Pepaingáꞌi i topebuku
5
Deꞌe miꞌi paturoꞌkuꞌ i tauna to pebuku.
Rángina miꞌi teriaꞌkou,
láwiꞌ ina narampekou kapári.
2 Ina matántá peawaꞌmi.
Waruꞌmi ina natátáꞌ epiꞌ.
3 Buláwá hai peráꞌmi ina matágárá.
Tágárána iti ina mopatongawaꞌ kamasalaꞌmi láwiꞌ mampomahile pekou kapebukumi.
Onoꞌ miꞌi haneꞌi ina rahukukou nodokou tauna to naꞌandeꞌ api.
Morámpu pekou párewá i duniáꞌ deꞌe,
agáiáná tiꞌara piꞌi marue ina haweꞌ alo kahópóꞌána duniáꞌ!
4 Topobágóꞌ i hinoemi meraruaꞌheꞌ láwiꞌ tiꞌara nibaiari saroraꞌ.
Topepare i bondemi mekakaeheꞌ membiáꞌ tulungi,
hai pekakaeraꞌ napehádingi miꞌi Pueꞌ Ala to Makuasaꞌ.
5-6 Mosalaꞌikou tauna to tiꞌara masalaꞌ,
to tiꞌara rabuku moewaꞌkou,
álána nihukuheꞌ mate.
I duniáꞌ deꞌe,
meawaꞌ tueꞌmi.
Mampeliꞌ pekou kagóeꞌámi haduduámi,
mole nodokou binataꞌ to mopakaruduꞌ wátáraꞌ haduduáraꞌ duuꞌna haweꞌ tempóraꞌ rasambale!
Noꞌonoꞌ miꞌi woꞌo kómu ane haweꞌ alo pehukuá.
Hangaa-ngaa sabaraꞌkou i lalu kapári
7 Halalu-halalu!
Hangaa-ngaa sabaraꞌkou duuꞌna haweꞌ huleꞌ Pueꞌ.
Nipeita noumbá kasabaraꞌraꞌ topohinoe mampegiá powuaꞌna tudaꞌ-tudaꞌraꞌ to mobunduꞌ ntepuꞌu.
Sabaraꞌheꞌ mampegiá udá i tempóraꞌ mantudaꞌ haweꞌ i powuaꞌna.
8 Noꞌonoꞌ woꞌo kómu.
Hangaa-ngaa sabaraꞌkou hai nipakaróhó lalumi,
láwiꞌ tiꞌara piꞌi marue ina haweꞌ miꞌi Pueꞌ.
9 Halalu-halalu!
Ineeꞌkou mohume-hume hai mombesasalaꞌi,
bona tiꞌarakou molámbiꞌ pehuku,
láwiꞌ Topobutusi meángkáꞌ miꞌi i lindoꞌ babaꞌ;
tiꞌara piꞌi marue ina haweꞌ!
10 Halalu-halalu!
Nabiꞌ-nabiꞌ hangkoia to mopahaweꞌ ngkóráꞌna Pueꞌ,
mewaliꞌmoheꞌ pándiriꞌ i kitaꞌ láwiꞌ sabaraꞌheꞌ mantódihá kapári.
11 Tauna to mantaha i lalu kapári tarekeꞌ tauna to morasiꞌ.
Niꞌisá miꞌi daritakáná Aiubi to sabaraꞌ mantódihá kapári.
Hai niꞌisánto woꞌo apa to mewaliꞌ i kahópóꞌána:
ia nawátiꞌ Pueꞌ Ala láwiꞌ bulá laluna Pueꞌ Ala hai bukeꞌ ahiꞌ.
Ineeꞌkou modándi mokábelái mampopengaa
12 Halalu-halalu!
To paraluu ntepuꞌu nipailalu:
ineeꞌkou modándi mokábelái surugáꞌ ba duniáꞌ ba apa peá.
Ane tunggáiámi manguliꞌ ió,
gáná miꞌi niuliꞌ peá “Ió.”
Ane tunggáiámi manguliꞌ tiꞌara,
gáná miꞌi niuliꞌ peá “Tiꞌara,”
bona tiꞌarakou ina molámbiꞌ pehuku.
Hangaa-ngaa mekakaekou i Pueꞌ Ala
13 Ane arai i oloꞌmi to molámbiꞌ kapári,
maroꞌa ane ia mekakae.
Ane arai to góeꞌ,
maroꞌa ane ia monani motóiá Pueꞌ Ala.
14 Ane arai to tiꞌara nalalu,
maroꞌa ane ia mokióꞌheꞌ pinátuá,
bona pinátuáheꞌ iti peisá mampekakaeá hai molánái i lalu hangaꞌna Pueꞌ.
15 Ane mekakaeheꞌ láwiꞌ mepoinálái ntepuꞌuheꞌ,
bateꞌna mauriꞌ to tiꞌara nalalu iti.
Pueꞌ Ala ina mopakauriꞌ wátána,
hai ane ara dósána,
ina Naꞌámpungi woꞌo.
16 Onoꞌ miꞌi haneꞌi hangaa-ngaa nipangákuꞌ i lindoꞌna hángká rángámi apa salaꞌmi,
hai mombepekakaeákou bona mauriꞌkou.
Pemoso ntepuꞌu pekakaeraꞌ tauna to manótó.
17 Rápáꞌna,
nabiꞌ Eliá hangkoia tauna biásá hibali hai kitaꞌ.
Ia mekakae hangko i laluna ntepuꞌu bona tiꞌara keudá,
hai tiꞌara mpuꞌu keudá tálu parena ini wulána kamaruena.
18 Roo onoꞌ,
ia mekakae wopiꞌi bona keudá,
hai keudá mpuꞌu,
hai tampoꞌ mampopowuaꞌ huleꞌ upu-upu tudaꞌ-tudaꞌ.a
19 Halalu-halalu!
Ane arai i oloꞌmi hadua tauna to mehupeꞌ hangko i paturoꞌ to toꞌu,
hai ara woꞌo hadua to moteteꞌ bona mesuleꞌ i Pueꞌ,
20 hangaa-ngaa naisá,
heáná to moánti huleꞌ tauna to madósá iti hangko i bábehiána to salaꞌ,
ia motulungi tauna iti bona tekábáhá hangko i kapate,b
hai dósána to handaꞌ teámpungi.
Hangko i kódóꞌ,
IAKOBU