2
Mewaliꞌ,
Timotiu to kupoánáꞌ!
Hangaa-ngaa nupakaróhó ntepuꞌu lalumu ánti kamaꞌahiꞌna Kerisitu Iesu i hio.
2 Hangkoia nuhádi miꞌi upu-upu paturoꞌkuꞌ,
hai handaꞌ woꞌo tauna to mampehádingi hai mosabiki katoꞌuna paturoꞌkuꞌ iti.
Mewaliꞌ,
paturoꞌ iti hangaa-ngaa nupahaweꞌ woꞌo i tauna to peisá rapoinálái,
bona hira woꞌo ina mopaturoꞌ tauna ntániꞌna.
Hangaa-ngaa timamakoꞌ mantódihá kapári hai mobágóꞌ matimi
3-4 Hangaa-ngaa timamakoꞌ woꞌo mantódihá kapári nodo woꞌo kódóꞌ ánti pobágóꞌmu i Kerisitu Iesu.
Tauna to mampopolumao bágóꞌna Pueꞌ peisá rapándiriꞌ nodo hadua surudadoꞌ to maroꞌa,
to tiꞌara mopaioru peá urusiána haduduána,
láwiꞌ naundeꞌ mopagóeꞌ tadulakona.
5 Noꞌonoꞌ woꞌo tauna to mampopolumao bágóꞌna Pueꞌ peisá rapándiriꞌ nodo hadua toposilumba.a
Ia hangaa-ngaa mampeuláꞌi áturá-áturá posilumba,
láwiꞌ ane tiꞌara napeuláꞌi,
tiꞌara ina molámbiꞌ parasee.
6 Hai tauna to mampopolumao bágóꞌna Pueꞌ peisá woꞌo rapándiriꞌ nodo hadua topohinoe.
Ane madotai mobágóꞌ,
bateꞌna ia to rungu-runguna motarima wuaꞌna powiáꞌna.
7 Hangaa-ngaa nupailalu paturoꞌkuꞌ iti,
hai Pueꞌ ina mopakanótó lalumu bona nuisá upu-upuna iti.
8 Hangaa-ngaa nubuhinao:
Iesu Kerisitu Ia miꞌi Datu Topehómpóꞌ,
pemuleꞌána Datu Daudiꞌ,
hai Ia tueꞌ huleꞌ hangko i kapate.
Iti miꞌi ntóáꞌna Ngkóráꞌ Marasa to kupahaweꞌ.
9 Ánti kamopahaweꞌkuꞌ Ngkóráꞌ Marasa,
onoꞌ miꞌi haneꞌi kulámbiꞌ kapári,
duuꞌna ratimpukuaꞌ ieneꞌ i lalu tarungku,
nodoaꞌ hadua tauna to kadake.
Agáiáná ngkóráꞌna Pueꞌ Ala tiꞌara peisá ratimpuku,
10 onoꞌ miꞌi haneꞌi kubuku mantódihá upu-upu kapári deꞌe,
bona tauna to Napileꞌi ina molámbiꞌ katehómpóꞌ ánti pohintuwuꞌraꞌ hai Kerisitu Iesu,
hai ina molámbiꞌheꞌ woꞌo katueꞌ to meawaꞌ i surugáꞌ.b
11 Toꞌu ntepuꞌu laluita deꞌe mokana i Iesu to manguliꞌ node:
Ane matekeꞌ hingkakani hai Ia,c
ina tueꞌkeꞌ woꞌo hingkakani hai Ia.
12 Ane sabaraꞌkeꞌ mantódihá kapári ánti peuláꞌtaꞌ i Hia,
ina mepárentákeꞌ woꞌo hingkakani hai Ia.
Agáiáná ane tasapuáka peuláꞌtaꞌ i Hia,
kitaꞌ woꞌo ina Nasapuáka kakitaꞌna taunáNa.
13 Kehapiꞌkeꞌ tiꞌara tetidaꞌ i pepoináláintaꞌ i Hia,
Ia ina mobukeki oaꞌ upu-upu dándiNa i kitaꞌ,
láwiꞌ Ia tiꞌara peisá mosapuáka kaheánáNa.
Hangaa-ngaa maroꞌa pambiárámu ane mewaliꞌkoꞌ topobágóꞌna Pueꞌ Ala
14 Timotiu!
Upu-upu to kuꞌuliꞌ deꞌe,
hangaa-ngaa nupahaweꞌáheꞌ oaꞌ tauna to mepoinálái i Kerisitu.
I lalu hangaꞌna Pueꞌ Ala,
nupolaluitaꞌáheꞌ bona ineeꞌheꞌ mampombeheheꞌi mokana i laluita,
láwiꞌ tiꞌara ara bunduꞌna i lalu katueꞌtaꞌ,
ngkáliꞌna riꞌi mopakarugiꞌ peá pepoináláiraꞌ tauna to mampehádingi.
15 Agáiáná io Timotiu,
hangaa-ngaa nupahaweꞌ i katoꞌu-toꞌuána paturoꞌ to toꞌu.
Nupakaróhó pampopolumaomu bágóꞌ iti,
bona tiꞌarakoꞌ mahili i lindoꞌna Pueꞌ Ala.
Ane nubábehi noꞌonoꞌ,
io ina narekeꞌkoꞌ Pueꞌ Ala nodo topobágóꞌNa to maroꞌa.
16 Ineeꞌheꞌ nupohintuwuꞌá tauna to moánti-ánti laluita to tiꞌara mobunduꞌ,
láwiꞌ laluitaraꞌ iti tiꞌara moánti tauna i katueꞌ to magasaꞌ,
agáiáná moántiraheꞌ karaoꞌ hangko i Pueꞌ Ala.
17 Laluitaraꞌ iti nodo hakiꞌ to mendele.
Himeneud hai Piletu mouláꞌheꞌ woꞌo tauna to moánti paturoꞌ to kadake.
18 Mehupeꞌheꞌ hangko i paturoꞌ to toꞌu.
Rauliꞌ pearóraꞌ upu-upu tauna to mate mewaliꞌ miꞌi.
Paturoꞌraꞌ iti salaꞌ,
hai mopawuli peheꞌ tauna.
19 Agáiáná ntóáꞌ pepoináláintaꞌ to napakanótó Pueꞌ Ala maróhó ntepuꞌu,
ia miꞌi:
“Naisá miꞌi Pueꞌ Ala heáná to Napileꞌi mewaliꞌ ánáꞌNa,”e
hai,
“Heáná peá to mopangákuꞌ kaꞌIesuna Pueꞌraꞌ,
hangaa-ngaa mokábáháheꞌ bábehiáraꞌ to kadake.”
20 I lalu támbi to mahile,
ara handaꞌ pákáꞌna párewá.
Ara párewá to maroꞌa to rabábehi hangko i buláwá hai peráꞌ.
Ara woꞌo to rabábehi hangko i kau ba tampoꞌ pólóꞌ.
To maroꞌa rapakeꞌ i kahaweꞌna torare to rabiláꞌ.
To tiꞌara maroꞌa rapakeꞌ alo-alona.
21 Mewaliꞌ,
heáná tauna to mokábáhá bábehiána to kadake,
ia to mewaliꞌ nodo párewá to maroꞌa.
Lempóna,
mewaliꞌ topobágóꞌ to magasaꞌ hai to mobunduꞌ i Pueꞌ,
láwiꞌ timama mampopolumao upu-upu bágóꞌ to maroꞌa.
22 Mewaliꞌ kuhángáꞌákoꞌ Timotiu:
Ineeꞌ nupeuláꞌi peundeꞌána lalumu nodo tauna to maleheꞌ mani.
Hangaa-ngaa nupári-pári mobábehi bábehiá to hintotoꞌ hai peundeꞌána Pueꞌ Ala.
Nupakaróhó pepoináláimu i Pueꞌ hai kamaꞌahiꞌmu i tauna ntániꞌna.
Hangaa-ngaa mohintuwuꞌkoꞌ hai upu-upu tauna to mekakae i Pueꞌ hangko i kabulána laluraꞌ.
23 Araheꞌ tauna to mampombeheheꞌi paturoꞌ to tiꞌara mobunduꞌ,
láwiꞌ paturoꞌ to toꞌu tiꞌara mani manótó i laluraꞌ.
Ineeꞌ nupesuaꞌi pombeheheꞌraꞌ iti,
láwiꞌ nuisá paturoꞌ iti mopaꞌara peá posisalaꞌ,
24 hai tiꞌara hintotoꞌ ane kitaꞌ to mewaliꞌ huoꞌána Pueꞌ pakakeꞌ mombeheheꞌ.
Hangaa-ngaa maꞌálusuꞌkeꞌ i upu-upu tauna.
Hangaa-ngaa mapándekeꞌ mepaturoꞌ,
hai sabaraꞌkeꞌ.
25 Ane araheꞌ tauna to moewaꞌ paturoꞌ to toꞌu,
hangaa-ngaa tapamaꞌálusuꞌ polaluitantaꞌ mopaturoꞌheꞌ.
Babilaꞌ naweꞌiheꞌ Pueꞌ tempó menosoꞌ hangko i peꞌewaꞌraꞌ,
hai ina moisáheꞌ woꞌo paturoꞌ to toꞌu,
26 duuꞌna manótó laluraꞌ hai tekábáháheꞌ hangko i kuasaꞌna Datu Tokadake,
láwiꞌ Datu Tokadake moákálángimoheꞌ bona mampeuláꞌiheꞌ peundeꞌána.