Zaa 11

Zezwii a bheyi Lazaa yɛ 'ku

1‑2 ‑Glɔ wa laa Betanii,

‑mä nɩkpɛ ‑bhlʋ glɩɛ.

'Mö wa laa Lazaa.

Ɔ kä nglʋdaayuë 'sɔ,

‑mɔ a nglɩɛ Maatɩ,

‑mɔ a nglɩɛ Malii.

Malii ‑ɔ 'zʋ a‑a ‑Alowli 'a kplɩɩ 'kpö a kpö a 'ke ‑bhlʋ yɔwʋ,

'n ɔ yi a‑a 'ɔ nyukwëa 'mö yɔwʋ sɩɔnɩɩ,

mɔɔ.

Ngwlɩ 'la a ‑daayu Lazaa 'mö gu 'lɩbhää.

3 Zaa,

wa 'sɔ ‑kpɔ,

'n wa yiɛ Zezwii nɩkpɛ 'wʋ tie nɩɩ:

«‑N ‑kä möö,

'nyɛ ‑Alowli Zezwii 'dɩ,

ɔ bheyi Lazaa,

ɔ ‑wa'ɛɛ,

ɔ'ɔɔ ‑yɛ.»

4 Zezwii 'nʋä tɩtɩ 'laa,

ɔ lɛ naa:

«Guu ‑wʋ lɩbhää Lazaa,

wʋ 'naa 'kɔ 'kwie 'mö kwä.

‑Maa wʋ 'kä Lagɔ 'a 'ghïlinɔɔ 'yli 'wälanɩ,

nza wʋ lɩbhɔɔ.

‑Mä wʋ 'mö,

Lagɔ yi 'ɔ Yuu a 'nglɩɩ 'ghlimanɩ.»

5 Maatɩ ‑nyɛ Malii 'sɔ,

wa ‑daayu Lazaa kökä,

dlɩ 'wʋ wa ‑glɛɛ tenyii Zezwii.

6 ‑Maa ‑sɩbhä yɩ ‑wʋ 'mö,

Zezwii 'nʋä Lazaa a gulɩbhätɩtɩɩ,

dɛ ɔ ‑wʋ a‑a 'n wa yoo 'dɩ 'nyɛɛ,

ɔ ‑sɛ ‑lɛ 'ylɩ ‑mimii 'sɔ.

7 Ylɩɩ 'sɔ ‑kpɔ 'plɩɛ 'wëë,

'n ɔ yia'aa 'ɔ ‑gänɩwaa 'dɩ 'nyɛ nɩɩ:

«‑Mä Zwidee‑bhölɩɩ 'mö,

a‑a 'kä ‑mä 'bɩwʋ mö.»

8 Ɔ gbää ‑sɩbhää,

'ɔ ‑gänɩwaa lɛ naa:

«‑Atʋ,

dɛɛ mä 'a Zwiiföwa gbä'ɛ wa ‑kamö 'kpɩ 'mö 'lɩbhä ‑n 'kä 'kuu,

‑lɛ 'nɩɛ ‑bhlɛ 'mö gwälɛ cuu,

‑mä ‑n gbä bhä'ɛ ‑n 'kä ‑sɩkaa mö ‑a?»

9 Zezwii lɛ naa:

«Zɩzɩzlɩ,

ɛ kä 'gïle kʋgbä'sɔ 'mö,

ɛ'ɛ ‑bhö ɔ mi?

Zlɩ ‑kä ‑gä 'n nɩkpɛ ‑kä nɛmöö,

ɔ'ɔ gozo ɔ 'kä bhli.

Ɛ'ɛ ‑bhö nyɩasɛ,

‑maa mä'ä 'pɩwʋ a lɩlɛ a za,

ɔ yɩlɩ sɛ.

10 ‑Maa swe ‑kä ylu,

'n nɩkpɛ ‑kä nɛmöö,

gozo ɔ gozoo 'n ɔ bhliɛ.

Ɛ'ɛ ‑bhö nyɩasɛ,

‑maa ɔ'bhë ɔ'ɔɔ lɩlɛ 'mö ‑kä.»

11 Zezwii gbää sa'a 'wëë 'n ɔ yuë'ɛɛ 'dɩ 'nyɛ nɩɩ:

«‑Aa bheyi Lazaa,

ɔ yɛ ngämö,

‑maa n 'kä mö n 'kɔ gäla.»

12 'Ɔ ‑gänɩwaa lɛ naa:

«‑Alowli!

Ɔ ‑käa'a ngämöö,

ɔ yiɛ yɛmanɩɛ.»

13 Zezwii 'nyʋää ‑sɩbhä 'dɩɩ,

sɛ'ɛ ɔ gbä a‑a nɩɩ,

Lazaa yɛ 'ku.

‑Maa wa ‑tɔnɩ wabhlɩ ‑tiamö a 'yɛla ɔ gaa.

14 Zaa,

'n Zezwii yuëa'aa gbëaa 'dɩ 'nyɛ nɩɩ:

«Lazaa yɛ 'ku.

15 ‑Maa a za,

yɩ ‑bhöö 'mäna 'wʋ,

sɛ n'n‑ä ‑lɛ ‑wʋ 'n ɔ yiɛ 'ku a za.

Ɛ'ɛ ‑bhö nyɩasɛ,

‑maa ‑lɛ a dɔ'wʋ,

a ‑yii tenyii dlɩ tɛɛnɩ.

Zaa,

a‑a 'kä ‑mä ɔ yɔwʋ mö.»

16 Ɔ gbää sa'aa,

'ɔ ‑gänɩwaa a gla'mö a ‑nɔ ‑bhlʋ,

Tomaa wa laa Pʋwayuu,

ɔ lɛ naa:

«‑A'bhɩanyɩ,

mää ‑Atʋ möä da'aa,

a‑a 'kä ‑mä 'mämö,

‑a ‑nyɔɔ 'sɔ,

‑a 'kä 'gämö 'kunɩ.»

17 Zezwii ghlɛɛ ‑mä Betanii,

ɔ lɛ 'bhöö 'lɛ wa yɛ Lazaa ziza 'wë,

'ylɩ ‑mʋäna yɛ 'plɩ.

18 'Lɩlɩlɩ a dɔ'wʋ,

Betanii a ‑glɔ,

Zeluzalɛɛmö a ‑kʋkʋyɔwʋ,

'kwili ta 'wʋ a sɛ,

‑lɛ wʋ ‑wʋä.

19 Zaa,

Lazaa 'kuä,

‑mä a Zwiiföwa a ‑bɛ,

'n wa yi a‑a yi wa 'kä Maatɩ ‑nyɛ Malii 'sɔ dlɩ 'mlɩ 'pä.

20 ‑Maa Maatɩ,

ɔ 'nʋä nɩɩ,

Zezwii yɛ yii,

'n ɔ yiɛ 'wʋ ‑sɔ,

'n ɔ yoo 'yio 'wʋ mö.

Malii ɔbhlɩ,

‑mä ɔ tʋʋä 'ligbë 'mö.

21 Maatɩ ghlɛɛ ‑lɛ Zezwii yɔwʋʋ,

ɔ lɛ naa:

«‑Alowli,

‑n ‑kä a dɛ'ɛ ‑wʋʋ,

na ‑daayu 'naa 'kä a 'ku.

22 Miɛ abhlɩ,

‑maa n ‑yi sɛ nɩɩ,

‑bhlɛ ‑sɩkaa a'bhë ‑kë,

'saa ‑n ‑kä Lagɔ 'yɩbhänɩɩ,

ɔ ‑yimu 'nyɛ.»

23 Zezwii lɛ naa:

«Maatɩ,

‑na ‑daayu,

ɔ yi gɔlɔ,

ɔ yi glu 'wlʋ.»

24 Maatɩ lɛ naa:

«‑Alowli,

n ‑yi'ɛ sɛ nɩɩ,

'pɩwʋ a 'ylibhɩɛdaa ‑kä ghlɛ 'kuduwaa 'wuë ‑kä glu 'wlʋʋ,

ɔ yi glu 'wlʋmö.»

25 Ɔ gbää sa'aa,

Zezwii lɛ naa:

«Maatɩ,

‑amöö glɩnɩɛ gluwlʋwlɛ,

‑amöö glɩnɩɛ ‑bhölɩbhölɛ.

‑Ɔ ‑kaa dlɩ tɛɛnɩ,

ɔ yi 'ku a'bhë ‑kë,

ɔ yi ‑bhölɩ.

26 'N nɩkpɛ a ‑mɔɔ ‑wʋä ‑bhlɛ mä'ä 'pɩwʋ,

ɔ ‑kaaa dlɩ 'tɛɛnɩɩ,

ɔ 'naa 'kä 'kwädlɩ 'ku.

Maatɩ,

‑n kɩ bhä ‑sɩbhä dlɩ 'wʋ?»

27 Ɔ lɛ naa:

«Nn ‑Alowli,

n kɩ dlɩ 'wʋ nɩɩ,

Kliisɩ,

Puënyɔɔ Lagɔ ‑sɛɛ ‑lɛ,

Lagɔ 'a Yuu ‑ɔ 'kä a‑a mä'ä dʋdʋ 'wʋ yii,

mö ‑n glɩnɩɛ.»

'Mɩɔ yɛ Zezwii 'ylimö ghlɛ

28 Yɩ 'plɩɛ sa'a 'wëë,

'n Maatɩ yiɛ ‑mä ɔ ‑daayu Malii ghlɩ,

'n ɔ yoo 'ngungwanɩ.

Ɔ lɛ naa:

«‑Atʋ yɛ yi,

ɔ yɩbhä ɔ ‑kamö 'ylɩmö.»

29 Maatɩ 'nyɛɛ Malii 'dɩ cuu,

‑va,

'n ɔ yiɛ 'wʋ ‑sɔ,

yɛ'mötɩtasɛ 'n ɔ yiɛ ‑mä Zezwii ghlɩ.

30 ‑Lɛ a 'tɛnyɩ 'la 'mö,

Zezwii 'nɩɛ a ‑bhlɛ ‑mä glɔ 'mö plɛ,

‑maa dɛɛ Maatɩ to a‑a,

ɔ glɩ ‑lɛ 'yize.

31 Malii ‑sɔɔ sa'a yɛ'mötɩtasɛ 'wʋʋ,

Zwiiföwaa ‑wa ‑nyɔɔ ‑wʋ a‑a ‑mä 'ligbë 'mö,

‑wa ‑wɔɔ a‑a dlɩ 'mlɩ 'pä dɔ'wʋʋ,

wa ‑tɔnɩ wabhlɩ nɩɩ,

‑mä lesikpë 'wʋ ‑mä ɔ mö 'winɩɛ,

'n wa yoo 'bɩwʋ bhlinɩ.

32 ‑Maa Malii ghlɛɛ dɛɛ Zezwii ‑wʋä,

ɔ 'yoo 'ylɩmöö,

'n ɔ yiɛ ‑lɛ ɔ dlɩ 'mö ‑kokomïladigbï glu 'pä,

ɔ lɛ naa:

«‑Alowli,

‑n ‑kä a dɛ'ɛ ‑wʋʋ,

na ‑daayu 'naa 'kä a 'ku.»

33 Malii ‑wʋ 'wi dɔ'wʋ,

Zwiiföwaa ‑wa yo a‑a 'bɩwʋʋ,

wa 'wuë,

wa ‑wʋ 'wimö dɔ'wʋ,

Zezwii yiluëë 'klʋ ‑këë,

'n yɩ yoo dlɩnuë yie,

'n ɔ dlɩ yiɛ yɔwʋ sumanɩ.

34 'N ɔ yuëë nimï 'yɩbhä nɩɩ:

«Dɛ a zizoo bhä 'nɩ?»

Wa lɛ naa:

«‑Alowli,

yi ‑n 'kä ‑lɛ 'ylɩmö.»

35 'N 'mɩɔ yiɛ Zezwii 'ylimö ghlɛ.

36 'Mɩɔ ghlɛɛ Zezwii 'ylimöö,

Zwiiföwaa lɛ naa:

«A yɩɛ,

dlɩ 'wʋ Lazaa ‑gälɔɔ a‑a tenyii.»

37 ‑Maa wa gla'mö a ‑mumuë lɛ naa:

«Mɔɔ ‑dɩ'ɛ 'kukwlekänyɔɔ a yilaa,

ɔ'ɔ a bhä bhɛnɩ ɔ 'kä gbä,

Lazaa tɩa 'ku ‑a?»

Lazaa yɛ glu 'wlʋ

38 Wa gbää sa'aa,

'n yɩ yi'ɛɛ 'wʋ 'sɔ Zezwii dlɩ yɔwʋ sumanɩ tenyii,

'n ɔ yiɛ lesikpëa a'bhë yɔwʋ 'dio.

‑Budubheyi a sɛ a bhuluä ‑mä kpiyi a ‑gäga 'mö 'n a gbaanɩ'ɛɛ kpiyi nuë 'wʋ.

39 Zezwii lɛ naa:

«A nɩ ‑sɛ ‑lɛ kpiyii lesikpëa a ngloluë 'wʋ.»

‑Maa Maatɩ ‑ɔnyɩ ‑daayu 'ku a‑a,

ɔ lɛ naa:

«‑Alowli,

ɔ yɛɛ ‑bhlɛ ‑mä lesikpëa 'mö 'ylɩ ‑mʋäna ‑sɛ,

ɔ yɛ zɛ,

nglɛ ɔ 'kää 'pä.»

40 'N Zezwii yiɛ Maatɩ 'dɩ 'nyɛɛ,

ɔ lɛ naa:

«Maatɩ,

n ‑nɩmö bhä'ɛ 'dɩ 'nyɛ nɩɩ,

‑n ‑kaa dlɩ 'tɛɛnɩɩ,

sɛɛ Lagɔ 'ghïliɛ,

‑n yi ‑sɩbhä 'ylɩmö ‑a?»

41 Ɔ 'nyɛɛ ‑sɩbhä Maatɩ 'dɩ 'wëë,

'n wa yia'aa ‑lɛ kpiyii ngloluë 'wʋ ‑sɛ,

'n Zezwii yiɛ ghäyɩ yɩlɩ,

ɔ lɛ naa:

«‑Atʋ Lagɔ,

sɛɛ ‑n ngluä 'na bhibhewɛlɩɩ 'wʋ a za,

n bhälɩmö ‑këë.

42 N ‑yi abhlɩ sɛ nɩɩ,

n ‑kamö bhibhee,

‑n nglu 'kwädlɩ 'wʋ,

‑maa nɩkpa nɩ ‑wa ‑binɩɩɛ dɛ'ɛɛ,

wa za n ghlaniɛ ngli,

nzɩɩ wa 'kɩ dlɩ 'wʋ ‑kä nɩɩ,

‑nanyɩgäsɛ ‑nmö tieaaa.»

43 Zezwii bhibhee ‑sɩbhä 'wëë,

'n ɔ yiɛ tenyii 'mö 'kpa,

ɔ lɛ:

«Lazaa,

'wlʋ ‑mä lesikpë 'mö!»

44 Ɔ gbää ‑sɩbhä cuu,

'n Lazaa yiɛ ‑mä lesikpëa 'mö 'wlʋ.

Ɔ 'kää ‑mä 'wlʋʋ,

‑gäzɛlokuu wa bibe a‑a 'ɔ kplɩɩ ‑nyɛ 'ɔ swɩɩ 'sɔɔ 'n 'ɔ 'wukpëlea kökä,

yɩ ‑bibeo ‑bhlɛ.

Zezwii lɛ naa:

«A nɩ bulonɔɔ,

ɔ 'kä 'ligbë 'mö mö.»

Zwiiföwaa yɛ Zezwii a 'lɩbhälɩbhäylɩ plɛ

(Matie 26.1‑5; Maakö 14.1‑2; Lwiikö 22.1‑2)

45 Zwiiföwaa ‑wa yi a‑a Malii dlɩ 'mlɩ 'pää,

wa 'yɩɛ 'saa Zezwii nʋä 'ylɩmöö,

wa gla'mö a ‑mumuë a ‑bɛ dlɩ wa tɛɛnɔa'aa.

46 ‑Maa wa gla'mö a ‑mumuë wabhlɩ,

Falizɩɛwaa 'mö wa ghlɩɛ ‑mä,

'saa Zezwii nʋä da'aa,

'n wa yuënyɩɛ 'tɩtɩ 'wʋ 'nyɛ.

47 Wa 'nyʋänyɩɛ 'tɩtɩ 'wʋ 'wëë,

Falizɩɛwaa ‑nyɛ Zwiiföwaa 'a Lagɔbʋbɔwaa a 'kifiea 'sɔ,

'n wa yiɛ Zwiiföwaa 'a ‑zijlituwa 'kädɩɩ 'wuë 'wlu 'yɩbha,

wa lɛ naa:

«Sɛ ‑a 'kä bhä 'mözʋmözʋmö 'nɩ?

Nɩkpɛ nɩ,

zɩzɛ ɔ pää,

zumanɩ ɛ zumanɩaa 'wëë.

48 ‑A ‑kɔɔ kɛ yɔwʋ ‑sɛɛ,

nɩkpaa 'wuë,

'bɩwʋ wa yoo bhlinɩ,

Ghlʋmɛɛwaa ‑wa 'kämanɩɛ,

wa yi ‑tɔnɩ nɩɩ,

tʋ ‑a 'kää glu ‑sɛ zaa,

wa yi ‑a'a Lagɔbudu 'Kɔdʋʋ wlɛ,

wa yi ‑a'a ngëyii 'wuë sɛ yɛla.»

49 ‑Maa wa gla'mö a ‑nɔ ‑bhlʋ wa laa Kayiifö,

‑ɔ glɩnɩ a‑a ‑lɛ a 'ylʋba 'la 'mö Lagɔbʋbɔnyɔ 'kɔdɔɔ,

ɔ lɛ naa:

«Sɛ yɩ ‑wʋ ɔ 'mö 'n a 'kä ‑bhɩɛ bhä ‑ɔɔ'nɛɛnɩwa 'nɩ?

50 A nɩ yɩbhlɩnɩ sɛ nɩɩ,

nɩkpɛ ‑bhlʋ ‑kä ‑a'a ngëyii 'wuë a 'wlumö 'kuu,

yɩ nɛnɩ nzɩɩ ‑a'a bhlɩɩ tɩa sɛ ylɛ.»

51 Kayiifö,

ɔnyɩgäsɛ a dlɩ zɛmö ‑mä yɩ'ɩɛ 'bhöönɩ.

‑Maa ‑lɛ a 'ylʋba 'la 'mö mɔɔ glɩnɩ a‑a Lagɔbʋbɔnyɔ 'kɔdɔɔ.

Zaa,

Lagɔ a'bhë mɔɔ bhïlanɔ a‑a da'a 'mö nɩɩ,

Zezwii yi a Zwiiföwaa a 'wlumö 'ku.

52 Ɛ'ɛ ‑bhö Zwiiföwaa a 'yize ‑maa,

Lagɔ 'a yuë ‑muë'la ‑wa mlɩnɩɛ mä'ä dʋdʋkpätaa 'wuë 'wʋ 'sɔ,

Zezwii yi wa 'wlumö 'ku,

nzɩɩ wa 'wuë wa 'kä ‑zɩkpa ‑bhlʋ 'zʋ.

53 'Bhöönɩa'a ‑lɛ a zlɩ 'la 'mö,

Zwiiföwaa 'a 'kädɩ 'la,

'n wa yiɛ Zezwii 'yli yɔwʋ pianɩ,

wa 'kɔ 'lɩbhä ɔ 'kä 'ku.

54 ‑Sɩbhä a za,

Zezwii 'nɩa'a ‑mä Zwiiföwaa gla'mö 'sibhë.

‑Maa ‑mä 'muse yɔwʋ a glɔ ‑bhlʋ wa laa Eflayiimö,

ɔ ‑nyɛ 'ɔ ‑gänɩwaa 'sɔ,

‑mä wa möä glɩɛ.

55 ‑Lɛ a 'tɛnyɩ 'la 'mö,

Zwiiföwaa 'a Galɛ'möwlʋfɛtɩɩ mɛɛ lɛ 'kää ghlɛ zaa,

nɩkpa a 'kɔkɔmlɛ,

wa 'bhöönɩ ‑mä Zwiifö‑bhölɩɩ 'wuë ‑gömö 'n wa yiɛ ‑mä Zeluzalɛɛmö mö.

Sɛ wa ‑kää 'zʋ wa 'kä 'wlɩlɩ plɛ Lagɔ a 'yila 'klʋ a dɔ'wʋʋ,

wa 'kä ‑sɩbhä 'zʋ 'wë 'fɛtɩ 'kä ghlɛ nza wa möä ‑mä.

56 Wa 'wuë 'n wa tɛlɩɛ Zezwii sɛ.

Wa ‑kä ‑mä Lagɔbudu 'Kɔdʋʋ 'mö 'wʋ gbanɩɩ,

'n wa 'yɩbhäyɩbhänɩɛ nimï nɩɩ:

«Zaa,

sɛ a pää dlɩ a dɔ'wʋ,

ɔ yi bhä 'fɛtɩ 'wʋ yimö ‑a?»

57 Nyɩasɛ wa'aa ‑sɩbhä nʋ,

‑maa Lagɔbʋbɔwaa a 'kifiea,

wa ‑nyɛ Falizɩɛwaa 'sɔ,

wa yɛ a wɛlɩ 'pä nɩɩ,

'n nɩkpɛ ‑kä dɛɛ Zezwii ‑wʋä dɛ ‑yii,

ɔ nɩ 'nyʋä 'dɩ,

wa 'kɔ köbhä.