Rárá pombetulungi hai bábehiá to maroꞌa
6
Halalu-halalu,
ane moitakou halalu hampepepoináláimi mobábehi salaꞌ,
kómu to mampeuláꞌi peundeꞌána Inao to Magasaꞌ,
hangaa-ngaa niteteꞌheꞌ huleꞌ i rárá to manótó.
Agáiáná ane nibábehi iti,
hangaa-ngaa nipamaꞌálusuꞌ lalumi.
Hai maingáꞌ-ingáꞌkou woꞌo,
bona ineeꞌkou woꞌo maꞌala nakuasaꞌi dósá.
2 Hangaa-ngaa mombetulungikou hadua hai hadua,
bona hangko i bábehiámi iti,
nipeuláꞌi miꞌi hawaꞌna Kerisitu.a
3 Ane ara hadua tauna to mampekiri melumbuꞌ tueꞌna hangko i rángána,
mole riꞌi tiꞌara,
lempóna ia modongkoki wátána haduduána.
4 Rángina miꞌi kitaꞌ upu-upu mampekiri bábehiántaꞌ haduduántaꞌ,
ba maroꞌa ba tiꞌara.
Ane maroꞌai,
peisá tapogóeꞌ.
Agáiáná ineeꞌ miꞌi tapahibali bábehiántaꞌ hai bábehiána tauna ntániꞌna,
5 láwiꞌ kitaꞌ upu-upu hangaa-ngaa mampopolumaokeꞌ bágóꞌtaꞌ haduduántaꞌ.b
6 Tauna to motarima paturoꞌ mokana i ngkóráꞌna Pueꞌ Ala,
hangaa-ngaa mampogáláꞌá woꞌo to mepaturoꞌ iti hangko i porasiꞌána.
7 Maingáꞌ-ingáꞌkou,
halalu-halalu!
Ane tauliꞌ peisákeꞌ mampodongkoꞌá Pueꞌ Ala,
wátántaꞌ haduduántaꞌ to tapodongkoꞌá,
láwiꞌ apa to tatudaꞌ,
iti woꞌo to ina tapupu.
8 Ane mouláꞌkeꞌ oaꞌ peundeꞌántaꞌ haduduántaꞌ,
ina molámbiꞌkeꞌ wuaꞌna bábehiántaꞌ iti,
lempóna:
ina tegáákikeꞌ hangko i Pueꞌ Ala duuꞌna i rue-ruena.
Agáiáná ane bábehiántaꞌ mampeuláꞌi oaꞌ peundeꞌána Inao to Magasaꞌ,
ina molámbiꞌkeꞌ katueꞌ to maroꞌa to tiꞌara mokahópóꞌá hangko i Inao to Magasaꞌ.
9 Mewaliꞌ halalu-halalu,
ineeꞌkeꞌ luleꞌ mobábehi apa to maroꞌa,
láwiꞌ ane mobábehikeꞌ oaꞌ bábehiá to maroꞌa,
bateꞌna ina talámbiꞌ wuaꞌna bábehiántaꞌ i tempó to tepakanótó miꞌi.
10 Mewaliꞌ,
tangaꞌna mani ara tempó,
hangaa-ngaa mobábehikeꞌ oaꞌ apa to maroꞌa i upu-upu tauna,
pelumbuꞌna miꞌi i halalu hampepepoináláintaꞌ.
Paturoꞌ to kahópóꞌána
11 Nipeita noumbá kamabángkána ukiꞌna to kuꞌukiꞌ hai taengkuꞌ haduduángkuꞌ.c
12 Maingáꞌ-ingáꞌkou i tauna to moánti paturoꞌ to mepakanawoꞌ.
Raundeꞌ peá bona ratóiá tauna ntániꞌna.
Mouláꞌheꞌ ádá i rawana peá hai mopári-párikou bona mampeuláꞌikou woꞌo ádá petileꞌ.
Iti rabábehi láwiꞌ malááꞌheꞌ ina rapopeahiahiꞌ toIahudiꞌ ane mobámbáriheꞌ Kerisitu to mate i kau mombehape.
13 Katoꞌuána,
tauna to mampeuláꞌi ádá petileꞌ iti,
tiꞌaraheꞌ mampeuláꞌi upu-upu áturá-áturá to teukiꞌ i Paturoꞌna Musa.
Tunggáiáraꞌ mohuoꞌkou mampopetileꞌ,
bona mampepemahileheꞌ ánti kanipeuláꞌina áturáraꞌ iti.
14 Agáiáná kódóꞌ,
tiꞌara kuꞌundeꞌ mampepemahile.
To kupomahile ia miꞌi Pueꞌ Iesu Kerisitu to mate rapakuꞌ i kau mombehape.
Ane kódóꞌi,
nodoaꞌ woꞌo to rapakuꞌ i kau hingkakani hai Ia,
láwiꞌ tiꞌara piꞌi kuꞌundeꞌ mouláꞌ peundeꞌáraꞌ tauna to i duniáꞌ deꞌe.
Hai tauna i duniáꞌ deꞌe,
tiꞌara tediiꞌ laluraꞌ i apa to kupaioru.
15 Ratileꞌ ba tiꞌara,
tiꞌara iti to mobunduꞌ.
To mobunduꞌ ia miꞌi katueꞌ to woꞌud hangko i Pueꞌ Ala.
16 I lalu pekakaengkuꞌ,
kupembiáꞌ bona Pueꞌ Ala moweꞌikou roꞌa ngkatueꞌ hai mopatongawaꞌ ahiꞌNa i upu-upu tauna to mampeuláꞌi paturoꞌ deꞌe to mewaliꞌmoheꞌ taunáNa.
17 Kahópóꞌána,
kupembiáꞌ bona tiꞌara piꞌi ara to mopakasusaꞌaꞌ,
láwiꞌ kódóꞌ miꞌi surona Pueꞌ Iesu,
hai tongawaꞌ hangko i to bálána wátángkuꞌ.e
18 Kupembiáꞌ bona Pueꞌtaꞌ Iesu Kerisitu mowátiꞌkou hangko i kabulána laluNa.
Ami.
Hangko i kódóꞌ,
PAULU