9
Roo onoꞌ,
malaꞌeka to kalima motawueꞌ woꞌo tamburuꞌna,
hai kuita hadua malaꞌeka to nodo hambuaꞌ betue to manawoꞌ miꞌi hangko i langiꞌ tóá i duniáꞌ.a
Malaꞌeka iti raweꞌi pegili babaꞌ pingke pehukuá to tiꞌara tehukáꞌ kakaladuna.b
2 Betue iti mobungkáhi babaꞌ pingke pehukuá.
Kanabungkáhina,
mentumbuꞌ miꞌi rámbu to rumukuꞌ,
nodo rámbu to mesupaꞌ hangko i walombo to mahile.
Alo hai laerawa mewaliꞌ makáindi,
natóróbumbungi rámbu to hangko i pingke pehukuá iti.
3 Hangko i lalu rámbu iti,
mesuwuꞌmoheꞌ mai katupeeꞌ haneꞌi mengkatóá i duniáꞌ.
Katupeeꞌ iti raweꞌiheꞌ kuasaꞌ mehóiꞌ,
nodo pehóiꞌraꞌ kalajengki.
4 Katupeeꞌ iti,
tiꞌaraheꞌ rapaliu mopakarugiꞌ rumpuꞌ ba kau ba tudaꞌ-tudaꞌ.
To peisá rapamarugiꞌ,
bateꞌna tauna peá to tiꞌara ara petándáina Pueꞌ Ala i kireraꞌ.
5 Hai tiꞌaraheꞌ woꞌo rapaliu mopapate tauna,
agáiáná rapaliu peheꞌ mepopeahiahiꞌ lima wulána kamaruena.
Kamaháina pehóiꞌraꞌ katupeeꞌ iti nodo woꞌo kamaháina pehóiꞌraꞌ kalajengki.
6 Onoꞌ miꞌi haneꞌi i lalu lima wulána iti,
tauna ina mampeliꞌheꞌ rárá bona mateheꞌ,
agáiáná tiꞌara ara.
Ánti kamaꞌángkárána pehádiraꞌ,
onoꞌ haneꞌi rapoinao miꞌi mate,
agáiáná tiꞌaraheꞌ oaꞌ mewaliꞌ mate.
7 Lenggeꞌraꞌ katupeeꞌ iti nodo lenggeꞌ dárá to rapesaweꞌi surudadoꞌ lao mombeala.
I wuáꞌraꞌ ara to nodo tatali buláwá.
Lindoꞌraꞌ nodo lindoꞌ tauna.
8 Wuluraꞌ malóe nodo weluáꞌ towawine,
hai ngihiraꞌ maróhó nodo ngihi singá.
9 Pondáraꞌ teháláꞌ hai badu besiꞌ.
Pokániꞌ kápiraꞌ nodo peruuna handaꞌ kereta to radiiꞌ dárá lao mombeala.
10 Ikuraꞌ hai pehóiꞌraꞌ nodo iku hai pehóiꞌraꞌ kalajengki.
I ikuraꞌ iti,
ara kuasaꞌ mampopeahiahiꞌheꞌ tauna lima wulána kamaruena.
11 Ara daturaꞌ to mopárentáheꞌ.
Daturaꞌ iti ia miꞌi malaꞌeka to kadake to mokámpái pingke pehukuá.
Hangaꞌna i lalu básá Iberani ia miꞌi Abadon.
I lalu básá Iunani Apolion,
lempóna:
Topegero.
12 Hópóꞌ miꞌi pepopeahiahiꞌ to rungu-runguna,
agáiáná ara mani rompákáꞌ pepopeahiahiꞌ to ina meusungi.
13 Roo iti,
malaꞌeka to kaꞌini motawueꞌ tamburuꞌna.
Kuhádi wambaꞌ hangko i iba tánduꞌ i hokina paintuá dupaꞌ to rabábehi hangko i buláwá to i lindoꞌna Pueꞌ Ala.
14 Nauliꞌ wambaꞌ iti i malaꞌeka to kaꞌini,
“Nukábáhámoheꞌ malaꞌeka to iba to tetimpuku i uwai Epara.”
15 Nakábáhá mpuꞌumoheꞌ.
Malaꞌeka to iba iti rapatimama miꞌi ami bona i pare,
i wulá,
i alo hai i jaa to napakanótó Pueꞌ Ala,
peisáheꞌ mohuoꞌ surudadoꞌraꞌ bona mopapate hanggáláꞌ tálu hangko i upu-upu tauna {to tiꞌara mengkoruꞌ i Pueꞌ Ala}.
16 Surudadoꞌ topodárá to meuláꞌ i hira,
rongatu juta kahandaꞌraꞌ.
Kuisá kahandaꞌraꞌ,
láwiꞌ ara to mohángáꞌáꞌáꞌaꞌ.
17 Surudadoꞌ hai dárá to rapesaweꞌi to kuita i lalu pampetudeꞌá iti,
upu-upuheꞌ mebadu besiꞌ.
Baduraꞌ malei nodo api to roreꞌ,
maiti nodo rámbu,
hai mabádáꞌ nodo taꞌilokoꞌ.
Wuáꞌ dáráraꞌ nodo wuáꞌ singá,
hai hangko i lalu ngángáraꞌ mesuwuꞌ mai api,
rámbu hai belerang.
18 Hanggáláꞌ tálu hangko i tauna,
rapapate hai tálu pákáꞌna pepopeahiahiꞌ,
ia miꞌi api,
belerang hai rámbu to mesuwuꞌ hangko i ngángáraꞌ dárá iti.
19 Kamakuasaꞌraꞌ dárá iti ara i ngángáraꞌ hai i ikuraꞌ,
láwiꞌ ikuraꞌ mowuáꞌ nodo wuáꞌ lelótó to metilóꞌ.
Ikuraꞌ iti rapakeꞌ woꞌo mampopeahiahiꞌ tauna.
20-21 Agáiáná pentáráꞌána tauna to tiꞌara rapapate i pepopeahiahiꞌ iti,
bateꞌraꞌ peá tiꞌara mau menosoꞌ hangko i bábehiáraꞌ to kadake.
Tiꞌaraheꞌ mau menosoꞌ hangko i pepapateraꞌ,
pedotiraꞌ,
panakoraꞌ,
hai bábehiáraꞌ to metitidiꞌi.
Tiꞌaraheꞌ woꞌo mokábáhá penómbáraꞌ i setáꞌ hai i lenggeꞌ ánitu kehapiꞌ to rapenómbái iti rabábehi peá haduduáraꞌ hangko i buláwá,
peráꞌ,
tambaga,
watu,
ba hangko i kau.
Hai lenggeꞌ iti,
tiꞌaraheꞌ meita,
tiꞌaraheꞌ mehádi,
hai tiꞌaraheꞌ woꞌo peisá molumao.