Pogómbó mahile i Ierusale
15
Hangkani tempó,
bahangapa toIahudiꞌ hangko i tampoꞌ Iudá to mepoinálái i Pueꞌ Iesu,
laoheꞌ i kótá Antiokia i tampoꞌ Siria.
ToIahudiꞌ iti mopaturoꞌheꞌ toSarani i Antiokia,
rahángáꞌáheꞌ,
“Ane tiꞌarakou ratileꞌ mouláꞌ áturá to naweꞌikeꞌ Musa,
bateꞌna tiꞌarakou ina molámbiꞌ katehómpóꞌ!”
2 Agáiáná Paulu hai Baranaba tiꞌara mpuꞌuheꞌ mampokana paturoꞌraꞌ iti.
Kahópóꞌána,
rabutusi bona Paulu,
Baranaba,
hai bahangapa tauna ntániꞌna hangko i jemaꞌa iti,
lao mopahaweꞌ posisalaꞌ iti i surona Pueꞌ Iesu hai tadulako-tadulako ntániꞌna i kótá Ierusale.
3 Mewaliꞌ,
Paulu hai Baranaba rapopeángkáꞌheꞌ toSarani to i Antiokia hai raꞌántiheꞌ haweꞌ i rawa kótá.
Hangko ionoꞌ,
molumaoheꞌ lao i kótá Ierusale.
I polumaoáraꞌ iti,
moliuheꞌ i roboꞌ Penisia hai tampoꞌ Samaria,
hai mopahaweꞌáheꞌ noumbá tauna to tiꞌara toIahudiꞌ mepoináláiheꞌ woꞌo i Iesu.
Bámbári iti mopagóeꞌ laluraꞌ upu-upu halalu hampepepoináláiraꞌ.
4 Kahaweꞌraꞌ i Ierusale,
ratarimaheꞌ maroꞌa jemaꞌa hai surona Pueꞌ Iesu hai tadulako-tadulako ntániꞌna to ara ionoꞌ.
Paulu hai Baranaba mampodaritaheꞌ upu-upu to nabábehi Pueꞌ Ala i polumaoraꞌ moánti Ngkóráꞌ Marasa i tampoꞌraꞌ tauna to tiꞌara toIahudiꞌ.
5 Agáiáná araheꞌ woꞌo bahangapa toParisi to mepoináláimoheꞌ i Iesu,
meángkáꞌheꞌ,
rauliꞌ,
“Tauna to tiꞌara toIahudiꞌ to mepoinálái i Iesu,
hangaa-ngaa ratileꞌheꞌ hai hangaa-ngaa mampeuláꞌiheꞌ woꞌo Paturoꞌna Musa!”
6 Onoꞌ miꞌi haneꞌi mogómbóheꞌ surona Pueꞌ Iesu hai tadulako-tadulako ntániꞌna mampolaluita posisalaꞌ iti.
7 Marue ntepuꞌuheꞌ mampolaluita ádá petileꞌ.
Kahópóꞌána,
meángkáꞌ miꞌi Peturuꞌ,
nauliꞌ,
“Halalu-halalu,
niꞌisá miꞌi apa to mewaliꞌ i kódóꞌ.
Bahangapa parena to liu,
kódóꞌ Napileꞌiaꞌ Pueꞌ Ala hangko i oloꞌmi,
hai Nahuoꞌaꞌ moánti Ngkóráꞌ Marasa i tauna to tiꞌara toIahudiꞌ,
bona bámbári iti rahádi hai rapoinálái woꞌo.a
8 Hai Pueꞌ Ala to moisá laluraꞌ tauna,
motarimaheꞌ tauna to tiꞌara toIahudiꞌ,
hai Ia mopatongawaꞌ tunggáiáNa iti i kaNaweꞌiraꞌ Inao to Magasaꞌ hibali hai to mewaliꞌ i kitaꞌ hangkoia.
9 Kitaꞌ toIahudiꞌ hai hira to tiꞌaraheꞌ toIahudiꞌ,
tiꞌarakeꞌ napopontaniꞌ Pueꞌ Ala.
Ia mopamagasaꞌ woꞌo laluraꞌ láwiꞌ mepoináláiheꞌ i Iesu.
10 Mewaliꞌ halalu-halalu,
moapa riꞌi haneꞌi nipoinao mopaꞌara kamabukoꞌna Pueꞌ Ala?
Moapa riꞌi haneꞌi nipoinao mopamatimiheꞌ hai handaꞌ párentá to maꞌángkárá rapeuláꞌi?
Mantepuꞌu i toioruntaꞌ hangkoia duuꞌna haweꞌ i kitaꞌ deꞌe-deꞌe,
tiꞌara tabuku mampeuláꞌi upu-upu párentá hai páliá iti!
11 Tiꞌarakeꞌ molámbiꞌ katueꞌ to maroꞌa hangko i pampeuláꞌintaꞌ párentá hai páliá to noꞌonoꞌ.
Kitaꞌ molámbiꞌkeꞌ katehómpóꞌ ánti kabulána laluna Pueꞌ Iesu,
noꞌonoꞌ woꞌo hira.”
12 Roo onoꞌ,
maniiꞌmoheꞌ upu-upu tauna to mogómbó iti,
hai mampehádingiheꞌ woꞌo apa to rapahaweꞌ Baranaba hai Paulu mokana i tandaꞌ kuasaꞌ to rabábehi,
hai kuasaꞌna Pueꞌ Ala tempóraꞌ ara i wánuá-wánuá tauna to tiꞌaraheꞌ toIahudiꞌ.
13 Karooraꞌ Baranaba hai Paulu molaluita,
Iakobu mopahaweꞌ woꞌo laluitana,
nauliꞌ,
“Halalu-halalu,
nipehádingi apa to kuhángáꞌákou.
14 Simoꞌ Peturuꞌ roo miꞌi mopahaweꞌákeꞌ noumbá rungu-runguna Pueꞌ Ala mopatongawaꞌ ahiꞌNa i tauna to tiꞌara toIahudiꞌ.
Araheꞌ to Napileꞌi bona hira woꞌo mewaliꞌ taunáNa.
15 Hai apa to mewaliꞌ iti,
hiolaꞌ hai apa to raukiꞌ miꞌi nabiꞌ-nabiꞌ hangkoia,
láwiꞌ ara teukiꞌ node:
16 Nauliꞌ Pueꞌ,
‘Roo onoꞌ,
ina mesuleꞌAꞌ
hai popárentána Datu Daudiꞌ
to nodo hambuaꞌ bambaruꞌ to madungká,
ina Kuaró huleꞌ.
Upu-upu to magero ina Kuaró huleꞌ,
bona mewaliꞌ huleꞌ maróhó,
17 hai bona upu-upu tauna ntániꞌna
to tiꞌara toIahudiꞌ,
ina moundeꞌheꞌ woꞌo moisá kaheánáNgkuꞌ,
láwiꞌ Kukióꞌmoheꞌ mewaliꞌ taunáNgkuꞌ.’
Eneꞌ miꞌi ngkóráꞌna Pueꞌ,
hai Ia to ina mampopewaliꞌ upu-upuna iti
19 Napaliliu wopiꞌi Iakobu laluitana,
nauliꞌ,
“Mewaliꞌ deꞌe miꞌi polámbiꞌkuꞌ,
halalu-halalu.
Ineeꞌkeꞌ mopamapári tauna to tiꞌara toIahudiꞌ to mepoinálái i Pueꞌ Ala.
20 Maroꞌa ane taukiꞌ peá sura mopaturoꞌheꞌ bona ineeꞌheꞌ mandeꞌ pandeꞌ to rapopenómbá i ánitu,
ineeꞌheꞌ mandeꞌ waheꞌ,
hai ineeꞌheꞌ woꞌo mandeꞌ bauꞌ to tiꞌara sieruꞌ rapopesuwuꞌ waheꞌna.
Hai hangaa-ngaa tahángáꞌáheꞌ woꞌo bona ineeꞌheꞌ motoina ba motoama deleꞌ,
hai ineeꞌheꞌ mebuálósi.
21 {Hangko i upu-upu Paturoꞌna Musa,
kehapiꞌ bahangapa peá to tapahaweꞌáheꞌ,
bona ineeꞌkeꞌ rapokóiꞌ inao toIahudiꞌ.
} Láwiꞌ mantepuꞌu hangkoia haweꞌ deꞌe-deꞌe,
hangka toIahudiꞌtaꞌ iumbá-umbá peá mobásá Sura Paturoꞌna Musa i támbi penómbáꞌá i alo-alo Satu,
alo penómbáꞌá.
Hai áturá-áturá iti rapahaweꞌ i upu-upu wánuántaꞌ.”
Sura to rapakatu i toSarani to tiꞌaraheꞌ toIahudiꞌ
22 Roo onoꞌ,
suronaheꞌ Pueꞌ Iesu,
hai tadulako-tadulako ntániꞌna,
hai upu-upu toSarani to mogómbó ionoꞌ,
mopileꞌiheꞌ bahangapa tauna hangko i oloꞌraꞌ,
bona laoheꞌ i Antiokia hingkakani hai Paulu hai Baranaba.
To rapileꞌi iti,
rodua tobaleilo to rabiláꞌ halalu hampepepoináláiraꞌ.
Hira iti iamoheꞌ Silasi hai Iudasiꞌ to rauliꞌ woꞌo Barasaba.
23 Sura to raꞌánti teukiꞌ node:
“Molámbiꞌ toSarani
i katoroꞌáraꞌ
Tabeá hangko i kaiꞌ surona Pueꞌ Iesu,
hai tadulakoraꞌ toSarani i Ierusale.
Mopakatuangkaiꞌ sura deꞌe i kómu halalu hampepepoináláingkiꞌ to tiꞌarakou toIahudiꞌ to toroꞌ i kótá Antiokia,
i tampoꞌ Siria,
hai i poropensi Kilikia.
24 Kihádi miꞌi ara bahangapa tauna hangko i oloꞌkiꞌ to lao i kómu mopawulikou i pepoináláimi moliu paturoꞌraꞌ.
Mewaliꞌ bona niꞌisá:
tiꞌara kaiꞌ to mohuoꞌheꞌ.
25 Onoꞌ miꞌi haneꞌi mogómbómongkaiꞌ ieneꞌ,
hai himpudumongkaiꞌ mopileꞌi bahangapa tauna hangko i oloꞌkiꞌ bona laoheꞌ i kómu hingkakani hai Baranaba hai Paulu to kipokaꞌahiꞌ.
26 Baranaba hai Paulu iti mohuhuꞌheꞌ katueꞌraꞌ i Pueꞌ Iesu Kerisitu duuꞌraꞌ molámbiꞌ handaꞌ kapári ánti pampopolumaoraꞌ bágóꞌ to naweꞌiheꞌ Pueꞌ Ala.
27 Mewaliꞌ,
deꞌe-deꞌe kihuoꞌmoheꞌ woꞌo Iudasiꞌ hai Silasi lao i kómu.
To rodua iti ina mopakanótóákou tunggáiána sura deꞌe.
28 Halalu-halalu,
deꞌe miꞌi pobutusi to kilámbiꞌ ánti peteteꞌna Inao to Magasaꞌ,
hai kaiꞌ tadulakomi,
kipokana woꞌo.
Kihángáꞌákou bona tiꞌarakou rapamatimi hai handaꞌ párentá to maꞌángkárá nipeuláꞌi.
Bateꞌna deꞌe peá to paraluu kipahaweꞌákou bona nipeuláꞌi,
ia miꞌi:
29 Ineeꞌkou mandeꞌ pandeꞌ to rapopenómbá i ánitu.
Ineeꞌkou mandeꞌ waheꞌ ba bauꞌ to tiꞌara rapopesuwuꞌ sieruꞌ waheꞌna.
Ineeꞌkou motoina ba motoama deleꞌ,
hai ineeꞌkou mebuálósi.
Ane nikaraohi upu-upu bábehiá iti,
gáná miꞌi.
Mewaliꞌ hangka ieneꞌ miꞌi sieruꞌ laluitangkiꞌ.
Pueꞌ mowátiꞌkou upu-upu.”
30 Karooraꞌ mepálákáná,
tauna to iba itib rapopeángkáꞌmoheꞌ lao i kótá Antiokia i tampoꞌ Siria.
Kahaweꞌraꞌ i Antiokia iti,
morámpumoheꞌ upu-upu tauna to mepoinálái i Pueꞌ Iesu bona raweꞌiheꞌ sura to raꞌánti.
31 Karoona sura iti rabásá i lindoꞌna jemaꞌa,
góeꞌheꞌ hai lindó miꞌi laluraꞌ.
32 Hangko ionoꞌ,
Iudasiꞌ hai Silasi molalaluitaheꞌ marue mopaturoꞌ halalu hampepepoináláiraꞌ hai mopakaróhó pepoináláiraꞌ,
láwiꞌ to roduaheꞌ iti iamoheꞌ nabiꞌ.
33 Bahangapa kamaruena,
toroꞌheꞌ hingkakani hai tauna i Antiokia,
hai roo onoꞌ Silasi hai Iudasiꞌ rapopeángkáꞌmoheꞌ mesuleꞌ lao i Ierusale. [
34 Agáiáná Silasi mopakanótó miꞌi bona toroꞌ oaꞌ i Antiokia.]c
35 Paulu hai Baranaba toroꞌheꞌ i Antiokia.
Hira hai handaꞌ tauna ntániꞌna mopahaweꞌ ngkóráꞌna Pueꞌ hai mopaturoꞌ tauna to ara ionoꞌ.
Polumaona Paulu moánti Ngkóráꞌ Marasa i karongkánina (15:36–18:22)
Paulu hai Baranaba mogááꞌ
36 Hangko ionoꞌ,
nauliꞌ Paulu i Baranaba,
“Maroꞌa ane mesuleꞌkeꞌ lao moweoꞌ halalu hampepepoináláintaꞌ to ara i upu-upu wánuá to tapoliui tempóntaꞌ moánti ngkóráꞌna Pueꞌ,
bona taisá noumbá katueꞌraꞌ.”
37 Baranaba mampoinao moánti Iohane to rauliꞌ woꞌo Marakusi i polumaoraꞌ iti,
38 agáiáná nauliꞌ Paulu,
“Tiꞌara maroꞌa taꞌánti,
láwiꞌ napálehikeꞌ iaꞌo i poropensi Pampilia,
hai tiꞌara tetidaꞌ i kitaꞌ duuꞌna roo bágóꞌtaꞌ.”d
39 Mewaliꞌ mosisalaꞌheꞌ Paulu hai Baranaba,
álána mogááꞌheꞌ.
Baranaba naporángá Marakusi,
hai mengkaheꞌheꞌ i duanga tahiꞌ lao i puló Sipuru.
40 Paulu mopileꞌi Silasi bona ara rángána.
Halalu hampepepoináláiraꞌ i kótá Antiokia mampopeángkáꞌheꞌ hai mampekakaeáheꞌ bona Pueꞌ Ala mokámpáiheꞌ hai mopatongawaꞌ ahiꞌNa i polumaoraꞌ.
41 Paulu hai Silasi mampoliui tampoꞌ Siria hai poropensi Kilikia,
mopakaróhó pepoináláiraꞌ toSarani to ara ionoꞌ.