Nʋnʋlii 20

Pɔɔlʋ yɛ ‑mä Masedʋanɩ‑bhölɩɩ ‑nyɛ Glɛkö‑bhölɩɩ 'sɔ 'mö mö

‑Jiji 'la 'wuë donɩɛ 'wëë,

'n Pɔɔlʋ yia'aa Zezwii 'a ‑gänɩwaa ‑wa ‑wʋä ‑mä 'wlu 'yɩbha,

wa 'wuë 'n ɔ yuëë 'dɩ 'mö zʋ 'tɩɩ 'wë,

'n ɔ yuëë kɩnɩ,

‑mä Masedʋanɩ‑bhölɩɩ 'mö 'n ɔ yiɛ ‑mä mö.

2 Ɔ ghlɛɛ ‑mä,

Zezwii 'a ‑gänɩwaa ‑wa ‑wʋä ‑mä,

‑sɩbhä ɔ nɛmöä wa ‑zɩkpöö 'wʋ bhʋlʋbhlʋ,

‑sɩbhä ɔ nyʋä Lagɔ 'a wɛlɩɩ,

'n ɔ pʋää swɩ nyɛmʋ 'mö,

sa'a ‑këë,

‑mä Glɛkö‑bhölɩɩ 'mö,

'n ɔ yiɛ ‑mä ghlɛ.

3 Ɔ ‑sɛ ‑mä 'cwɩ ta.

Ɔ lɛ 'kää 'wʋ ‑sɔ,

ɔ 'kä batoo 'wʋ 'libhï ɔ 'kä ‑mä Silii‑bhölɩɩ 'mö möä yii,

'n ɔ yiɛ 'nʋ nɩɩ,

Zwiiföwaa yɛ ɔ za 'dɩ zʋ wa 'kɔ 'lɩbhä ɔ 'kä 'ku.

‑Sɩbhä a za,

‑mä Masedʋanɩ‑bhölɩɩ 'mö 'n ɔ yiɛ ‑mä 'bɩwʋ mö.

4 ‑Maa ɔ 'kää möä yii,

Zezwii a ‑nʋä ‑mumuë 'mö ɔ ‑nyɛɛ mönɩɛ yɔwʋ.

Belee a nɩkpɛɛ wa laa Pilusɩ,

ɔ yowli Sopatɛlɩ mɔ,

Tesaloniikö glɔ 'mö a nɩkpa 'sɔ,

Alitaakö ‑nyɛ Sekudusɩ 'sɔ muë,

Dɛɛbö a nɩkpɛ ‑mɔmɔɔ wa laa Gayusɩ mɔ,

Timotee mɔ 'n Azii‑bhölɩɩ 'mö a nɩkpa 'sɔ,

Tisikö ‑nyɛ Tlofimö 'sɔ,

wa 'wuë 'mö Pɔɔlʋ ‑nyɛɛ mönɩɛ ‑mä Masedʋanɩ‑bhölɩɩ 'mö yɔwʋ.

5 Nɩkpa 'la ngbi'sɔ ‑kpɔ,

'n wa yiɛ 'yuku 'plɩ,

'n wa ‑yinyɩɛ ‑mä ‑glɔ wa laa Tlʋasɩ ‑kʋnɩɛ mö.

6 ‑Abhʋa abhlɩ,

Galɛ'möwlʋfɛtɩɩ 'plɩɛ 'wëë,

a‑a yiɛ ‑mä Filiipö batoo 'wʋ 'libhïnɩ,

'ylɩ ngbï 'plɩɛ,

a‑a yuëë ‑mä Tlʋasɩ ghlɩnɩ.

‑A ‑sɛ ‑mä 'ylɩ ngbi'sɔ.

Pɔɔlʋ yɛ ‑mä Tlʋasɩ Lagɔwɛlɩɩ bhïlanɩ

7 Zlɩ ‑kä zɩɩ,

'dimasiɛ zaa,

‑lɛ a ‑kidosɛ 'la,

‑abhʋa Zezwii a ‑nʋa 'wuë,

a‑a yiɛ 'wlu 'yɩbhä.

Sɛɛ Zezwii gbä a‑a,

‑a 'kä ‑sɩbhä 'fɔlɔ 'mö ‑dɩdɩnɩ ‑a 'kʋ 'gämö linɩ.

‑A 'yɩbhää 'wluu,

'n Pɔɔlʋ ‑yinyɩɛ Lagɔwɛlɩ 'nyɛ.

‑Maa zlɩ ‑kä zɩ mö ɔ 'kää mö zaa,

ɔ ‑wʋ bhïla dɔ'wʋ ‑këë zlɩ a jijo'wʋ.

8 'Tasɩ a 'kïbhë ‑bhlʋ 'mö,

‑mä ‑a 'yɩbhänɩɛ 'wlu,

'napö a ‑bɛ dɩ‑ɩ ‑mä 'yi.

9 ‑Maa ‑aa gla'mö a nyɛgbayu ‑bhlʋ,

ɔ nglɩɛ Etisɩ,

‑buduu a finɛtlɩ 'mö,

‑mä ɔ glɩɛ ɔbhlɩ sɛ.

Pɔɔlʋ ‑wʋ bhïla dɔ'wʋ ‑këë,

nyɛgbayu 'la 'n 'yɛla yoo köbhä 'n ɔ yiɛ ngämö cluclu.

Ɔ ngämöä 'n ɔ yiɛ ‑mä 'tasɩ a tananɛɛ a kïbhëa 'mö 'bhöö,

'n ɔ yiɛ zɛmö bhli.

Wa lɛ mɔ a 'wlu 'libhïëë,

ɔ ku‑u.

10 ‑Maa Pɔɔlʋ kwliɛ,

'n ɔ yiɛ 'wlu kwlinɩ,

'n ɔ yoo 'wʋ 'libhï 'n ɔ yoo gbögbönɩ.

Ɔ lɛ naa:

«A nɩ tɩ 'wi,

‑maa ɔ ‑gä.»

11 Ɔ gbää sa'a 'wëë 'n ɔ ‑yinyɩ'ɛɛ 'wʋ 'sɔ ‑mä ‑budu 'mö päla.

'N ɔ yiɛ 'fɔlɔ 'wʋ 'libhï,

'n ɔ yuä 'mö ‑dɩdɩnɩ,

a‑a yuä 'gämö linɩ.

'N ɔ yia'aa Lagɔwɛlɩ bhïla ‑këë 'n 'zɔkpɔylʋ yiɛ glu 'wlʋ,

'n ɔ yia'aa kɩnɩ ɔ 'kä mö.

12 ‑Maa nyɛgbayu 'la,

ɔ ‑gä 'n wa ‑nyɔɔ yiɛ 'ligbë 'mö mö,

nɩkpaa 'wuë 'mäna.

Pɔɔlʋ yɛ ‑mä Mile glɔ 'mö mö

13 ‑Maa ‑a 'kää ‑mä Tlʋasɩ 'bhööä yii,

‑abhʋa Pɔɔlʋ 'a ‑gänɩwaa,

‑abhʋaa 'libhïä ‑abhlɩ batoo 'wʋ,

‑glɔɔ wa laa Asɔsɩ,

‑a 'kä ‑mä mö.

‑Maa Pɔɔlʋ lɛ naa,

ɔ 'kä ɔbhlɩ kplɩ 'yli nɛmönɩ,

‑a 'kä ‑mä 'wʋ gbanɩ,

‑mä ɔ 'käa'aa batoo 'wʋ 'libhïnɩmö,

‑a nyɔɔ 'sɔ,

‑a 'kä yɔwʋ mönɩ.

14 Zaa,

ɔ ghlɩnɩnyɩɛ ‑mä Asɔsɩ,

'n ɔ yia'aa batoo 'mö ‑gbälɛ,

‑glɔɔ wa laa Mitilɛnɩ,

‑a ‑nyɔɔ 'sɔ a‑a yiɛ ‑mä mö.

15 ‑A 'bhööä ‑lɛ,

zlɩ zɩɛ,

gïnyɛlekpë 'käda ‑bhlʋ wa laa Sioo,

a‑a yeaa nuë sɩbhä.

Zlɩ zɩ'ɛɛ,

gïnyɛlekpë 'käda ‑mämaa wa laa Samɔsɩ,

a‑a yeaa yɔwʋ ghlɛ.

Zlɩ ‑mɛ'la 'mö 'yɛ,

‑glɔɔ wa laa Mile,

a‑a yia'aa ‑mä ghlɛ.

16 Nyɩasɛ ‑aaa Efɛɛzɩ a ‑glɔɔ yɛ'mö bhlɩ a‑a 'kä 'gbɩɩ ‑mä Mile mö.

‑Maa Pɔɔlʋ lɛ naa,

ɔ 'kä 'pulo ɔ ‑kä ‑jɔlʋ 'mö ‑kää,

Patɩkɔɔtɩ a fɛtɩɩ,

ɔ 'kɛa ‑mä Zeluzalɛɛmö ‑sɛnɩ.

Zaa,

ɔ'ɔɔ 'yɩbhä ɔ 'kä ‑mä Azii‑bhölɩɩ 'mö bʋanɩ.

Pɔɔlʋ yɛ Efɛɛzɩ a ‑zɩkpa a 'yukugänɩwaa kɩnɩ

17 ‑A ‑wʋ ‑mä Mile 'n Pɔɔlʋ yiɛ ‑mä Efɛɛzɩ a ‑zɩkpa a 'yukugänɩwaa 'dɩ 'wʋ 'pä nɩɩ,

wa nɩ yi.

18 Wa yiɛ,

wa ghlɩnɔɔ ‑mä Mile,

sɛ'ɛ ɔ 'zuëë 'dɩ 'mö nɩɩ:

«‑Atʋayuënyɩ,

'fʋ n 'nanyɩɛ wäzɩ,

‑maa n nɛ naa:

‑Zlɩ n yiɛ tɛkädɔ'wʋ mä'ä Azii‑bhölɩɩ 'mö 'n n yiɛ ‑mä 'a mä'a möö,

'tɛnyɩɩ 'wuë n ‑sɛɛ ‑mä a jijo'wʋʋ,

'na sɛ n nɛmöä,

a'bhï a 'yɩ ‑sɩbhä 'ylɩmö.

19 ‑Alowli Zezwii 'a libhoo n ‑wuuä nʋ dɔ'wʋʋ,

n'n‑ä nanyɩ 'kɔdɔ 'mö 'wʋ 'libhï.

‑Li ‑mimii a ‑bɛ,

yɩ ghälaa 'mɩɔ 'yli 'mö.

Zwiiföwaa,

wa tɛlɩ sɛ wa ‑kaa 'lɩbhä n 'kä 'ku.

‑Lɛ a 'klɩyɩyɛ 'la 'wuë,

n ‑wɛɛ ‑sɩbhä 'yɩ dɔ'wʋ 'n n nʋä Zezwii 'a libhoo 'yize.

20 Wɛlɩɩ ‑yɩ kää a dɔ'wʋ dɛsɛ ‑yɩ 'kanyɩɛ puëë,

a'bhï a ‑yi sɛ nɩɩ,

n 'nanyɩɛ yɩ kïbhë ‑bhlʋ a'bhë 'yli zizanɩ.

‑Maa ɛ yi ‑mä Lagɔbïdii 'mö ma oo,

ɛ yi ‑mä 'a 'ligbïï 'mö ma oo,

‑sɩbhä n 'nyɛnanyiɛ ‑mä,

yɩ 'wuë ‑sɩbhä n ‑sɛsɛnanyiɛ dlɩ ‑gömö.

21 ‑Wa glɩnɩɛ Zwiiföwa oo,

‑waaa Zwiiföwa glɩnɩ oo,

wa 'wuë sɛ'ɛ n 'titiluë 'yukwli 'mö nɩɩ,

wa nɩ ligba,

wa 'kä ‑tiamö Lagɔ yɩbhlɩnɩ,

miɛ nɩɩ,

wa 'kä Zezwii dlɩ 'tɛɛnɩ ɔ 'kä wa ‑lowli 'zʋ.

22 ‑Sɩkaa a dɔ'wʋ,

a nɩ ‑pʋnɩɩ sasɛ 'yukwli,

'Wugɔmʋʋ 'Wlɩlɩ lɛ n nɩ mö Zeluzalɛɛmö klɩpaa,

zaa ‑mä n ‑wʋä mö dɔ'wʋ.

N'n‑ä 'saa ‑kaa ‑mä ghlɩɛ ‑yi.

23 ‑Gwlɩɩ 'wuë n nɛmöä ‑gömöö,

n ‑kä ‑glɔ ‑mu'la 'mö ghlɛ 'yize,

‑sɩbhä 'Wugɔmʋʋ 'Wlɩlɩ nyɩaaa 'dɩ nɩɩ,

'klɩyɩyɛ ‑gänɩɩ 'yuku,

wa ‑yii ‑jie 'mö 'pä.

'Saa n ‑yiɛ cuu,

miɛ da'a.

24 ‑Maa yɩ 'wuë 'mö a dɔ'wʋ,

'na pɩwʋʋ,

‑mä n'n‑ä dlɩ 'wʋ 'pä 'lɩlɩlɩ.

'Saa n pää dlɩ 'wʋ cuu,

muä nɩɩ,

n 'kä mö ‑këë n 'kä ‑mä 'gbë 'wʋ ghlɛ,

libhoo ‑Alowli Zezwii nyɩaaa,

n kʋ zɛmö bhɩɛ,

sɛɛ Lagɔ 'pää nɩkpɛ a ngäzɩdlɩ Zezwii Kliisɩ a bɔɔmö a za‑a,

‑lɛ a 'Mänatɩtɩ 'la n 'kɩ saa 'wuë bia,

yɩ 'yize mɩɩ kää dɛsɛ na dɔ'wʋ.

25 ‑Maa a 'wuë abhʋa n ‑wʋ a‑a jijo'wʋ 'n n nyɩanyɩ a‑a 'pɩwʋ mää Lagɔ 'kämanɩɛ a wɛlɩɩ,

n ‑kaanyɩa'a dɛ'ɛ yɔwʋ 'bhöö 'wëë,

n ‑yi sɛ nɩɩ,

a gla'mö a nɩkpɛ 'naa ‑kaaa'a 'ylɩmö 'lɩlɩlɩ.

26 Nza n nyanyɩɛ zɩɛ 'dɩ nɩɩ:

A gla'mö a nɩkpɛ ‑kä tʋʋ Lagɔ a 'yila 'klʋ a dɔ'wʋʋ,

‑amöö 'nɩɛ ɔ gbʋ ‑kä.

27 Ɛ'ɛ ‑bhö nyɩasɛ,

‑maa 'saa 'wuë Lagɔ yɩbhää 'bhlɩbhëa a dɔ'wʋʋ,

yɩ 'wuë ‑sɩbhä n kälɩnanyɩɛ kɛ 'klʋ gbëaa.

28 Abhʋa 'Wugɔmʋʋ 'Wlɩlɩ 'zʋaa Zezwii a ‑nʋa a 'yukugänɩwa 'wʋ.

Zaa,

a nɩ 'nɛmanɩ anyɩ 'wʋ a tɩa tʋʋ,

‑muë'la a ‑gänɩɛ 'yukuu,

a nɩ 'zʋnuë'ɛ 'yli,

wa tɩa tʋʋ.

Zezwii a ‑nʋa a ‑zɩkpaaa,

‑mä Zezwii 'a 'kwiea 'mö,

‑mä ɔ dɩba Lagɔ ghlɩnaa.

Wa 'kä ɔ ‑nʋä 'zʋ a za,

nza ɔ dluu kwliɛ 'n ɔ yiɛ wa za 'ku.

Zaa,

‑lɛ a nɩkpa 'la,

a nɩ ‑suë sasɛ.

29 ‑Maa n ‑yi sɛ nɩɩ,

n ‑kä mö 'wëë,

sɛɛ gbï yi'ɛ 'bhabhïla jijo'wʋʋ,

‑sɩbhä nɩkpa ‑mumuë 'kanyɩɛ jijo'wʋ yi,

wa 'kanyɩ ‑lizoku 'wlu nʋ.

30 A gla'mö a'bhë,

‑mumuë yi ‑mä 'wlʋ,

wa yi Lagɔ 'a wɛlɩ widɩ 'mö ‑sɛnɩ,

wa 'kä Zezwii 'a ‑gänɩwaa 'wlumö nyima,

wa 'kä 'wa wɛlɩɩ ‑gänɩ.

31 Zaa,

a nɩ ‑ligba a 'kä ‑lɛ glɩ.

A'bhï a ‑yi sɛ nɩɩ,

'ylʋböö ta ‑kpɔ n ‑saanyɩɛ jijo'wʋʋ,

yɩ 'mö,

ɛ yi sabʋ oo,

ɛ yi zlɩgä oo,

a 'wuë bhʋlʋbhlʋ,

‑sɩbhä n zʋanyɩɛ 'dɩ 'mö a 'kä sasɛ Zezwii ‑gänɩ.

A za n 'wi Lagɔ a 'yila 'klʋ 'mɩɔ a'bhë.

32 ‑Sɩkaa a dɔ'wʋ,

Lagɔ 'mö n tanyɩɛ kä'mö.

Ɔ'bhë mɔɔ nɩ 'zʋnanyɩ 'yli,

wɛlɩɩ yɩ bhïlaa 'ɔ ngäzɩdlɩɩ a dɛɛ,

mɩɩ nɩ ‑soanyɩ.

Ɔ bhɛnɩ ɔ 'kanyɩ swɩ nyɛmʋ 'mö 'pä,

a 'kɔ dlɩ 'tɛɛnɩ 'yize.

‑Wa glɩnɩɛ ɔ 'yize a ‑nʋä,

‑lii 'wuë ɔ gbää ɔ 'kʋä 'nyɛɛ,

ɔ bhɛnɩ'ɛ ɔ 'kanyi 'nyɛ.

33 A'bhï a ‑yi sɛ nɩɩ,

ɛ yi moni oo,

ɛ yi ‑banɩ oo,

n'n‑ä tɛkäsɛ yɩ gla'mö a ‑lu nɩkpɛ zɛla.

34 A'bhï a ‑yi sɛ nɩɩ,

n ‑nyɛ 'na ‑gänɩwaa 'sɔ,

‑a 'kä li,

‑a 'kä 'mö päla a dɔ'wʋ,

na'bhë 'na kätɩkpöö 'mö n libhïä 'wʋ,

'n n nʋä libho.

35 Sa'a n tulananyɩɛ 'ylimö nɩɩ,

nɩkpɛ ‑kä libho nʋ,

ɔ 'kä 'pʋawaa 'wʋ yii,

mɩɩ nɛnɩɛ.

Ɛ'ɛ ‑bhö nyɩasɛ,

‑maa ‑Alowli Zezwii a'bhë sɛ'ɛ ɔ gbää nɩɩ,

nɩkpɛ ‑kamö ‑lu 'nyɛɛ,

yɩ ‑bhö ‑tiamö 'mäna 'wʋ.

‑Maa ‑na'bhë,

‑n 'kä nɩkpɛ ‑lu 'nyɛɛ,

yɩ ‑yimö tenyii 'mäna 'wʋ ‑bhö,

yɩ yi ‑mi'la 'wʋ zi.

‑Lɛ a wɛlɩ 'la a nɩ tia 'wʋ dlʋ.»

36 Pɔɔlʋ 'zuëë ‑sɩbhä 'dɩ 'mö 'wëë,

ɔ ‑nyʋä 'sɔ 'n wa yiɛ ‑kokomïladigbï glu 'pä 'n ɔ yiɛ Lagɔ bhibhe.

37 Ɔ 'käa'aa möä yii,

wa wuë wa ‑wʋ 'wi dɔ'wʋ,

'n wa gbönɔɔ bhʋlʋbhlʋ dlɩ 'n wa kɩnɔɔ.

38 Nyɩasɛ ngäzɩ 'nuëë 'lɩbhä,

‑maa Pɔɔlʋ bhïlaa,

sɛ'ɛ ɔ gbää nɩɩ,

wa 'naa 'kɔa'a 'wʋ 'sɔ 'ylɩmönɩ.

'N wa yoa'aa 'yio 'wʋ kwä ‑këë ‑mä batoo yɔwʋ.