Pilemo i

Surana Paulu to Napakatu i

Pilemo

Laluita to mopakanótó óntóꞌna sura

Paulu mopakatu sura deꞌe i halalu hampepepoináláina to rahangaꞌ Pilemo. Pilemo toroꞌ i kótá Kolose, hai ara hadua hawiꞌna to rahangaꞌ Onesimu. Hangkoia Onesimu iti melangka hangko i Pilemo lao i kótá Roma. I tempó iti, Paulu ratarungku i Roma ánti pobágóꞌna mopahaweꞌ Ngkóráꞌ Marasa. Onesimu mampombelámbiꞌá Paulu i Roma, hai i kanahádina Ngkóráꞌ Marasa, ia mepoinálái miꞌi i Pueꞌ Iesu.

Hangko ionoꞌ, Paulu mohángáꞌá Onesimu, nauliꞌ, “Rángina miꞌi mesuleꞌkoꞌ lao i pueꞌmu.” Agáiáná Onesimu malááꞌ mesuleꞌ lao i Pilemo, nauliꞌ, “Ane mesuleꞌaꞌ, ina nahukuaꞌ láwiꞌ melangkaꞌaꞌ hangko i hia.” Nauliꞌ Paulu, “Tiꞌarakoꞌ ina nahuku, láwiꞌ ina kuꞌukiꞌ hambuaꞌ sura i Pilemo. Ina kupembiáꞌ bona naꞌámpungikoꞌ.” Mewaliꞌ, i lalu sura deꞌe, Paulu membiáꞌ bona Pilemo moámpungi Onesimu. Napembiáꞌ woꞌo bona ia motarima huleꞌ Onesimu hangko i laluna ntepuꞌu, hai tiꞌara piꞌi narekeꞌ nodo hawiꞌna, agáiáná narekeꞌ miꞌi nodo halalu hampepepoináláina.

I lalu básá Iunani, hangaꞌna Onesimu iti lempóna “mobunduꞌ”. Nauliꞌ Paulu, iatoliu Onesimu tiꞌara mobunduꞌ i pueꞌna, agáiáná deꞌe-deꞌe, mobunduꞌ ntepuꞌu láwiꞌ mepoinálái miꞌi i Pueꞌ Iesu (wátiꞌna ka-11).

Óntóꞌna

1. Tabeá (1-3)

2. Paulu motóiá Pilemo ánti kamaꞌahiꞌna hai kamaróhóna pepoináláina (4-7)

3. Paulu membiáꞌ bona Pilemo moámpungi Onesimu (8-22)

4. Tabeá hai laluita to kahópóꞌána (23-25)