Nʋnʋlii 21

Pɔɔlʋ yɛ ‑mä Zeluzalɛɛmö mö

‑A kɩnuëë 'wëë,

a‑a yiɛ batoo 'wʋ 'libhï,

‑glɔɔ wa laa Kɔsɩ,

a‑a yiɛ ‑mä 'gbɩɩ mö.

Zlɩ zɩɛ,

‑glɔɔ wa laa Ghlɔdɩ,

a‑a yiɛ ‑mä mö.

‑A 'bhööä ‑mä,

‑glɔ ‑mumuu wa laa Patalaa,

a‑a yiɛ ‑mä ghlɛ.

2 ‑Mä ‑a ghlɩnɩɛ batoo ‑mumuu,

Fenisii‑bhölɩɩ 'mö ‑mä wʋ möä.

Mö ‑a ‑gbälɛɛ 'mö a‑a yiɛ mö.

3 Gïnyɛlekpë 'käda ‑bhlʋ wa laa Siiplɩ,

‑a ghlaa yɔwʋʋ,

a‑a yeaa kɔpɛ 'pänɩ.

‑Mä Silii‑bhölɩɩ 'mö,

a‑a yiɛ ‑mä a pɩɔ 'yli mönɩ.

‑Mä a glɔ ‑bhlʋ wa laa Tiilɩ,

‑mä wa 'kää batoo 'mö a ‑lii kwïlanɩ zaa ‑a ghlɛɛ ‑mä,

'n wʋ yiɛ 'kïkë köbhä.

4 ‑A ghlɩ ‑mä Zezwii a ‑gänɩwa,

‑a ‑sʋa 'ylɩ ngbi'sɔ yɔwʋ.

‑Maa,

'saa 'kää Pɔɔlʋ ‑mä Zeluzalɛɛmö ghlɩɩ,

'mö 'Wugɔmʋʋ 'Wlɩlɩ tulanuëë 'ylimö zaa,

'n wa yoo 'dɩ 'nyɛ nɩɩ,

ɔ nɩ tɩ ‑mä mö.

5 ‑Maa ylɩ ngbi'sɔ ‑kpɔ 'plɩɛ,

batoo a mömözlɩ ghlɛɛ,

a‑a yiɛ 'wʋ ‑sɔ ‑a 'kä mö.

‑A 'kää möä yii,

Zezwii a ‑nʋa,

'wa ngwlɩɩ muë,

'wa yuëa muë,

wa 'wuë 'n wa ‑yinyɩɛ 'yio kwä ‑këë ‑mä gïnyɛ yɔwʋ.

‑A ghlɛɛ ‑mää,

‑lɛ 'kïkë 'wlu,

‑a 'wuë,

a‑a yiɛ ‑kokomïladigbï glu 'pä,

a‑a yiɛ Lagɔ bhibhe.

6 ‑A bhibhee 'wëë,

a‑a yia'aa kɩnɩkɩnɩnɩ,

a‑a yiɛ batoo 'mö ‑gbälɛ 'n wa yiɛ wabhlɩ wa 'bhele 'bɩwʋ mö.

7 ‑A bhɩɛ nyuu 'möö,

‑a 'bhööä Tiilɩ,

a‑a yiɛ ‑glɔɔ wa laa Pʋtʋlemayisɩ ghlɛ.

Zezwii 'a ‑gänɩwaa ‑wa ‑wʋä ‑mä,

a‑a yuëë bhälɩɛ mö.

‑A ‑sɛ ‑lɛ wa yowʋ 'ylɩ ‑bhlʋ.

8 Zlɩ zɩɛ,

a‑a yiɛ 'wʋ ‑sɔ,

a‑a yiɛ ‑mä Sezalee mö.

‑A ghlɛɛ ‑mä,

Lagɔwɛlɩbhïlanyɔ Filiipö,

mö ‑a plɛɛ 'wʋ.

Nɩkpaa ngbi'sɔ ‑kpɔ wa ‑sɛ a ‑lɛ ‑mä Zeluzalɛɛmö,

wa gla'mö a ‑nɔ ‑bhlʋ Filiipö glɩnɩɛ.

9 Ɔ kä nglʋyuë ‑mʋäna,

wa'aa ‑bhlɛ tɛkäsɛ nyɩbhɛlʋ a dɛ ghlɛnɩ.

'Wugɔmʋʋ 'Wlɩlɩ ‑wuë ‑gömö 'n ɔ bhïlanuëë 'mö.

10 ‑A yɛ ‑lɛ 'ylɩ a ‑bɛ ‑sɛ 'wë,

'n Lagɔ a 'möbhïlanɩnyɔ ‑bhlʋ yiɛ yi.

Zwidee‑bhölɩɩ 'mö ‑mä ɔ 'bhöönɩɛ,

ɔ nglɩɛ Agabusɩ.

11 'N ɔ ‑yinyɩɛ ‑lɛ ghlɩnɩ.

'N ɔ yiɛ Pɔɔlʋ 'a 'bɛtʋʋ 'wʋ 'libhï,

'n ɔ yiɛ ɔnyɩ a kplɩɩ ‑nyɛ swɩɩ 'sɔ gwa,

ɔ lɛ:

«'Wugɔmʋʋ 'Wlɩlɩ lɛ naa,

nɩkpɛɛ ‑ɔ ‑kälɩɛ 'bɛtʋ nɩ‑ɩ,

ɔ ‑kä ‑mä Zeluzalɛɛmö ghlɛɛ,

sɛ'ɛ ‑sɩbhä Zwiiföwaa lɛ 'kɔɔ gwa,

lɛgäwaa ‑waaa Lagɔ ‑yii,

wa 'kʋänyɩ kä'mö plɩnɩ.»

12 Ɔ gbää sa'aa,

‑a ‑nyɛ Zezwii 'a ‑gänɩwaa ‑wa ‑wʋä ‑mä 'sɔ,

a‑a yiɛ Pɔɔlʋ ‑bɛlɩ 'pä nɩɩ ɔ nɩ tɩ ‑mä Zeluzalɛɛmö mö.

13 ‑Maa Pɔɔlʋ lɛ naa:

«Sɛ yɩ ‑wʋ ɔ 'mö 'n a wi bhä 'nɩ?

A ‑kaa bhä swɩ yɔwʋ 'kuanɩ ‑a?

‑Mä Zeluzalɛɛmö,

wa ‑yii ‑mä gwanɩ oo,

wa ‑yii 'lɩbhä n yi 'kuë yi a'bhë oo,

n yi ‑mä mö.

Ɛ'ɛ ‑bhö nyɩasɛ,

‑maa n ‑bhɩɔ 'mö,

n 'kä ‑Alowli Zezwii a za 'ku.»

14 ‑A lɛ yɛla a ‑li 'mö,

‑a 'kä 'ɔ dlɩɩ 'mö 'bhɛla,

‑maa a‑a bhɛmanɩ zaa,

a‑a yoo kɛ yɔwʋ ‑sɛ,

‑a lɛ naa:

«Lagɔ 'a sɛ ɔ yɩbhää,

‑sɩbhä nɩ 'wlʋnɩ 'yli.»

15 ‑A ‑sɛɛ ‑mä ‑glɔ 'la 'mö 'ylɩya 'wëë,

a‑a yiɛ ‑a'a ‑lii 'wlu gïganɩ,

a‑a yiɛ Zeluzalɛɛmö a 'yio 'wʋ 'libhï.

16 Zezwii a ‑gänɩwa ‑mumuë ‑wa ‑wʋä ‑mä Sezalee,

'n wa ‑yinyɩɛ 'yio 'wʋ kwä,

nzɩɩ ‑a ‑kä ‑mä Zeluzalɛɛmö ghlɛɛ,

Siiplɩ a nɩkpɛ ‑bhlʋ wa laa Mlasɔɔ wa ‑kanyɩ ‑lɛ 'ɔ 'ligbë 'mö kwä,

‑a 'kä ‑lɛ gʋʋ.

Nɩkpɛ 'la ɔ yɛ Zezwii a ‑nɔ 'zʋ,

‑lɛ yɛ 'mö gwälɛ.

Pɔɔlʋ yɛ Zaakö bhälɩɛ mö

17 ‑A ghlɛɛ ‑mä Zeluzalɛɛmö,

‑aa Lagɔdaayuë,

wa pälanyɩ 'mänasɛ 'tɩɩ.

18 Zlɩ zɩɛ,

'n Pɔɔlʋ ‑yinyɩɛ 'wʋ 'libhï,

‑mä Zaakö a 'ligbë 'mö,

a‑a yiɛ ‑mä mö.

Zeluzalɛɛmö a ‑zɩkpa a 'yukugänɩwaa 'wuë,

wa yɩbhä ‑mä 'wlu,

a‑a yuëë ‑mä ghlɩnɩ.

19 Pɔɔlʋ bhäluëë 'wëë,

'n ɔ yiɛ 'tɩtɩ ‑sɛ.

Libhoo Lagɔ 'nyɔ a‑a ‑mä ‑waaa Zwiiföwa glɩnɩ jijo'wʋʋ,

'n sɛɛ Lagɔ a'bhë nʋnuëë ‑li 'kädɩ 'möö,

‑sɩbhä a tɩtɩɩ 'wuë 'mö ɔ ‑sɛɛ.

20 Pɔɔlʋ 'nyʋää ‑sɩbhä 'tɩtɩɩ,

wa 'wuë 'n wa yiɛ Lagɔ a 'nglɩ 'ghlimanɩ.

'Wë,

'n wa yiɛ Pɔɔlʋ 'dɩ 'nyɛ,

wa lɛ naa:

«‑Atʋayu,

‑ayo,

‑maa yɩɛ,

Zwiiföwaa ‑wa yɛɛ Zezwii a ‑nʋä 'zʋʋ,

wa'aa muënɩ,

‑maa Moyizɩ 'a Gböö 'mö wa ‑glɛɛ tenyii 'wʋ 'yize.

21 Nɩkpa 'la wa yɛ 'nʋ nɩɩ,

Zwiiföwa ‑muë'la ‑wa ‑wʋä ‑mä ‑waaa Zwiiföwaa glɩnɩ jijo'wʋʋ,

‑nmö nyʋää 'dɩ nɩɩ,

wa nɩ ‑sɛ Moyizɩ 'a Gböö kɛ'mö,

miɛ nɩɩ wa nɩ tɩ 'wa yuëa 'wʋ ‑dɩ,

‑a'bhilɔ 'wuë wa nɩ ‑sʋʋ kɛ'mö.

22 ‑Maa nɩkpa 'la,

sɛ yɩ 'nɩa'a 'mö ‑wʋ ‑kë,

wa yi 'nʋ nɩɩ,

‑n yɛ yi.

Zaa,

sɛ ‑a 'kä bhä 'zʋ 'nɩ?

23 Yɩɛ sɛ ‑a ‑kamöä dɛ'ɛ 'dɩ 'nyɛɛ 'zʋ ‑sɩbhä.

‑Aa gla'mö a nɩkpa ‑mʋäna,

wa yɛ Lagɔ wɛlɩ 'yukwli 'mö 'zʋ.

24 Zaa,

‑n nyʋä 'sɔ a nɩ mö,

sɛɛ Moyizɩ 'a Gböö gbää nɩkpɛ nɩ 'zʋ ɔ 'kä Lagɔ a 'yila 'klʋ a dɔ'wʋ 'wlɩlɩ plɛɛ,

a nɩ 'zʋ ‑sɩbhä.

‑Lii wa bʋbɔnɩɛ,

‑nmö nɩ pɩɩɩ wa 'wlumö nzɩɩ wa 'käa 'wa nyukwëa kpälɩ.

‑Sɩbhä a dɔ'wʋ,

nɩkpa 'wuë,

wa yi sɛ yɩbhlɩmanɩ nɩɩ,

widɩ 'wʋ wa 'libhïnɩmöä,

‑maa Moyizɩ 'a Gböö,

‑n 'zʋmi 'klʋkpamö.

25 ‑Maa ɛ ‑kä wabhlɩ nɩkpaa ‑waaa Zwiiföwa glɩnɩ ‑wa 'zʋä Zezwii a ‑nʋä muëë,

'kïbhï ‑mʋäna 'mö wa 'kää 'klʋkpamö zʋ cuu,

‑sɩbhä ‑a 'cɛluëë 'wʋ nɩɩ:

Wa ‑kä nɩmɛ 'fʋ a ‑lagɔ bʋbɔnɩɩ,

wa nɩ tɛ li,

nɩma ‑yɩɩɛ dlu 'mö sa‑aa,

wa nɩ ti li.

Wa nɩ tɩ nɩmɛdlu a'bhë li 'lɩlɩlɩ,

wa nɩ tɩ 'ngwlɩ ‑nyɛ nyɩbhɛlɩ 'sɔ ‑sɛsɛnɩ.»

26 Zaakö 'nyɛɛ sa'a Pɔɔlʋ 'dɩ 'wëë,

zlɩ zɩɛ,

'n ɔ yiɛ nɩkpa 'la ‑mʋäna ‑kpɔ 'wʋ 'libhï,

sɛɛ gböö gbää nɩkpɛ nɩ 'zʋ,

ɔ 'kä 'wlɩlɩ plɛɛ,

Pɔɔlʋ ‑nyʋä 'sɔ,

'n wa yiɛ ‑sɩbhä tɛɛ.

'N ɔ yiɛ ‑mä Lagɔbudu 'Kɔdʋʋ 'mö mö,

zlɩ ‑ɛnyɩɩ 'mö 'wa 'wlɩlɩplɛtɛnyɩ 'kää bhɩɛ wa 'kä Lagɔ ‑li bʋbɔnɩ,

ɔ 'kä ‑lɛ a zlɩ 'la Lagɔbʋbɔnyɔɔ sʋlʋnɩ.

Wa yɛ Pɔɔlʋ ‑mä Lagɔbudu 'Kɔdʋʋ 'mö 'wʋ gbulonɩ

27‑28 Pɔɔlʋ ‑nyɛ nɩkpa 'la 'sɔ,

'wa 'wlɩlɩplɛtɛnyɩ a ylɩ ngbi'sɔ ‑kpɔ lɛ 'kää bhɩɛɛ yii,

Zwiiföwa ‑mumuë ‑wa 'bhöönɩɛ ‑mä Azii‑bhölɩɩ 'möö,

Pɔɔlʋ ‑wʋ ‑mä Lagɔbudu 'Kɔdʋʋ 'mö,

'n wa yoo ‑mä 'ylɩmö.

Wa yoo 'ylɩmö cuu,

'n wa yiɛ 'mö 'kpa,

wa lɛ:

«Yizlaɛlɩ a nɩkpanyɩ aa,

a yi ‑a 'kä nɩkpɛ nɩ köbhä aa,

‑maa mɔɔ bhïlaa ‑aa dɛ wɛlɩzoku.

Saa 'wuë ‑sɩbhä ɔ bhïlanɩɛ.

Ɔ bhïla Moyizɩ 'a Gböö a dɛ wɛlɩzoku,

Lagɔbudu 'Kɔdʋʋ,

ɔ bhïla'ɛ wʋ dɛ wɛlɩzoku.

A yɩɛ,

mä'ä Lagɔbudu 'Kɔdʋʋ 'mö,

nɩkpa ‑waaa Zwiiföwa glɩnɩ a'bhëë,

ɔ kʋä ‑mä päla.

‑Budu nɩ ‑wʋ ‑wʋä 'wlɩlɩ Lagɔ a 'yila 'klʋ a dɔ'wʋʋ,

sa'a ɔ plʋʋä fɩ.»

Wa 'kpaa sa'a 'möö,

'n nɩkpa 'wuë yiɛ yi,

'n wa yiɛ Pɔɔlʋ 'wʋ gbulo.

29 'Fʋ wa'aa ‑sɩbhä gbä.

‑Maa Efɛɛzɩ a nɩkpɛ ‑bhlʋ wa laa Tlofimö,

'mö wa 'yɩ a‑a ‑mä Zeluzalɛɛmö Pɔɔlʋ 'bɩwʋ 'ylɩmö zaa,

wa ‑tɔnɩ 'mö ɔ ‑nyɛɛ plɛ ‑mä Lagɔbudu 'Kɔdʋʋ 'mö.

30 Wa gbuloo Pɔɔlʋ 'wʋʋ,

'n wa yiɛ ‑glɔɔ 'wuë glu ‑sɛ,

nɩkpaa guë bidibidi 'n wa yiɛ yi.

Wa yiɛ,

'n wa yiɛ Pɔɔlʋ 'wʋ 'libhï,

'n wa ‑nyɔɔ yiɛ ‑mä Lagɔbudu 'Kɔdʋʋ 'mö 'wlʋ,

'n wa yiɛ ‑lɛ ‑gba cuu.

31 Wa ‑wʋ Pɔɔlʋ 'kukusɛ 'lɩbhä dɔ'wʋ,

‑mä a 'slʋjagbëa a 'kämanɩnyɔɔ 'n ɔ yiɛ 'nʋ nɩɩ,

‑glɔɔ 'wuë,

wʋ ziko 'wʋ.

32 Ɔ 'nwiɛ cuu,

ɔ ‑su 'slʋja ‑nyɛ wa 'kämanɩwa ‑mumuë 'sɔ,

'n ɔ yiɛ ‑mä mö.

Nɩkpa a ‑bʋbʋʋ 'yuëë 'ylɩmö cuu,

'n wa yiɛ Pɔɔlʋ a 'lɩbhälɩbhä dɔ'wʋ 'nɩgbö.

33 'Slʋjaa ghlɛɛ ‑lɛ,

'wa 'kämanɩnyɔɔ 'n ɔ yiɛ Pɔɔlʋ yɔwʋ 'dio,

ɔ lɛ wa nɩ gbulo 'wʋ wa 'kɔ 'gogwi 'sɔ gwanɩ.

'N ɔ yiɛ nɩkpaa nimï 'yɩbhä nɩɩ:

«Nɩkpɛ nɩ ‑mɔ ɔ glɩnɩ bhä,

sɛ ɔ 'zʋ bhä?»

34 Ɔ 'yɩbhää sa'a nimïï,

nɩkpaa a ‑bʋbʋʋ,

‑muë ‑kä 'mö 'kpa wa nʋ 'wa sɛ,

‑muë ‑kä 'mö 'kpa wa nʋ 'wa sɛ.

‑Maa sɛ wa bhïlaa sa'a bidibidi a za,

'slʋjaa a 'kämanɩnyɔɔ,

ɔ'ɔɔ ‑lu 'mö 'nʋ 'lɩlɩlɩ zaa,

ɔ lɛ wa nɩ kwä Pɔɔlʋ ‑mä 'slʋjaligbë 'mö.

35 Wa ‑nyɛ Pɔɔlʋ ghlɛɛ ‑lɛ ‑buduu a ɛsɩkaliea 'klʋʋ,

'slʋjaa 'wʋ wa 'libhoo,

wa ‑soo ghäyɩ 'n wa ‑nyɔɔ yiɛ mö.

Ɛ'ɛ ‑bhö nyɩasɛ,

‑maa Zwiiföwaa a klɛɛ zumanɩ ɛ zumanɩɛ tenyii.

36 Zaa,

wa 'wuë wa ‑gänɩ Pɔɔlʋ 'n wa kpaa 'mö 'n wa nʋä:

«Ɔ nɩ 'lɩbhɔ ɔ 'kä 'ku aa,

ɔ 'kä 'ku aa,

ɔ 'kä 'ku aa!»

'Slʋjaa a 'kämanɩnyɔɔ yɛ Pɔɔlʋ 'tɛnyɩ 'nyɛ ɔ 'kä 'mö ‑sɛnɩ

37 'Slʋjaa ‑nyɛ Pɔɔlʋ ‑wʋ mö dɔ'wʋ,

wa lɛ 'kä ‑mä 'ligbë 'mö plɛɛ yi,

'n ɔ yiɛ 'wa 'kämanɩnyɔɔ 'dɩ 'nyɛ nɩɩ:

«N bhiamö nyɩaaa ‑ka 'tɛnyɩ n 'kä 'mö ‑sɛnɩ.»

Ɔ gbää sa'a,

'kämanɩnyɔɔ lɛ naa:

«N'n!

‑Aa,

‑n ‑yi bhä Glɛkögbʋ ‑a?

38 N ‑tɔnɩ'ɛ na a Ezipötɩyii ‑ɔ ‑sɛɛ 'ylɩya nɩ 'mö ‑glɔɔ glu 'n ɔ yiɛ 'kulɩbhäwa a mila ‑mʋäna 'wʋ 'libhï,

'n ɔ ‑nyʋä yiɛ ‑mä 'muse 'klʋ gwë zizaa mö,

mö ‑n glɩnɩɩ.»

39 Pɔɔlʋ lɛ naa:

«N'nn,

‑maa Zwiiföyi n glɩnɩɛ.

‑Mä Silisii‑bhölɩɩ 'mö a dɛsɛkäglɔɔ wa laa Taasɩ,

‑mä a nɩkpɛ n glɩnɩɛ.

‑Maa n bhiamö,

nyɩaa 'tɛnyɩ,

n 'kä na 'bhɩa Zwiiföwaa 'dɩ 'nyɛ.»

40 'N 'kämanɩnyɔɔ yiɛ 'wʋ nglu.

'Slʋjaligbëa nuë 'wʋ a ɛsɩkaliea 'klʋʋ,

Pɔɔlʋ 'nɩgbö ‑lɛ,

'n ɔ yiɛ sɔ ghäyɩ 'pä,

wa 'wuë 'n wa yiɛ vlɩɩ 'zʋ.

'N Pɔɔlʋ yiɛ Ebleegbʋʋ ‑wʋ glɩnɩɛ Zwiiföwaa a gbʋʋ 'mö bhïlanɩ.