Iunu mampeuláꞌi hawaꞌna Pueꞌ Ala
3
Karongkánina PUEꞌ molaluita i Iunu,
2 Nauliꞌ,
“Laomokoꞌ i kótá Niniwe,
kótá to mahile iti,
hai nupahaweꞌámoheꞌ apa to Kuhángáꞌámokoꞌ.”
3 Hangkani deꞌe Iunu mampeuláꞌi miꞌi hawaꞌna PUEꞌ haneꞌi lao i Niniwe,a
kótá to mahile ntepuꞌu.
Ane ratolelingiꞌi,
tálu alona rapolumaoi.
4 Iunu mesuaꞌ i lalu kótá iti.
Hangaloá nalumaohi hangko natepuꞌu riꞌi molaluita,
nauliꞌ napasimbuku,
“Iba rái puloꞌna alona,
Niniwe deꞌe ina magero!”
5 ToNiniwe iti mampoináláiheꞌ laluitana Pueꞌ iti,
onoꞌ miꞌi haneꞌi upu-upu tauna himpudu bona mopuasaꞌheꞌ,
maroꞌa tosae,
maroꞌa ánángkóiꞌ.
Mopakeꞌheꞌ waruꞌ to rabábehi hangko i karuꞌ bona mopatongawaꞌheꞌ kamampenosoꞌiraꞌ dósáraꞌ.
6 Kanahádina datu Niniwe bámbári iti,
ia mendáulu hangko i pehodaꞌá kadatuána hai ia woꞌo molosu waruꞌ kadatuána,
mopakeꞌ waruꞌ karuꞌ haneꞌi mehoda i awu.
7 Ia woꞌo mopaꞌara hawaꞌ to rahawaka i humalele Niniwe,
mampoliui pobutusiraꞌ datu hai upu-upu tauna to mapángkáꞌ lántiꞌraꞌ.
Hawaꞌ iti node:
“Upu-upu tauna tiꞌara peisá mandeꞌ hai mainu,
noꞌonoꞌ woꞌo gapiꞌ,
dimbá hai binataꞌ to ntániꞌna to rapiaraꞌ.
8 Upu-upu tauna hangaa-ngaa mewaruꞌheꞌ karuꞌ.
Noꞌonoꞌ woꞌo upu-upu binataꞌ hangaa-ngaa rakómókiheꞌ hai karuꞌ,
tandaꞌ penosoꞌraꞌ upu-upu tauna.
Hai hangaa-ngaa mekakaeheꞌ i Pueꞌ Ala hangko i laluraꞌ ntepuꞌu.
Hira woꞌo hangaa-ngaa mobálikiheꞌ bábehiáraꞌ to kadake hai bábehiá to bukeꞌ dósá.
9 Babilaꞌ PUEꞌ ina mobáliki tunggáiáNa hai tiꞌara piꞌi ina mabukoꞌ,
haneꞌi tiꞌarakeꞌ ina marugiꞌ.”
10 Kanaitána Pueꞌ Ala toꞌu-toꞌu mokábáhá mpuꞌumoheꞌ bábehiáraꞌ to kadake,
onoꞌ miꞌi haneꞌi tiꞌara piꞌi Napopewaliꞌ poliwoNa ina mohukuheꞌ.