Paulu mohuoꞌheꞌ mohuku hadua tauna to mobuálósi umána
5
Ara kuhádi bámbári kana i bábehiána hadua tauna hangko i oloꞌmi.
Bábehiána tauna iti metitidiꞌi,
láwiꞌ ia mobuálósi umána.a
Mogalo tauna to tiꞌara moisá Pueꞌ Ala,
tiꞌaraheꞌ mobábehi to noꞌonoꞌ.
2 Agáiáná kómu,
kehapiꞌ ara to mobábehi bábehiá to noꞌonoꞌ,
mampepemahile manikou,
mole katoꞌuána,
hangaa-ngaa niposusa lalu riꞌi,
hai tauna iti hangaa-ngaa nipopesuwuꞌ hangko i oloꞌmi.
3-4 Kehapiꞌaꞌ karaoꞌ hangko i kómu,
agáiáná pekiringkuꞌ aranto oaꞌ hingkakani hai kómu,
hai makuasaꞌ maniaꞌ mampohawaꞌákou.
Mewaliꞌ,
hangko i kuasaꞌ to naweꞌiaꞌ Pueꞌ Iesu Kerisitu,
kupakanótóákou:
tauna to kadake bábehiána iti hangaa-ngaa rahuku.
Ane moromu-romukou,
nodontoaꞌ to hingkakani hai kómu,
hai kupembiáꞌ i lalu kuasaꞌna Iesu Pueꞌtaꞌ
5 bona nihuhuꞌ tauna iti i kuasaꞌna Datu Tokadake.
Lempóna,
hangaa-ngaa nipopesuwuꞌ tauna iti hangko i oloꞌmi,
{hai ineeꞌ nipaliu maminggu hingkakani hai kómu}.
Hangaa-ngaa nibábehi noꞌonoꞌ,
bona tauna iti molámbiꞌ pehuku,
hai kahópóꞌána ia ina menosoꞌ hai molámbiꞌ katehómpóꞌ i kahaweꞌna huleꞌ Pueꞌ Iesu.b
6 Tiꞌarakou hintotoꞌ mampepemahile oaꞌ,
láwiꞌ ara maniheꞌ i oloꞌmi to kadake bábehiáraꞌ!
Tiꞌara paꞌi niꞌisá laluita to manguliꞌ,
“Ragiꞌ to hantóiꞌ mampopembongke tinámpu mewaliꞌ handaꞌ”?
Lempóna,
hadua tauna to madósá peisá mopakanawoꞌ handaꞌ tauna.
7 Ane kaiꞌ toIahudiꞌ mobábehi ádá Posusa Paska,
upu-upu ragiꞌ hangaa-ngaa rawehángi sieruꞌ hangko i támbingkiꞌ.
Noꞌonoꞌ woꞌo kómu,
hangaa-ngaa mampopesuwuꞌkou tauna to madósá iti hangko i oloꞌmi.
Ane nibábehi noꞌonoꞌ,
ina mewaliꞌkou nodo rótiꞌ to woꞌu to tiꞌara raragiꞌi.
Lempóna,
ina magasaꞌ huleꞌ pohintuwuꞌmi.
Kómu napamagasaꞌmokou Pueꞌ Ala moliu Kerisitu to mate mohómpóki dósántaꞌ.
Ia nodo hambaꞌa dimbá to rasambale i Posusa Paska.
8 Mewaliꞌ,
maimokeꞌ mamposusai Posusa Paska i laluntaꞌ.
Hangaa-ngaa tatibe ragiꞌ to sae,
lempóna bábehiántaꞌ hangkoia to kadake.
Hai hangaa-ngaa mandeꞌkeꞌ rótiꞌ to woꞌu to tiꞌara raragiꞌi.
Lempóna,
hangaa-ngaa mampeuláꞌikeꞌ peundeꞌána Pueꞌ Ala hangko i kabulána laluntaꞌ.
9 I lalu surangkuꞌ to kupakatu miꞌi i kómu,c
kuhángáꞌáꞌákou bona ineeꞌheꞌ niporomuá tauna to mobábehi bábehiá to metitidiꞌi.
10 Agáiáná to kuꞌuliꞌ deꞌe,
tiꞌara mokana i tauna to tiꞌara moisá Pueꞌ Ala hai metitidiꞌi bábehiáraꞌ,
to mehioroꞌ,
to mebagiuꞌ,
ba to menómbá i ánitu,
láwiꞌ ane kehira to kutunggái,
lempóna kehangaa-ngaa nipálehi duniáꞌ deꞌe.
11 Tunggáiángkuꞌ deꞌe ia miꞌi bona ineeꞌheꞌ niporomuá tauna to manguliꞌ katoSaraniraꞌ agáiáná:
mobábehiheꞌ bábehiá to metitidiꞌi,
mampakaꞌoiheꞌ,
menómbáheꞌ i ánitu,
mopakadakeheꞌ hángká rángáraꞌ,
malangu-languheꞌ,
hai mebagiuꞌheꞌ.
Mogalo riꞌi mandeꞌ,
ineeꞌkou hingkakani hai tauna to noꞌonoꞌ!d
12-13 Ane tauna to tiꞌaraheꞌ toSarani,
tiꞌara ara kuasaꞌkuꞌ ina mosalaꞌiheꞌ.
Pueꞌ Ala peá to makuasaꞌ mohukuheꞌ.
Agáiáná kómu,
peisákou mohuku halalu hampepepoináláimi to mobábehi oaꞌ salaꞌ,
láwiꞌ ara to teukiꞌ i lalu Sura Magasaꞌ node:
“Nipopesuwuꞌmoheꞌ tauna to kadake bábehiáraꞌ hangko i oloꞌmi!”