Ánáꞌ Dimbá hai topeuláꞌNa i Buluꞌ Sio
14
Roo onoꞌ,
kuita Iesu to rapándiriꞌ nodo Ánáꞌ Dimbá meángkáꞌ i wongko Buluꞌ Sio i Ierusale hingkakani hai topeuláꞌNa to hangatu iba puloꞌraꞌ hai iba sáburaꞌ.a
I kireraꞌ,
teukiꞌ hangaꞌna Ánáꞌ Dimbá hai hangaꞌna UmáNa.
2 Hai kuhádi pokániꞌ to rumihi hangko i surugáꞌ,
nodo pewoo uwai to mahile,
hai nodo pokániꞌ gumpataꞌ.
Pokániꞌ to kuhádi iti,
nodo woꞌo pokániꞌ kasapi to rakáwiꞌ tauna.
3 Monaniheꞌ hampákáꞌ nani to woꞌu i lindoꞌ pehodaꞌá kadatuána Pueꞌ Ala hai i lindoꞌraꞌ pinatueꞌ to iba hai totosae to motolelingiheꞌ pehodaꞌá datu iti.b
Naniraꞌ iti,
tiꞌara haweꞌ hadua tauna to nabuku mampegurui,
bateꞌraꞌ peá to hangatu iba puloꞌraꞌ hai iba sáburaꞌ tauna iti.
Hangko i oloꞌraꞌ tauna i duniáꞌ,
hira miꞌi to nahómpóki Ánáꞌ Dimbá hangko i huku dósáraꞌ.
4 Magasaꞌ katueꞌraꞌ nodoheꞌ to tiꞌara haweꞌ hangkani mobábehi salaꞌ hai towawine.c
Iumbá kalaoána Ánáꞌ Dimbá,
ionoꞌheꞌ woꞌo meuláꞌ.
Hira to Nahómpóki Ánáꞌ Dimbá iti hangko i oloꞌraꞌ upu-upu tauna i duniáꞌ.
Nodo tauna mohuhuꞌ wuaꞌ to rungu-runguna hangko i tudaꞌ-tudaꞌraꞌ i Pueꞌ Ala,
hira woꞌo rahuhuꞌ nodo popenómbá to rungu-runguna i Pueꞌ Ala hai i Ánáꞌ Dimbá.
5 Tiꞌaraheꞌ modongkoꞌ,
hai tiꞌara woꞌo ara kamasalaꞌraꞌ.
Tálu malaꞌeka to mopaingáꞌi tauna kana i alo pobutusi
6 Hai kuita wopiꞌi hadua malaꞌeka to ntániꞌna to membara i laerawa.
Malaꞌeka iti moánti Ngkóráꞌ Marasa to tiꞌara tebáliki duuꞌna i rue-ruena.
Ngkóráꞌ Marasa iti ina nabámbári i tauna to toroꞌ i humalele duniáꞌ:
i upu-upu kadatuá,
upu-upu pemuleꞌá hai i upu-upu básá.
7 Malaꞌeka iti molaluita napasimbuku,
nauliꞌ,
“Mengkoruꞌmokou i Pueꞌ Ala,
hai nipomahile hangaꞌNa,
láwiꞌ haweꞌ miꞌi tempó pehukuáNa.
Menómbámokou i Pueꞌ Ala to mampopewaliꞌ langiꞌ,
duniáꞌ,
tahiꞌ hai upu-upu ulu uwai.”
8 Hangko ionoꞌ,
ara woꞌo malaꞌeka karoduána to meuláꞌ i malaꞌeka to rungu-runguna molaluita,
nauliꞌ,
“Magero miꞌi!
Magero miꞌi {kótá to kadake to rapándiriꞌ nodo} kótá Bábeli,d
kótá to mahile ntepuꞌu!
ToBábeli iti,
mowáwáháheꞌ tauna i humalele duniáꞌ mainu to melángui áláraꞌ mampeuláꞌiheꞌ bábehiáraꞌ to metitidiꞌi.”
9 Roo onoꞌ,
malaꞌeka to katálu meuláꞌ woꞌo i malaꞌeka to rodua iti,
hai molaluita woꞌo napasimbuku,
nauliꞌ,
“Heáná peá to menómbá i binataꞌ to kadake hai lenggeꞌna binataꞌ iti,
hai heáná peá to motarima tandaꞌ binataꞌ iti i kireraꞌ ba i taeraꞌ,
10 tauna iti ina Nakabukoꞌi ntepuꞌuheꞌ Pueꞌ Ala,
hai tiꞌara ina ara kamaluluna laluNa i hira.e
Tauna iti ina rapopeahiahiꞌheꞌ i lalu api belerang.
Malaꞌeka to magasaꞌ hai Ánáꞌ Dimbá to i surugáꞌ ina mampetiro karapopeahiahiꞌraꞌ iti.
11 Rámbu hangko i api to mampopeahiahiꞌheꞌ ina mengkaoreꞌ oaꞌ duuꞌna i rue-ruena.
Maroꞌa mabaa ba káindi,
tauna iti ina rapopeahiahiꞌheꞌ oaꞌ,
láwiꞌ menómbámoheꞌ i binataꞌ to kadake hai i lenggeꞌna,
hai motarimamoheꞌ tandaꞌ hangaꞌna binataꞌ iti.”
12 Onoꞌ miꞌi haneꞌi tauna to mehárungá i Pueꞌ Ala hai mampeuláꞌi oaꞌ hawaꞌNa,
hangaa-ngaa sabaraꞌheꞌ mantódihá kapári.
13 Roo onoꞌ,
kuhádi wopiꞌi wambaꞌ hangko i surugáꞌ to manguliꞌ,
“Nuꞌukiꞌ miꞌi deꞌe:
Mantepuꞌu deꞌe-deꞌe,
morasiꞌheꞌ tauna to mepoinálái oaꞌ i Pueꞌ Iesu duuꞌraꞌ mate.”
Nahániki Inao to Magasaꞌ,
“Toꞌu ntepuꞌu!
Láwiꞌ tauna iti bateꞌraꞌ ina mengkaroo hangko i pobágóꞌraꞌ,
hai bateꞌraꞌ ina molámbiꞌheꞌ wuaꞌna bábehiáraꞌ.”
Óntóꞌ duniáꞌ rapepare
14 Roo onoꞌ,
kuita wopiꞌi gawu to bulá.
Hai i wongko gawu iti,
mehoda hadua tauna,
lenggeꞌNa nodo Ánáꞌ Mánusiá.f
I wuáꞌNa ara tatali buláwá,
hai taeNa motibaaꞌ hamata kandaoꞌ to mataru.
15 Hangko ionoꞌ hadua malaꞌeka to ntániꞌna mesuwuꞌ hangko i Támbina Pueꞌ Ala.
Ia molaluita napasimbuku i tauna to mehoda i wongko gawu iti,
nauliꞌ,
“Nuwaleá miꞌi kandaoꞌMu láwiꞌ haweꞌ miꞌi tempóna mepare.
Mangka miꞌi óntóꞌ duniáꞌ.”
16 Hangko ionoꞌ,
tauna to mehoda i wongko gawu iti morámpu upu-upu tauna i duniáꞌ.
Tempóna miꞌi mobutusi kárá-káráraꞌ.g
17 Roo onoꞌ,
malaꞌeka to ntániꞌna mesuwuꞌ hangko i Támbina Pueꞌ Ala i surugáꞌ.
Ia woꞌo motibaaꞌ kandaoꞌ to mataru.
18 Haweꞌ wopiꞌi hadua malaꞌeka to ntániꞌna hangko i paintuá popenómbá,
ia miꞌi to mokámpái api.
Malaꞌeka iti molaluita napasimbuku i malaꞌeka to motibaaꞌ kandaoꞌ to mataru,
nauliꞌ,
“Nuwaleá miꞌi kandaoꞌmu hai nurántáhi miꞌi wuaꞌ anggoroꞌ to i duniáꞌ,
láwiꞌ mangka miꞌi wuaꞌna.”
19 Malaꞌeka iti mowaleá miꞌi kandaoꞌna i duniáꞌ,
morántáhi wuaꞌ anggoroꞌ,
hai natibe i lalu popieꞌá anggoroꞌ to mahile.
Popieꞌá anggoroꞌ iti,
lempóna kamabukoꞌna Pueꞌ Ala i tauna to kadake.h
20 Mewaliꞌ wuaꞌ anggoroꞌi iti rapieꞌ i rawa kótá,
hai hangko i popieꞌá iti,
moili miꞌi waheꞌ nodo poiliána uwai to mahile.
Kakaraoꞌna poiliána rekeꞌ-rekeꞌna tálu átuna kiló,
kakaladuna haweꞌ i humena dárá.