2 Kolɛɛtɩ a ‑nʋa 1

'Sɔnabɔgʋʋ Pɔɔlʋ 'cɛlɩɛ ‑mä

Kolɛɛtɩ a ‑nʋa

'wʋʋ

Bhälɩwɛlɩɩ

‑Amö Pɔɔlʋ,

‑amö Lagɔ ‑sɛɛ ‑lɛ n 'kä Zezwii Kliisɩ a tietienyɔ glɩnɩɩ,

n ‑nyɛ ‑aa ‑daayu Timotee 'sɔ,

abhʋa Lagɔ a ‑nʋa,

abhʋaa ‑wʋä ‑mä Kolɛɛtɩ glɔ 'mö 'n ‑mä Akayii‑bhölɩɩ 'wuë 'möö,

abhʋaa ‑a pää 'bɔgʋ nɩ 'wʋ.

2 ‑Aa dɩba Lagɔ ‑nyɛ ‑Alowli Zezwii Kliisɩ 'sɔ,

'tɩɩglɩglɛɛ ‑nyɛ 'nyupälɩɩ 'sɔ ‑yɩ 'bhöönuëë 'möö,

yɩ nɩ ghlanyɩ 'wʋ.

Pɔɔlʋ bhälɩ Lagɔ 'ɔ ngäzɩdlɩɩ a za

3 ‑Alowli Zezwii Kliisɩ a dɩba Lagɔ,

a‑a nɩ 'ghlimanɩ ɔ 'nglɩ.

‑A 'wuë mɔɔ glɩnɩɛ ‑aa dɩba.

Ɔ 'wuë ngäzɩdlɩ.

Mɔɔ pää 'kwädlɩ nɩkpa swɩ nyɛmʋ 'mö.

4 ‑A'a zwɩɩ 'wuë ‑a ziɛ 'mö,

mɔɔ paanyɩɛ swɩ nyɛmʋ 'mö.

Nzɩɩ sɛ ɔ paanyɩɛ swɩ nyɛmʋ 'möö,

nɩkpɛ ‑mɔɔ ‑kä 'zwɩ zii,

zwɩ ‑mɛ ɔ yi zi dɔ'wʋ ‑wʋ ‑kë,

‑a 'kä'ɛ ‑abhlɩ ɔ swɩnyɛmʋ'möpäsɛ yɩbhlɩnɩ.

5 Sɛɛ Kliisɩ ziɛ ‑aa za 'zwɩ tenyii,

sɛ ‑bhʋlʋ ‑kpɔ 'la,

‑sɩbhä Lagɔ ghlɛnɩɛ Kliisɩ 'mö 'n ɔ paanyɩɛ swɩ nyɛmʋ 'mö tenyii.

6 A 'käa Lagɔ 'a 'pʋpʋɛ ghlɩ a za,

nza ‑a ylɔɔ.

‑A käa'ɛ a swɩnyɛmʋ'möpäsɛ yɩbhlɩnɩ,

nza ‑a ziɛ 'zwɩ.

‑Mä ‑a'a 'zwɩzize 'wuë 'mö,

Lagɔ ‑kanyɩ swɩ nyɛmʋ 'mö 'pää,

mɩɩ 'kää 'nglɩ ‑kä,

a'bhï a 'kä 'yli yɔwʋ 'tɛmanɩ,

nzɩɩ a ‑kä ‑aa saa 'zwɩ zi dɔ'wʋ ‑wʋʋ,

swɩ tanyɩa 'kwädlɩ yɔwʋ 'kunɩ.

7 ‑Sɩbhä a za,

‑aa dila ‑kä 'kwädlɩ a dɛ bhlinɩɩ,

'wʋ yɩ 'tɛɛ 'yize.

A ‑nyɛ ‑abhʋa 'sɔ sɛ ‑a zinɩɛ 'gämö 'zwɩ a za,

‑a ‑yi sɛ nɩɩ,

sɛɛ Lagɔ paanyɩɛ swɩ nyɛmʋ 'möö,

ɔ yeanyɩ ‑sɩbhä swɩ nyɛmʋ 'mö 'pä.

8 ‑Atʋayuënyɩ,

‑a yɩbhä a nɩ ‑yi sɛ nɩɩ:

Klɩɩ ‑a 'yɩɛ ‑mä Azii‑bhölɩɩ 'möö,

ɛ'ɛɛ ‑sɩbhä a sɛ ‑wʋ,

'mö ɛ 'tɛmanɩnyɩɛ kɛ tenyii.

Sɛ ‑a 'kɛ a ngli 'pʋ a'bhë,

‑a 'ni a ‑yi.

9 ‑A ‑kä a dlɩ 'pää,

‑a lɛ ‑abhlɩ nɩɩ,

‑a'a kwie a ylɩɩ yɛ a ghlɛ 'wë.

‑Lɛ a klɩ 'la,

nyɩasɛ ɛ ‑nɩnyɩɛ ghlɩ,

‑maa ‑a tɩa ‑anyɩ dlɩ 'tɛɛnɩ,

Lagɔ,

nɩkpɛ ‑kä 'ku 'wë ‑kë ‑ɔ bhɛnɩɛ ɔ 'kɔ gälaa,

ɔ 'yize mö ‑a 'kä dlɩ 'tɛɛnɩ nza ɛ ghölɩnyɩɛ.

10 Mɔɔ ‑sanyɩɛ ‑lɛ a kwie 'la ngli,

mɔɔ ‑kanyɩɛ 'kwädlɩ ‑sɩbhä a klɩɩ ngli ‑sɛ 'yize.

‑A 'tɛɛnɔ ‑tiamö dlɩ nɩɩ,

ɔ yi 'kwädlɩ ‑sɩbhä 'zʋ.

11 ‑A ‑yi sɛ nɩɩ,

a'bhï,

a yi ‑aa 'wlumö bhibhe zaa,

yɩ yi ‑sɩbhä 'wʋ 'plɩ.

‑Lɛ a dɔ'wʋ,

sɛɛ Lagɔ 'kää 'a bhibhewɛlɩɩ 'wʋ nglu 'n ɔ 'kää ‑aa ngäzɩdlɩ 'pä a za,

nɩkpa a ‑bɛ yo ‑aa za bhälɩ.

Pɔɔlʋ yɛ 'ɔ Kolɛɛtɩ a mömɛ 'ylɩ 'wʋ ‑sɛ

12 ‑Lii ‑a kää ‑a 'kä 'mö tɛkpɔnɩ miɛ nɩɩ,

‑a'a 'mlɩwʋnuëyii ‑nɩnyɩɛ gbʋ köbha zaa,

‑a ‑yi sɛ nɩɩ,

‑a'a nɛmönɛmösaa 'wuë 'mö,

gbëaa Lagɔ zʋä nɩkpɛ dlɩ zɛmöö,

mö ‑a kää 'kwädlɩ ngli,

‑a'a nʋnʋlii 'wuë 'mö,

‑aa 'pä käbösɛ dlɩ,

‑aa plɛ ‑bɩɛbɩ.

‑Maa Lagɔ ‑ɔ kää nɩkpaa 'wuë a ngäzɩdlɩɩ,

mɔɔ ‑sunyɩɛ zaa,

'ɔ sɛ ɔ yɩbhää,

‑sɩbhä ‑a 'zʋä nɩkpa 'wuë gla'mö.

‑Sɩbhä ‑a 'zʋmö'ɛ tenyii ‑mä a gla'mö.

‑Li 'la 'wuë ‑a ‑nʋä,

ɛ'ɛ ‑bhö ‑a'a 'nɛɛnɔɔ 'mö ma,

‑maa Lagɔ 'a ngäzɩdlɩɩ 'mö ma‑a.

13‑14 'Bɔgwɩɩ ‑a panyɩɛ 'wʋʋ,

wɛlɩɩ ‑a cɛlɩɛ ‑mä,

a zɛlɩɛ da'a 'möö,

a nɩ ‑yi sɛ nɩɩ,

‑a'a sɛ ‑a pää ‑tiamö dlɩ ‑sɩbhä ma‑a,

‑maa ‑aaa dlɩpänɔ ‑mumuu ‑kä.

Wɛlɩ 'la,

'kïbhë 'mö a kɩɛ abhlɩ ‑bhlɛ 'mö 'nʋnɩ,

‑maa ‑a kɩ dlɩ 'wʋ nɩɩ,

a yi 'ylɩ ‑bhlʋ 'mö sasɛ 'mö 'nʋ.

Miɛ nɩɩ,

‑Alowli Zezwii 'a yiyizlɩɩ ‑kä ghlɛɛ,

sɛ ‑a 'kää a za ɔ 'nglɩ 'ghlimanɩɩ,

a yi'ɛ ‑sɩbhä ‑aa za ɔ 'nglɩ 'ghlimanɩmö.

15‑16 N kɩ ‑sɩbhä dlɩ 'wʋ.

‑Sɩbhä a za n 'pä a‑a dlɩ nɩɩ,

n ‑kä a mä'ä Masedʋanɩ‑bhölɩɩ 'mö yie yii,

‑mä 'a mä'a,

‑mä n 'kä a‑a tɛɛ yi 'wë,

n 'kä a bhäla mä'ä Masedʋanɩ yi.

N ‑kä a 'yɛ ‑mä 'bhöönɩ,

n 'kä a 'yɛ ‑mä 'a mä'a yi.

Nzɩɩ 'mäna 'kanyɩ a 'ki 'sɔ 'mö 'lɩbhänɩ.

‑Lɛ a dɔ'wʋ,

n ‑kä a ‑mä Zwidee‑bhölɩɩ 'mö möä yii,

a ‑yii a kwänɩ,

n yi a ‑mä mö.

17 Sa'a ‑sɩbhä n bhëgëa a‑a,

‑maa n'n‑a'a ‑sɩbhä 'zʋ.

Zaa,

n'n‑ä da'a ‑sɩbhä 'zʋʋ,

sɛ'ɛ yɩ sɛ bhä zɛmö nɩɩ,

dlɩzɛmöfoosɛ n bhëgëa a‑a,

‑sɩbhä yɩ sɛ bhä zɛmö ‑a?

‑Maa n ‑kä 'kwädlɩ 'na ‑lii bhëgëaa,

sɛ n pää dlɩ cuu,

‑sɩbhä n zʋ bhä ‑a?

N'n‑ä n 'kä sɛ ‑mä'la 'zʋä yi 'n n nʋ bhä nɩɩ,

n yi ‑sɩbhä 'zʋ ‑a?

18 Ɛ'ɛ ‑bhö ‑sɩbhä ma.

Lagɔ ‑ɔ kää gbëaa a 'yize nglii,

ɔ'bhë ɔ ‑yi sɛ nɩɩ,

n ‑kaanyɩ 'kwädlɩ 'dɩ 'nyɛɛ,

n'n‑ä mɩɩ 'sɔ ngli ‑kä.

19 ‑Atʋayuënyɩ,

‑amö mɔ,

Silasɩ mɔ 'n Timotee,

‑a yiɛ ‑mä 'a mä'aa,

Lagɔ 'a Yuu Zezwii Kliisɩ ‑bhʋlʋ ‑kpɔ,

ɔ dɩ ‑a 'nyanyɩɛ.

'Mö Zezwii ‑ɔnyɩɩ dɩ ‑a 'nyanyɩɛ da'aa,

ɔ'bhë 'saa ɔ glɩnɩɛ 'wuë,

ɛ'ɛ ‑bhö 'mökpɛnɩli,

‑maa ‑tiamö a ‑li a 'yizee.

20 Miɛ nɩɩ,

‑lii 'wuë Lagɔ gbä a‑a ɔ 'kä 'bhlɩbhë a dɛ 'yli 'wälanɩɩ,

‑mä Zezwii 'mö ‑mä yɩ 'wlʋnɩɛ 'yli.

Zezwii mɔɔ kää 'nglɩ ‑abhʋa ɔ ‑nʋa 'wuë,

a‑a nʋä nɩɩ:

«Nn,

miɛ!»

Sa'a ‑sɩbhä ‑a 'ghlimanɩɛ Lagɔ a 'nglɩ.

21 Ɔ'bhë,

‑a ‑nyɛ abhʋa 'sɔ,

mɔɔ gälanyɩɛ Zezwii Kliisɩ 'wʋ,

nzɩɩ ‑a 'käa ‑tiamö 'yli yɔwʋ 'tɛɛ.

Mɔɔ ‑sanyɩɛ ‑lɛ,

22 mɔɔ zʋʋnyɩɛ 'ɔ nglɩɩ ‑gömö.

Mɔɔ zʋʋnyɩɛ 'ɔ 'Wugɔmʋʋ ‑gömö,

‑li a ‑lii ɔ ‑kanyɩɛ zɩla'a 'nyɛɛ,

'mö ɔ 'fɩɛɛ ‑bhlɛ da'a 'mö.

N ‑kä yio ‑kä,

Lagɔ ‑yi sɛ.

23 ‑Atʋayuënyɩ,

n'n‑a'a ‑mä 'a mä'a Kolɛɛtɩ 'bɩwʋ yii,

ɛ'ɛ ‑bhö nyɩasɛ,

‑maa n'n‑ä 'yɩbhä n 'kanyɩ'ɛ yɔla.

24 ‑Abhʋa Zezwii 'a tietiewaa,

sɛ a 'kɔɔ ‑gänɩ a dɔ'wʋ,

‑aaa ‑kä ‑a 'kanyɩ 'wlumö köbhänɩ.

‑A ‑yi sɛ nɩɩ,

ɔ'bhë 'mö a 'tɛɛnɩɛ sasɛ dlɩ zaa,

‑a yɩbhä ‑a 'kanyɩ swɩ nyɛmʋ 'mö 'pä a 'kɔ 'mänasɛ ‑gänɩ.