1 Kolɛɛtɩ a ‑nʋa 16

Monii wa 'kää Zeluzalɛɛmö a Lagɔdaayuëa a za tuu

Monii wa 'kää Zezwii a ‑nʋa a ‑zɩkpaa ‑a ‑wʋä ‑mä Zeluzalɛɛmö a za 'wʋ 'päpänɩ a dɔ'wʋ,

sɛ'ɛ n nyanyɩɛ 'dɩ nɩɩ,

Zezwii a ‑nʋa a ‑zɩkpöö ‑yɩ ‑wʋä ‑mä Galatii‑bhölɩɩ 'mö,

sɛ n gbää yɩ nɩ 'zʋʋ,

a nɩ 'zʋmö ‑sɩbhä.

2 'Dimasiea 'wuë 'mö,

a nɩ 'zʋ bhʋlʋbhlʋ moni ‑lɛ sɛ.

‑Na'a dɛ ‑n kää,

‑lɛ ‑n nɩ 'zʋ ‑lɛ sɛ.

‑Lɛ a dɔ'wʋ n ‑kä yii,

moni a 'wʋpäpänɩgbʋ tɩa gbɔɔ.

3 N ‑kä glɔ ghlɛɛ nɩkpa a ‑muë a ‑sɛɛ a'bhïï,

n 'kʋä ‑mä Zeluzalɛɛmö tie,

wa 'kä ‑mä moni 'la kwä.

Wa ‑kä möä yi n yuë 'bɔgwɩ sula,

nzɩɩ ‑mä a ‑nʋa 'kʋäa sasɛ päla.

4 Ɛ ‑kä'ɛ na 'mämömämöli glɩnɩɩ,

n ‑nyʋä 'sɔ ‑a yi yɔwʋ mönɩ.

Sɛ'ɛ Pɔɔlʋ bhëgëaa

5 N ‑kä ‑mä 'a mä'a yie yii,

‑mä Masedʋanɩ‑bhölɩɩ 'mö ‑mä n 'kää 'wʋ 'tʋnɩ,

‑maa n 'naa 'kä ‑mä gwälɛ.

6 N ‑kä yii,

n yi ‑mä 'ylɩya ‑sɛ.

Ɛ ‑kä'ɛ ‑bëbëyitɛnyɩɩ 'wuë mɛɛ,

n ye ‑mä ‑sɛ.

‑Lɛ a dɔ'wʋ n ‑kä ‑mä 'a mä'a 'wʋ ‑sɔ,

dɛɛ Lagɔ ‑kaaa 'pänɩ n ‑kä ‑lɛ möä yii,

a ‑yii 'yiobhlinɩlu 'nyɛ.

7 N'n‑ä 'yɩbhä n 'kanyɩ 'plɩplɩlɩ 'mö 'ylɩmönɩ,

‑maa sɛ'ɛ n gbää nɩɩ,

n yɩbhä Lagɔ ‑kä nglu n 'kanyɩ 'ylɩya yɔwʋ ‑sɛ 'wë,

n 'kä bhäla 'plɩ.

8 Miɛ abhlɩ,

‑maa n yi ‑bhlɛ mä'ä Efɛɛzɩ glɩ,

Patɩkɔɔtɩ a 'fɛtɩ yi ghlɛ.

9 Ɛ'ɛ ‑bhö nyɩasɛ,

‑maa Lagɔ ‑kaa mä'ä 'tɛnyɩ 'nyɛ n 'kä ɔ libho 'kɔdʋ nʋ.

‑Tiamö abhlɩ,

‑wa yɩbhää wa ‑kaa ‑kplikpli 'yli klɛnɩɩ,

wa'aa muënɩ,

‑maa ‑lɛ a libho 'la dɛsɛ wʋ kää tenyii zaa,

n yɩbhä klɩpaa n 'kʋ nʋ.

10 Timotee,

ɔ ‑kä ‑mä 'a mä'a yii,

sɛ a 'kɔɔ päla 'n nganɔ 'naa 'kɔɔ ku 'mö ‑wʋʋ,

a nɩ pälɔɔ ‑sɩbhä,

‑maa sɛ n nʋä ‑Alowli 'a libhoo,

‑sɩbhä ɔ nʋmuä.

11 Zaa,

‑bɛ nɩ to 'ylimö fälanɩ.

A 'wuë a nɩ yo 'wʋ,

nzɩɩ ɔ 'kä 'tɩɩ ‑wʋ ɔ 'kä 'bɩwʋ yi,

‑maa ɔ ‑nyɛ ‑aa ‑daayuë ‑muë'la 'sɔ,

n ‑kʋnuë mä'ä.

12 Apɔlɔsɩ ɔbhlɩ,

n kɔ ‑bɛ 'wʋ 'dɩ 'mö 'zʋ nɩɩ,

ɔ ‑nyɛ ‑aa ‑daayuë ‑muë nɩ 'sɔ,

wa nɩ mö ‑mä 'a mä'a.

‑Maa ɔ lɛ nɩɩ,

ɔ dlɩ 'nɩɛ ‑bhlɛ ‑mä a mömɛ 'wʋ ‑wʋ.

Sa'a ɔ nʋä,

‑maa ɔ lɛ ‑zlɩ ɔ ‑kä 'tɛnyɩ ghlɩ ɔ yi ‑mä yi.

Wɛlɩɩ Pɔɔlʋ 'bhlenɩɛ 'gbëë

13 Sɛ'ɛ n gbää nɩɩ,

a nɩ ‑ligba a 'kä ‑lɛ glɩ.

Lagɔ a dlɩ 'tɛɛnɩ dɔ'wʋ,

dɛ a kää sɛɛ,

a nɩ nyɔnʋ ‑lɛ kɛ,

a nɩ 'zʋ ‑mä nyɩbhɛlʋdlɩ,

a nɩ 'tɛmanɩ 'mö.

14 'A nʋnʋlii 'wuë,

a nɩ nʋnii ‑wawʋʋ 'mö.

15 Sefanasɩ ‑nyɛ 'ɔ ‑kosu yɔwʋ a ‑nʋa 'sɔ,

a ‑yuë.

A ‑yi sɛ nɩɩ,

‑mä Akayii‑bhölɩɩ 'mö,

mʋa ngluä tɛɛ 'wʋ wa 'kä Lagɔ ‑gänɩ 'n wa yi'ɛɛ wanyɩ 'mö 'wlʋ wa 'kä wa 'bhɩa Lagɔgänɩwaa 'yli ‑wʋ.

Zaa,

‑atʋayuënyɩ,

'dɩ 'mö n zʋanyɩɛ dɛ'ɛ nɩɩ,

16 Sefanasɩ a sɛ a nɩkpɛ,

a nɩ 'zʋ ɔ wɛlɩ 'klʋkpamö.

Nɩkpa 'wuë ‑wa ylɔɔ ɔ saa Lagɔ 'a libhoo a za‑a,

a nɩ 'zʋmö'ɛ wa wɛlɩ 'klʋkpamö.

17 Sefanasɩ mɔ,

Fɔtinatusɩ mɔ,

'n Akayikusɩ,

wa yiɛ mä'ää,

'mänaa lɩbhaaa tenyii.

A tʋʋ lɩbhaaa,

‑maa n 'yuëë 'ylɩmöä,

ɛ 'kä ‑bhɩɛ a 'wuë abhʋa n yɛ 'ylɩmö 'n na dlɩɩ yiɛ bhli.

18 Sɛ wa 'panyɩ a‑a swɩ nyɛmʋ 'möö,

‑sɩbhä wa paaaa swɩ nyɛmʋ 'mö.

‑Sɩbhä a nɩkpa,

a kä a 'kä wa 'dɩ a dɩ ‑sɛ.

19 Zezwii a ‑nʋa 'wuë ‑wa ‑wʋä mä'ä Azii‑bhölɩɩ 'möö,

wa lɛ wa bhälanyɩ.

Akilasɩ ‑nyɛ Plisilɩ 'sɔ,

Zezwii a ‑nʋa ‑wa yɩbhää ‑mä 'wa 'ligbëa 'mö 'wlu kökä,

wa 'wuë,

wa lɛ wa bhälanyɩ ‑këë ‑Alowli a 'nglɩ 'mö.

20 Zezwii a ‑nʋa 'wuë ‑wa ‑wʋä mä'ää,

wa lɛ wa bhälanyɩ.

A 'wuë a nɩ bälɩbhälɩnɩ Lagɔdaayuë ‑wa ‑wawanɩ a sɛ.

21 Wɛlɩkïbhë nɩ n 'bhlenɩɛ dɛ'ɛ 'gbëë,

na'bhë 'na kätɩkpaa 'mö n 'cɛlɩnaa 'mö nɩɩ:

‑Amö Pɔɔlʋ,

n bhälanyɩ.

22 Nɩkpɛ ‑mɔ 'nɩ ‑Alowli ‑wa,

ɔ ‑bhätlɩnɩ.

N nɛ naa:

«Malanataa!»^a

23 ‑Alowli Zezwii nɩ 'panyɩ 'nyu.

24 Ɔ 'nglɩ 'mö,

a 'wuë,

n ‑waanyɩ 'kwädlɩ 'yize.