Malaꞌeka to motibaaꞌ hambuaꞌ sura to kókóiꞌ
10
Roo onoꞌ,
kuita hadua malaꞌeka to maróhó ntepuꞌu mendáulu mai hangko i surugáꞌ.
Malaꞌeka iti napótóꞌ gawu,
hai wuáꞌna natolelingi mpárágiá.
Lindoꞌna mewangkaꞌ nodo alo,
bitina nodo áriꞌi to keapi.
2 Biti kuánána mepangka i tahiꞌ,
hai biti kabeoꞌna mepangka i lorena.a
I taena ara hambuaꞌ sura to kókóiꞌ to tebungkáhi.
3 Monganga-nganga miꞌi malaꞌeka iti napasimbuku,
nodo pengau singá.
Roo monganga,
ara gumpataꞌ to mokániꞌ masimbuku pitu kánina,
molaluita nodo tauna.b
4 Karoona gumpataꞌ iti molaluita,
ina kuꞌukiꞌ laluitana,
agáiáná hangkaꞌ-hangkaꞌ peá kuhádi wopiꞌi wambaꞌ hangko i surugáꞌ to mohángáꞌáꞌáꞌaꞌ,
“Ineeꞌ nuꞌukiꞌ iti!
Hangaa-ngaa nuwuniángi apa to nauliꞌ gumpataꞌ to pitu ininá.”
5 Roo iti,
malaꞌeka to kuita ininá,
to mepangka i tahiꞌ hai i lorena,
moángkáꞌ miꞌi tae kuánána i langiꞌ,
6-7 haneꞌi modándi i lalu hangaꞌna Pueꞌ Ala to tueꞌ duuꞌna i rue-ruena,
to mampopewaliꞌ langiꞌ,
duniáꞌ,
tahiꞌ hai upu-upu óntóꞌna.
I podándina nauliꞌ node:
“Ane malaꞌeka to kapitu motawueꞌ tamburuꞌna,
i tempó iti pemiꞌi Pueꞌ Ala ina mampopewaliꞌ tunggáiáNa to marue miꞌi tewuniángi.c
TunggáiáNa iti bateꞌna ina hawiáꞌ mewaliꞌ,
mouláꞌ apa to Napopaisáꞌáheꞌ huoꞌáNa hangkoia,
ia miꞌi nabiꞌ-nabiꞌ to moánti ngkóráꞌNa.”
8 Roo onoꞌ,
wambaꞌ to kuhádi hangko i surugáꞌ ininá mohángáꞌá wopaꞌaꞌ,
nauliꞌ,
“Laomokoꞌ moala sura to tebungkáhi,
to ara i taena malaꞌeka to mepangka i tahiꞌ hai i lorena!”
9 Lao mpuꞌumoꞌ i malaꞌeka iti,
kuhángáꞌá,
“Weꞌiaꞌ sura to kókóiꞌ iti.”
Nahángáꞌáꞌáꞌaꞌ,
“Nuala miꞌi haneꞌi nuandeꞌ.
Ane i ngángámu,
ina matáni nodo tináháꞌ,
agáiáná ane i lalu taꞌimu,
ina mapaiꞌ.”d
10 Kuala mpuꞌu miꞌi sura iti hangko i taena malaꞌeka haneꞌi kuandeꞌ.
I ngángángkuꞌ,
minána matáni ntepuꞌu nodo tináháꞌ,
agáiáná i lalu taꞌingkuꞌ mapaiꞌ.
11 Roo onoꞌ,
nahángáꞌáꞌáꞌaꞌ,
“Hangaa-ngaa nupahaweꞌ wopiꞌi apa to napakanótó miꞌi Pueꞌ Ala i tauna i humalele duniáꞌ,
maroꞌa datu-datu,
tampoꞌ,
pemuleꞌá hai upu-upu básá.”