Naniraꞌ topenangi
15
Roo onoꞌ,
kuita wopiꞌi i langiꞌ hambuaꞌ tandaꞌ to mahile hai to mehelei.
Kuita pitu to motibaaꞌ pitu pákáꞌna pepopeahiahiꞌ to kahópóꞌána.
Ane hópóꞌ miꞌi pepopeahiahiꞌ to pitu iti,
ina hópóꞌ miꞌi kamabukoꞌna Pueꞌ Ala i tauna to kadake.a
2 Hai kuita ara to nodo tahiꞌ kamaeláꞌna,
lenggeꞌna nodo kaca mogalo api.
Hai i wiwi tahiꞌ to nodo kaca iti,
kuita handaꞌ tauna meángkáꞌ.
Taunaheꞌ iti to monangi binataꞌ to kadake ánti katiꞌáráraꞌ menómbá i hia ba i lenggeꞌna,
hai tiꞌaraheꞌ woꞌo motarima ángkáꞌ binataꞌ iti to molempónga hangaꞌna.
Tauna to menangi iti,
meángkáꞌ i wiwi tahiꞌ to nodo kaca,
hai motibaaꞌheꞌ kasapi to naweꞌiheꞌ Pueꞌ Ala.
3 Monaniheꞌ nani to nodo nanina nabiꞌ Musa,b
huoꞌána Pueꞌ Ala hangkoia,
hai nanina Ánáꞌ Dimbá.
Monaniheꞌ node:
“Ó Pueꞌ Ala,
maroꞌa ntepuꞌu bábehiáMu,
melumbuꞌ kuasaꞌMu hangko i upu-upuna!
Upu-upu to Nubábehi,
bateꞌna manótó hai toꞌu.
Io miꞌi Daturaꞌ upu-upu tauna i duniáꞌ haweꞌ i rue-ruena.
4 Pueꞌ,
heáná paꞌi to tiꞌara mengkoruꞌ i Hio,
hai heáná paꞌi to tiꞌara mopangákuꞌ kamahilena hangaꞌMu?
Io peá to magasaꞌ.
Upu-upu tauna bateꞌna ina menómbá i Hio,
láwiꞌ tongawaꞌ miꞌi kamanótóna pobutusiMu i upu-upu tauna.”
Pitu pemboliá (15:5–16:21)
Pitu malaꞌeka moánti pitu wuaꞌna pemboliá to moꞌóntóꞌ pehukuna Pueꞌ Ala
5 Roo onoꞌ,
kuita tebungkáhi miꞌi Lintuꞌ to Melumbuꞌ Kamagasaꞌna i lalu Bambaruꞌ Penómbáꞌác to ara i surugáꞌ.
6 Hai pitu malaꞌeka mesuwuꞌ hangko i Támbina Pueꞌ Ala,
moántiheꞌ pitu wuaꞌna pemboliá to bukeꞌ hai pitu pákáꞌna pepopeahiahiꞌ.
Waruꞌraꞌ malaꞌeka iti rabábehi hangko i báná to bulá hai mengkilaꞌ.
Pondáraꞌ rawewehi pampou hangko i buláwá.
7 I pesuwuꞌraꞌ malaꞌeka to pitu iti,
hambaꞌa hangko i pinatueꞌ to iba mampoweꞌiheꞌ pitu wuaꞌna pemboliá to rabábehi hangko i buláwá hai moꞌóntóꞌ kamabukoꞌna Pueꞌ Ala to tueꞌ oaꞌ duuꞌna i rue-ruena.
8 I tempó iti woꞌo,
Támbina Pueꞌ Ala i surugáꞌ hangkaꞌ-hangkaꞌ peá bukeꞌ hai rámbu to mesuwuꞌ hangko i peawaꞌna Pueꞌ Ala hai hangko i kuasaꞌNa.d
Tiꞌara ara haweꞌ hadua to peisá mesuaꞌ i laluna,
ane tiꞌara mani hópóꞌ pitu pákáꞌna pepopeahiahiꞌ to raꞌánti malaꞌeka to pitu iti.