Iakobu 1

Sura to Naukiꞌ

Iakobu

Molámbiꞌ toSarani

i kaꞌaraꞌámi

1 Tabeá hangko i kódóꞌ Iakobu,

huoꞌána Pueꞌ Ala hai Pueꞌ Iesu Kerisitu.

Sura deꞌe kupakatu i kómu taunána Pueꞌ Ala to hampuloꞌ hai rontina,

to mahawuꞌ i humalele duniáꞌ.

Hangaa-ngaa góeꞌkou i lalu kapári

2 Halalu-halalu!

Ane narampekou mampopengaa kapári,

ineeꞌ nipokóiꞌ inao.

Ngkáliꞌna riꞌi,

hangaa-ngaa nipogóeꞌ,

3 láwiꞌ niꞌisá,

ane pepoináláimi rapáresáꞌ moliu kapári,

peisákou meguru bona mantahakou.

4 Hai hangaa-ngaa mantahakou duuꞌna i kahópóꞌána,

bona maróhó ntepuꞌu pepoináláimi hai tiꞌara ara kamasalaꞌmi ba kamakuraꞌna pambiárámi.

Hangaa-ngaa nipembiáꞌ kabukeꞌ pekiri hangko i Pueꞌ Ala

5 Ane arai i oloꞌmi to tiꞌara mani gaga bukeꞌ pekiri,

hangaa-ngaa napembiáꞌ i Pueꞌ Ala,

hai bateꞌna ina Naweꞌikou.

Láwiꞌ Pueꞌ Ala tiꞌara luleꞌ mampoweꞌikeꞌ apa to taparaluu,

hai Naweꞌikeꞌ hangko i kabulá laluNa.

6 Agáiáná ane tapembiáꞌ i Pueꞌ Ala,

hangaa-ngaa mepoinálái ntepuꞌukeꞌ.

Ineeꞌ bata-bata laluntaꞌ,

láwiꞌ heáná tauna to bata-bata laluna,

peisá rapándiriꞌ nodo bálumbá to nawui ngkálu soꞌu ngkálu mai.

7-8 Tauna to noꞌonoꞌ,

morompenga mani laluna,

tiꞌara mokanótóá katueꞌna.

Onoꞌ miꞌi haneꞌi ia tiꞌara peisá mohárungá ba apa peá hangko i Pueꞌ.

Paturoꞌ i topeahiahiꞌ hai topebuku

9 ToSarani to meahiahiꞌ tueꞌraꞌ,

hangaa-ngaa góeꞌheꞌ láwiꞌ bateꞌna napaireámoheꞌ Pueꞌ Ala ánti pepoináláiraꞌ i Hia.^a

10 Noꞌonoꞌ woꞌo toSarani to pebuku,

hangaa-ngaa góeꞌheꞌ ane Pueꞌ Ala mopaiwóiꞌ tueꞌraꞌ.

Tauna to pebuku peisá rapándiriꞌ nodo bungaꞌ i pádá:

hampalai peá katueꞌna,

11 láwiꞌ ane bungaꞌ i pádá iti nahimbaꞌi alo to mahárá,

kásáliu malau duuꞌna maránáꞌ bungaꞌna hai tiꞌara piꞌi malásáꞌ.

Noꞌonoꞌ woꞌo tauna to pebuku:

ina mateheꞌ tangaꞌraꞌ mokádipurá kapebukuraꞌ.

Hangaa-ngaa mantahakou ane rakeloꞌ

12 Morasiꞌ tauna to mantaha i lalu kapári hai pekeloꞌ,

láwiꞌ ane mantahaheꞌ,

ina molámbiꞌheꞌ háwángina,

ia miꞌi katueꞌ to maroꞌa to tiꞌara mokahópóꞌá^b to nadándi Pueꞌ Ala i heáná peá tauna to mepokaꞌahiꞌ i Hia.

13 Ane ara to rakeloꞌ bona mobábehi to kadake,

ineeꞌ rapekiri,

“Pekeloꞌ deꞌe hangko i Pueꞌ Ala,”

láwiꞌ Pueꞌ Ala tiꞌara peisá rakeloꞌ to kadake,

hai Ia tiꞌara woꞌo ina mokeloꞌ tauna bona mobábehiheꞌ to kadake.

14 Agáiáná upu-upu tauna to rakeloꞌ,

nadiiꞌ peundeꞌána laluraꞌ to tiꞌara maroꞌa.

15 Ane mouláꞌkeꞌ peundeꞌána laluntaꞌ haduduántaꞌ,

bateꞌna mobábehikeꞌ dósá.^c

Hai ane madósákeꞌ oaꞌ,

kahópóꞌána ina naꞌántikeꞌ i kapate.^d

16 Halalungkuꞌ to kupokaꞌahiꞌ!

Ineeꞌkou rapakanawoꞌ!

17 Upu-upu to maroꞌa hai to tiꞌara ara kamakuraꞌna mentóáꞌ hangko i Pueꞌ Ala.

Ia miꞌi to mampopewaliꞌ upu-upuna to mewangkaꞌ i langiꞌ,

tiꞌara ara katebálikiáNa,

hai tiꞌara woꞌo ara kamakáindiNa.

18 Napopewaliꞌkeꞌ ánáꞌNa mouláꞌ peundeꞌáNa haduduáNa moliu Ngkóráꞌ Marasa to toꞌu,

bona kitaꞌ to mepoinálái Napomahile ntepuꞌukeꞌ hangko i upu-upu to Napopewaliꞌ.

Hangaa-ngaa nipeuláꞌi ngkóráꞌna Pueꞌ Ala

19 Halalungkuꞌ to kupokaꞌahiꞌ!

Hangaa-ngaa nipailalu laluita deꞌe:

kitaꞌ upu-upu hangaa-ngaa moundeꞌkeꞌ mampehádingi apa to rauliꞌ tauna ntániꞌna,

tapekiri sieruꞌ hangko tiꞌara manikeꞌ molaluita,

hai ineeꞌkeꞌ hawiáꞌ mabukoꞌ,

20 láwiꞌ tauna to mabukoꞌ,

tiꞌaraheꞌ peisá mobábehi apa to hiolaꞌ hai peundeꞌána Pueꞌ Ala.

21 Onoꞌ miꞌi haneꞌi hangaa-ngaa nikábáhá upu-upu bábehiá to kedái hai kadake,

nodo to paka rabábehi tauna i duniáꞌ deꞌe.^e

Hangaa-ngaa mengkaiwóiꞌkou motarima ngkóráꞌ to natudaꞌ Pueꞌ Ala i lalumi,

láwiꞌ ngkóráꞌ iti ara kuasaꞌ mohómpókikou hangko i huku dósámi.^f

22 Mewaliꞌ,

ngkóráꞌna Pueꞌ iti hangaa-ngaa nipeuláꞌi ntepuꞌu.

Ineeꞌ peá nipehádingi mbero,

láwiꞌ ane noꞌonoꞌi,

mopakanawoꞌ pekou wátámi haduduámi.

23 Tauna to mohádi peá ngkóráꞌna Pueꞌ hai tiꞌara mampeuláꞌi,

peisá rapándiriꞌ nodo tauna to mampeita lenggeꞌna i pampewaio,

24 agáiáná i kapohuꞌna peá,

tiꞌara piꞌi nabuhinao ba noumbái lenggeꞌna iti.

25 Onoꞌ miꞌi haneꞌi hangaa-ngaa nipailalu ntepuꞌu ngkóráꞌna Pueꞌ Ala hai nipeuláꞌi oaꞌ,

láwiꞌ ngkóráꞌna Pueꞌ tiꞌara ara kamakuraꞌna,

hai ara kuasaꞌna mokábáhákeꞌ hangko i dósántaꞌ.

Mewaliꞌ,

ineeꞌkou mohádi peá ngkóráꞌNa haneꞌi nikáláliꞌá.

Hangaa-ngaa nipeuláꞌi ngkóráꞌNa iti,

láwiꞌ upu-upu tauna to mobábehi noꞌonoꞌ,

bateꞌna nawátiꞌheꞌ Pueꞌ Ala i apa peá to rabábehi.

Poagama to toꞌu i peitáNa Pueꞌ Ala

26 Ane arai hadua tauna to manguliꞌ kaꞌiana to moagama ntepuꞌu,

agáiáná tiꞌara naisá mokámpái lilaꞌna bona maroꞌa polaluitana,

ia mopakanawoꞌ peá wátána haduduána.

Poágámána iti mbero-mbero peá.

27 Ngkáliꞌna riꞌi,

poagama to tiꞌara ara kamakuraꞌna ba kamasalaꞌna i peitána Pueꞌ Ala Umántaꞌ node:

hangaa-ngaa motulungikeꞌ ánángkóiꞌ to ilu hai tobembaꞌ to meahiahiꞌ tueꞌraꞌ,

hai hangaa-ngaa mokámpáikeꞌ katueꞌtaꞌ,

bona tiꞌarakeꞌ rapakedái tauna to kadake i duniáꞌ to moewaꞌ Pueꞌ Ala.