Iesu melumbuꞌ kamahilena tueꞌNa hangko i nabiꞌ Musa
3
Halalu-halalu to mewaliꞌ taunána Pueꞌ Ala to Nakióꞌ mesuaꞌ i surugáꞌ!
Nipailalu kaheánána Iesu.
Ia miꞌi Huoꞌána Pueꞌ Ala hai Tadulako Menómbá Mahile to tapoinálái.
2 Iesu tetidaꞌ mampopolumao bágóꞌNa to nahuoꞌá Pueꞌ Ala.
Noꞌonoꞌ woꞌo,
Musa hangkoia tetidaꞌ mampopolumao bágóꞌna mokádipurá támbina Pueꞌ Ala;
lempóna,
mokádipurá taunána Pueꞌ Ala.
3 Agáiáná hintotoꞌ ntepuꞌu Iesu molámbiꞌ pebiláꞌ to melumbuꞌ hangko i Musa,
láwiꞌ tauna to moaró támbi hangaa-ngaa melumbuꞌ karabiláꞌna hangko i támbi to naꞌaró.
4 Upu-upu támbi,
bateꞌna ara to mobábehi.
Agáiáná to mobábehi upu-upuna to ara,
bateꞌna peá Pueꞌ Ala.
5 Musa peisá rapándiriꞌ nodo hadua topokádipurá támbi.
Ia tetidaꞌ mampopolumao bágóꞌna mokádipurá taunána Pueꞌ Ala.
Hai apa to nabábehi Musa iti,
mopakanótóákeꞌ Ngkóráꞌ Marasa to ina rapahaweꞌ i tempó to ina haweꞌ.
6 Agáiáná Kerisitu,
tiꞌara peá topekádipurá.
Ia miꞌi Ánáꞌna Pueꞌ Ala to mampopolumao oaꞌ bágóꞌNa,
nodo hadua tadulako to mokádipurá upu-upu támbina Pueꞌ Ala,
hai kitaꞌ miꞌi deꞌe támbina Pueꞌ Ala,
asalaꞌ maróhó oaꞌ pepoináláintaꞌ,
hai mehárungákeꞌ i Pueꞌ Iesu to tapomahile.
Ineeꞌ tapamatuꞌa laluntaꞌ i pekióꞌna Pueꞌ Ala
7 Mewaliꞌ halalu-halalu,
hangaa-ngaa nipehádingi maroꞌa paturoꞌna Inao to Magasaꞌ to teukiꞌ i lalu Sura Magasaꞌ node:
“Alo deꞌe,
ane nihádi apa to nauliꞌ Pueꞌ Ala,
8 ineeꞌ nipamatuꞌa lalumi
nodo kamatuꞌana laluraꞌ toiorumi hangkoia
to naꞌánti nabiꞌ Musa mesuwuꞌ hangko i tampoꞌ Másiriꞌ.
Toiorumi iti moewaꞌheꞌ Pueꞌ Ala,
hai mampehukáꞌheꞌ oaꞌ kasabaraꞌNa i pádá loriꞌ.
9 Nauliꞌ Pueꞌ Ala:
‘Toiorumi mampehukáꞌAꞌ hai rapampeitai mpuꞌu kasabaraꞌKuꞌ,
mole riꞌi moitamoheꞌ handaꞌ tandaꞌ kuasaꞌ
to Kupatongawaꞌámoheꞌ i lalu iba puloꞌna parena kamaruena.
10 Onoꞌ miꞌi haneꞌi mabukoꞌ ntepuꞌuAꞌ i taunaheꞌ iti,
láwiꞌ pakaheꞌ mouláꞌ rárá ntaniꞌ,
hai tiꞌaraheꞌ mau mampeuláꞌi peundeꞌáNgkuꞌ.
11 Onoꞌ miꞌi ánti kamabukoꞌKuꞌ haneꞌi Kutotowi node:
Tiꞌaraheꞌ ina mesuaꞌ i pengkarooá to Kupatimamaꞌámoheꞌ,
ia miꞌi tampoꞌ to Kudándiámoheꞌ.’ ” (Sura Petóiá 95:7-11)
12 Halalu-halalu,
maingáꞌ-ingáꞌkou bona tiꞌara ara i oloꞌmi to kadake laluna.
Ineeꞌkou mewaliꞌ nodo tauna to mopálehi pepoináláina i Pueꞌ Ala to tueꞌ!
13 Ngkáliꞌna riꞌi,
mombepakaróhó mpolalukou oaꞌ i alo-alona,
bona tiꞌarakou ara to napakanawoꞌ dósá duuꞌna matuꞌa lalumi.
Mombepakaróhó mpolalukou hadua hai hadua lántuꞌána mani peisá rauliꞌ,
“Alo Deꞌe,”
lempóna,
i tempómi mani tueꞌ.
14 Mobágóꞌkeꞌ hingkakani hai Kerisitu,
asalaꞌ apa to tapoinálái hangko i rungu-runguna,
tatibaaꞌ ntepuꞌu duuꞌna i kahópóꞌána.
15 Láwiꞌ deꞌe miꞌi to teukiꞌ i lalu Sura Magasaꞌ to manguliꞌ node:
“Alo deꞌe,
ane nihádi apa to nauliꞌ Pueꞌ Ala,
ineeꞌ nipamatuꞌa lalumi
nodo kamatuꞌana laluraꞌ toiorumi hangkoia.” (Sura Petóiá 95:7-8)
16 Heánáheꞌ to mopaꞌara kamabukoꞌna Pueꞌ Ala,
kehapiꞌ mohádiheꞌ wambaꞌNa?
Tiꞌara paꞌi toSáráeliꞌ to naꞌánti nabiꞌ Musa mesuwuꞌ hangko i tampoꞌ Másiriꞌ.
17 Hai heáná to nakabukoꞌi Pueꞌ Ala iba puloꞌna parena kamaruena?
Tiꞌara paꞌi toSáráeliꞌ to mateheꞌ i pádá loriꞌ ánti kahandaꞌna dósáraꞌ.
18 Hai heáná to natotowi Pueꞌ Ala,
bona tiꞌaraheꞌ peisá mesuaꞌ i pengkarooá to Napatimamaꞌámoheꞌ,
ia miꞌi tampoꞌ to Nadándiáheꞌ?
Tiꞌara paꞌi toSáráeliꞌ to tiꞌaraheꞌ mampeuláꞌi hawaꞌNa.
19 Mewaliꞌ taisá miꞌi:
katiꞌáráraꞌ peisá mesuaꞌ i tampoꞌ to nadándiáheꞌ Pueꞌ Ala hai mengkaroo hingkakani hai Ia,
láwiꞌ tiꞌaraheꞌ mepoinálái i Hia.