4
TangaꞌNa mani tueꞌ i duniáꞌ deꞌe,
Kerisitu molámbiꞌ miꞌi kapári,
onoꞌ miꞌi haneꞌi hangaa-ngaa nipakaróhó woꞌo lalumi bona timamakou mantódihá kapári nodo Ia,
láwiꞌ heáná to mantódihá kapári i lalu katueꞌna,
tiꞌara piꞌi ina nakuasaꞌi dósá.a
2 Mewaliꞌ,
i tempómi mani tueꞌ i duniáꞌ deꞌe,
ineeꞌ nipeuláꞌi peundeꞌána lalumi haduduámi.
Hangaa-ngaa mampeuláꞌikou peundeꞌána Pueꞌ Ala,
3 láwiꞌ gáná miꞌi tempómi tueꞌ nodo tauna to tiꞌara moisá Pueꞌ.
I tempó iti,
rárá katueꞌmi tiꞌara maroꞌa,
láwiꞌ mampeuláꞌi pekou peundeꞌána lalumi to kadake,
peundeꞌána lalumi tiꞌara mau upu,
mainukou duuꞌmi malangu-langu,
mosusakou oaꞌ,
masilakakou,
hai menómbákou i ánitu to tiꞌara hintotoꞌ rapenómbái.
4 Agáiáná deꞌe-deꞌe,
tingkáráꞌmoheꞌ tauna to niporángá tempómi tiꞌara mani moisá Pueꞌ Ala,
láwiꞌ tiꞌarapokou mampeuláꞌi bábehiáraꞌ to kadake.
Onoꞌ miꞌi haneꞌi rasasalaꞌikou.
5 Agáiáná hangkani tempó rángámi iti hangaa-ngaa meángkáꞌheꞌ i lindoꞌna Pueꞌ Ala mopangákuꞌ bábehiáraꞌ to kadake,
láwiꞌ Pueꞌ Ala ina mohoda-hoda kara-kara upu-upu tauna,
maroꞌa to tueꞌ mani,
maroꞌa to mate miꞌi.
6 Tauna to mohádi miꞌi Ngkóráꞌ Marasa haneꞌiheꞌ mepoinálái,
kehapiꞌ matemoheꞌ ánti pehukuna Pueꞌ Ala i upu-upu tauna,b
ina molámbiꞌheꞌ katueꞌ to maroꞌa to tiꞌara mokahópóꞌá láwiꞌ iti miꞌi peundeꞌána Pueꞌ Ala.
Hangaa-ngaa mohintuwuꞌkeꞌ hai mombetulungikeꞌ
7 Halalu-halalu,
kahópóꞌána duniáꞌ deꞌe hungkuꞌ miꞌi,
hai upu-upu óntóꞌna ina matántá.
Onoꞌ miꞌi haneꞌi hangaa-ngaa manótó pekirimi hai nipakaróhó lalumi,
bona peisákou mekakae.
8 To melumbuꞌ hangko i upu-upuna iti,
hangaa-ngaa mombepokaꞌahiꞌkou hadua hai hadua hangko i lalumi ntepuꞌu,
láwiꞌ ane nibábehi noꞌonoꞌ,
ina nibuku woꞌo moámpungi dósáraꞌ hángká rángámi.c
9 Hangaa-ngaa góeꞌ lalumi ane ara torare to haweꞌ i támbimi,
hai ineeꞌkou mohume-hume.
10 Kitaꞌ upu-upu molámbiꞌmokeꞌ kapánde to montaniꞌ-ntaniꞌ mouláꞌ apa to naweꞌikeꞌ Pueꞌ Ala hangko i kabulána laluNa.
Mewaliꞌ hangaa-ngaa tapakeꞌ kapánde iti motulungi tauna ntániꞌna,
hai mampopolumao maroꞌa bágóꞌ to naweꞌikeꞌ Pueꞌ Ala iti.
11 Heáná to mopahaweꞌ ngkóráꞌna Pueꞌ,
hangaa-ngaa napahaweꞌ hintotoꞌ hai apa to natarima hangko i Pueꞌ Ala.
Heáná to motulungi tauna ntániꞌna,
hangaa-ngaa metulungi mouláꞌ kuasaꞌ to nalámbiꞌ hangko i Pueꞌ Ala.
Hangaa-ngaa nibábehi noꞌonoꞌ,
bona Pueꞌ Ala rapomahile moliu Iesu Kerisitu,
láwiꞌ Ia to makuasaꞌ hai to hintotoꞌ rapomahile duuꞌna i rue-ruena!
Ami.
Paturoꞌ i tauna to rapopeahiahiꞌ ánti peuláꞌraꞌ i Kerisitu
12 Halalu-halalu to kupokaꞌahiꞌ!
Ineeꞌ nipotingkáráꞌ ane arai kapári to morampekou,
láwiꞌ biásá talámbiꞌ kapári i lalu katueꞌtaꞌ.
Kapári iti peisá rapándiriꞌ nodo api,
láwiꞌ napakeꞌ Pueꞌ Ala mampehukáꞌ kamaróhóna pepoináláimi.d
13 Ngkáliꞌna riꞌi hangaa-ngaa nipokagóeꞌ,
láwiꞌ molámbiꞌmokou kapári nodo to morampe Kerisitu.
Onoꞌ miꞌi haneꞌi,
ane haweꞌ miꞌi tempóna Kerisitu mopatongawaꞌ peawaꞌNa i upu-upu tauna,
ina góeꞌ ntepuꞌukou.
14 Halalu-halalu,
morasiꞌkou ane rasasalaꞌikou ánti peuláꞌmi i Kerisitu,
láwiꞌ Inao to Magasaꞌ to meawaꞌ to hangko i Pueꞌ Ala ara oaꞌ i lalumi.
15 Agáiáná ineeꞌ ara hadua hangko i oloꞌmi to molámbiꞌ kapári láwiꞌ mepapate ba manako ba mobábehi to kadake,
ba mampesuaꞌi oaꞌ urusiána hángká rángána.
16 Mewaliꞌ ane rapopeahiahiꞌkou ánti katoSaranimi,
ineeꞌ nipokahili,
ngkáliꞌna riꞌi hangaa-ngaa niuliꞌ handaꞌ kamaroꞌana i Pueꞌ Ala ánti kakómuna topeuláꞌna Kerisitu.
17 Haweꞌ miꞌi tempóna Pueꞌ Ala ina mohoda-hoda kara-kara upu-upu tauna,e
hai to ina Nahoda-hoda ioru ia miꞌi kárá-kárántaꞌ kitaꞌ taunáNa.
Mewaliꞌ ane kárá-kárántaꞌ to ioru to Nahoda-hoda,
noumbá pehukuNa i tauna to tiꞌaraheꞌ mampoinálái Ngkóráꞌ Marasa to hangko i Hia?
18 I lalu Sura Magasaꞌ teukiꞌ node:
“Mogalo riꞌi tauna to manótó bábehiáraꞌ,
maꞌángkárá kamolámbiꞌraꞌ katehómpóꞌ,
apa mani tauna to kadake
to tiꞌara mengkoruꞌ i Pueꞌ Ala!”f
19 Mewaliꞌ,
ane arakou to molámbiꞌ kapári ánti peundeꞌána Pueꞌ Ala,
nipaisarenga katueꞌmi i Pueꞌ Ala to mampopewaliꞌ duniáꞌ hai upu-upu to ara,
láwiꞌ Ia tetidaꞌ hai ina mobukeki upu-upu dándiNa i kómu,
hai hangaa-ngaa nibábehi oaꞌ apa to maroꞌa.