Iunu 2

Pekakaena Iunu

Hangko i lalu taꞌi bauꞌ Iunu mekakae i PUEꞌ Alana, nauliꞌ:

2 “Ó PUEꞌ,

i lalu kamapáringkuꞌ mekakaeaꞌ i Hio,

hai Nuhánikiaꞌ.

Hangko i duniáꞌ tomate, membiáꞌaꞌ tulungi.

Pembiáꞌkuꞌ Nupehádingi hai Nupailalu.

3 Nutibemoꞌ i tahiꞌ to kaladu,

haweꞌ i pohiꞌna tahiꞌ.

Ionoꞌ uwai motolelingiaꞌ,

hai bálumbá to mahile to Nuhuoꞌ, mowasóengaꞌaꞌ.

4 Kuꞌuliꞌ i lalungkuꞌ:

‘Nawuramoꞌ PUEꞌ hangko i lindoꞌNa.

Tiꞌara piꞌi ina kuita támbiNa to magasaꞌ.’

5 Uwai tahiꞌ mempusaꞌ i ngángángkuꞌ.

Uwai tahiꞌ motolelingi wátángkuꞌ.

Lómóꞌ tahiꞌ mowewehi wuáꞌkuꞌ.

6-7 Tiriaꞌ haweꞌ i lokeꞌna buluꞌ to i lalu tahiꞌ,

i kaꞌaraꞌá to teparauꞌ babaꞌna haweꞌ i kahópóꞌána duniáꞌ.

Hungkuaꞌ ina mate.

KubuhinaoKoꞌ hai mekakaeaꞌ i Hio.

Haweꞌ mpuꞌu miꞌi pekakaengkuꞌ i Hio.

Hangko i támbiMu to magasaꞌ, Nupehádingiaꞌ,

haneꞌi Nuángkáꞌaꞌ hangko i lalu tahiꞌ,

Ó PUEꞌ Alangkuꞌ.

8 Tauna to menómbáheꞌ i ánitu to mbero-mbero,

mopálehimoKoꞌ hai tiꞌarapoheꞌ tetidaꞌ.

9 Agáiáná kódóꞌ ina monanikaꞌaꞌ nani petóiá i lindoꞌMu,

hai ina mampopenómbáꞌaꞌ popenómbá i Hio.

Upu-upu dándingkuꞌ ina kubukeki,

láwiꞌ Io miꞌi PUEꞌkuꞌ to mampelaeaꞌ.”

10 Hangko ionoꞌ, ánti popakanótóna PUEꞌ, bauꞌ mobólá Iunu i kámárá.