Lagɔ 'a ‑zijlitutwee 'mö ɛ zlɔnɩɛ
2
‑Mɔ ‑n yi glɩnɩ oo,
‑mɔ ‑n 'nɩ glɩnɩ oo,
‑nmö tunɩɛ ‑mumuë ‑zijlii,
mɩɩ 'naa ‑kamö gbʋ ‑gömö ‑sɛ.
Ɛ'ɛ ‑bhö nyɩasɛ,
‑maa ‑lizokuu wa nʋä,
mö ‑n nʋmöä.
Zaa,
‑n ‑kämö gbʋ ‑gömö.
2 ‑A'bhï ‑a ‑yi sɛ nɩɩ,
nɩkpaa ‑wa nʋä sa'a a ‑lizokuu,
‑zijlea Lagɔ 'kʋää tuu,
gbëaa 'mö a 'kää ‑wʋ.
3 Zaa,
‑lizokuu nɩkpaa nʋä,
‑nmö nʋmiɛ 'wë n‑n bhïlaa wa dɛ ‑zijlitunyɔ a sɛɛ,
‑n pä bhä dlɩ nɩɩ,
Lagɔ 'a ‑zijle 'la ‑n yea ngli 'pʋ ‑a?
4 ‑Maa Lagɔ 'a dlɩzɛmönanɔ 'kɔdʋʋ,
'ɔ dlɩ'wʋyɔnɩyɔnɛɛ ‑nyɛ 'ɔ dlɩ'mökpaanɔɔ 'sɔ,
ylimö ‑n fälani bhä ‑a?
‑Nn bhä sɛ ‑yi nɩɩ,
Lagɔ ‑kä sa'a ‑na za dlɩ zɛmö nɛnɩɩ,
‑n 'kä ligba,
‑n 'kä ‑na'a ‑lizokuu kɛ'mö ‑sɛ a za‑a?
5 ‑Maa ‑nmö ‑naa,
‑na'a dlɩɩ mö ‑n 'tumanɩɛ 'mö,
‑nn‑ä 'yɩbhä ‑n 'kä ligba ‑n 'kɩ kɛ'mö ‑sɛ.
‑N ‑kä sa'a zʋ dɔ'wʋ ‑wʋʋ,
‑na'a gbʋʋ mö ‑n 'tɛmanɩɛ da'a 'mö 'yize,
'ɔ ‑zijle 'kädaa a zlɩ,
ɔ ‑yimö tenyii ‑zijle tu.
‑Lɛ a zlɩ 'la 'mö,
nɩkpaa 'wuë wa yi sɛ yɩbhlɩnɩ nɩɩ,
Lagɔ 'a ‑zijlitutwee,
'mö ɛ zlɔnɩɛ.
6 Wa 'wuë 'wa 'saa wa nʋä,
‑sɩbhä ɔ 'kʋää bhʋlʋbhlʋ yɩ 'pɛna 'nyɛ.
7 ‑Mumuë ‑wʋ ‑lɛ,
'saa nɛnɩɛ Lagɔ dlɩ yɔwʋ a nʋnʋ dɔ'wʋ,
wa'a yɔlɔ.
‑Lii yɩ kää 'nglɩ ‑gömö,
‑yɩ kää dɛsɛ,
‑yɩ 'naa 'kää 'yli bhɩɛ,
yɩ gbʋʋ mʋʋ plɛnuëë.
‑Lɛ a nɩkpa 'la,
'mö Lagɔ 'kää 'pɩwʋ mää 'naa 'kää 'yli bhɩɛ 'nyɛ.
8 ‑Maa ‑mumuë ‑wʋ ‑lɛ,
wa'a 'zʋ Lagɔ 'klʋkpamö,
‑yɩ ‑wʋä gbëaa 'mö,
'mö wa ‑sɛɛ ‑lɛ 'n wa zʋä ‑lɛ ‑yɩɩɛ 'mö zlɔnɩ.
‑Lɛ a nɩkpa 'la,
Lagɔ yuë 'klɛ 'kädɛ yɔwʋ 'pänɩ.
9 Nɩkpa 'wuë ‑wa nʋä ‑lizokuu,
'klɩyɩyɛ 'kädɛ ‑nyɛ dlɩyliyile 'sɔ 'mö Lagɔ 'kʋää 'wʋ ‑lɛnɩ,
tɛɛnɩ Zwiiföwa 'wʋ ‑n 'kä ‑waaa Zwiiföwa glɩnɩ 'wʋ ghlɛ.
10 ‑Maa nɩkpaa 'wuë 'saa nɛnɩɛ Lagɔ dlɩ yɔwʋ ‑wa nwiɛ,
Lagɔ yuë 'nglɩ 'kädɩ 'nyɛ,
ɔ 'yila 'klʋ a dɔ'wʋ,
wa yi 'wʋ 'wɔlʋ,
wa dila yi bhli 'tɩɩ,
tɛɛnɩ Zwiiföwa 'wʋ ‑n 'kä ‑waaa Zwiiföwa glɩnɩ 'wʋ ghlɛ.
11 Ɛ'ɛ ‑bhö nyɩasɛ,
‑maa Lagɔ,
ɔ'ɔ gbäzɩ nɩkpa 'mö,
ɔ dɔ'wʋ nɩkpa 'wuë ‑bhʋlʋ wa glɩnɩɛ.
12 Lagɔ 'a Gböö Moyizɩ 'cɛlɩɛ,
nɩkpaa ‑wa 'niɛ ‑yi,
wa ‑kä 'nyinyloli nʋʋ,
Lagɔ yuë gbʋ köbha,
‑maa Gbö 'la,
'mö ɔ 'naa 'kä 'klʋ yɩlɩ ɔ 'kʋä ‑zijle tu.
‑Maa ‑wa ‑yiɛ ‑lɛ a Gbö 'la,
wa ‑kä 'nyinyloli nʋʋ,
Gbö 'la mɩɩ 'kʋä wabhlɩ gbʋ köbha.
13 Ɛ'ɛ ‑bhö nyɩasɛ,
‑maa nɩkpaa ‑wa ‑pʋnɩɛ Lagɔ 'a Gböö 'yukwli mʋa 'nɩɛ Lagɔ a 'yila 'klʋ a dɔ'wʋ 'mö zlɔnɩ.
‑Maa sɛ yɩ gbää wa zʋä ‑sɩbhää,
'mö Lagɔ 'zʋaa 'mözlɔnɩwa 'wʋ.
14 Nɩkpaa ‑waaa Zwiiföwa glɩnɩɩ,
Lagɔ 'a Gböö Moyizɩ 'cɛlɩɛ,
wa 'niɛ ‑yi,
‑maa ‑sɩbhä yɩ ‑wʋ 'mö,
ki ‑mimii 'mö a dɔ'wʋ,
wanyɩgäsɛ sɛ yɩ gbää,
wa nɛmö ‑sɩbhä.
Mɩɩ sɛɛ zɛmö nɩɩ,
yɩ ‑wʋ ‑mä wa dila zɛmö.
15 Sa'a 'wa nɛmönɛmösaa tulanɩɛ 'ylimö nɩɩ,
Lagɔ 'a Gböö,
yɩ cɛlɩ ‑mä wa dila zɛmö.
'Wa 'mlɩwʋnuëyii,
zlɩ ‑mɛmɛɛ 'mö,
ɔ köbhʋä gbʋ,
zlɩ ‑mɛmɛɛ 'mö,
ɔ sʋä gbʋ.
‑Mi 'la 'wuë,
mɩɩ tulanɩɛ 'ylimö nɩɩ,
Lagɔ 'a Gböö,
yɩ cɛlɩ ‑mä wa dila zɛmö.
16 Nɩkpaa a dila zɛmö a ‑lii ‑yɩ zizaa,
‑zlɩ Lagɔ ‑kä Zezwii Kliisɩ 'mö ghlɛnɩ ɔ ‑kʋä ‑zijli tuë yii,
yɩ 'wuë gbëdanguu yɩ 'kää bhli.
Lagɔ 'a 'Mänatɩtɩɩ n biaa dɛ'ɛɛ,
‑sɩbhä yɩ gbää.
Zwiiföwaa ‑nyɛ Lagɔ 'a Gböö 'sɔ a wɛlɩɩ
17 ‑Maa ‑nmö kää Zwiiföyi a 'nglɩ ‑gömö,
‑nmö 'tɛɛnɩɛ Moyizɩ 'a Gböö dlɩ,
‑nmö nʋä nɩɩ,
Lagɔ ‑n ‑yi zaa n‑n tɛkpɔɔ,
18 sɛɛ Lagɔ yɩbhää ‑n ‑yi ‑sɩbhä.
'Saa kää dɛsɛ 'n 'saa 'nɩɛ dɛsɛ ‑kä,
'mö Gböö sʋlʋnɩmöä.
19 ‑Nmö laa ‑nanyɩ 'kukwlekäwa a 'yukugänɩnyɔɔ,
‑wa ‑wʋä ‑mä 'yuylukwë 'mö a yɔlɔkpëë,
20 ‑waaa ‑lu ‑yi ‑nyɛ yuë 'sɔ a 'cɩanyɔ,
ɛ'ɛ ‑bhö nyɩasɛ,
‑maa ‑n nɛ naa,
‑n ‑yi Gböö 'wuë ‑nyɛ yɩ zɛmösɛsaa 'sɔ.
21 Miɛ abhlɩ,
‑maa ‑n ‑kʋä ‑sɩbhä 'cɩa dɔ'wʋ ‑wʋʋ,
‑na'bhë ‑n 'cɩamö ‑nanyɩ.
‑N ‑kä nɩkpa Lagɔwɛlɩɩ 'nyɛɛ,
sɛ'ɛ ‑n nʋä nɩɩ,
tɩ 'wi ghli.
‑Maa ‑na'bhë ‑n ghli 'wi.
22 ‑N nɛ nɩɩ,
nɩkpɛ nɩ tɩ ɔ 'li a 'nglɔ sɛ tɛlɩ,
‑maa ‑na'bhë,
‑n tɛlɩ ‑na'bhɩa a 'ngwlɩ sɛ.
'Fʋ a ‑lagwɩɩ a bʋbɔbʋbʋ,
‑n 'nuä ‑wa 'lɩlɩlɩ,
‑maa ‑bïdii wa bʋbɔniɛ 'möö,
yɩ 'mö a ‑lii,
‑n ghli 'wi.
23 Gbʋmö ‑n ‑yi Moyizɩ 'a Gböö a za,
tɛkpɔ ‑n tɛkpɔɔ.
‑Sɩbhä yɩ ‑wʋ 'mö,
‑maa ‑nn 'zwi 'klʋkpamö.
Sa'a ‑sɩbhä ‑nn 'zʋä ‑lɛ Lagɔ.
24 A yɩɛ,
sɛ'ɛ yɩ cɛlɩɛ a dɛ ‑mä Lagɔbɔgʋʋ 'mö nɩɩ:
Abhʋa Zwiiföwaa a za,
käböbhölɩ 'mö a ‑nʋa fälanɩɛ 'na nglɩɩ 'ylimö.a
25 'Lɩlɩlɩ a dɔ'wʋ,
‑n ‑kä 'wʋ dɩ‑ɩ,
‑sɛɛ Lagɔ 'a Gböö gbää ‑n ‑kä ‑sɩbhä nɛmö 'tɩɩ,
‑na'a 'wʋdɩɩdɛ dɛsɛ ɛ kää.
‑Maa,
sɛɛ Gböö gbää,
n‑n 'nɩ ‑sɩbhä nɛmöö,
‑n yi 'wʋ dɩ‑ɩ ‑kë,
nɩkpɛ a ‑mɔ ‑ɔɔɔ 'wʋ dɩ‑ɩ,
mö ‑n ‑nyɛ 'wlʋnɩɛ.
26 Sɛ ‑bhʋlʋ ‑kpɔ 'la,
nɩkpɛ a ‑mɔ ‑ɔɔɔ 'wʋ dɩ‑ɩ,
sɛɛ Lagɔ 'a wɛlɩɩ gbää ɔ ‑kä ‑sɩbhä nɛmöö,
Lagɔ yo ɔ ‑nɔ a ‑mɔ,
‑ɔ dɩ‑ɩ 'wʋ 'mö 'wʋ 'libhï.
27 Zaa,
‑waaa 'wʋ dɩ‑ɩ,
‑maa,
sɛɛ Lagɔ 'a wɛlɩɩ gbää,
‑wa nɛmöä ‑sɩbhää,
wa yi 'nglɩ ‑kä Lagɔ yeanyɩ gbʋ köbha.
Ɛ'ɛ ‑bhö nyɩasɛ,
‑maa mʋa zʋä 'ɔ wɛlɩɩ 'klʋkpamö.
A'bhï abhʋaa kää yɩ 'bɔgʋʋ 'wʋ,
abhʋaa dɩ‑ɩɛ 'wʋʋ,
a 'niɛ 'klʋkpamö zʋ.
28 Sɛ'ɛ n gbää nɩɩ,
nɩkpɛ a ‑mɔɔ nʋä Zwiiföyi a ‑li cuu,
mɔɔ 'nɩɛ ‑tiamö a Zwiiföyi glɩnɩ.
'Wʋdɩɩdɛ wa yɩlɩnɩɛ 'ylimö 'wʋʋ,
mɛɛ 'nɩɛ ‑tiamö dɛsɛ ‑kä.
29 ‑Maa ‑na'a dlɩpäsaa ‑sɩbhä ma‑a 'kää 'nglɩ ‑kä ‑n 'kä ‑tiamö Lagɔ a ‑nɔ glɩnɩ.
‑Na'a dlɩɩ a 'mözigbanɛ,
mɛɛ kää dɛsɛ,
mɛɛ glɩnɩɛ ‑tiamö a 'wʋdɩɩdɛ.
‑Tiamö a 'wʋdɩɩdɛ 'la,
Lagɔ 'a 'Wugɔmʋʋ a 'yize a libhoo.
Ɛ'ɛ ‑bhö 'bɔgʋ 'mö a Gbö a libhoo.
‑Tiamö a Zwiiföyi 'la,
nɩkpaa 'nɔɔ bhɩzɩ,
‑maa Lagɔ mɔɔ bhɩzoo.