Paulu surona Pueꞌ Ala
4
Ane kaiꞌ tadulakomi,
rángina miꞌi niuliꞌ peangkaiꞌ huoꞌá,
láwiꞌ huoꞌánaꞌangkaiꞌ woꞌo Kerisitu.
Kaiꞌ to moánti ngkóráꞌna Pueꞌ Ala,
hai hangkoia ngkóráꞌ iti tewuniángi i tauna i duniáꞌ.a
2 To paraluu i huoꞌá,
hangaa-ngaa mampeuláꞌiheꞌ oaꞌ hawaꞌna to i reáraꞌ.
3 Mewaliꞌ,
ane arakou to mosalaꞌi pobágóꞌkuꞌ,
tiꞌaranto moapa.
Noꞌonoꞌ woꞌo ane pobágóꞌkuꞌ rapáresáꞌ,
tiꞌara woꞌo moapa.
Tiꞌara woꞌo kódóꞌ to mopakanótó ba maroꞌa pobágóꞌkuꞌ ba tiꞌara.
4 Kuisá kabulána lalungkuꞌ hai tiꞌaraꞌaꞌ masalaꞌ,
agáiáná tiꞌara iti to mopakanótó katiꞌárángkuꞌ masalaꞌ.
Pueꞌ to ina mopáresáꞌ lalungkuꞌ,
ba maroꞌai ba tiꞌara.
5 Onoꞌ miꞌi haneꞌi kuꞌuliꞌ,
ineeꞌkou mosalaꞌi pobágóꞌraꞌ hángká rángámi ane tiꞌara mani tempóna.
Nipegiá sieruꞌ kahaweꞌna huleꞌ Pueꞌ.
Ia miꞌi to ina mobungkáhi upu-upu to tewuniángi mani i lalu kamakáindiána.
Ia to ina mopatongawaꞌ upu-upu tunggáiána laluraꞌ tauna.
I tempó iti,
hadua-hadua tauna ina molámbiꞌ petóiá hangko i Pueꞌ Ala to hintotoꞌ natarima.
Paulu mokámbáróá toKorintu láwiꞌ mampepemahileheꞌ
6 Halalu-halalu,
apa to kuꞌuliꞌ ininá,
kana i Apolo hai kódóꞌ haduduángkuꞌ.
Kaiꞌ rodua kupopándiriꞌ,
bona mampeuláꞌikou párentá to manguliꞌ,
“Ineeꞌkou moliungi apa to teukiꞌ miꞌi.”
Tunggáiángkuꞌ bona ineeꞌkou mampepemahile ánti peuláꞌmi i hadua tadulakomi.
Ineeꞌkou motóiá hadua tadulakomi hai mopakóiꞌ to haduána.
7 Ba niuliꞌ ripaꞌi,
maroꞌa manikou hangko i hángká rángámi?
Apa paꞌi to ara i kómu ane tiꞌarai to nitarima hangko i Pueꞌ Ala?
Hai moapa riꞌi haneꞌi mampepemahilekou,
ane upu-upu to ara i kómu,
iti to naweꞌikou Pueꞌ Ala?
8 Ba nipekiri paꞌi tiꞌara piꞌi ara to niparaluu?
Ba nipekiri paꞌi maróhó miꞌi pepoináláimi i Pueꞌ?
Ba niuliꞌ mepárentákou nodo datu,
hai kaiꞌ surona Pueꞌ Iesu tiꞌara piꞌi niparaluu?
Kemaroꞌa ntepuꞌu ane mewaliꞌkou datu i popárentána Pueꞌ Ala,
bona mepárentáꞌangkaiꞌ woꞌo hingkakani hai kómu.
9 Agáiáná tiꞌara maniangkaiꞌ mewaliꞌ datu i duniáꞌ.
Mouláꞌ polámbiꞌkuꞌ,
kaiꞌ surona Pueꞌ Iesu,
napopewaliꞌmongkaiꞌ Pueꞌ Ala tauna to tepaiwóiꞌá tueꞌkiꞌ hangko i upu-upu tauna.
Kaiꞌ rapahibaliangkaiꞌ hai tauna to rahuku mate i lindoꞌraꞌ tauna to handaꞌ,
to rapengongoꞌi tauna hai malaꞌeka.
10 Kaiꞌ rarekeꞌangkaiꞌ tobebe láwiꞌ mopahaweꞌangkaiꞌ bámbári kana i Kerisitu,
agáiáná kómu,
niuliꞌ toSarani to mapándekou!
Kaiꞌ,
maledeꞌangkaiꞌ,
agáiáná kómu,
niuliꞌ maróhó pepoináláimi!
Kómu to raꞌádái tauna i duniáꞌ,
agáiáná kaiꞌ,
rasasalaꞌiangkaiꞌ!b
11 Haweꞌ deꞌe-deꞌe,
tiꞌara gáná pandeꞌkiꞌ,
tiꞌara gáná painungkiꞌ,
hai tiꞌara woꞌo gáná pewaruꞌkiꞌ.
Rapopeahiahiꞌangkaiꞌ oaꞌ.
Tiꞌara ara katoroꞌángkiꞌ.
12 Kaiꞌ mobágóꞌangkaiꞌ matimi mampeliꞌ katueꞌángkiꞌ.
Ane araheꞌ to motundaꞌ-tundaꞌangkaiꞌ,
kiháwángiheꞌ hai pewátiꞌ.
Ane araheꞌ to mampopeahiahiꞌangkaiꞌ,
kitódihá peá.
13 Ane araheꞌ to mohuwárá laluita to kadake i kaiꞌ,
kihániki peheꞌ hai laluita to maꞌálusuꞌ.
Haweꞌ deꞌe-deꞌe,
terekeꞌangkaiꞌ nodo peá rumpuꞌ to ratibe láwiꞌ tiꞌara piꞌi mobunduꞌ.c
14 Halalu-halalu!
Tunggáiángkuꞌ deꞌe tiꞌarakou kupakahiliá,
agáiáná moliu laluitangkuꞌ deꞌe,
kupaturoꞌkou láwiꞌ kurekeꞌmokou nodo ánáꞌkuꞌ haduduángkuꞌ to kupokaꞌahiꞌ.
15 Kehapiꞌ i sábuna gurumi to moteteꞌkou i peuláꞌmi i Kerisitu,
kódóꞌ peá to nipouma,
láwiꞌ kódóꞌ miꞌi to rungu-runguna moánti Ngkóráꞌ Marasa,
álána mepoináláikou i Kerisitu Iesu.
16 Onoꞌ miꞌi haneꞌi kupembiáꞌ ntepuꞌu halalu-halalu,
bona nipeuláꞌi bábehiángkuꞌ.
17 Mewaliꞌ kuhuoꞌ Timotiu lao mampohidupaꞌákou.
Timotiu iti mampopolumao oaꞌ bágóꞌna Pueꞌ,
hai kurekeꞌ miꞌi ánáꞌkuꞌ to kupokaꞌahiꞌ.
Ane haweꞌi i kómu,
ina napopambuhinaoákou noumbá peuláꞌkuꞌ i Kerisitu,
nodo to kupahaweꞌ miꞌi woꞌo i upu-upu jemaꞌa.
18 I oloꞌmi ara to mewaliꞌ maꞌángkáꞌ,
láwiꞌ rapekiri tiꞌarapoꞌ ina lao mampohidupaꞌákou.
19 Agáiáná ina laontoaꞌ.
Ane napokana Pueꞌ,
tiꞌara piꞌi marue ina haweꞌaꞌ.
I tempó iti,
ina kuita apa to rabábehi tauna to mampepemahile iti,
hai ina kuisá ba ara kuasaꞌna Pueꞌ Ala i hira,
ba laluitaraꞌ peá.
20 Láwiꞌ ane Pueꞌ Ala mepárentá i laluntaꞌ,
hangaa-ngaa tapeuláꞌi peundeꞌáNa,
tiꞌara peá i polaluitantaꞌ,
agáiáná i bábehiántaꞌ woꞌo,
láwiꞌ ara kuasaꞌ to talámbiꞌ hangko i Hia.d
21 Mewaliꞌ,
umbána to niundeꞌ:
ane haweꞌaꞌ mopaturoꞌkou hai tiꞌara mani nikábáhá bábehiámi to kadake,
ina mahárá polaluitangkuꞌ.
Agáiáná ane tebáliki miꞌi bábehiámi,
ina maꞌálusuꞌ polaluitangkuꞌ hai maꞌahiꞌ lalungkuꞌ.