Timotiu meuláꞌ i Paulu
16
Paulu mopaliliu polumaona lao i kótá Debe hai Lisitera.
I kótá Lisitera iti,
ara hadua tobaleilo to mepoinálái i Iesu.
Hangaꞌna Timotiu.
Inána Timotiu toIahudiꞌ,
hai ia woꞌo mepoinálái i Iesu.
Umána toIunani.
2 Timotiu iti rabiláꞌ upu-upu tauna to mepoinálái i kótá Lisitera hai Ikoniu.
3 Peundeꞌána Paulu bona Timotiu meuláꞌ i hia i polumaona moánti Ngkóráꞌ Marasa,
onoꞌ miꞌi haneꞌi napembiáꞌ Paulu bona Timotiu ratileꞌ sieruꞌ mouláꞌ Paturoꞌna Musa.
Tunggáiána bona ina ratarima toIahudiꞌ,
láwiꞌ upu-upu toIahudiꞌ i tampoꞌ iti moisá katoIunanina umána Timotiu iti.
4 Karoona Timotiu ratileꞌ,
Paulu,
Silasi hai Timotiu pohuꞌ hangko ionoꞌ.
I upu-upu wánuá to rapoliui,
mopahaweꞌheꞌ oaꞌ i toSarani pobutusiraꞌ surona Pueꞌ Iesu hai tadulako-tadulako ntániꞌna i Ierusale,a
hai mopaturoꞌheꞌ bona áturá to rapakanótó miꞌi rapeuláꞌi.
5 Onoꞌ miꞌi haneꞌi kamaróhó-róhóá pepoináláiraꞌ toSarani hai kahandaꞌ-handaꞌáheꞌ tauna to mepoinálái i Pueꞌ Iesu.
Paulu moita pampetudeꞌá i kótá Teroasi
6 Inao to Magasaꞌ tiꞌara mopaliuheꞌ Paulu hai Silasi mopahaweꞌ ngkóráꞌna Pueꞌ Ala i poropensi Asia,b
onoꞌ miꞌi haneꞌi tebáliki tunggáiáraꞌ,
hai laoheꞌ mampoliui roboꞌ Perigia to ara i tampoꞌ Galatia.
7 Kahaweꞌraꞌ i parailiꞌna roboꞌ Misia,
ina liliuheꞌ lao i poropensi Bitinia,
agáiáná Inao to Magasaꞌ to hangko i Pueꞌ Iesu mokóntó wopaheꞌ bona ineeꞌheꞌ lao ionoꞌ.
8 Onoꞌ miꞌi haneꞌi moliuheꞌ i roboꞌ Misia hai mendáuluheꞌ lao i kótá Teroasi to i wiwi tahiꞌ.
9 Tangaꞌ káindi,
Paulu moita pampetudeꞌá.
Naita hadua tobaleilo to hangko i tampoꞌ Makedoniac meángkáꞌ i lindoꞌna,
nauliꞌ,
“Maimokou i Makedonia.
Kipembiáꞌ bona nitulungiangkaiꞌ!”
10 Karoona moita pampetudeꞌá iti,
Paulu,
hingkakani hai Timotiu,
Silasi hai kódóꞌ Lukasi,
mangkádipuráꞌangkaiꞌd hai hawiáꞌangkaiꞌ lao i tampoꞌ Makedonia,
láwiꞌ tongawaꞌ miꞌi kanahuoꞌkiꞌ Pueꞌ Ala moánti Ngkóráꞌ Marasa i tauna to araheꞌ ionoꞌ.
Paulu i kótá Pilipi, Lidia mepoinálái i Iesu
11 I kapohuꞌkiꞌ hangko i kótá Teroasi,
mengkaheꞌangkaiꞌ i duanga tahiꞌ liliu lao i puló Samorake,
hai kahalona laoangkaiꞌ i kótá Neapoli.
12 Roo onoꞌ,
mendáuluangkaiꞌ hangko i duanga tahiꞌ,
hai molumaoangkaiꞌ lao i kótá Pilipi.
Kótá Pilipi iti ia miꞌi hambuaꞌ kótá to tekahangaꞌiá i tampoꞌ Makedonia,
to nakatoroꞌi toRoma.
Toroꞌangkaiꞌ i kótá iti bahangapai alona kamaruena.
13 I alo penómbáꞌáraꞌ toIahudiꞌ,
laoangkaiꞌ i wiwi uwai i rawa kótá,
láwiꞌ kipekiri hangaa-ngaa ara pekakaeáraꞌ toIahudiꞌ hungkuꞌ i babaꞌá kótá.
Araheꞌ bahangapa towawine to hirámpu ionoꞌ,
onoꞌ miꞌi haneꞌi mehodaꞌangkaiꞌ molaluita hai hira.
14 I oloꞌraꞌ ara hadua towawine to rahangaꞌ Lidia hangko i kótá Tiatira.
Lidia iti,
topobaluꞌ-baluꞌ báná to makámumu to masuliꞌ hólóna,
hai ia mengkoruꞌ i Pueꞌ Ala.e
Pueꞌ Ala mobungkáhi pekirina,
álána natarima apa to napaturoꞌá Paulu.
15 Roo onoꞌ,
Lidia hai upu-upu tauna to toroꞌ i támbina,
rariumoheꞌ.
Roomoheꞌ rariu,
napembiáꞌ ntepuꞌu Lidia bona laoangkaiꞌ toroꞌ i támbina,
nauliꞌ,
“Láwiꞌ niꞌisá miꞌi kódóꞌ tauna to mepoináláimoꞌ i Pueꞌ Iesu,
laomokeꞌ i támbingkuꞌ.”
Onoꞌ miꞌi haneꞌi lao mpuꞌuangkaiꞌ i támbina.
Paulu hai Silasi ratarungku i Pilipi
16 Hangkani tempó,
kalaongkiꞌ i pekakaeáraꞌ toIahudiꞌ,
mohidupaꞌangkaiꞌ hai hadua towawine to hawiꞌ tueꞌna.
Towawine iti paka napesuaꞌi tokadake,
hai ánti kuasaꞌna tokadake iti,
ia peisá mopahaweꞌ apa to ina mewaliꞌ.
Onoꞌ miꞌi haneꞌi pueꞌna molámbiꞌheꞌ handaꞌ dóiꞌ.
17 I polumaongkiꞌ hai Paulu,
towawine iti meuláꞌ oaꞌ i kaiꞌ hai monganga-nganga oaꞌ napasimbuku,
nauliꞌ,
“Taunaheꞌ deꞌe huoꞌánaheꞌ Pueꞌ Ala to i Surugáꞌ!
Maiheꞌ mopahaweꞌákou rárá katehómpóꞌ.”
18 Bahangapa miꞌi alona,
onoꞌ peá oaꞌ laluitana,
haneꞌi kahópóꞌána luleꞌ miꞌi Paulu mampehádingi.
Mewaliꞌ,
mehaileꞌ miꞌi Paulu,
nauliꞌ i tokadake to mampesuaꞌi towawine iti,
“I lalu hangaꞌna Iesu Kerisitu,
pesuwuꞌ hangko i hia!”
Kásáliu mesuwuꞌ mpuꞌu miꞌi tokadake iti.
19 Karaisána pueꞌna hawiꞌ iti tiꞌarapoheꞌ peisá molámbiꞌ dóiꞌ moliu hawiꞌraꞌ iti,
mabukoꞌ ntepuꞌuheꞌ.
Onoꞌ haneꞌi laomoheꞌ mohakaꞌ Paulu hai Silasi,
radiiꞌ lao i tangaꞌ kótá i lindoꞌraꞌ topopárentá.
20 Kahaweꞌraꞌ i lindoꞌraꞌ topopárentá iti,
rauliꞌ,
“Taunaheꞌ deꞌe toIahudiꞌ to maiheꞌ mopawuli tauna i kótántaꞌ.f
21 Mepaturoꞌheꞌ mokana ádá to mosisalaꞌ hai ádántaꞌ.
Kitaꞌ toRoma,
tiꞌarakeꞌ peisá motarima ba mampeuláꞌi paturoꞌraꞌ.”
22 Tauna to handaꞌ meuláꞌheꞌ woꞌo mesalaꞌi,
onoꞌ miꞌi haneꞌi topopárentá i kótá iti mohuoꞌheꞌ surudadoꞌraꞌ bona waruꞌraꞌ Paulu hai Silasi ralosui hai rabóbáꞌheꞌ.
23 Handaꞌ miꞌi kániraꞌ rabóbáꞌ,
hai roo onoꞌ ratarungkuheꞌ.
Kapalaꞌ tarungku rapohawaꞌá bona Paulu hai Silasi rakámpái ntepuꞌu.
24 Ánti párentáraꞌ iti,
kapalaꞌ tarungku mampopesuaꞌheꞌ i lintuꞌ to i tangaꞌ-tangaꞌ ntepuꞌu,
hai bitiraꞌ rombali rahangkalaꞌ i kau.g
25 Tangaꞌ káindi,
Paulu hai Silasi mekakaeheꞌ hai monani-naniheꞌ motóiá Pueꞌ Ala.
Tauna ntániꞌna to ratarungku ionoꞌ mampehádingiheꞌ woꞌo naniraꞌ.
26 Hangkaꞌ-hangkaꞌ perái,
mewaliꞌ linu to rumihi álána watu pehodaꞌána petarungkuá moduá-duá.
I tempó onoꞌ woꞌo,
tebungkáhi miꞌi upu-upu babaꞌ,
hai rante to ratimpukuáheꞌ upu-upu tauna to ratarungku tekábáhá.
27 Kásáliu kapalaꞌ tarungku mearó,
hai moita katebungkáhina miꞌi upu-upu babaꞌ.
Nabutuꞌ miꞌi pihoꞌna ina menoꞌo,
láwiꞌ napekiri upu-upu tauna to ratarungku melangkamoheꞌ.h
28 Agáiáná Paulu mekióꞌ napasimbuku hangko i lalu tarungku,
nauliꞌ,
“Ineeꞌkoꞌ menoꞌo!
Upu-upungkiꞌ ara maniangkaiꞌ ieneꞌ!”
29 Hangko ionoꞌ,
kapalaꞌ tarungku iti membiáꞌ huluꞌ haneꞌi nagagu mesuaꞌ i lalu tarungku.
Ia moridiꞌ ánti kamalááꞌna hai lao molingkudu motóngkóꞌ i bitiraꞌ Paulu hai Silasi,
30 haneꞌiheꞌ naꞌánti lao i rawa,
nahángáꞌáheꞌ,
“Tuá,
apa miꞌi wongkódóꞌá to ina kubábehi bona tehómpókiaꞌ hangko i huku dósángkuꞌ?”
31 Rahániki Paulu hai Silasi,
rauliꞌ,
“Mepoináláimokoꞌ i Pueꞌ Iesu,
bona molámbiꞌkoꞌ katehómpóꞌ,
io hai upu-upu tauna to toroꞌ i támbimu.”
32 Hangko ionoꞌ,
Paulu hai Silasi mopahaweꞌheꞌ ngkóráꞌna Pueꞌ i kapalaꞌ tarungku,
hai i upu-upu tauna to toroꞌ i támbina.
33 Mewaliꞌ,
i wengi iti kapalaꞌ tarungku mobahoꞌi to beláraꞌ.
Hai i wengi iti woꞌo,
ia hai upu-upu tauna to i támbina mepoinálái haneꞌiheꞌ rariu.
34 Roo onoꞌ,
kapalaꞌ tarungku iti moántiheꞌ Paulu hai Silasi lao i támbina hai napaꞌandeꞌheꞌ.
Góeꞌ ntepuꞌuheꞌ hantámbi iti,
láwiꞌ mepoináláimoheꞌ i Pueꞌ Ala.
35 Kahalona mepulo,
topopárentá toRoma mohuoꞌ surudadoꞌraꞌ lao i tarungku mohángáꞌá kapalaꞌ tarungku,
“Nukábáhámoheꞌ tauna to rodua to rahakaꞌ iamáindi.”
36 Kanahádina kapalaꞌ tarungku hawaꞌ iti,
nauliꞌ i Paulu hai Silasi,
“Ara hawaꞌ hangko i topopárentá to mohángáꞌáꞌaꞌ bona kukábáhámokou.
Mewaliꞌ peisámokou pohuꞌ,
hai maroꞌa-roꞌakou.”
37 Agáiáná nauliꞌ Paulu i surudadoꞌ iti,
“Hangko tiꞌara mani rahoda-hoda kárá-kárángkiꞌ,
rapapaháimongkaiꞌ i lindoꞌraꞌ tauna to handaꞌ hai ratarungkuangkaiꞌ!
Agáiáná tiꞌara hintotoꞌ láwiꞌ kaiꞌ deꞌe toRomaꞌangkaiꞌ.i
Hai deꞌe-deꞌe rapoinaoangkaiꞌ rakábáhá ngkániiꞌ-niiꞌ!
Tiꞌara kipokana!
Nipahaweꞌáheꞌ,
hira riꞌi to hangaa-ngaa maiangkaiꞌ mokábáhá.”
38 Mesuleꞌmoheꞌ surudadoꞌ iti moánti tewáina Paulu i topopárentá.
Karahádina topopárentá katoRomaraꞌ Paulu hai Silasi iti,
malááꞌheꞌ.
39 Mewaliꞌ laoheꞌ membiáꞌ ámpu i Paulu hai Silasi,
hai rawawaheꞌ lao i rawa tarungku.
Rapembiáꞌ bona pohuꞌheꞌ hangko i kótá iti.
40 Mewaliꞌ,
pohuꞌ mpuꞌumoheꞌ Paulu hai Silasi hangko i tarungku iti,
laoheꞌ sieruꞌ i támbina Lidia.
Ionoꞌ,
mampombelámbiꞌámoheꞌ halalu hampepepoináláiraꞌ,
hai mopakaróhóheꞌ laluraꞌ.
Roo onoꞌ,
pohuꞌheꞌ mopálehi kótá Pilipi.