Lagɔ 'a 'yliwʋwaa a libhoo
3
‑Atʋayuënyɩ,
'lɩlɩlɩ a dɔ'wʋ,
Lagɔ 'a wɛlɩɩ n 'nyanyɩɛ,
nɩkpa a ‑muë Lagɔ 'a 'Wugɔmʋʋ ‑wʋä ‑gömöö,
‑mi wa 'kʋä 'nyɛɛ,
'mö n 'nanyɩɛ 'nyɛɛ.
‑Maa nɩkpa a ‑muë wanyɩ 'a 'zʋzʋsaa ‑suä cuu,
‑wa ‑bhɩɛ 'yuë 'pɩpɩ Lagɔwɛlɩɩ 'mö a dɔ'wʋ,
‑mi wa 'kʋä 'nyɛɛ,
'mö n 'nyanyɩɛ.
2 Lɩbhʋ n 'nyanyɩɛ ‑maa n 'nanyɩɛ 'wʋtɛɛlilili 'nyɛ.
Ɛ'ɛ ‑bhö nyɩasɛ,
‑maa a'aa bhɛnɩ a 'kɩ li,
‑sɩkaa ‑bhlɛ ‑kë,
a'aa bhɛnɩ a 'kɩ li,
3 Ɛ'ɛ ‑bhö nyɩasɛ ‑maa nɩkpa a ‑muë Lagɔ 'a 'Wugɔmʋʋ 'nɩɛ ‑su a sɛ a nɛmöä.
Miɛ nɩɩ,
'yli a kälɩkälɩnɩɛ,
a 'yize 'lʋ a lʋä.
‑Sɩbhä ma‑a tulanɩɛ 'ylimö nɩɩ,
nɩkpa a ‑muë Lagɔ 'a 'Wugɔmʋʋ 'nɩɛ ‑su 'mö a glɩnɩɛ,
nɩkpa a ‑muëë 'nɩɛ Lagɔ ‑yi a sɛ a nɛmöä.
4 ‑Mɔ ‑kä nɩɩ:
«Pɔɔlʋ a ‑nɔ n glɩnɩɛ.»
‑Mɔmɔɔ ‑kä nɩɩ:
«‑Amö na a Apɔlɔsɩ a ‑nɔ n glɩnɩɛ.»
Zaa,
a ‑kä sa'a nʋʋ,
nɩkpa a ‑muëë 'nɩɛ Lagɔ ‑yi a sɛ a'aa bhä da'a zʋ ‑a?
5 ‑Tiamö a dɔ'wʋ,
n ‑nyɛ Apɔlɔsɩ 'sɔ a'bhë,
dɛ ‑ma ‑a kä bhä sɛ 'nɩ?
'Yliwʋwa ‑a glɩnɩɛ cuu,
‑aa za a 'zʋä Zezwii Kliisɩ a ‑nʋä.
Bhʋlʋbhlʋ ‑Alowli Lagɔ nyɩanyɩɛ libhi,
mö ‑a nʋä.
6 ‑Amö na a,
n yiɛ,
glʋ n glʋä,
'n Apɔlɔsɩ yiɛ ɔbhlɩ 'saa n glʋä 'nyu 'wʋ pälɩɛ yi,
yɩ 'kä 'pʋ.
‑Maa Lagɔ mɔɔ kää 'nglɩ 'n yɩ yiɛ 'wlʋ,
'n yɩ yiɛ 'pʋ.
7 ‑Sɩbhä a za n gbää nɩɩ,
‑ɔ glʋä mɔ,
‑ɔ pälɩɛ glʋglʋlii 'nyu 'wʋ mɔ,
mʋa 'nɩɛ dɛsɛ ‑kä.
‑Maa Lagɔ ‑ɔ kää 'nglɩ 'n yɩ wlʋä 'n yɩ pʋä,
ɔ 'yize mɔɔ kää dɛsɛ.
8 ‑Ɔ glʋä,
ɔ ‑nyɛ ‑ɔ pälɩɛ glʋglʋlii 'nyu 'wʋ 'sɔ,
Lagɔ 'a libho ‑bhʋlʋ ‑kpɔ 'mö wa nʋä.
Libho 'la,
'wa sɛ wa nuä,
Lagɔ yuë 'ylɩ ‑bhlʋ 'mö ‑sɩbhä a 'ylimö a ‑lu 'nyɛ.
9 Sɛ'ɛ n gbää nɩɩ,
‑abhʋa Lagɔ 'a libhonʋwaa 'wuë,
‑a ‑nyɛ Lagɔ 'sɔ libho wʋ ‑a nʋnɩɛ.
Abhʋa n pälɩɛ 'ɔ 'lagblɛɛ 'wʋ.
‑Budu a ‑mu Lagɔ ‑wʋä 'sɩbhä dɔ'wʋ,
'mö n pälanyɩ'ɛɛ 'wʋ.
10 Lagɔ a'bhë mɔɔ paaaa 'nyu 'n n yiɛ 'nɛɛnɩsɛ ‑budu 'la glu pälɩ 'tɩɩ.
‑Mumuë ‑wʋʋ 'gbäla dɔ'wʋ.
‑Maa 'sɩbhäsɩbhäwa 'la 'wuë,
wa kä wa 'kä 'wa 'sɩbhäsɩbhäsaa 'wʋ 'nɛmanɩ.
11 ‑Budu 'la a gluu,
Zezwii Kliisɩ mɔɔ,
‑bɛ 'nɩɛ bhɛnɩ ɔ 'kʋ 'sɔ glu pälɩnɩ.
12 ‑Mumuë 'gbälanu ‑sika ‑nyɛ 'pɛlʋtɛɛlɛya ‑mimii 'sɔ,
'nglɩkäkpɩ kökä.
‑Mumuë wabhlɩ,
wa ‑nɩɩ wa 'gbälanuä,
swi 'n pëpï.
13 Libhoo wa nʋä bhʋlʋbhlʋ a nanɔɔ,
Lagɔ 'a ‑zijle 'käda a zlɩɩ,
‑ɛ glɩnɩɛ ‑kosuu,
ɛ 'mö wʋ 'kää 'ylɩmö 'yoo.
Sɛ'ɛ n gbää nɩɩ,
libhoo wa nʋä 'n ‑wʋ ‑kä gwälɛgwälɛlu glɩnɩ 'n wʋ ‑kä ‑kosuu ngli 'plɩɛ yii,
‑mä ‑kosu 'la 'mö,
‑mä yɩ 'kää gbëdanguu bhlinɩ.
14 Zaa,
'saa nɩkpɛ 'sɩbhää 'n wʋ ‑kä ‑kosu ngli 'plɩɩ,
ɔ yi wʋ 'ylimö a ‑lu ghlɩ.
15 'N wʋ ‑kä ‑lu a ‑mu ‑kosu siaa glɩnɩɩ,
ɔ yi bɔ.
Ɔ'bhë ɔ yi abhlɩ 'pʋ,
‑maa nɩkpɛ a ‑mɔ ‑ɔnyɩɩ ‑lii 'wuë si'ɛ 'n wa 'pʋɔ'ɛ ‑kosu ngli a sɛ ɔ 'kää 'pʋ.
16 ‑Atʋayuënyɩ,
sɛ a glɩnɩɛ Lagɔ 'a ‑buduu 'n sɛɛ Lagɔ 'a 'Wugɔmʋʋ ‑bhölɩnanyɩɛ 'möö,
a ‑yi bhä ‑sɩbhä ‑a?
17 Lagɔ 'a ‑buduu,
ɔ 'yize a ‑lu wʋ glɩnɩɛ.
Zaa,
‑ɔ ‑kʋʋ nyimaa,
Lagɔ yo 'yli bhɩa.
N ‑kä sa'a gbää,
abhʋaa glɩnɩɛ ‑lɛ a ‑budu 'la,
a dɛ n bhïlaa.
Zezwii Kliisɩ a ‑nʋä a glɩnɩɛ
18 A gla'mö a ‑nɔ ‑bhlʋ a'bhë nɩ tɩ ɔnyɩ dula.
Nɩkpɛ ‑kä mä'ä 'pɩwʋ a ‑lii 'wuë ‑yi ‑kë,
ɔ ‑kä ‑sɩbhä a za ɔnyɩ 'nɛɛnɩnyɔ 'kɔdɔ 'mö 'wʋ 'libhïï,
ɔ nɩ yɩbhlɩnɩ sɛ nɩɩ,
Lagɔ a dɔ'wʋ,
ɔ'ɔɔ ‑lu ‑yi 'lɩlɩlɩ.
‑Lɛ a dɔ'wʋ ɔ yi ‑tiamö 'nɛmanɩ.
19 Nɩkpaa,
'saa wa laa 'nɛɛnɩwɛlɩɩ,
Lagɔ a dɔ'wʋ,
‑ɔɔ'nɛɛnɩwɛlɩɛ.
Nza yɩ cɛlɩɛ ‑mä Lagɔbɔgʋʋ 'mö nɩɩ:
‑Wa laa wanyɩ 'nɛɛnɩwa 'kädɩɩ,
'wa ylʋwɛlɩɩ,
'mö Lagɔ libhïä 'wʋ 'n ɔ köbhʋää gbʋ.a
20 Sɛ'ɛ yɩ cɛlɩ'ɛɛ ‑mä nɩɩ:
‑Wa laa wanyɩ 'nɛɛnɩwa 'kädɩɩ,
‑Alowli Lagɔ ‑yi sɛ nɩɩ,
'wa dlɩpäpʋʋ 'wuë,
nyɩasɛluä.b
21‑22 ‑Sɩbhä a za ‑bɛ nɩ tɩ nɩkpɛ ‑bhlʋ a'bhë 'mö tɛkpɔnɩ.
Ɛ yi ‑amö Pɔɔlʋ mɔ oo,
ɛ yi Apɔlɔsɩ mɔ oo,
ɛ yi Piɛlɩ mɔ oo,
‑a 'wuë,
a 'yliwʋwa ‑a glɩnɩɛ.
Mä'ä 'pɩwʋ a ‑lii 'wuë abhʋaa ‑këliɛ.
Ɛ yi 'saa ‑bhölɩɛ ‑sɩkaa mi oo,
ɛ yi 'saa 'kää 'zɩgblɛ ghlɛ mi oo,
ɛ yi 'kwie a'bhë mɛ oo,
yɩ 'wuë,
abhʋaa 'kämaniɛ ‑gömö.
23 ‑Maa abhʋa abhlɩ,
‑bɛ 'nanyɩɛ ‑kälɩ 'n ɛ 'nɩ ‑bhö Zezwii Kliisɩ a 'yize mɔɔ.
Sɛ ɔ glɩnɩɛ Lagɔ a 'yize a ‑nɔ,
‑sɩbhä a glɩnɩɛ ɔ 'yize a ‑nʋä.