1 Kolɛɛtɩ a ‑nʋa 4

Zezwii Kliisɩ a tietiewaa ‑a glɩnɩɛ

Zaa,

‑abhʋa Zezwii 'a tietiewaa,

sɛ a kää a ‑kanyɩ 'wʋ 'libhïï,

‑sɩbhä ma‑a nɩɩ,

Kliisɩ a 'yliwʋwa ‑a glɩnɩɛ.

Lagɔ 'a wɛlɩɩ ɔ kälɩnɩnyɩɛ kɛ 'klʋʋ,

‑a 'kɩ sasɛ nɩkpa 'nyɛ.

2 Wa ‑kä nɩkpɛ libho 'nyɛɛ,

'saa wa 'yɩbhänɔɔ cuu,

muä nɩɩ,

ɔ nɩ nu sasɛ.

3 ‑Amö na a,

sɛ n nʋä 'na libhoo,

‑sɩbhä ‑kä nɛnɩ,

‑sɩbhä 'nɩ nɛnɩɩ,

abhʋa 'naa 'kɩ 'mö ‑dɩnɩ.

Mä'ä 'pɩwʋ a nɩkpɛ ‑bhlʋ a'bhë 'nɩɛ ‑kä ɔ 'kɩ 'mö ‑dɩnɩ.

Na'bhë,

n'n‑ä 'yɛ nanyɩ 'zʋ.

4 ‑Tiamö abhlɩ,

na 'yize a dɔ'wʋ,

n ‑yi sɛ nɩɩ,

n'n‑ä ‑bhlɛ tɛkäsɛ Lagɔ 'a libhoo 'zokwësɛ nʋ.

‑Maa 'na sɛ n pää da'a dlɩɩ,

‑sɩbhä ma‑a 'nɩɛ 'na wɛlɩɩ 'wlu 'klɛ.

‑Alowli Lagɔ mɔɔ 'kɩɛ 'ylɩ ‑bhlʋ 'mö 'wlu 'klɛ.

5 Nza n gbää nɩɩ,

a nɩ tɩ wɛlɩ 'wlu 'klɛ 'n Lagɔ 'a 'tɛnyɩ 'nɩɛ ghlɛ 'wëë.

‑Maa a nɩ ‑kʋnɩ ‑Alowli Zezwii 'a yiyizlɩɩ.

‑Lɛ a zlɩ 'la 'mö,

‑lii 'wuë nɩkpa nʋ a‑a 'wi 'möö,

mɔɔ 'kɩɛ 'pɩwʋ 'pä,

mɔɔ 'kää nɩkpaa 'wuë a 'mlɩ a wɛlɩɩ gbëdanguu bhïla.

Lagɔ a'bhë,

mɔɔ 'kʋää ‑lɛ a zlɩ 'la 'mö libhoo wa nʋä a za bhɩzɩ.

6 ‑Atʋayuënyɩ,

n ‑kä ‑sɩbhä n ‑nyɛ Apɔlɔsɩ 'sɔ a dɛ bhïlaa,

ɛ'ɛ ‑bhö nyɩasɛ,

‑maa n 'kanyɩ 'mö 'nua nɩɩ,

'nglɩ a ‑mi Lagɔ 'nɩɛ nɩkpɛ 'nyɛɛ,

a nɩ tɔnyɩ zuëna,

nza n bhïlaa ‑sɩbhä,

nzɩɩ a tɩa ‑mumuë 'mö tɛkpɔnɩ,

a tɩa ‑mumuë 'ylimö fälanɩ.

7 ‑Nmöö pää dlɩ nɩɩ,

‑n kä dɛsɛ ‑n zi ‑mumuë 'wʋʋ,

dɛ ‑n kä bhä sɛ 'nɩ?

'Saa ‑n kä bhä ‑wʋʋ bhä Lagɔ kä'mö 'bhöönɩ 'nɩ?

Zaa,

‑lii 'wuë ‑n kää,

Lagɔ mɔɔ ‑kami ‑sɩbhä 'nyɛɛ,

sɛ yɩ ‑wʋ ɔ 'mö n‑n tɛkpɔni bhä 'mö 'n ɛ 'kä ‑bhɩɛ 'nyɛ wa ‑nɩmiɛ 'nyɛ 'nɩ?

8 Sɛ'ɛ a nʋä abhlɩ nɩɩ,

'saa a tɛlɩ a‑a sɛ 'wuë a 'kʋ ghlɩ,

a yɛ 'wlʋ,

a yɛ 'kämanɩwa 'kädɩ zʋ 'wë.

‑Maa ‑abhʋa abhlɩ,

‑sɩbhä yɩ'ɩɛ ‑aa dɛ 'mö ‑wʋ.

N yɩbhä a nyɩasɛ a nɩ 'zʋ ‑tiamö 'kämanɩwa,

nzɩɩ n ‑nyɛ abhʋa 'sɔ ‑a 'kä a 'gämö 'kämanɩnɩ.

9 Ɛ'ɛ ‑bhö nyɩasɛ,

‑maa ‑abhʋa Zezwii 'a tietiewaa,

wa ‑kanyɩ ‑bhlɛ ‑sɩkaa 'wʋ yɩlɩɩ,

ɛ ‑bhɩɛ,

nɩkpaa 'wuë a dɔ'wʋ,

‑waaa dɛsɛ ‑kä 'mö Lagɔ 'zʋanyɩɛ 'wʋ,

nɩkpa a ‑muë wa 'kä nɩkpabhë a 'yila 'klʋ zʋ,

wa 'kä ylɛ dɔ'wʋ ‑wʋ,

wa 'kä 'lɩbhä ‑wa 'kä 'ku,

mö ‑a glɩnɩɛ mä'ä dʋdʋ 'wʋ a nɩkpaa ‑nyɛ Lagɔzuzukuu 'wuë 'sɔ a 'yila 'klʋ.

10 ‑Abhʋa ‑abhlɩ Kliisɩ a za,

‑ɔɔ'nɛɛnɩwa 'mö wa libhïnyɩɛ 'wʋ.

‑Maa abhʋa abhlɩ,

ɔ za,

'nɛɛnɩwa wa lanyɩɛ.

‑Abhʋa ‑abhlɩ,

nɩkpa a ‑muë 'nɩɛ 'mö 'tɛɛ mö ‑a glɩnɩɛ.

Abhʋa abhlɩ,

nɩkpa a ‑muë 'tɛɛ 'mö,

'mö a glɩnɩɛ.

'Zʋ wa zʋanyɩɛ,

‑abhʋa ‑abhlɩ 'ylimö wa fälanɩnyɩɛ.

11 ‑Bhlɛ ‑sɩkaa 'yize,

ngɔmʋ ‑nyɛ 'nyutʋ 'sɔ mɩɩ lɩbhanyɩɛ.

‑Aa 'wualu ‑kä,

'sɛlɩ wa sɛlɩnyɩɛ 'kwädlɩ,

saa 'wuë ‑sɩbhä ‑a nɛmöä.

12 Yɔlɔ ‑a ylɔ tenyii,

‑a'a kätɩkpöö mö ‑a libhïä 'wʋ,

a‑a nʋä libho.

Nɩkpa ‑kanyɩ bhätlɩnɩɩ,

nyu ‑a pʋää ‑abhlɩ.

Wa ‑kanyɩ 'klɩ 'yɩaa,

yɩ ‑nɩnyɩɛ swɩ yɔwʋ 'kuanɩ.

13 Wa ‑kanyɩ wɛlɩzoku bhïlanɩɩ,

wɛlɩ a ‑wɛlɩ ‑a sɛniɛ ‑gömö.

Nɩkpa a ‑muë ‑bhätlɩnɩ ‑mä 'bhlɩbhëa 'wuë gla'mö a sɛ wa libhïnyɩɛ 'wʋ,

wa 'wuë a klɛka ‑a glɩnɩɛ.

‑Abhʋa Zezwii 'a tietiewaa,

sa'a ‑sɩbhä ‑a'a wɛlɩ ‑wʋä ‑bhlɛ 'yize.

14 ‑Atʋayuënyɩ,

n 'kanyɩ zʋ 'lɩbha a za,

nza n 'nanyɩɛ sa'a 'wʋ 'cɛlɩ.

‑Maa na 'yuë a ‑muë n ‑waa tenyii 'mö a glɩnɩɛ zaa,

n 'kanyɩ 'mö zlɔmanɩ,

nza n 'cɛlanyɩɛ ‑sɩbhä 'wʋ.

15 ‑Wa 'cɩanyɩɛ Zezwii Kliisɩ 'a wɛlɩɩ,

wa yi ‑zu ‑kë,

‑maa yɩ 'mö a dɔ'wʋ a kä dɩba ‑bhlʋ ‑kpöö.

‑Amöö 'nyanyɩɛ tɛɛ 'ɔ 'Mänatɩtɩɩ 'n a yiɛ ɔ 'nglɩ 'mö zɩkpalele ghlɩ zaa,

‑amöö glɩnɩɛ a dɩba.

16 ‑Sɩbhä a za 'dɩ 'mö n zʋanyɩɛ dɛ'ɛ nɩɩ,

a nɩ ‑gänɩ 'na gbäpöö.

17 Nza n tieanyɩɛ Timotee 'wʋ.

Zezwii Kliisɩ a za na 'yu ɔ glɩnɩɛ,

‑wa n ‑wɔɔɔ tenyii,

n 'tɛɛnɔɔ dlɩ.

‑Abhʋa Zezwii a ‑nʋa,

sɛ ‑a kää ‑a 'kä nɛmö,

sɛ n nyɛɛ saa 'wuë ɔ ‑nʋa a ‑zɩkpö 'dɩɩ,

Timotee 'kanyɩ ‑sɩbhä 'wʋ ligbanɩ,

nza n tieanyɔɔ 'wʋ.

18 A gla'mö a ‑mumuë ‑tɔnɩ a n'n‑ä n 'kä 'wʋ 'sɔ ‑mä 'a mä'a yinɩ zaa 'n wa yiɛ wanyɩ 'kädɩ 'mö 'wʋ 'libhï.

19 ‑Maa ‑Alowli ‑kä ngluu,

n yia'a ‑pa ‑mä yi,

n ‑kä yii,

bhabhawa 'la,

n 'kä wa bhïlawɛlɩ 'yukwli ‑pʋnɩ a za n'n‑ä yi,

‑maa 'saa wa bhɛnɩɛ wa 'kä nʋʋ,

n 'kʋ 'ylɩmö a za‑a.

20 Nyɩasɛ n'n‑ä ‑sɩbhä gbä,

‑maa 'pɩwʋ mää Lagɔ 'kämanɩɛ a gbʋʋ,

wʋ'ʋä ‑mä ngliwɛlɩ 'mö ‑wʋ,

‑maa ‑mä nʋnʋli 'mö,

‑mä wʋ ‑wʋä.

21 'Saa a yɩbhä bhä 'nɩ?

N ‑kä yi dɔ'wʋ ‑wʋ,

n nɩ ‑su bhä ‑kpliyi,

‑maa ‑mä na dlɩ zɛmö,

a ‑wawʋ nɩ ‑wʋ bhä ‑mä,

nzɩɩ n 'kä dlɩwätɛ 'mö yinɩ ‑a?