Pobágóꞌna Paulu moánti Ngkóráꞌ Marasa i tauna to tiꞌara toIahudiꞌ
3
Kitaꞌ toIahudiꞌ hai to tiꞌara toIahudiꞌ,
mohintuwuꞌmokeꞌ ánti pobágóꞌna Kerisitu,
hai kódóꞌ Paulu ratarungkuaꞌa ánti pobágóꞌkuꞌ moánti Ngkóráꞌ Marasa kana i Kerisitu i kómu to tiꞌarakou toIahudiꞌ.
2 Tongawaꞌ miꞌi kanihádina noumbá Pueꞌ Ala mampoweꞌiaꞌ bágóꞌ deꞌe,
bona moántiaꞌ Ngkóráꞌ Marasa mokana i kamaꞌahiꞌna Pueꞌ Ala i kómu to tiꞌarakou toIahudiꞌ.
3 Hangkoia,
tunggáiána Pueꞌ Ala iti tewuniángi mani.
Agáiáná deꞌe-deꞌe Napatongawaꞌ miꞌi i kódóꞌ,
hai iti to kuꞌukiꞌ miꞌi i lalu surangkuꞌ deꞌe,b
kehapiꞌ rerembe peá.
4 Mewaliꞌ,
ane nibásá surangkuꞌ deꞌe,
ina niꞌisá tunggáiána Pueꞌ Ala kana i Kerisitu to tewuniángi mani hangkoia,
nodo to rapopaisáꞌámoꞌ.
5 Hangkoia,
tunggáiáNa iti tiꞌara mani Napatongawaꞌ i tauna.
Agáiáná deꞌe-deꞌe tunggáiána Pueꞌ Ala tongawaꞌ miꞌi i kaiꞌ to Napileꞌi mewaliꞌ suroNa hai i tauna to mopahaweꞌ laluitaNa,
láwiꞌ Inao to Magasaꞌ mopakanótóáꞌangkaiꞌ.
6 Deꞌe miꞌi tunggáiáNa to tewuniángi iti,
bona tauna to tiꞌara toIahudiꞌ molámbiꞌheꞌ woꞌo pewátiꞌ hangko i Pueꞌ Ala hingkakani hai toIahudiꞌ.
Mewaliꞌ mohintuwuꞌmoheꞌ hai hingkani-ngkanimoheꞌ molámbiꞌ apa to nadándi Pueꞌ Ala i upu-upu ánáꞌNa.c
Iti ralámbiꞌ ánti pohintuwuꞌraꞌ hai Kerisitu Iesu,
láwiꞌ mepoináláiheꞌ i Ngkóráꞌ Marasa.
7 Mewaliꞌ,
kódóꞌ moántiaꞌ Ngkóráꞌ Marasa deꞌe láwiꞌ napileꞌiaꞌ Pueꞌ Ala mewaliꞌ topobágóꞌNa ánti kabulána laluNa.
Ia mopakaróhóaꞌ hai kuasaꞌNa bona kubuku mampopolumao bágóꞌ iti.
8 Hangko i upu-upu tauna to mepoinálái i Pueꞌ Iesu,
kódóꞌ miꞌi deꞌe to tepaiwóiꞌá ntepuꞌu.
Agáiáná kehapiꞌ noꞌonoꞌ,
ánti kabulána laluNa,
Pueꞌ Ala mohuoꞌaꞌ mopahaweꞌ i tauna to tiꞌaraheꞌ toIahudiꞌ kamaroꞌana pewátiꞌ to talámbiꞌ hangko i Kerisitu.
Melumbuꞌ kamaroꞌana pewátiꞌ iti hangko i upu-upu to peisá rapekiri tauna.
9 Pueꞌ Ala mampoweꞌiaꞌ woꞌo bágóꞌ mopakanótóáheꞌ upu-upu tauna {noumbá kamolámbiꞌraꞌ katehómpóꞌ moliu Iesu}.
Hangkoia,
Pueꞌ Ala to mampopewaliꞌ duniáꞌ hai upu-upu óntóꞌna,
mowuniángi tunggáiáNa iti,
10 bona deꞌe-deꞌe moliu pohintuwuꞌraꞌ tauna to mepoinálái,
maroꞌa toIahudiꞌ,
maroꞌa to tiꞌara toIahudiꞌ,
upu-upu topopárentá hai upu-upu to makuasaꞌ i surugáꞌ ina moisá kamapándena Pueꞌ Ala i upu-upu to Nabábehi.
11 Pueꞌ Ala mobábehi upu-upuna iti mouláꞌ tunggáiáNa to Napakanótó hangko tiꞌara mani duniáꞌ deꞌe Napopewaliꞌ,
hai tunggáiáNa iti Napopewaliꞌ moliu Kerisitu Iesu Pueꞌtaꞌ.
12 Ánti pohintuwuꞌtaꞌ hai Kerisitu Iesu hai ánti pepoináláintaꞌ i Hia,
pebáiꞌmokeꞌ mengkahungkuꞌ i Pueꞌ Ala hai tiꞌara piꞌi bata-bata laluntaꞌ.
13 Onoꞌ miꞌi haneꞌi kupembiáꞌ bona ineeꞌ masusa lalumi mohádi bámbári karapopeahiahiꞌkuꞌ hai karatarungkungkuꞌ,
láwiꞌ kapári to kutódihá deꞌe moánti pewátiꞌ i kómu.
Paulu mekakae bona taisá noumbá kamahilena ahiꞌna Iesu Kerisitu i kitaꞌ
14 Halalungkuꞌ to tiꞌarakou toIahudiꞌ,
ane kupailalu upu-upu pewátiꞌ to nilámbiꞌ ánti peuláꞌmi i Kerisitu,
hangaa-ngaa molingkuduaꞌ motóiá Pueꞌ Ala Umántaꞌ.
15 Ia miꞌi pentóáꞌána upu-upu to tueꞌ i duniáꞌ hai i surugáꞌ.
16 Mekakaeaꞌ i Pueꞌ Ala,
bona hangko i kuasaꞌNa to maróhó ntepuꞌu,
ina Napakaróhó lalumi moliu InaoNa,
17 duuꞌna Kerisitu toroꞌ oaꞌ i lalumi ánti pepoináláimi.
Mekakaeaꞌ bona ahiꞌna Pueꞌ Ala mokálándá i lalumid hai mewaliꞌ ntóáꞌna katueꞌmi.
18-19 Mekakaeaꞌ bona kómu hingkakani hai upu-upu tauna to mepoinálái i Kerisitu,
ina moisákou kamahilena ahiꞌna Kerisitu i kitaꞌ.
Ahiꞌna iti tiꞌara mpuꞌu taisá láwiꞌ melumbuꞌ hangko i apa to tabuku tahuwárá,
hai tiꞌara ara támpáꞌna.
Mekakaeaꞌ bona niꞌisá ntepuꞌu ahiꞌNa iti i lalu katueꞌmi,
bona pambiárámi ina hibali hai pambiárána Pueꞌ Ala.e
20 Maróhó ntepuꞌu kuasaꞌna Pueꞌ Ala i lalu katueꞌtaꞌ.
Hai kuasaꞌNa iti peisá mopaꞌara to melumbuꞌ ntepuꞌu kahandaꞌna hangko i upu-upu to tapembiáꞌ ba to tapekiri.
21 Onoꞌ miꞌi haneꞌi hintotoꞌ ntepuꞌukeꞌ motóiá hai mampomahile hangaꞌna Pueꞌ Ala,
ánti bábehiáNa to Nabábehi i kitaꞌ to mepoinálái moliu Kerisitu Iesu.
Tatóiá miꞌi Pueꞌ Ala mantepuꞌu deꞌe-deꞌe haweꞌ i rue-ruena.
Ami.