Ghlɔɔmö a ‑nʋa 3

Zwiiföwaa zi 'wʋ ‑li ‑mimii 'mö

Nn,

sɛ'ɛ ‑n 'kää ‑kamä nɩɩ,

zaa,

nɩkpɛ 'kä Zwiiföyi glɩnɩ,

dɛ yɩ kä bhäa'aa sɛ?

'Wʋdɩɩdɛ a'bhë,

'saa ɛ kä bhöa'aa 'ylimö?

2 Miɛ abhlɩ,

‑maa yɩ kä dɛsɛ tenyii.

Ɛ'ɛ ‑bhö nyɩasɛ,

‑maa,

Zwiiföwaa,

'mö Lagɔ kälɩnɩɛ 'ɔ wɛlɩɩ kɛ 'klʋ tɛɛ.

3 Wa gla'mö a ‑mumuë kɔ ‑gömö panɩ a za,

wɛlɩɩ ɔ yɛɛ bhïla 'wëë,

nza ɔ 'kɩ bhä nimï ‑sɛ ‑a?

4 N'nn,

ɔ 'naa 'kɩ nimï ‑sɛ 'lɩlɩlɩ.

‑Sɩbhä a dɔ'wʋ,

nɩkpa yi sɛ yɩbhlɩmanɩ nɩɩ,

wa 'wuë,

yiowa wa glɩnɩɛ,

‑maa Lagɔ ɔbhlɩ,

gbëaa a 'yize ɔ kää ngli.

Nza yɩ cɛlɩɛ ‑mä Lagɔbɔgʋʋ 'mö nɩɩ:

‑Atʋ Lagɔ,

nɩkpaa 'wuë,

wa kä wa 'kä sɛ yɩbhlɩmanɩ nɩɩ,

gbëaa a 'yize ‑n kää ngli,

'n nɩkpɛ ‑kamö 'kïbhë 'bɩwʋ kwää,

‑nmö 'kää zugwë ghlɩ.^a

5 ‑A'a sɛɛ ‑aaa 'mö zlɔnɩɩ,

'n ‑sɩbhä ‑kä sɛɛ Lagɔ zlɔnɩɛ 'mö 'yli 'wälanɩɩ,

sɛ ‑a 'kä bhä gbä?

'N Lagɔ ‑kanyɩ 'klɛ yɔwʋ 'pänɩɛ sɛɛ ‑aaa 'mö zlɔnɩ a za‑a,

ɔ'ɔ bhä 'mö zlɔnɩ ‑a?

6 ‑Maa 'lɩlɩlɩ a dɔ'wʋ,

Lagɔ 'mö ɔ zlɔnɩɛ ‑tiamö,

'n ɛ 'nɩ ‑bhö a ‑sɩbhää,

sɛ ɔ 'kä a bhä 'bhlɩbhëa 'wuë a ‑zijlitunyɔ glɩnɩ 'nɩ?

7 Nɩkpa ‑mumuë bhɛnɩ wa 'kä nɩɩ:

'Na sɛ n glɩnɩɛ yionyɔ,

‑sɩbhä ma‑a ‑kä 'nglɩ ‑kä 'n Lagɔ a gbëaa ‑kä 'yli 'wlʋnɩ 'n ‑sɩbhä a za ɔ 'nglɩ ‑kä 'ghlimanɩɩ,

'saa bhä 'n wa ‑kaa bhä 'nyinylolinʋnyɔ 'mö 'wʋ 'libhï 'nɩ?

8 Sɛ'ɛ nɩkpa ‑mumuë 'kää ‑kamä nɩɩ,

zaa,

a‑a nɩ nʋa'a 'nyinyloli,

nzɩɩ,

‑li a ‑li 'kä ‑mä yɩ 'mö 'yli 'wlʋnɩ.

Nɩkpa ‑mumuë,

wa ‑kä wa 'kä 'na nglɩɩ nyima,

wa lɛ nɩɩ,

na'bhë 'na Lagɔwɛlɩɩ n bhïlaa,

sa'a yɩ sɛɛ zɛmö.

‑Maa nɩkpa 'la,

Lagɔ yuë 'wa 'nyinylolii a 'pɛna 'nyɛ.

Ɔ ‑kʋänyɩ 'nyɛɛ,

wa'bhï mʋa 'yɩbhɩɛ ‑sɩbhä.

‑Ɔ 'kää 'mö zlɔnɩ Lagɔ a 'yila 'klʋʋ ɔ'ɔɔ ‑bhölɩ

9 Zaa,

sɛ'ɛ yɩ sɛ bhä zɛmö nɩɩ,

‑abhʋa Zwiiföwaa,

‑abhʋaa kä bhä dɛsɛ,

a‑a zi bhä ‑muë'la 'wuë 'wʋ ‑a?

N'nn,

ɛ'ɛ ‑bhö sa'a ma 'lɩlɩlɩ.

'Mö n 'bhööä da'a ‑gömö ‑sɛsɛnɩɛ nɩɩ,

nɩkpaa 'wuë,

‑wa yi Zwiiföwa glɩnɩ oo,

‑wa 'nɩ Zwiiföwa glɩnɩ oo,

‑a 'wuë,

'nyinylolii a 'mötɛɛnɔ zɛmö ‑mä ‑a ‑wʋä.

10 Lagɔbɔgʋʋ 'mö,

sɛ'ɛ yɩ cɛlɩɛ ‑mä nɩɩ:

‑Ɔ 'kää 'mö zlɔnɩ Lagɔ a 'yila 'klʋʋ,

ɔ'ɔɔ ‑bhölɩ.

‑Bhlʋ a'bhë 'nɩɛ ‑bhölɩ.

11 ‑Ɔ 'nɛɛ,

ɔ'ɔɔ ‑bhölɩ

‑ɔ tɛlɩɛ sɛ ɔ 'kä Lagɔ yɩbhlɩnɩɩ,

ɔ'ɔɔ ‑bhölɩ.

12 'Bhlɩbhëa 'wuë mʋa panɩɛ Lagɔ ‑gömö,

wa 'wuë,

‑sɩbhä wa tʋʋ 'gämö.

Wa gla'mö,

'saa zlɔnɩɛ 'mö,

‑ɔ 'kʋ nʋʋ,

ɔ'ɔɔ ‑mä ‑wʋ

‑bhlʋ a'bhë 'nɩɛ ‑mä ‑wʋ.^b

13 'Wa ngli a wɛlɩɩ,

'kulɩbhälibho a 'yize yɩ 'kää.

'Wa ngli a mɩɩ,

nɩkpadulalibho a 'yize yɩ kää.^c

'Wa ngli a wɛlɩɩ,

yɩ 'kä ‑bhɩɛ tɩmɛ a glʋ.^d

14 ‑Mä wa ngli,

bhätlɩnɩwɛlɩ,

wɛlɩzoku,

yɩ 'yize,

mɩɩ suä ‑mä.^e

15 'Kulɩbhäzlɩ ‑kä ghlɛɛ,

sɛ'ɛ 'wa kwii nʋä ‑kpakpakpa.

16 Dɛ wa ‑kä ghlɛɛ,

sɛ wa yɛlaa,

ngäzɩ a 'yize wa tɩɛ ‑lɛ 'n wa plɩɛ.

17 Wa'a tɛlɩ 'tɩɩglɩglɛ a 'yio sɛ.^f

18 Wa'aa Lagɔ a nganɔ ku 'mö ‑kä 'lɩlɩlɩ.^g

19 ‑A 'wuë ‑a ‑yi sɛ nɩɩ,

Gböö Moyizɩ 'cɛlɩɛ,

‑muë yɩ 'kämanɩɛ ‑gömöö,

'mö yɩ göä 'yi.

‑Maa ɛ'ɛ ‑bhö käbönɩkpɛ a ‑li.

Zaa,

‑aa gla'mö,

nɩkpɛ a ‑mɔɔ 'kää gbʋ ‑dɩ ‑ɔ 'kää nɩɩ,

ɔ'ɔɔ ɔbhlɩ gbʋ ‑gömö ‑kä,

ɔ'ɔɔ ‑bhölɩ.

Zaa 'bhlɩbhëa 'wuë,

wa kä gbʋ ‑gömö Lagɔ a 'yila 'klʋ a dɔ'wʋ.

20 Ɛ'ɛ ‑bhö nyɩasɛ,

‑maa nɩkpɛ a ‑mɔɔ 'kää Lagɔ 'a Gböö 'klʋkpamö 'zʋ ‑këë,

ɔ 'kä Lagɔ a 'yila 'klʋ a dɔ'wʋ 'mö zlɔmanɩɩ,

ɔ'ɔɔ ‑bhölɩ 'lɩlɩlɩ.

Zaa,

Lagɔ 'a Gböö,

nɩkpa yɩ dɩɛ 'yila 'n wa yɩbhlɩnɩɛ sɛ nɩɩ,

'nyinylolinʋwaa wa glɩnɩɛ.

Lagɔ mɔɔ zlɔmanɩɛ nɩkpɛ 'mö Zezwii Kliisɩ a 'nglɩ 'mö

21 ‑Maa ‑sɩkaa a dɔ'wʋ,

Gböö a 'klʋkpamözʋzwɛɛ mɛɛ 'nɩɛ 'nglɩ ‑kä nɩkpɛ 'kä 'mö zlɔmanɩ Lagɔ a 'yila 'klʋ a dɔ'wʋ.

‑Maa sɛ ɔ zlɔmanɩnyɩɛ 'möö,

ɔ'bhë ɔ ‑kanyɩ ‑sɩbhä sʋlʋnɩ 'wë.

Sa'a yɩ cɛlɩ a‑a 'kɩ ‑mä Moyizɩ 'a Gböö ‑nyɛ Lagɔ 'a 'möbhilanɩwaa 'sɔ a 'bɔgwɩɩ 'mö.

22 Miɛ nɩɩ,

nɩkpaa ‑wa 'tɛɛnɩɛ Zezwii Kliisɩ a 'yize dlɩɩ,

'mö Lagɔ 'libhïä 'mözlɔnɩwa 'mö 'wʋ.

Wɛlɩ 'la,

nɩkpa 'wuë a ‑liɛ.

Ɛ'ɛ ‑bhö nyɩasɛ,

‑maa Lagɔ a dɔ'wʋ nɩkpaa 'wuë ‑bhʋlʋ wa glɩnɩɛ.

23 Miɛ nɩɩ,

nɩkpaa 'wuë,

'nyinyloli wa nʋä.

Zaa,

Lagɔ 'a 'ghïlinɔɔ,

wa 'naa 'kʋa'a 'ylɩmö.

24 ‑Maa wa 'wuë,

Lagɔ mɔɔ pää wa ngäzɩdlɩ,

'n ɔ yuëë 'fʋ 'mözlɔnɩwa 'wʋ 'zʋa.

Zezwii Kliisɩ 'mö ɔ ghlɛnɩɛ 'mö 'n ɔ yuëë 'nyinylolii a galɛ 'mö ‑sɛ.

25‑26 Miɛ nɩɩ,

Zezwii Kliisɩ 'mö Lagɔ ‑sɛɛ ‑lɛ ɔ 'kä nɩkpaa 'wuë a bʋbɔnɩlu 'zʋ.

'Ɔ dluu ‑wʋ kwliɛ a za.

‑Ɔ ‑kɩɩ ‑sɩbhä dlɩ 'tɛɛnɩɩ,

Lagɔ yi 'ɔ 'nyinylolii a gbʋʋ 'yi 'tatinɩ.

Zezwii 'a kwie 'la 'mö,

‑mä yɩ 'wlʋnɩɛ 'yli nɩɩ,

Lagɔ ‑kpöö 'wʋ ɔ ‑wʋä 'kwädlɩ.

Bhla'mö a dɔ'wʋ,

dlɩ 'mö ɔ ‑kpaanɩɛ ‑këë,

ɔ'ɔɔ nɩkpa 'wa 'nyinylolii a 'pɛna 'nyɛ.

Lagɔ,

'mö ɔ zlɔnɩɛ zaa,

‑sɩkaa a dɔ'wʋ,

nɩkpaa 'wuë ‑wa 'tɛɛnɩɛ Zezwii dlɩɩ,

ɔ yɩbhä ɔ 'kʋä 'mözlɔnɩwa 'wʋ 'zʋa.

27 Zaa,

yɩ ‑kä sa'a 'mö ‑wʋʋ,

'kïbhë a ‑maa 'kää 'nglɩ ‑kä nɩkpɛ 'kä ɔnyɩ 'wʋ 'pä Lagɔ a 'yila 'klʋ a dɔ'wʋʋ,

dɛ a ‑wʋ bhä 'nɩ?

A'aa ‑bhölɩ 'lɩlɩlɩ.

N ‑kä sa'a gbää,

ɛ'ɛ ‑bhö nyɩasɛ,

‑maa wɛlɩɩ ‑yɩ nʋä nɩɩ nɩkpɛ ‑kä ɔ 'kä 'pʋʋ,

ɔ nɩ 'zʋ Lagɔ 'a Gböö 'klʋkpamö,

'mö n 'nɩɛ ‑gänɩ.

‑Maa ‑yɩ nʋä nɩɩ,

‑ɔ ‑kä ɔ 'kä 'pʋʋ,

ɔ nɩ 'tɛɛnɩ Zezwii dlɩ cuu,

'mö n ‑gänɩɛ,

nza n gbää ‑sɩbhä.

28 Sɛ'ɛ n gbää nɩɩ:

‑A 'wuë,

wɛlɩɩ ‑a 'kää ‑gänɩ,

miɛ nɩɩ:

Nɩkpɛ,

'ɔ sɛ ɔ zʋä Lagɔ 'a Gböö 'klʋkpamöö,

mɩɩ 'naa 'kä 'nglɩ ‑kä 'lɩlɩlɩ ɔ 'kä 'mö zlɔmanɩ.

‑Maa ɔ ‑kä Zezwii dlɩ 'tɛɛnɩ cuu,

yɩ 'yize,

mɩɩ 'kää 'nglɩ ‑kä,

ɔ 'kä 'mö zlɔmanɩ.

29 Zaa,

Lagɔ,

Zwiiföwaa a 'yize a Lagɔ ɔ glɩnɩ bhä ‑a?

‑Waaa Zwiiföwa glɩnɩɩ,

ɔ'ɔɔ bhä wa Lagɔ glɩnɩmö ‑a?

Ɔ glɩnɩmö ‑waaa Zwiiföwa glɩnɩ a Lagɔ.

30 Ɛ'ɛ ‑bhö nyɩasɛ,

‑maa Lagɔ,

ɔ ‑bhli ‑bhʋlʋ ‑kpöö.

‑Sɩbhä a za,

Zwiiföwaa muë,

‑waaa Zwiiföwa glɩnɩ muë,

wa 'wuë a dɔ'wʋ,

‑ɔ ‑kä Zezwii dlɩ 'tɛɛnɩ cuu,

mɔɔ zlɔnɩɛ 'mö Lagɔ a 'yila 'klʋ a dɔ'wʋ.

31 N ‑kä sa'a Zezwii a dlɩtɛɛnɩtɛnɛ a wɛlɩɩ bhïlaa,

sɛ'ɛ yɩ sɛ bhä zɛmö nɩɩ,

Lagɔ 'a Gböö,

yɩ'ɩa'a dɛsɛ ‑kä zaa,

‑a kä ‑a 'kɩ sɛ ‑sɛ,

‑sɩbhä yɩ sɛ bhä zɛmö ‑a?

N'nn,

ɛ'ɛ ‑bhö sa'a ma.

Lagɔ 'a Gböö,

n 'niɛ sɛ ‑sɛ,

‑maa sɛ yɩ sɛɛ ‑tiamö zɛmöö,

‑sɩbhä n tulanɩɛ 'ylimö.