Paturoꞌ i toSarani
5
Ara woꞌo pembiáꞌkuꞌ i kómu to mewaliꞌ pinátuá i jemaꞌa-jemaꞌa.
Kuꞌukiꞌákou deꞌe láwiꞌ kódóꞌ woꞌo hadua pinátuá,
hai kuita mata kapári to morampe Kerisitu hangkoia.
Ane haweꞌ Kerisitu i lalu peawaꞌNa,
peawaꞌNa iti ina rapatongawaꞌ i upu-upu tauna,
hai ina molámbiꞌaꞌ woꞌo gáláꞌkuꞌ i lalu peawaꞌNa iti.
2 Kupembiáꞌ bona nikádipuráheꞌ maroꞌa taunána Pueꞌ Ala to ara i jemaꞌami,
láwiꞌ hira iti nodoheꞌ dimbá to napoináláiákou Pueꞌ Ala bona niewuheꞌ.
Nikádipuráheꞌ hangko i lalumi ntepuꞌu,
láwiꞌ iti peundeꞌána Pueꞌ Ala;
ineeꞌ nipobágóꞌ iti nodokou to rapasimbukuá.
Nitulungiheꞌ hangko i kabulána lalumi.
Ineeꞌ pekou mampeliꞌ porasiꞌámi haduduámi.
3 Ineeꞌheꞌ nipohawaꞌá tauna to rapoináláiákou nodo topopárentá mampohawaꞌá taunána.
Ngkáliꞌna riꞌi hangaa-ngaa mewaliꞌkou pándiriꞌ i hira,
4 álána ane haweꞌ huleꞌ Tadulako Topoewu,
ina Naweꞌikou háwángina pobágóꞌmi,
ia miꞌi tatali to meawaꞌ haweꞌ i rue-ruena.a
5 Noꞌonoꞌ woꞌo kómu to maleheꞌ mani,
hangaa-ngaa mengkoruꞌkou i totosae.
Hai kómu upu-upu to mepoinálái,
hangaa-ngaa niꞌisá mengkaiwóiꞌ hai mombetulungi,
láwiꞌ:
“Pueꞌ Ala moewaꞌ tauna to mampepemahile,
agáiáná Ia motulungi tauna to mengkaiwóiꞌ.” (Sura Paturoꞌ 3:34)
6 Onoꞌ miꞌi haneꞌi halalu-halalu,
hangaa-ngaa mengkaiwóiꞌkou,
hai mengkoruꞌkou i Pueꞌ Ala to makuasaꞌ,
bona ane haweꞌ miꞌi tempóna,
ina Napaireá katueꞌmi.
7 Nipaisarenga upu-upu kamapárina katueꞌmi i Hia,
láwiꞌ Ia to mokádipurákou.
8 Hangaa-ngaa nipakanótó pekirimi hai maingáꞌ-ingáꞌkou,
láwiꞌ ewálimi Datu Tokadake molulumao oaꞌ.
Ia nodo hambaꞌa singá to marimi,
timama miꞌi ina moharaꞌ ewálina.
9 Hangaa-ngaa niewaꞌ ntepuꞌu moliu pepoináláimi to maróhó.
Hai niꞌisá i humalele duniáꞌ,
halalu hampepepoináláimi molámbiꞌheꞌ woꞌo kapári nodo to nilámbiꞌ.
10 Hai ane maliu miꞌi kapári to hampaiꞌ peá iti,
Pueꞌ Ala ina mopagánái apa to makuraꞌ mani i lalu katueꞌmi.
Lempóna,
Ia ina mopakaróhó woꞌo pepoináláimi,
mopakanótó katueꞌmi hai mopatetidaꞌ lalumi.
Láwiꞌ Pueꞌ Ala Ia miꞌi pentóáꞌána upu-upu ahiꞌ.
Ia to mopileꞌikou mewaliꞌ ánáꞌNa,
bona ánti pohintuwuꞌmi hai Kerisitu Iesu,
ina molámbiꞌkou gáláꞌmi i lalu peawaꞌNa to tiꞌara mokahópóꞌá.b
11 Tatóiá miꞌi Pueꞌ Ala láwiꞌ Ia to makuasaꞌ i upu-upuna duuꞌna i rue-ruena.
Ami!
Kahópóꞌána sura
12 Surangkuꞌ to rembe deꞌe kuꞌukiꞌ,
hai Silasic modureiaꞌ moukiꞌ.
Ia woꞌo halalu hampepepoináláintaꞌ to peisá rapoinálái.
I lalu surangkuꞌ deꞌe,
kupahaweꞌámokou i katoꞌu-toꞌuána noumbá kamahilena ahiꞌna Pueꞌ Ala i kitaꞌ.
Kuꞌukiꞌ noꞌonoꞌ bona maróhó lalumi.
Hangaa-ngaa tetidaꞌkou oaꞌ i lalu kamaꞌahiꞌNa iti.
13 Tabeá hangko i halalu hampepepoináláimi to ara ieneꞌ i kótá Bábeli {to peisá woꞌo rauliꞌ kótá Roma}.d
Hira napileꞌiheꞌ Pueꞌ Ala,
hibali hai kómu.
Marakusi to kupoánáꞌe mopakatu woꞌo tabeána haweꞌ i kómu.
14 Kupembiáꞌ bona mombetabe-tabekou hadua hai hadua tandaꞌ kamaꞌahiꞌmi i halalu hampepepoináláimi.
Kupembiáꞌ woꞌo i Pueꞌ Ala bona Naweꞌikou roꞌa ngkatueꞌ ánti pohintuwuꞌmi hai Kerisitu.
Hangko i kódóꞌ,
PETURUꞌ