Paturoꞌ to kahópóꞌána
13
Hangaa-ngaa mombepokaꞌahiꞌkou oaꞌ nodokou tohampohalaluá.
2 Hangaa-ngaa bulá lalumi motarima torare to mehupeꞌ i támbimi,
láwiꞌ taisá araheꞌ tauna to mampotorare malaꞌeka,
agáiáná tiꞌara raisá kamalaꞌekaraꞌ.a
3 Nibuhinao halalu hampepepoináláimi to ratarungku,
láwiꞌ kómu woꞌo nodokou to ratarungku hingkakani hai hira.
Hai nitulungiheꞌ tauna to rapopeahiahiꞌ ánti pepoináláiraꞌ,
láwiꞌ kómu woꞌo nodokou to rapopeahiahiꞌ hingkakani hai hira.
4 Upu-upu tauna hangaa-ngaa mobiláꞌ dándi pohamboko to rapatongawaꞌ i lindoꞌna Pueꞌ Ala.
Hangaa-ngaa tetidaꞌkou i hambokomi,
láwiꞌ tauna to mebuálósi hai to mobábehi bábehiá to metitidiꞌi,
bateꞌraꞌ ina nahuku Pueꞌ Ala.
5 Ineeꞌ pekou mampoinao mampeliꞌ dóiꞌ,
agáiáná nipokagóeꞌ apa peá to ara i kómu,b
láwiꞌ Pueꞌ Ala haduduáNa to ina mopagánái apa to niparaluu i lalu katueꞌmi.
Hai ara laluitana Pueꞌ Ala to manguliꞌ:
“Tiꞌarakoꞌ haweꞌ hangkani ina Kupálehi,
hai tiꞌarakoꞌ haweꞌ hangkani ina Kukálámbáhi.” (Pohuleki 31:6)
6 Onoꞌ miꞌi haneꞌi maróhó laluntaꞌ,
hai tauliꞌ:
“Tiꞌaraꞌaꞌ malááꞌ,
láwiꞌ Pueꞌ to motulungiaꞌ.
Tiꞌara kupokalááꞌ apa to ina rabábehi tauna i kódóꞌ.” (Sura Petóiá 118:6)
7 Hangaa-ngaa nipekiriheꞌ oaꞌ tadulakomi hangkoia to mopahaweꞌákou ngkóráꞌna Pueꞌ Ala.
Nibuhinao noumbá kahópóꞌána katueꞌraꞌ.
Pepoináláiraꞌ peisá mewaliꞌ pándiriꞌ i kómu.
8 {Kehapiꞌ matemoheꞌ,
} agáiáná Iesu Kerisitu tiꞌara mambáliꞌ;
Ia hibali peá oaꞌ hangko i rungu-runguna,
deꞌe-deꞌe,
hai duuꞌna i rue-ruena.c
9 Mewaliꞌ ineeꞌkou mampeuláꞌi paturoꞌ to tiꞌara toꞌu to mopakanawoꞌkou.
Rángina miꞌi mopailalukou kamahilena ahiꞌna Pueꞌ Ala,
láwiꞌ onoꞌ miꞌi to mopakaróhó pepoináláimi.
Ane ádá hai páliá mokana i pandeꞌ,
tiꞌara mobunduꞌ i lalu katueꞌtaꞌ.d
10 Ara miꞌi i kitaꞌ to melumbuꞌ kamaroꞌana hangko i ádá agama toIahudiꞌ,
ia miꞌi Iesu.
Upu-upu tauna to mampeuláꞌi mani áturá popenómbá toIahudiꞌ,
tiꞌaraheꞌ ina molámbiꞌ gáláꞌraꞌ hangko i popenómbána Iesu,
ia miꞌi katueꞌ to maroꞌa to tiꞌara mokahópóꞌá.e
11 Mouláꞌ áturá ágámáraꞌ toIahudiꞌ,
Tadulako Menómbá Mahile mosambale binataꞌ bona mopaháwángi dósá,
hai waheꞌna naꞌánti i lalu Lintuꞌ to Melumbuꞌ Kamagasaꞌna,
agáiáná wátána raꞌánti lao i rawa kótá haneꞌi raintu duuꞌna mewaliꞌ awu.f
12 Noꞌonoꞌ woꞌo Iesu Kerisitu raꞌánti lao i rawa kótá.
Ionoꞌ Ia molámbiꞌ kapári hai rapapate bona waheꞌNa mopamagasaꞌkeꞌ to mepoinálái i Hia.
13 Mewaliꞌ halalu-halalu,
hangaa-ngaa takábáhá kamampeuláꞌintaꞌ áturá-áturá agama toIahudiꞌ.
Rángina miꞌi mepoináláikeꞌ i Iesu,
kehapiꞌkeꞌ ratitibei tauna nodo woꞌo Iesu ratitibei.g
14 Katueꞌtaꞌ i duniáꞌ deꞌe bukeꞌ hai kapári,
agáiáná tiꞌara duniáꞌ deꞌe to ina mewaliꞌ katoroꞌántaꞌ duuꞌna i rue-ruena.
Deꞌe-deꞌe mehárungákeꞌ i katoroꞌántaꞌ i surugáꞌ to ina ara oaꞌ duuꞌna i rue-ruena.
15 Mewaliꞌ halalu-halalu,
ánti kanatangaꞌ-tangaꞌintaꞌ Iesu,
peisákeꞌ mohuhuꞌ oaꞌ popenómbántaꞌ i Pueꞌ Ala.
Popenómbántaꞌ iti tiꞌara piꞌi binataꞌ,
agáiáná petóiá to tahuwárá mampomahile hangaꞌNa.
16 Ineeꞌkou luleꞌ mobábehi apa to maroꞌa.
Hangaa-ngaa motulungikou halalumi,
láwiꞌ iti miꞌi woꞌo popenómbá to mopagóeꞌ Pueꞌ Ala.
17 Nipeuláꞌi miꞌi paturoꞌraꞌ tadulakomi hai nipengkoruꞌiheꞌ,
láwiꞌ hira to moteteꞌkou i lalu pepoináláimi,
hai hira to hangaa-ngaa mehániꞌheꞌ i Pueꞌ Ala kana i pobágóꞌraꞌ.
Nipeuláꞌi paturoꞌraꞌ bona góeꞌheꞌ mampopolumao bágóꞌraꞌ.
Ane tiꞌara nipeuláꞌi hawaꞌraꞌ,
ina mopamasusakou laluraꞌ hai tiꞌarakou ina morasiꞌ.
18 Kupembiáꞌ bona nipekakaeáꞌangkaiꞌ oaꞌ.
Kiꞌisá kabulána lalungkiꞌ,
láwiꞌ i pákáꞌ-pákáꞌna kipoinao mobábehi oaꞌ to maroꞌa.
19 Hai kupembiáꞌ ntepuꞌu bona nipekakaeáꞌaꞌ,
bona hawiáꞌaꞌ mesuleꞌ lao i kómu.
Pekakae hai kahópóꞌána sura
20 Moliu waheꞌna Iesu Pueꞌtaꞌ to rapapate,
Pueꞌ Ala mopakanótó dándiNa to mopahintuwuꞌkeꞌ hai Ia duuꞌna i rue-ruena.
Hai Pueꞌ Ala mopatueꞌ huleꞌ Iesu hangko i kapate,
haneꞌi Naꞌángkáꞌ mewaliꞌ Topoewu to melumbuꞌ kamaroꞌana,
hai kitaꞌ deꞌe dimbáNa.
Onoꞌ miꞌi haneꞌi mekakaeaꞌ i Pueꞌ Ala,
láwiꞌ Ia pentóáꞌána roꞌa ngkatueꞌ.
21 Kupembiáꞌ bona Naweꞌikou upu-upu to maroꞌa,
bona peisákou mampeuláꞌi peundeꞌáNa.
Kupembiáꞌ bona moliu kuasaꞌna Iesu Kerisitu,
Pueꞌ Ala mokale i lalumi duuꞌna apa to nibábehi ina mopagóeꞌ ntepuꞌu Pueꞌ Ala.
Tatóiá miꞌi Pueꞌ Iesu duuꞌna i rue-ruena.
Ami.
22 Halalu-halalu,
kupembiáꞌ bona nipailalu paturoꞌ to teukiꞌ i lalu sura deꞌe,
kehapiꞌ surangkuꞌ deꞌe hampaieneꞌ peá.
23 Bona niꞌisá woꞌo:
halaluntaꞌ Timotiu rakábáhá miꞌi hangko i tarungku.
Ane poloꞌ haweꞌ ieneꞌ,
ina kuporángá lao moweoꞌkou.
24 Nipahaweꞌ tabeángkiꞌ i upu-upu tadulakomi hai upu-upu halalu hampepepoináláimi.
Tabeá hangko i halalumi to hangko i Italia.
25 Pueꞌ mowátiꞌkou upu-upu.
Hangko i kódóꞌ.