Ghlɔɔmö a ‑nʋa 1

'Bɔgʋʋ Pɔɔlʋ 'cɛlɩɛ ‑mä

Ghlɔɔmö a ‑nʋa

'wʋʋ

Bhälɩwɛlɩɩ

‑Amö Zezwii Kliisɩ a libhonʋnyɔ Pɔɔlʋ,

‑amö Lagɔ wäzɩɛ nzɩɩ n 'kä ɔ tietienyɔ 'zʋ,

'wë 'n ɔ ‑yiiɛ ‑lɛ ‑sɛ n 'kä 'ɔ 'Mänatɩtɩɩ biaa,

‑amöö 'cɛlɩɛ 'bɔgʋ nɩ.

2 'Mänatɩtɩ 'la,

wɛlɩɩ Lagɔ 'nyɛ a‑a ‑pa 'wʋ 'ɔ 'möbhïlanɩwaa,

'mö wa 'cɛlɩɛ ‑mä 'wa Lagɔbɔgwɩɩ 'mö.

3 Ɔ yuu ‑Alowli Zezwii Kliisɩ a dɛ yɩ bhïlaa.

'Ɔ nɩkpɛglɩnɩsaa 'mö a dɔ'wʋ,

'bhlɩlowli Daviidɩ a ngëyi 'mö ‑mä ɔ 'bhöönɩɛ.

4 ‑Maa Lagɔsɛ a dɔ'wʋ,

Lagɔ a Yuä.

'Mö 'Wugɔmʋʋ 'Wlɩlɩ tulanɩɛ 'ylimö gbëaa,

‑zlɩ Lagɔ 'a 'mötɛɛnɔɔ 'mö,

ɔ gälɔɔɔ,

'n 'ɔ yoo glu ‑sɛɛ.

5 ‑Mä ‑Alowli Zezwii Kliisɩ 'mö,

‑mä Lagɔ 'pänɩɛ na ngäzɩdlɩ 'n ɔ ‑yiiɛ ɔ tietienyɔ 'wʋ 'zʋa,

nzɩɩ 'bhlɩbhëa 'kɔ dlɩ 'tɛɛnɩ,

wa 'kɔ 'klʋkpamö zʋ.

6 ‑Maa abhʋa 'yɛ abhlɩ,

nɩkpa 'la Lagɔ wäzɩɛ wa 'kä Zezwii Kliisɩ a ‑nʋä 'zʋʋ,

wa gla'mö a ‑nʋä a glɩnɩmöä.

7 Zaa,

a 'wuë abhʋaa ‑wʋä ‑mä Ghlɔɔmö glɔ 'möö,

abhʋa ‑glɛɛ Lagɔ dlɩ 'wʋ,

abhʋa ɔ wäzɩɛ a 'kä 'wlɩlɩ plɛ a za‑a,

a 'wuë,

‑aa dɩba Lagɔ ‑nyɛ ‑Alowli Zezwii Kliisɩ 'sɔ,

'wa 'tɩɩglɩglɛɛ ‑nyɛ 'nyupälɩɩ 'sɔ,

yɩ nɩ ghlanyɩ 'wʋ.

Pɔɔlʋ 'yɩbhä ɔ 'kä Zezwii a ‑nʋa ‑wa ‑wʋä ‑mä Ghlɔɔmö 'ylɩmöä mö

8 N 'kä tɛɛɛ yi a dɔ'wʋ,

a 'wuë a za n bhälɩ tenyii na dɩba Lagɔ Zezwii Kliisɩ a 'nglɩ 'mö.

Ɛ'ɛ ‑bhö nyɩasɛ,

‑maa 'a sɛ a 'tɛɛnɩɛ Zezwii dlɩɩ,

‑mä 'bhlɩbhëa 'wuë ‑gömö,

wa sɛ ‑sɩbhä a 'dɩ.

9 Lagɔ,

‑ɔnyɩɩ libhoo n ‑wʋä 'na dlɩɩ 'wuë zɛmö nʋnɩ dɔ'wʋʋ,

'n n biaa ɔ Yowli 'a 'Mänatɩtɩɩ,

ɔ ‑yi sɛ nɩɩ,

a 'wuë a 'wlu 'mö n bhibhee 'kwädlɩ.

10 N ‑kɔɔ 'kwädlɩ bhibhee,

sɛ'ɛ n bhibhee nɩɩ,

ɔ nɩ nglu 'wʋ,

n 'kä 'ylɩ ‑bhlʋ 'mö ‑mä 'a mä'a yi.

11 Ɛ'ɛ ‑bhö nyɩasɛ,

‑maa n yɩbhä tenyii,

n 'kä ‑mä a jijo'wʋ yi,

nzɩɩ 'nyupälɩɩ Lagɔ 'a 'Wugɔmʋʋ nyɩaa,

a 'kɩ ghlɩmö,

a 'kä swɩ nyɛmʋ 'mö 'pɔɔ.

12 'Saa n yɩbhä'ɛɛ tenyii a'bhëë,

miɛ nɩɩ,

n ‑kä ‑mä a jijo'wʋ yii,

sɛ ‑a 'tɛɛnɩɛ 'gämö Lagɔ dlɩ a za,

‑a 'wuë ‑a 'kä swɩ nyɛmʋ 'mö 'päpänɩ.

13 ‑Atʋayuënyɩ,

n 'kä ‑mä 'a mä'a yi a ‑lii,

n kɩ ‑bɛ 'wʋ 'wlumö zʋ,

‑maa n'n‑ä 'yio ghlɩ ‑këë ‑bhlɛ zɩ'ɛ,

sɛ n bhïlaa Lagɔ 'a wɛlɩɩ ‑mä ‑gwlɩ ‑mi'la ‑gömö 'n nɩkpa ngluä 'wʋ wa 'kä Zezwii a ‑nʋä zʋʋ,

n yɩbhä a nyɩasɛ yɩ 'kä ‑sɩbhä ‑mä 'a mä'a ‑wʋmö.

14 Ɛ'ɛ ‑bhö nyɩasɛ,

‑maa nɩkpaa 'wuë,

ɛ yi ‑wa ‑ngöä 'mö muë oo,

ɛ yi ‑waaa 'mö ‑ngö muë oo,

ɛ yi 'bɔgʋyiwaa muë oo,

ɛ yi ‑waaa 'bɔgʋ ‑yi muë oo,

wa 'wuë,

n kä n 'kʋä Lagɔ 'a wɛlɩɩ 'nyɛ klɩpaa.

15 Mɩɩ kää 'nglɩ,

nza n yɩbhää n 'kä ‑mä 'a mä'a yi klɩpaa,

abhʋaa ‑wʋä ‑mä Ghlɔɔmö,

n 'kanyɩ 'Mänatɩtɩɩ 'nyɛmö.

'Mänatɩtɩɩ Lagɔ a 'mötɛɛnɔ yɩ glɩnɩɛ

16 'Mänatɩtɩ 'la,

n 'kɩ bia a dɔ'wʋ,

yɩ ‑nɩɩɛ zʋ 'wʋ ‑bhö.

Ɛ'ɛ ‑bhö nyɩasɛ,

‑maa Lagɔ a 'mötɛɛnɔ yɩ glɩnɩɛ.

Nɩkpaa a kii 'wuë ‑wa 'tɛɛniɛ dlɩ,

yɩ yuë puë,

'tɛɛnɩ Zwiiföwaa 'wʋ 'wë,

‑n 'kä ‑waaa Zwiiföwa glɩnɩ 'wʋ ghlɛ.

17 Sɛɛ nɩkpɛ 'kää 'mö zlɔmanɩ Lagɔ a 'yila 'klʋ a dɔ'wʋʋ,

‑sɩbhä 'Mänatɩtɩɩ kälɩɛ 'klʋ.

Sɛɛ yɩ nʋä nɩɩ,

Lagɔ a dlɩtɛɛnɩtɛnɛ,

tɛɛnɩ ‑mä ɛ tɛɛnɩdɛ 'wʋ ‑këë ‑n 'kä ‑mä ɛ gbë 'wʋ ghlɛ,

ɛ 'yize cuu,

mɛɛ kää 'nglɩ 'n nɩkpɛ zlɔmanɩɛ 'mö Lagɔ a 'yila 'klʋ a dɔ'wʋ.

‑Sɩbhä yɩ cɛlɩɛ 'kɩ ‑mä Lagɔbɔgwɩɩ 'mö nɩɩ:

‑Ɔ 'tɛɛnɩɛ Lagɔ dlɩɩ,

mɔɔ zlɔnɩɛ 'mö Lagɔ a 'yila 'klʋ dɔ'wʋ,

zaa mɔɔ 'kää ‑bhölɩ. ^a

Nɩkpaa 'wuë wa kä gbʋ ‑gömö Lagɔ a 'yila 'klʋ a dɔ'wʋ

18 ‑Mä ghäyɩ 'wʋ,

‑mä Lagɔ 'a klɛɛ 'bhöönɩɛ 'n ɛ bhlinɩɛ nɩkpa 'wuë ‑gömö.

Sɛ wa 'nɔɔ bʋbɔ 'lɩlɩlɩ 'n wa nʋä ‑lizoku a kii 'wuë a za.

‑Mä 'wa nʋnʋlizoku 'la 'mö,

gbëaa,

'mö wa gwaa 'klʋ.

19 'Saa 'wuë nɩkpɛ bhɛnɩɛ ɔ 'kä Lagɔ a dɛ yɩbhlɩnɩɩ,

yɩ 'nuëë 'yli zizaanɩ,

Lagɔ a'bhë mɔɔ kälɩnuënyɩɛ kɛ 'klʋ.

20 Lagɔ 'a 'mötɛɛnɔɔ ‑wʋʋä 'bhlenɩdɛ ‑kä ‑nyɛ ɔ'bhë a 'saa ɔ glɩnɩɛ 'sɔ,

nɩkpɛ 'niɛ 'wʋ yɩlɩ.

‑Maa sɛɛ 'pɩwʋ 'maa 'kä a tɛɛ a ‑lii ɔ ‑bhɛɛ 'mö,

‑mä nɩkpa 'kɩ a‑a yɩbhlɩnɩ.

Zaa,

nɩkpɛ 'nɩɛ zugwë ‑kä.

21 Wa 'wuë wa ‑yi sɛ nɩɩ Lagɔ,

ɔ ‑bhölɩ.

‑Maa sɛɛ nɩkpɛ kä a‑a 'lɩlɩlɩ a dɔ'wʋ ɔ 'kä Lagɔ 'a nglɩɩ 'ghlimanɩɩ,

wa'a 'zʋ ‑sɩbhä,

wa'a bhälɔɔ 'ɔ ‑li a ‑li a za.

‑Maa ‑lii ‑yɩɩɛ dɛ sɛ ‑kä 'lɩlɩlɩɩ,

'mö 'wa cɛlɩɩ ‑gänɩɛ,

wa'aa 'yɩbhä Lagɔ 'kä 'wa dlɩpäsɛzokwëa 'wʋ ngäla zaa,

'n wa yiɛ ‑lizoku a 'yize a nʋnʋwa 'zʋ.

22 Sɛ wa libhïä wanyɩ 'nɛɛnɩwa 'mö 'wʋ a za,

wa yɛ ‑ɔɔ'nɛɛnɩwa 'zʋ.

23 'Lɩlɩlɩ a dɔ'wʋ,

Lagɔ ‑ɔ 'ghïliɛ,

‑ɔɔ bhɩɛ 'ylii,

'mö wa 'kä a‑a wa 'kä bʋbɔ,

‑maa wa'aa ‑sɩbhä 'zʋ.

Nɩkpɛ ‑ɔ bhɩɛɛ 'ylii,

ɔ sɛ a ‑li wa bhɛnɩɛ kä'möö,

zɩ,

nɩma ‑yɩ kää bhɩ ‑mʋänaa,

ɛ yi mi oo,

ɛ yi gbisogbisonɩɩ mi oo,

'mö wa bʋbɔɔ.

24 ‑Sɩbhä a za,

Lagɔ kʋä 'yi 'tatinɩ,

‑lizokuu 'wa dilaa 'pänuëë 'wʋʋ,

wa 'kɩ wanyɩ 'wlu nʋ,

‑lii ‑yɩ ‑bhöä zʋ 'wʋʋ,

wa 'kɩ 'wlu nʋnʋnɩ.

25 Sɛ'ɛ n gbää nɩɩ,

Lagɔ 'a ‑tiamö a wɛlɩɩ 'mö wa zigbanɩɛ yiodɩ 'mö.

Miɛ nɩɩ ‑lii Lagɔ ‑bhɛ a‑a,

'mö wa bʋbɔɔ,

‑maa ‑lii 'wuë a 'wälanyɔ Lagɔ a'bhë wa kä a‑a wa 'kä bʋbɔɔ,

wa 'nɔɔ bʋbɔ.

Lagɔ 'a nglɩɩ,

yɩ nɩ 'ghlimanɩ 'kwädlɩkwädlɩnɩ.

‑Amɛɛ!

26 Sɛ'ɛ n gbää nɩɩ,

'wa sa'a a za,

Lagɔ kʋä 'yi 'tatinɩ,

‑lizokuu 'wa dilaa 'pänuëë 'wʋ ‑yɩ ‑bhöä zʋ 'wʋʋ,

wa 'kɩ nʋ.

Miɛ nɩɩ ngwlɩɩ,

nyɩbhɛlɩ a 'tʋ 'nuëa'a 'lɩbhä,

‑maa wa 'bhɩangwlɩɩ a tʋʋ lɩbhʋää,

'mö wa ‑nyɛɛ pöä sɛ.

27 Sɛ ‑bhʋlʋ ‑kpɔ 'la,

‑sɩbhä nyɩbhɛlɩɩ 'zʋmö'ɛɛ.

'Ngwlɩ a 'tʋ 'nuëa'a 'lɩbhä,

‑maa wa 'bhɩanyɩbhɛlɩ a'bhï,

wa tʋʋ lɩbhʋää tenyii,

'mö wa ‑nyɛɛ pöä sɛ.

‑Lizoku ‑yɩ ‑bhöä zʋ 'wʋ,

wanyɩgäsɛ sa'a wa nwiɛ wanyɩ 'wlu.

Sa'a wa panɩɛ Lagɔ ‑gömö 'n wa yiɛ tʋʋ.

‑Sɩbhä a za,

Lagɔ yuë 'wa 'nyinylolii a 'pɛna 'nyɛ.

28 Sɛɛ wa'a 'yɩbhä wa 'kä Lagɔ yɩbhlɩnɩ a za,

Lagɔ kʋä 'yi 'tatinɩ,

'wa ‑ɔɔ'nɛɛnɔɔ 'kʋä ‑gömö 'kämanɩ,

‑lii ‑yɩɩɛ nʋnʋsɛ ‑wʋ,

wa 'kɩ nʋ.

29 'Saa 'nɩɛ Lagɔ dlɩ yɔwʋ nɛnɩɩ,

‑lizoku a kii 'wuë,

mɩɩ suä ‑mä wa dila zɛmö,

miɛ nɩɩ:

Dlɩgwlikäkʋ,

'kpʋkpʋ,

'ylikälɩkälɛ,

'kulɩbhälɩbhʋ 'n nɩkpanyimanɛ.

‑Li 'la 'wuë,

mɩɩ suä ‑mä.

Zaklɔnɩkpa,

ylʋwa a 'yize wa glɩnɩɛ,

wa 'bhɩa a 'nglɩ wa nyimaa,

30 nɩkpaa wa sɛɛ,

Lagɔ 'mö wa ‑gblɩɛ,

'ylimö wa fälanɔɔ,

bha wa bhaa,

wanyɩ wa pää 'wʋ.

Sɛɛ zila zɩɛ,

‑lizoku a ki ‑mimii wa lɛmöä 'yize.

Wa sɛ wa ‑lowluwa 'klʋkpamö.

31 Wa'aa 'nɛɛnɔ ‑kä,

wa'a 'zʋ 'wa ngli a wɛlɩɩ 'klʋkpamö.

Wa'aa dlɩ zɛmö nɛnɩ,

wa'a 'pä wa 'bhɩa a ngäzɩdlɩ.

32 Wa ‑kä sa'a 'zʋ dɔ'wʋ ‑wʋʋ,

wa'bhï wa ‑yi sɛ nɩɩ Lagɔ 'niɛ ‑wa 'lɩlɩlɩ.

Wa ‑yi sɛ nɩɩ,

‑wa nʋä sa'a a ‑lii,

Lagɔ yuë 'wa 'nyinylolii a 'pɛna 'nyɛ,

ɔ 'kʋä 'yli bhɩa.

Wa ‑yi sa'a sɛ 'wë,

'n wa nwiɛ 'yize.

Nɩkpa ‑mumuë ‑kɩɩ'ɛ ‑sɩbhä nʋmöä,

wa lɛ ‑li a ‑liɛ.