11
Nipeuláꞌi miꞌi bábehiángkuꞌ,
nodo woꞌo kamampeuláꞌingkuꞌ bábehiána Kerisitu.
Ádá petótóku ane tauna maminggu
2 Kaliliuána halalu-halalu,
kutóiákou láwiꞌ i pákáꞌ-pákáꞌna nibuhinaoaꞌ oaꞌ,
hai nipeuláꞌi paturoꞌ to kupahaweꞌámokou.
3 Agáiáná ara mani hampákáꞌ to paraluu niꞌisá:
to mokapalaꞌi upu-upu tobaleilo ia miꞌi Kerisitu.
Noꞌonoꞌ woꞌo to mokapalaꞌi towawine ia miꞌi toámána,
hai Pueꞌ Ala mokapalaꞌi Kerisitu.
4 Ane maminggukeꞌ hai arai tobaleilo to metótóku haneꞌi mekakae ba mopahaweꞌ laluitana Pueꞌ Ala,
tobaleilo iti mopakóiꞌ Kerisitu to mewaliꞌ kapalaꞌna.
5 Agáiáná towawine to tiꞌara metótóku ane mekakae ba mopahaweꞌ laluitana Pueꞌ Ala,
ia mopakóiꞌ toámána to mewaliꞌ kapalaꞌna,
láwiꞌ ia hibali hai towawine to ralóli.a
6 Mewaliꞌ,
ane ara towawine to tiꞌara moundeꞌ metótóku,
rángina miꞌi ralóli peá hangko tiꞌara mani mekakae ba mopahaweꞌ laluitana Pueꞌ Ala!
Agáiáná ane mahili ragundiꞌ ba ralóli,
hangaa-ngaa metótóku.
7 Ane tobaleilo to mekakae ba mopahaweꞌ laluitana Pueꞌ Ala,
ineeꞌ metótóku,
láwiꞌ tobaleilo napopewaliꞌ Pueꞌ Ala mouláꞌ pambiáráNa haduduáNa,b
bona hangaꞌna Pueꞌ Ala rapomahile.
Towawine hangaa-ngaa metótókuheꞌ láwiꞌ towawine rapopewaliꞌ bona hangaꞌna tobaleilo rapomahile,
8 láwiꞌ tobaleilo tiꞌara rapopewaliꞌ hangko i towawine,
agáiáná towawine riꞌi to rapopewaliꞌ hangko i tobaleilo.c
9 Hai noꞌonoꞌ woꞌo,
tobaleilo tiꞌara rapopewaliꞌ bona motulungi toinána,
agáiáná toinána riꞌi to rapopewaliꞌ bona motulungi toámána.d
10 Onoꞌ miꞌi ntóáꞌna haneꞌi towawine hangaa-ngaa metótókuheꞌ,
láwiꞌ tótóku iti nodo tandaꞌ karaweꞌina miꞌi kuasaꞌ mopahaweꞌ laluitana Pueꞌ,
hai rapetiroheꞌ woꞌo malaꞌeka.
11 Agáiáná i kitaꞌ to mepoinálái i Pueꞌ,
towawine hai tobaleilo mombeparaluu.
Towawine hangaa-ngaa motulungi tobaleilo,
hai tobaleilo hangaa-ngaa motulungi towawine,e
12 láwiꞌ rungu-runguna towawine rapopewaliꞌ hangko i tobaleilo,
agáiáná roo onoꞌ,
upu-upu tobaleilo rapoánáka hangko i towawine,
agáiáná to mopaꞌara upu-upuna iti ia miꞌi Pueꞌ Ala.
13 Nipepekiri:
hintotoꞌ paꞌi ane towawine tiꞌara metótóku mekakae i Pueꞌ Ala ane maminggu?
14 Rápáꞌna,
handaꞌ tauna manguliꞌ tiꞌara hintotoꞌ ane tobaleilo malóe weluáꞌraꞌ,
15 agáiáná ane towawine malóe weluáꞌraꞌ,
iti mewaliꞌ tandaꞌ karaꞌádáiraꞌ,
láwiꞌ weluáꞌraꞌ to malóe iti mopamalásáꞌ wátáraꞌ,
hai weluáꞌraꞌ iti to mewaliꞌ tótókuna.
16 Agáiáná ane ara to mampoinao mosapuáka to kuꞌuliꞌ iti,
deꞌe miꞌi laluitangkuꞌ:
mouláꞌ ádá to kipeuláꞌi,
towawine hangaa-ngaa metótóku ane mamingguheꞌ,
hai ádá iti rapeuláꞌi woꞌo halalu hampepepoináláintaꞌ i jemaꞌa-jemaꞌa.
Tiꞌara ara ádá ntániꞌna.
Posisalaꞌraꞌ toKorintu ane mandeꞌheꞌ rótiꞌ
17 Kaliliuána,
ara woꞌo hampákáꞌ to kupoinao kuhángáꞌáꞌákou,
hai tiꞌara kutóiákou ánti bábehiámi deꞌe,
láwiꞌ ane moromu-romukou,
handaꞌ mani to kadake to nibábehi haneꞌi to maroꞌa.
18 Rungu-runguna,
kuhádi bámbári to manguliꞌ,
ane hirámpukou maminggu,
ara posisalaꞌ i oloꞌmi,
hai kupekiri bámbári iti babilaꞌ ara katoꞌuána!
19 Hintotoꞌnto ane niposisalaꞌi,
ane mopatongawaꞌ ba heáná to maróhó peuláꞌna i Pueꞌ.
20 Agáiáná ane hirámpukou,
tiꞌara nibábehi apa to hintotoꞌ i tauna to mandeꞌ rótiꞌ hai mainu anggoroꞌ mambuhinao kamatena Pueꞌ Iesu.
21 Arakou hantángáꞌ to mandeꞌ ioru duuꞌmi mabuhu,
hai arakou woꞌo to mainu duuꞌmi malangu.
Iti nibábehi i lindoꞌraꞌ rángámi to meahiahiꞌ tueꞌraꞌ,
álána marimiheꞌ hai mangkadoꞌu.
22 Moapa riꞌi haneꞌi nibábehi noꞌonoꞌ?
Tiꞌarakou paꞌi potámbi?
Rángimi mandeꞌ hai mainu sieruꞌ i lalu támbimi.
Ba niundeꞌ mopakóiꞌ halalu hampepepoináláimi?
Ba nipoinao nipakahiliáheꞌ halalumi to meahiahiꞌ tueꞌraꞌ?
Ba niuliꞌ riꞌi ina kuꞌuliꞌ kutóiákou?
Tiꞌara!
Bábehiámi iti tiꞌara kupokana.
23 Kupaturoꞌmokou hangkoia apa lempóna ane mandeꞌkou hai mainu hingkakani tempómi mambuhinao kamatena Pueꞌ Iesu.
Hai apa to kupaturoꞌákou iti,
kutarima hangko i Pueꞌ.f
Káindina,
hangko tiꞌara mani rahuhuꞌ i ewáliNa,
Pueꞌ Iesu moala miꞌi rótiꞌ
24 haneꞌi mekakae.
Nabiseꞌ-biseꞌ hai Nahángáꞌáꞌáheꞌ topeguruNa,
“Deꞌe miꞌi wátáNgkuꞌ to Kuhuhuꞌ mosulewátáikou.
Hangaa-ngaa nibábehi deꞌe mewaliꞌ tandaꞌ pebuhinaomi i Kódóꞌ.”
25 Noꞌonoꞌ woꞌo,
karooraꞌ mandeꞌ,
Nahuhuꞌámoheꞌ painuá anggoroꞌ,
haneꞌi Nahángáꞌáꞌáheꞌ,
“Óntóꞌna painuá anggoroꞌ deꞌe,
lempóna podándina Pueꞌ Ala to woꞌug to mopahintuwuꞌ Pueꞌ Ala hai tauna.
Dándi iti Napakaróhó hai waheꞌKuꞌ to tebubuha i kamateNgkuꞌ.
I káni-kánimi mainu,
nibábehi bona mewaliꞌ tandaꞌ pebuhinaomi i Kódóꞌ.”
26 Mewaliꞌ,
i káni-kánina mandeꞌkou rótiꞌ hai mainukou anggoroꞌ,
nibámbári kamatena Pueꞌ Iesu duuꞌna i kahaweꞌáNa huleꞌ.
27 Mewaliꞌ,
heáná to tiꞌara hintotoꞌ bábehiána ane mandeꞌ rótiꞌ hai mainu anggoroꞌ i lalu hangaꞌna Pueꞌ,h
tauna iti madósá,
láwiꞌ ia tiꞌara mobiláꞌ wátána hai waheꞌna Pueꞌ Iesu to rapándiriꞌ nodo rótiꞌ hai anggoroꞌ.
28 Upu-upu tauna hangaa-ngaa mopáresáꞌ sieruꞌ laluna hangko peisá riꞌi mandeꞌ rótiꞌ hai mainu anggoroꞌ,
29 láwiꞌ tauna to tiꞌara mobiláꞌ wátána Pueꞌ ane mandeꞌ rótiꞌ hai mainu anggoroꞌ,
ina nahuku Pueꞌ Ala.
30 Onoꞌ miꞌi haneꞌi handaꞌ tauna i oloꞌmi to maduꞌa hai maledeꞌ wátáraꞌ,
hai araheꞌ woꞌo to mate.
31 Agáiáná ane tapáresáꞌ sieruꞌ laluntaꞌ,
tiꞌarakeꞌ ina nahuku Pueꞌ.
32 Ane nahukukeꞌ Pueꞌ,
lempóna Ia mokámbáróákeꞌ nodo hadua umaꞌ mokámbáróá ánáꞌna,
bona menosoꞌkeꞌ hai tiꞌarakeꞌ ina rahuku i kahópóꞌána duniáꞌ hingkakani hai tauna to tiꞌara mepoinálái.
33 Mewaliꞌ halalu-halalu,
ane hirámpukou mosusa pandeꞌ rótiꞌ,
rángina miꞌi mombepegiákou sieruꞌ.
Ane aramokou aha,
hangko mandeꞌrakou hingkakani.
34 Ane ara to marimi,
rángina miꞌi mandeꞌ sieruꞌ i támbina,
bona tiꞌarakou nasalaꞌi Pueꞌ i tempómi mandeꞌ rótiꞌ.
Mokana i pekuneꞌmi to ntániꞌna,
ina kupakanótóákou ane haweꞌaꞌ huleꞌ.