔ ‑yinyɩ mä'ä 'pɩwʋ a ‑lizokuu 'wuë ngli ‑sɛ.

‑Li 'la 'wuë mɩɩ 'kää gbä ɔ 'nglɩ 'kä 'ghlimanɩ.

Pɔɔlʋ bhibhe Zezwii a ‑nʋa a za Lagɔ

15 ‑Atʋayuënyɩ,

'a sɛ a 'tɛɛnɩɛ Zezwii Kliisɩ dlɩ 'n a ‑waa ɔ ‑nʋa 'wuë,

n yɛ ‑sɩbhä a 'dɩ 'nʋ.

16 ‑Sɩbhä a za,

n 'kä 'kwädlɩ a za Lagɔ bhälɩ a dɔ'wʋ,

swɩ ‑nɩɩɛ yɔwʋ 'kunɩ.

N ‑kä 'kwädlɩ Lagɔ bhibhee,

n bhibhemö a dɛ.

17 'Na sɛ n bhibhee,

‑sɩbhä ma‑a nɩɩ,

‑Alowli Zezwii Kliisɩ a dɩba Lagɔ,

‑ɔnyɩɩ nglɩɩ 'ghïliɛ tenyii,

ɔ nɩ 'nyanyɩ 'nɛɛnɔɔ ‑wʋ 'bhöönɩɛ 'ɔ 'Wugɔmʋʋ 'möö,

'ɔ ‑lii 'wuë ɔ 'kanyɩɛ kɛ 'klʋ kälɩnɩɩ,

a 'kɩ 'mö 'nʋ,

nzɩɩ ɔ'bhë a 'kɔ sasɛ yɩbhlɩnɩ.

18 Lagɔ nɩ ngäla ‑mä a dila zɛmö 'wʋ,

nzɩɩ ‑lii ‑yɩnyɩɩ za ɔ wäzaanyɩɛ,

yɩ za a dila 'kä 'wʋ 'tɛɛ,

a 'kɩ yɩbhlɩnɩ.

N bhibhe'ɛ nɩɩ,

‑li a ‑lii 'wuë ‑yɩɩɛ ‑sɩbhä a sɛ ‑wʋ,

a ‑nyɛ ‑wa glɩnɩɛ ɔ 'yize a ‑nʋä 'sɔ,

‑yɩ ‑kʋnanyɩɛ,

a 'kɩ yɩbhlɩnɩ.

19‑20 ‑Abhʋaa 'tɛɛnɔɔ dlɩɩ,

'ɔ 'mötɛɛnɔ 'kɔdʋʋ ɔ nʋnɩnyɩɛ libho 'mö sɛ wʋ 'ghïliɛ tenyii,

a 'kä ‑sɩbhä yɩbhlɩnɩmö.

‑Zlɩ ɔ gälaa Zezwii Kliisɩ 'n ɔ yoo glu ‑sɛ 'n ɔ yoo ‑mä ɔ luukɛ 'wʋ sɛ 'gïlaa,

‑lɛ a 'mötɛɛnɔ 'la 'mö ɔ tulanɩɛ gbëaa 'ylimö.

21 ‑Sɩkaa a dɔ'wʋ,

zuzukuu 'wuë ‑yɩ 'tɛɛ 'mö,

yɩ ‑nyɛ nɩkpaa 'wuë ‑wa 'kämanɩɛ 'sɔ,

Zezwii Kliisɩ mɔɔ 'kämanuëë ‑gömö.

Ɛ yi mä'ä 'pɩwʋ ma oo,

ɛ yi ‑mä Lagɔ 'a 'pɩwʋlelea ‑a ‑gää ‑mä 'yuku 'wʋ ma oo,

'nglɩ ‑bhlʋ a'bhë ‑yɩ 'kää 'ghïli ‑yɩ 'kää Zezwii Kliisɩ a ‑nɩɩ 'wʋ zii,

yɩ'ɩɛ ‑bhölɩ.

22 ‑Lii 'wuë,

Zezwii Kliisɩ 'mö Lagɔ 'zʋaa yɩ ‑gömökämanɩnyɔ 'wʋ.

Zaa mɔɔ 'kämanɩɛ ‑lii 'wuë ‑gömö,

'mö Lagɔ 'zʋaa ɔ ‑nʋa 'wuë a ‑zɩkpa a 'wukpële 'wʋ.

23 Lagɔ a ‑nʋa 'wuë a ‑zɩkpaa,

Zezwii Kliisɩ 'a kpökpaa ma‑a.

Zezwii Kliisɩ ‑ɔ ‑wʋä saa 'wuë,

‑ɔ 'kämanɩɛ ‑lii 'wuë ‑gömöö,

'ɔ 'saa ɔ glɩnɩɛ 'tɩɩ,

‑mä ɔ ‑nʋa 'wuë a ‑zɩkpaa jijo'wʋ ‑mä ɔ 'wälanuä 'yli.